The Latest

وحدت نیوز (اسلام آباد) مجلس وحدت مسلمین پاکستان کی مرکزی کابینہ اور بین الصوبائی سیکریٹریز کا مشترکہ اجلاس مرکزی سیکریٹریٹ میں مرکزی ڈپٹی سیکریٹری جنرل علامہ سید احمد اقبال رضوی اور سیدناصرعباس شیرازی کی زیر صدارت منعقد ہوا، جس میں تمام اراکین مرکزی کابینہ ، چاروں صوبوں ،جنوبی پنجاب او ر ریاست آزادکشمیر کے صوبائی سیکریٹریز نے شرکت کی، اجلاس میں متفقہ طورپر فیصلہ کیا گیا کہ علامہ راجہ ناصرعباس جعفری کی انصاف کے حصول کے لئے جاری بھوک ہڑتال کے مطالبات اور مقاصدکو احتجاجی تحریک کی صورت میں آگے بڑھایاجائے گا، ملک بھرکے علمائے کرام، ذاکرین عظام، ملی تنظیموں، شخصیات ، آئمہ جمعہ والجماعت سے علاقائی سطح پر مضبوط روابط کے ذریعے احتجاجی تحریک  کی منظم شکل دی  جائے گی،ملک بھر میں بفرمان امام خمینی ؒ عالمی یوم القدس کے اجتماعات کا انعقادکیا جائے گا، 8شوال المعظم یوم انہدام جنت البقیع پر ملک گیر یوم احتجاج منایاجائے گا، 17جولائی کو ملک بھرمیں مجلس وحدت مسلمین شعبہ خواتین کے تحت علامہ راجہ ناصرعباس جعفری کی بھوک ہڑتالی تحریک سے اظہار یکجہتی کے لئے یوم احتجاج منایا جائے گا، 22جولائی کو انصاف کے حصول اور 10نکاتی چارٹرآف ڈیمانڈ پر حکومتی بے حسی کے خلاف علامتی طور پر ملک گیر اہم شاہراہیں بلاک کی جائیں گی جبکہ 7اگست کو سالار شہدائے پاکستان قائد ملت اسلامیہ شہید قائد حضرت علامہ سید عارف حسین الحسینیؒ کی اٹھائیسویں برسی کا عظیم الشان مرکزی ملک گیر اجتماع او رقائد وحدت علامہ راجہ ناصرعباس جعفری سے یوم تجدید عہد  اسلام آباد میں منعقد کیا جائے گا۔

وحدت نیوز(اسلام آباد) مجلس وحدت مسلمین کے مرکزی سیکریٹری جنرل علامہ راجہ ناصرعباس جعفری کا شہید میجر علی جواد چنگیزی کے بھائی میجرعلی قاسم سے ٹیلیفونک رابطہ ، طورخم بارڈرپر افغان فورسز کے حملے میں شہید ہونے والے ان کے بھائی میجر علی جواد کی عظیم قربانی پر خراج تحسین اور اظہار تعزیت، تفصیلات کے مطابق ایم ڈبلیوایم کے سربراہ علامہ راجہ ناصرعباس جعفری نےچند روز قبل طورخم بارڈرپر افغان فورسز کے حملے میں پہلے زخمی اور کل جام شہادت نوش کرجانے والے پاک فوج کے میجر علی جواد چنگیزی کے بھائی میجر علی قاسم کو ٹیلی فون کررکے  کہا ہے  کہ دکھ کی اس گھڑی میں ہم آپ کے ساتھ ہیں، خدا اپکے اہل خانہ کی جانب سے وطن عزیز کے استقلال اور استحکام کی راہ میں پیش کی جانے والی اس عظیم قربانی کو اپنی بارگاہ میں قبول فرمائے اور شہید کو جوار شہدائے کربلاؑمیں جگہ عنایت فرمائے ، علامہ راجہ ناصرعباس جعفری نے میجر علی قاسم سے کہا کہ اسی ہزار بے گناہ مقتول  پاکستانیوں کی خاطر ایک ماہ سے ذیادہ عرصہ گذرجانے کے باوجود بھوک ہڑتال ہوں انشاءاللہ  بھوک ہڑتال کیمپ کے مقاصد پورے ہونے کے بعد آپ کے پاس  حاضر ہو کر قوم کے اس عظیم  سپوت کی شہادت پر تعزیت پیش کرونگا ۔

وحدت نیوز(کراچی ) مجلس وحدت مسلمین پاکستان کے مرکزی سیکرٹری جنرل حجتہ الاسلام والمسلمین علامہ راجہ ناصرعباس جعفری نے ملکیۃ العرب،محسنہ اسلام ،ام المومنین حضرت خدیجہ سلام اللہ علیہا کے یوم وفات کی مناسبت سے مرکزی میڈیا سیل سے جاری اپنے ایک تعزیتی پیغام میں کہاہے کہ ام المومنین حضرت خدیجہ کی ساری زندگی دین اسلام کے لیے لاتعداد قربانیوں سے رقم ہے۔آپ کو عرب کی امیر ترین خاتون ہونے کا شرف حاصل تھا اسی وجہ سے ملیکۃ العرب پکارا جاتا۔آپ نے اپنی ساری دولت اسلام کی راہ میں خرچ کی اور زندگی کا طویل عرصہ شعب ابی طالب میں محصور رہ کر بسر کیا۔انہوں نے دین حکم رسول اللہ کی پیروی میں ثابت قدمی اور استقامت کی جو مثال قائم کی وہ ہمارے لیے مشعل راہ ہے۔حق کی سربلندی کے لیے راستے کی رکاوٹوں کا ڈٹ کر مقابلہ کرنا ہمیں سیرت ام المومنین سے ملتا ہے۔انہوں نے کہا کہ شجر اسلام کی آبیاری نسل خدیجہ سلام اللہ کے خون سے ہوئی۔دین اسلام کی سربلندی کے لیے اہل بیت اطہار علیہم السلام نے جو قربانیاں دیں وہ تاریخ میں نہیں ملتیں۔ آپ حضور اکرم ﷺ کی وہ رفیقہ حیات تھیں جن کی رحلت نے رسو ل اکرام کو اس قدر غمگین کیا کہ انہوں نے اس سال کو ’’عام الحزن‘‘ یعنی غم کا سال قرار دیا۔

وحدت نیوز (کراچی) مجلس وحدت مسلمین پاکستان کے مرکزی ترجمان علامہ مختار امامی نے وحدت میڈیا سیل سے جاری اپنے بیان میں متحدہ علما محاذ کے مرکزی رہنما و آل پاکستان شیعہ ایکشن کمیٹی کے سربراہ علامہ مرزا یوسف حسین اور معروف مذہبی شخصیت سید صغیر عابد رضوی سے سرکاری سیکورٹی واپس لینے پر شدید ردعمل کا اظہار کرتے ہوئے کہا ہے کہ سندھ حکومت میں موجود کچھ شرپسند عناصر صوبے کے حالات خراب کرنے کا تہیہ کئے ہوئے ہیں۔ اس وقت ملک بھر میں فعال مذہبی شخصیات ہٹ لسٹ پر ہیں۔ ملت تشیع کے چیدہ چیدہ افراد کو ٹارگٹ کلنگ کا نشانہ بنایا جا رہا ہے۔ ایسے کڑے اور نازک وقت میں سندھ انتظامیہ کا یہ غیر ذمہ دارانہ اقدام پیپلز پارٹی کی حکومت کے خلاف نفرت میں اضافے کا سبب بنے گا۔ انہوں نے کہا کہ ایک طرف کالعدم جماعتوں کے رہنما کو حکومت نہ صرف غیر معمولی سیکورٹی مہیا کر رکھی ہے بلکہ انہیں اپنے جلسوں کے ذریعے نفرت اور تعصب پھیلانے کی بھی کھلی آزادی حاصل ہے جب کہ دوسری طرف ملت تشیع کے ان محب وطن افراد کی زندگیوں کے لیے خطرات پیدا کیے جا رہے ہیں۔ انہوں نے کہا کہ متعصب انتظامیہ نے ہمارے ان مذہبی رہنماوں کے خلاف ایف آئی آر کا اندراج بھی کیا ہے۔ یہ دونوں مذہبی شخصیات گزشتہ ایک ماہ سے شہر میں موجود نہیں پھر ان پر کسی واقعہ میں ملوث ہونے کا الزام کیسے لگایا جا سکتا ہے۔ علامہ مختار امامی نے سندھ کے وزیر اعلی اور آئی جی سے مطالبہ کیا ہے کہ ان رہنماوں کی سرکاری سیکورٹی فوری طور پر بحال کی جائے بصورت دیگر کسی بھی ناخوشگوار واقعہ کی تمام تر ذمہ داری سندھ حکومت اورمتعقلہ انتظامیہ پر عائد ہوگی۔

وحدت نیوز(لاہور) سربراہ مجلس وحدت مسلمین علامہ راجہ ناصر عباس جعفری کا سیکریٹری سیاسیات لاہور سید حسین زیدی کو ٹیلی فون کامیاب احتجاجی کیمپ کو ایک ماہ مکمل ہونے پر خراج تحسین سید حسین زیدی نے قائد وحدت کی ا ستقامت کو سلام پیش کرتے ہوئے کہا کہ زندہ دلان لاہور اپنے محبوب قائد اور سالار وحدت کے ہر حکم پر لبیک کہتے ہیں اور اس مشن کار زینبی میں ہر قسم کی قربانی کے لئے تیار ہیں علامہ راجہ ناصر نے سید حسین زیدی کو خراج تحسین پیش کرتے ہوئے کہا کہ مجھے آپ اور لاہور کے عزیز کارکنوں پر فخر ہے جو ایک ماہ سے اس ظالم اور بے حس حکمرانوں کیخلاف میدان عمل میں حاضر ہیں اور انشاءاللہ وہ دن دور نہیں جب ہم اپنے حقوق ان ظالموں سے لے کر رہیں گے خدا ہمارا حامی و ناصر ہوں۔

وحدت نیوز (مشہد مقدس) شیعہ نسل کشی ہر ریاستی اداروں کی مجرمانہ خاموشی اورانصاف کے حصول کے لئے تینتیس روز سے اسلام آباد میں جاری مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری کی بھوک ہڑتال کے حوالے سے نمائندہ ولی فقیہ اورامام جمعہ والجماعت مشہد مقدس آیت اللہ سید احمد علم الہدیٰ نے اپنا ایک خصوصی پیغام جاری کیا ہے جو کہ درج ذیل ہے ۔

انا الله و انا الیه راجعون

پاکستانی مظلوم شیعہ  اپنی جانوں کا نذرانہ پیش کرتے ہوئے اپنے مظلوم آئمہ اطہار کی سیرت پر چلتے ہوئے ایک نمایاں تحریک کی صورت میں تاریخ رقم کرہے ہیں.پچھلے کئی برسوں سے پاکستانی عزیز قوم کا ظالمانہ قتل عام حکومت کی طرف سے نظر انداز کیا جارہا ہے. یہ حکومت کا انداز اس بات کا ثبوت ہے کہ حکومت پاکستان اور عالمی دھشت گردی کے مقاصد ایک ہیں.حال ہی میں ولادت با سعادت امام حسین ع کے موقع پر پاراچنار میں سیکیورٹی فورسز کے ہاتھوں ہونے والے حادثے نے اس حقیقت سے  مزید پردے ہٹائے کہ امریکیوں اور سعودیوں کے دہشت گرد ایجنٹ کس انداز سے پاکستانی سیکیورٹی اور عسکری اداروں میں سرایت کر چکے ہیں.حجت الاسلام والمسلمین جعفری (راجہ ناصر عباس جعفری) کی انصاف حاصل کرنے کے لئے دلیرانہ مقاومت اور استقامت قابل تعریف ہے، میں ان کے لیے اور ان کی قیمتی ثابت قدمی کے لیے اس پاک مقام حرم امام رضا ع میں دعا گو ہوں۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کی بھوک ہڑتال34 ویں روز میں داخل ہو چکی ہے۔گزشتہ روزآنے والی تیز طوفانی آندھی سے احتجاجی کیمپ مکمل طور پر اکھڑ گیا ۔اس کے باوجود علامہ ناصر عباس ،علامہ حسن ظفر نقوی اور ایم ڈبلیو ایم کے دیگر رہنما اور کارکن اپنی جگہ پر موجود رہے۔مرکزی قیادت نے کارکنوں سے خطاب کرتے ہوئے واضح کیا کہ بھوک ہڑتال اور لانگ مارچ کوئی سیاسی مقصد نہیں۔ ہم کسی حکومت یا وزیر کو گرانے کے ارادے سے یہاں نہیں بیٹھے بلکہ ہمارا مقصد اپنی قوم پر ہونے والے مظالم اور وطن عزیز کی سالمیت و بقا کے لیے ہونے والی سازشوں کے خلاف آواز بلند کرنا ہے ۔حکومت جس دن بھی مطالبات پر عمل درآمد کے لیے مذاکرات کی میز پر آ گئی ہم نے اسی روز یہاں سے اٹھ جانا ہے۔علامہ ناصر عباس نے ملک بھر میں ایم ڈبلیو ایم کے تمام ضلعی و صوبائی دفاتر کو لانگ مارچ کے حوالے سے تیاریاں تیز کرنے کی ہدایات جاری کر دیں ہیں۔انہوں نے کہا ہے کہ حکومت ہماری مشکلات سے دانستہ طور پر انجان بنی بیٹھی ہے۔ہماری یہ کوشش ہے کہ ہمارے مطالبات پر امن انداز میں تسلیم کر لیے جائیں لیکن حکومت قومی اداروں اور عوام کو آپس میں الجھاناچاہتی ہے۔تصادم کی راہ ہمارا شعار نہیں۔ ہم پرامن جدوجہد کے قائل ہیں اور آخر دم تک آئینی و قانونی حق کا استعمال کرتے رہیں گے۔ نیشنل ایکشن پلان کا استعمال ملک بھر میں بالعموم اور پنجاب میں بالخصوص ملت تشیع کو دبانے کے لیے کیا جا رہا ہے۔پارہ چنار اور گلگت بلتستان میں ہمارے لوگوں کو ان کی ذاتی جائیدادوں سے بے دخل کیا جا رہا ہے۔ملت تشیع کو ٹارگٹ کنلگ اور ریاستی مظالم کا سامنا ہے۔پوری قوم ملک کر اس حکومتی بربریت کے خلاف آواز بلند کرے گی۔عید کے فورا بعد لانگ مارچ کی تاریخ کا اعلان کیا جائے گا۔ انہوں نے تمام ضلعی و صوبائی کابینہ کو کہا ہے کہ وہ اپنے اپنے علاقوں میں تنظیمی سرگرمیوں کو مزید فعال کریں تا کہ ہر گلی کوچے کے لوگ اس بھوک ہرتال کے اسباب سے آگاہ ہوں۔ہماری قومی طاقت کے سامنے موجودہ حکومت کو بالآخر گھٹنے ٹیکنے پڑیں گے۔ نون لیگ جس مغالطے میں مبتلا ہے وہ اس کو ڈبو کر رکھ دے گا۔ موجودہ حکومت زمینی حقائق کو مدنظر رکھنے کی بجائے حاشیہ برداروں کی آرا پر عمل کر رہی ہے ۔انہوں نے کہا کہ مجلس وحدت مسلمین ایک ملک گیر مذہبی و سیاسی جماعت ہے۔ حکومت کی طرف سے شیعہ جماعت کے ساتھ یہ متعصبانہ رویہ نون لیگ کی سیاسی حیثیت کو خاک میں ملا کر رکھ دے گا۔

وحدت نیوز (لاہور) شاہ پور کانجراں لاہور میں صاحبزادہ معاذ المصطفیٰ قادری کی رہائش گاہ پر افطار ڈنر سے خطاب کرتے ہوئے سُنّی اتحاد کونسل پاکستان کے چیئرمین صاحبزادہ حامد رضا نے کہا ہے کہ کرپٹ سیاسی نظام کو آخری دھکا دینے کا وقت آ گیا ہے، عید کے بعد ناکام اور نااہل حکومت کیخلاف دما دم مست قلندر ہو گا، شیعہ سنی تصادم کی سازش کامیاب نہیں ہونے دیں گے، پنجاب بجٹ مایوس کن اور غریب دشمن ہے، واشنگٹن اور دہلی پاکستان دشمنی میں متحد ہو چکے ہیں، وقت آگیا ہے کہ پاکستان امریکہ کیخلاف دو ٹوک مؤقف اپنائے، افغان باڈر پر اپنی حدود میں گیٹ لگانا پاکستان کا قانونی حق ہے۔ صاحبزادہ حامد رضا نے مزید کہا کہ حکومت نے وزارت خارجہ کو 2 بابوں کے حوالے کر رکھا ہے جو ہر وقت آپس میں لڑتے رہتے ہیں، مستقل وزیر خارجہ کی عدم تقرر سے حکومت کی غیر سنجیدگی ظاہر ہو رہی ہے، امریکہ میں فائرنگ کے واقعہ سے یورپ اور امریکہ میں مقیم مسلمانوں کے مسائل میں اضافہ ہو گا۔ صاحبزادہ حامد رضا نے کہا کہ شام اور عراق میں اہل بیت اور صحابہ کے مزارات کی بیحرمتی کرنے والے خوارج ہیں، نواسی رسول سیدہ زینبؑ کے مزار کی بیحرمتی نا قابل برداشت ہے، ہمارے حکمران دولت کے پجاری اور اقتدار کے بھوکے ہیں، حکمران اشرافیہ کو عوامی مسائل سے کوئی دلچسپی نہیں۔ چیئرمین سنی اتحاد کونسل نے کہا کہ قومی مفاد کے تابع نئی خارجہ پالیسی بنانے کی ضرورت ہے، نظام زر و ظلم آخری سانسیں لے رہا ہے، غریب اور محروم طبقات اپنے حق کیلئے عید کے بعد سڑکوں پر نکلیں گے، حکومت نے 3 سالوں میں عوام کا کوئی مسئلہ حل نہیں کیا، انتخابی وعدے پورے نہ کرنے والوں کو اقتدار میں رہنے کا کوئی حق نہیں۔

وحدت نیوز (اسلام آباد) مجلس وحدت مسلمین کے اعلیٰ اختیاراتی ادارے شوریٰ عالی نے علامہ ناصر عباس جعفری کی بھوک ہڑتال اور لانگ مارچ تحریک کے فیصلے کی متفقہ طور پر توثیق کر دی ہے اور مرکزی کابینہ کو لانگ مارچ کی جزیات طے کرنے کا اختیار دیدیا ہے۔ علامہ شیخ حسن صلاح الدین کی زیرصدارت ایم ڈبلیو ایم کی شوریٰ عالی کا اجلاس مرکزی دفتر اسلام آباد میں ہوا جس میں علامہ ناصر عباس جعفری کی مظلوموں کے حق میں کی جانے والی بھوک ہڑتال اور حکومت کو مذاکرات کی ٹیبل پر لانے کیلئے لانگ مارچ کے اقدام کی توثیق کی گئی۔ اجلاس میں علامہ سید حسن ظفرنقوی، علامہ ناصر عباس جعفری، ناصر عباس شیرازی، علامہ ہاشم موسوی، علامہ جواد ہادی، نثار عابدی، آغا رضا، علی رضا بھٹی، مرکزی صدر آئی ایس او سمیت دیگر شوریٰ عالی کے ارکان نے شرکت کی۔ اجلاس میں شوریٰ عالی نے علامہ ناصر عباس کی گرتی ہوئی صحت پر تحفظات کا اظہار کیا اور کہا کہ علامہ ناصر عباس کی صحت کے حوالے سے کچھ بھی ہوا تو اس کی ذمہ دار مرکزی حکومت ہوگی۔ حکومت کو چاہیئے کہ وہ مظلوموں کے آئینی و قانونی مطالباب کو تسلیم کرے۔ شوریٰ عالی نے کہا کہ ایسے اقدامات کیے جائیں جن سے حکومت مذاکرات کی ٹیبل پر آئے اور مطالبات پر عملدرآمد شروع ہو۔ یہ تحریک مظلوموں کی تحریک ہے جسے کامیابی سے ہمکنار کرانا ہم سب کی ذمہ داری ہے۔

وحدت نیوز (اسلام آباد) مجلس وحدت مسلمین کے مرکزی سیکریٹری جنرل علامہ راجہ ناصر عباس جعفری نے اسلام آباد میں ہونے والے شوری عالی کے اہم اجلاس میں مولانا حسن ظفر نقوی اور برادر ناصر عباس شیرازی کو مجلس وحدت مسلمین کا مرکزی ڈپٹی سیکریٹری جنرل نامزد کردیا ہے جبکہ مولانا احمد اقبال رضوی کا نام پہلے ہی ڈپٹی سیکریٹری جنرل کے لیے اعلان کیا جا چکا تھا جو کہ سیکریٹری جنرل کی عدم موجودگی میں قائمقام سیکریٹری جنرل کی ذمہ داریاں بھی انجام دینگے ۔ واضح رہے کہ شوری عالی نے مجلس وحدت مسلمین کے تمام نامزد اراکین مرکزی کابینہ کے ناموں کی توثیق کردی ہے ۔

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree