وحدت نیوز ( ڈیرہ اللہ یار ) مجلس وحدت مسلمین کے نظریاتی ورکر اور ذمہ داران نظریاتی اساس کو اجا گر کرنے کیلئے اپنی کوشش تیز کریں ملک سے دہشت گردی لاقانونیت فرقیواریت ٹارگٹ کلنگ کا خاتمہ کر کے ایکمضبوط خوشحال مستحکم پاکستان ہماری منزل ہے ان خیالات کا اظہارایم ڈبلیوایم بلوچستان کے سیکریٹری جنرل علامہ مقصود علی ڈومکی نے ڈیرہ اللہ یار کے دورے کے موقع پر نیشنل پریس کلب میں تنظیمی ساتھیوں اور صحافیوں سے بات چیت کر تے ہوئے کیا صوبائی سیکریٹری تنظیم سازی علامہ بر کت مطہری نمائندہ وحدت نیوز جعفر آباد نذیر حسین بلوچ و دیگر بھی ان کے ہمراہ تھے،۔

علامہ مقصود علی ڈومکی نے مزید کہا کہ اسلامی جمہوریہ ایران پوری امت مسلمہ کیلئے روشنی کی ایک کرن کی حیثیت رکھتا ہے امام خمینی ایک بڑے عالمی ممبر تھے مسلم امہ کو یکجہتی اوراتحاد کا درس دیکر انہوں نے جو کارنا مہ سر انجام دیئے وہ ہمارے لیئے مشعل راہ ہے انہوں نے قائد شہید علامہ عارف حسینی کو خراج عقیدت پیش کر تے ہوئے انکی دینی قومی خدمات پر روشنی ڈالی اس موقع پر آل ڈومکی اتحاد کے شاہنواز گولہ مہر اللہ ڈومکی راجہ ڈومکی محمد علی ترین بھی موجود تھے۔

وحدت نیوز (کوئٹہ) مجلس وحدت مسلمین پاکستان کے مرکزی رہنما علامہ سید ہاشم موسوی نے شہید علامہ عارف حسین الحسینیؒ کی یاد کوتازہ کرتے ہوئے کہا ہے کہ شہید عارف حسین الحسینیؒ کا نام تاریخ کے صفحوں پر سنہرے حروف سے لکھا جا چکا ہے اور دنیا شہید الحسینی ؒ کی کارناموں کو تا دم مرگ یاد رکھے گی۔ ان خیالات کا اظہار انہوں نے نوجوانوں کے اہم اجلاس سے کیا ،اجلاس میں کوئٹہ سیکرٹری جنرل عباس علی،ڈپٹی سیکرٹری جنرل علامہ ولایت حسین جعفری، سیکرٹری سیاسیات کامران حسین، سیکرٹری روابط کربلائی رجب علی، سیکرٹری مالیات رشید طوری اور دیگر معزیزین نے شرکت کی ۔

انہوں نے کہا کہ علامہ عارف حسینیؒ سرمایائے ملت تھے اور ملک وقوم اور بالخصوص اتحاد بین المسلمین کیلئے ایک مثبت کردار ادا کر تے ہوئے پاکستان بھر میں مظلوموں کی رہنمائی کر تے تھے جو آج بھی پاکستان کے مظلوم عوام شہید کے نقش قدم پر چل رہے ہیں. شہید الحسینی ؒ کا کردار نہ صرف سیاست بلکہ دین کیلئے بھی مفید اور قابل تعریف تھا. یہی بات ملک بھر میں انکی مقبولیت کی وجہ بنی اور شہید ملک بھر کے مختلف دیہاتوں اور شہروں میں تبلیغات کیلئے تشریف لے جاتے تھے. شہید عارف حسینی ؒ ہمیشہ مظلوم کی حمایت کیا کرتے تھے اور ظالم کے خلاف کبھی بھی انکے پاؤ ں نہیں کانپے بلکہ ڈٹے رہتے. قائد شہید ؒ ظالموں کیلئے سب سے بڑی رکاؤٹ تھی جو کہ ملک کے مفاد پرست اور ظالم لیڈروں کیلئے ایک بڑا چیلنج تھااور آج بھی افکار شہید ؒ ظالم اور جابر حکمرانوں کیلئے چیلنج سے کم نہیں۔انہوں نے مزیدکہا کہ شہید قائد علامہ سید عارف حسین الحسینی (رہ) کے مشن اور افکار کو اگراپنا لیا جائے اور ان پر عمل کرے تو پاکستان کو بحرانوں سے نکالا جاسکتا ہے۔

انہوں نے مزید کہا کہ شہید قائد پاکستان میں استعمار دشمنی کی علامت بن گئے تھے، اسی جرم میں انہیں شہید کیا گیا لیکن دشمن کو معلوم نہ تھا کہ ان کا جسم تو ہم سے چھینا جاسکتا ہے، لیکن ان کی روح، ان کی فکر اور ان کی یادوں کو ملت تشیع کے دلوں سے اور ملت اسلامیان پاکستان کے دلوں سے کوئی نکال نہیں سکتا۔علامہ سید عارف حسین الحسینی (رہ)کی شہادت نہ صرف اہل تشیع بلکہ اہل اسلام کیلئے ناقابل تلافی نقصان ہے. یہ شہید الحسینی ؒ کے عظمت کی نشانی ہے کہ ہر پاکستانی شہری شہید کے یاد کو تازہ کرتے ہوئے شہید کی برسی مناتے ہیں اورہر با ضمیرفرزند ملت شہید کی یاد کو تا حیات زندہ رکھیں گے۔ آخر میں کہا گیاہے کہ مجلس وحدت مسلمین کوئٹہ ڈویژن شہید قائد علامہ عارف حسین الحسینیؒ کے ستائیسوی برسی کے موقع پر ایک عظیم الشان پروگرام کا انعقاد یزدان خان ماڈل ہائی سکول کوئٹہ میں 9 اگست بروز اتوار ہوگا اور اس پروگرام کے ساتھ ساتھ ایم پی اے آغا رضاکے صوابدیدی فنڈز سے میڈیکل اور اسپورٹس سے متعلق افراد میں چیک تقسیم کئے جائیں گے.

وحدت نیوز (سکردو) مجلس وحدت مسلمین پاکستان بلتستان ڈویژن کے سیکریٹری جنرل آغا علی رضوی نے اپنے ایک بیان میں کہا ہے کہ شہید قائد علامہ عارف حسین الحسینی مدافع فکر اقبال اور نظریہ پاکستان تھے۔ وہ فرزند خمینی پاکستان میں موجود محروموں اور مظلوموں کی امیدوں کامحور تھا، اس کی شہادت سے ملت یتیم نہیں ہوئی بلکہ ملک کا ہر مستضعف اور ہر محروم و مظلوم یتیم ہوا ۔ انہوں نے کہا کہ علامہ عارف حسین الحسینی مسیحائے ملت پاکستان تھے انہوں نے ملت کی درد کا حقیقی مداوا تلاش کیا اور ملک کو درپیش اندرونی و بیرونی مسائل کا ادراک کرتے ہوئے میدان عمل میں اترے۔ پاکستان کی خارجہ پالیسی کو امریکہ کی غلامی سے نجات دلانے اور باوقار و آزاد خارجہ پالیسی کے لیے زمینہ سازی کی۔ اس کے علاوہ ملک میں موجود اتحاد بین المسلمین کی فقدان کو درک کرتے ہوئے شیعہ سنی وحدت کا علمبردار بن کر علمی اقدام اٹھائے ۔ شہید قائد نے ملک میں جتنے اقدامات اٹھائے اس میں عالم اسلام اور ملک کی سرفرازی کا راز پوشیدہ تھا اور انکے اقدامات سے استکبار و استعمار اور سامراج کے لیے وطن عزیز میں گھیرا تنگ ہو رہا تھا ۔ اسلام اور پاکستان کے دشمنوں نے اس چیز کو درک کرتے ہوئے انہیں پاکستان سے اٹھانے کو ہی اپنی عافیت کا ذریعہ سمجھا لہذا اس فرزند علی نے نماز فجر کے بعد جام شہاد ت نوش فرمائے اور ہمیشہ ہمیشہ کے لیے سروخرو ہوئے۔ شہید عارف حسین الحسینی اگر چہ ہمارے درمیان نہیں لیکن شہید ہونے کے ناطے وہ اس وقت بھی ہمارے ساتھ ہیں۔ ملک بھر میں شیعہ سنی وحدت کے لیے اٹھنے والے اقدامات، مظلوموں اور محروموں کے حقوق کے لیے اٹھنے والی آواز اور دشمن اسلام و پاکستان امریکہ و اسرائیل کے خلاف اٹھنے والی مردہ باد امریکہ کی آواز دراصل شہید عارف حسینی کی آواز ہے۔ اس مسیحائے ملت نے قو م کو اپنی افکار سے بیدار کر دیا ہے اور حق و باطل کا پیمانہ دے دیا ہے۔ امام خمینی رھ نے عارف حسینی کی شہادت پر انہیں اپنا حقیقی فرزند قرار دے کر انکے ہر عمل اور ہر اقدام پر مہر تصدیق ثبت کی ہے،اور انہوں نے تاکید فرمائی تھی کی شہید قائد کے افکار کو زندہ رکھیں۔ شہید عارف کے ہر ہرا قدام اور ہر ہر پالیسی کو زندہ رکھنا حکم بت شکن کی اتباع ہے چاہے وہ اقدام عملی سیاست کے ذریعے محروموں کے حقوق کے لیے کوشش کرنا ہو یا اہل سنت برادی کے ساتھ شانے سے شانے ملا کر اور انہیں عزت و تکریم دے کے اجتماعی جدوجہد کرنا ہو ، خواہ ملک بھر میں امریکہ مردہ باد کے نعرے کو زندہ رکھنا ہو یا طالبان اور دہشتگرد تنظیموں کے خلاف ہر سطح پر اٹھ کھڑے ہو کر انہیں پاکستان میں دفن کرنا ہو۔ شہید عارف حسین سے بڑھ کر کوئی پاکستان میں فرزند انقلاب اور فرزند خمینی ہونے کا دم نہیں بھر سکتا۔ اور نہ ہی کسی کو یہ حق حاصل ہے شہید عارف کے نظریات کے خلاف اقدامات اٹھائے اور انکی تعریفیں بھی کریں اور خود کو وارث خمینی قرار دے۔ علامہ عارف حسین الحسینی نے اپنا نظر یہ اپنا عمل کھلی کتاب کی مانند سب کے سامنے رکھ دیا ہے اور کوئی ابہام نہیں رکھا ہے۔ اور انشا ء اللہ ملت اور وطن عزیز کی نظریاتی سرحدوں کے محافظ ہونے، محروموں کے حقوق کے مدافع ہونے، اتحاد بین المسلمین کے حقیقی داعی اور امریکہ و طالبان کے حقیقی دشمن ہونے کی دلیل ہمارا خون دے گا۔ ہم جانیں لوٹا دیں گے اور اپنے شہید قائد کے افکار و نظریات سے پیچھے نہیں ہٹیں گے۔