The Latest
وحدت نیوز (گلگت) مجلس وحدت مسلمین کے زیر اہتمام گلگت کے شاہی پولو گراونڈ میں تاریخی تکمیل پاکستان کانفرنس، شہریوں کی کثیر تعداد کی شرکت، کانفرنس کی صدارت ایم ڈبلیو ایم پاکستان کے سربراہ علامہ ناصر عباس جعفری نے کی جبکہ علامہ امین شہیدی، صاحبزادہ حامد رضا سربراہ سنی اتحاد کونسل سابق سینیٹر و ترجمان وائس آف شہدائے پاکستان سید فیصل رضا عابدی، علامہ مختار امامی، علامہ عبدالخالق اسدی، علامہ نیئر مصطفوی سمیت مجلس وحدت مسلمین کے نامزد امیدواروں نے شرکت کی۔ علامہ ناصر عباس جعفری نے تکمیل پاکستان کانفرنس سے خطاب میں کہا کہ خبردار اس الیکشن کو شیعہ سنی جنگ نہ بنانا بلکہ ظالموں اور مظلوموں کی جنگ سمجھ کر لڑنا، ظالم طبقہ کا کوئی مذہب نہیں، اگر یہاں کے مظلوم شیعہ سنی متحد ہوجائیں تو کوئی ظالم ان کا حق چھین نہیں سکتا، ہم نے کسی ظالم سے آج تک ہاتھ نہیں ملایا، ہم نے ہمیشہ مظلومین کے لئے آواز بلند کی، جس طرح مہدی شاہ شیعوں کا نمائندہ نہیں ہے، اسی طرح حفیظ الرحمان بھی سنیوں کا نمائندہ نہیں ہے، اگر یہ ہمارے نمائندے ہوتے تو آج ان کے حلقوں کے عوام کسمپرسی کا شکار نہیں ہوتے۔ ایم ڈبلیو ایم کے سربراہ کا کہنا تھا کہ ہم پرانے سیاسی نظام کو دفن کرنے کے لئے کرپشن سے پاک، بے داغ ماضی، تعلیم یافتہ قیادت کو سامنے لائے، تاکہ عوام کو اس کا حق دلایا جائے، انشاءاللہ 8 جون کو ہم نہیں پاکستان جیتے گا اور انشاءاللہ جیت کا جشن ہر گھر پر پاکستان کا پرچم لہرا کر منائیں گے، میں یہاں کی حکومت اور گورنر کو کہنا چاہتا ہوں کہ اگر دھاندلی ہوئی تو یہ ان کے گلے کی ہڈی بن جائے گی، جو نہ نگل سکو گے نہ اگل سکو گے۔
وحدت نیوز (گلگت) مجلس وحدت مسلمین پاکستان کے مرکزی ڈپٹی سیکرٹری جنرل علامہ امین شہیدی کا کہنا تھا کہ گلگت بلتستان کے ترقیاتی کام روکنے کی دھمکیاں دینے والے سن لیں کہ پاکستان کا خزانہ شریف خاندان کی ملکیت نہیں پاکستانی عوام کی ملکیت ہے، ہم اپنے حقوق ان سیاسی فرعونوں سے چھین کر لیں گے، نواز لیگ نے ہمیشہ دہشت گردوں کی سرپرستی کی، شہباز شریف نے علی الاعلان کہا کہ طالبان اور ہمارے نظریات ایک ہیں، لہذا وہ پنجاب پر حملے نہ کرے، ہم ان دہشت گردوں کے سپورٹرز کا ساتھ نہیں دے سکتے۔ ان خیالات کا اظہار انہوں نے گلگت میں تکمیل پاکستان کانفرنس سے خطاب کرتے ہوئے کیا۔ علامہ شہیدی کا کہنا تھا کہ آج گلگت بلتستان کے عوام کو سبز باغ دکھانے والے 8 جون کے بعد نظر نہیں آئینگے، مجلس وحدت مسلمین کا ہدف اس سرزمین کو آئین دلانا ہے، ہم اس لئے میدان میں آئے ہیں کہ یہاں کے عوام کو بااختیار بنا سکیں، ہم عوامی حقوق کے جنگ لڑ رہے ہیں۔
ایم ڈبلیو ایم کے مرکزی رہنما کا کہنا تھا کہ مفاد پرستوں کا ہدف صرف اقتدار کا حصول ہے، گلگت بلتستان میں لوگوں کو مذہب کے نام پر بیوقوف بنایا جا رہا ہے، مذہب اور مذہبی رہنماوُں کے نام پر عوام کے جذبات سے کھیل رہے ہیں، اب وہ زمانہ گزر گیا کہ مذہب کے نام پر لوگوں کو گمراہ کیا جائے، ہمیں فخر ہیں کہ ہم شیعہ ہیں، لیکن ہم نے سیاست میں قدم رکھتے وقت شعوری طور پر فیصلہ کیا کہ ہم مذہب کے نام پر نہیں بلکہ کارکردگی کی بنیاد پر سیاست کریں گے، حقوق غصب کرنے والے اس لئے کامیاب ہوگئے کہ انہوں نے آپ کو قومیتوں اور مسلکوں میں تقسیم کرکے آپ پر مسلط رہے، پیپلز پارٹی نے گلگت بلتستان کو کرپشن، اقرباء پروری اور محرومیوں کے سوا کچھ نہیں دیا۔ چالیس سال سے جاری سبسڈی کو نواز لیگ اور پیپلز پارٹی نے مل کر ختم کیا، گلگت بلتستان میں دہشت گردی اور انتہا پسندی کا بیج پیپلز پارٹی ہی کے دور اقتدار میں بویا گیا، گذشتہ دور میں یہاں کے عوام نے پیپلز پارٹی کے جھوٹے اعلانات پر عمل درآمد کی آس لے کر پیپلز پارٹی کو حکومت دی، لیکن پیپلز پارٹی نے عوامی فلاح و بہود اور حقوق کو جوتے کے نوک پر رکھا اور عوام کو ماموں بنا کر کرپشن کا بازار گرم کئے رکھا۔ پیپلز پارٹی کے دور حکومت میں کرپشن نہ کرنے پر محمد علی اختر کو ٹکٹ سے محروم کر دیا۔ علامہ امین شہیدی کا کہنا تھا کہ پیپلز پارٹی اپنے دور اقتدار میں دہشت گردوں کو عدالتوں سے سزا کے باوجود ریلیف دیتی رہی، ہم ان ظالموں کو جان چکے ہیں، اب ان کو گلگت بلتستان کے سرزمین پر امن کو تباہ کرنے کی اجازت نہیں دینگے۔
وحدت نیوز(گلگت) مجلس وحدت مسلمین کے زیر اہتمام گلگت کے شاہی پولو گراونڈ میں تاریخی تکمیل پاکستان کانفرنس، شہریوں کی کثیر تعداد کی شرکت، کانفرنس کی صدارت ایم ڈبلیو ایم پاکستان کے سربراہ علامہ ناصر عباس جعفری نے کی جبکہ علامہ امین شہیدی، صاحبزادہ حامد رضا سربراہ سنی اتحاد کونسل سابق سینیٹر و ترجمان وائس آف شہدائے پاکستان سید فیصل رضا عابدی، علامہ مختار امامی، علامہ عبدالخالق اسدی، علامہ نیئر مصطفوی سمیت مجلس وحدت مسلمین کے نامزد امیدواروں نے شرکت کی، جبکہ تاحد نگاہ انسانی سروں کا ایک سمندر موجود تھا۔
وحدت نیوز (گلگت) مجلس وحدت مسلمین پاکستان کے سربراہ علامہ ناصر عباس جعفری نے وفاقی بجٹ کو یکسر مسترد کرتے ہوئے کہا ہے کہ نون لیگ کا تیسرا بجٹ بھی لفظوں کے گورکھ دھندے سے بڑھ کر کچھ نہیں، اس بجٹ میں بھی لفظوں کا ہیر پھیر واضح ہے۔ بجٹ میں اشرافیہ کو ایک بار پھر نوازا گیا ہے، جبکہ سارا نزلہ غریب عوام پر ڈھایا گیا ہے، انہوں نے نون لیگ کی حکومت کی جانب سے گلگت بلتستان میں گندم کی سبسڈی ختم کرنے پر ردعمل ظاہر کرتے ہوئے کہا ہے کہ ہم نواز حکومت کے عوام کش فیصلوں کی سخت مذمت کرتے ہیں۔ علامہ ناصر عباس جعفری کا کہنا تھا کہ اس فیصلے سے نون لیگ کا اصل چہرہ عوام کے سامنے آگیا ہے، اب لوگ جان گئے ہیں کہ الیکشن جیتنے کیلئے کئے جانے والے سب کے سب اعلانات دھوکے اور فریب سے بڑھ کر نہیں۔ آٹھ جون کو گلگت بلتستان کے عوام خیمے پر مہر لگا کر نون لیگ سمیت چور جماعتوں سے عملی بیزاری کا اظہار کریں گے۔ علامہ ناصر عباس جعفری کا کہنا تھا کہ ہم کسی صورت عوام کے منہ سے نوالہ نہیں چھیننے دیں گے۔ گندم سبسڈی کا خاتمہ نون لیگ کی حکومت کے خاتمہ پر منتہج تو ہوسکتا ہے لیکن اس کی عملی صورت نہیں ہونے دیں گے۔ ایم ڈبلیو ایم کے سربراہ کا کہنا تھا کہ حکومت کو گذشتہ دیئے جانے والے دھرنے یاد رکھنے چاہیئے۔
وحدت نیوز(سکردو) مجلس وحدت مسلمین پاکستان بلتستان ڈویژن حلقہ ایک اور حلقہ دو کے امیدواروں کی کمپین کے سلسلے میں ایک عظیم الشان ریلی بعنوان استحکام پاکستان ریلی نکالی گئی ۔ ریلی میں مجلس وحدت مسلمین کی اعلیٰ قیادتوں کے علاوہ وائس آف شہداء پاکستان کے سربراہ سید فیصل رضا عابدی، سنی اتحاد کونسل کے سربراہ صاحبزادہ حامد رضا ، مجلس وحدت مسلمین سندھ کے سربراہ علامہ مختار امامی ، ایم ڈبلیو ایم ہزارہ کے سربراہ وحید کاظمی بھی شریک تھے۔
ریلی کا آغاز مجلس وحدت مسلمین بلتستان ڈویژن کے سربراہ علامہ آغا علی رضوی کے حکم سے صبح نو بجے ہوا۔ ریلی میں ہزاروں کی تعداد میں گاڑیاں اور موٹر سائیکل سوار شریک تھے۔ شرکاء ریلی نے ہاتھوں میں پاکستان کا پرچم اور مجلس وحدت مسلمین کا پرچم اٹھا رکھے تھے جبکہ پرجوش شرکاء مجلس وحدت مسلمین، راجہ ناصر عباس جعفری ، علامہ آغا علی رضوی کے حق میں نعرے بلند کر رہے تھے۔ شرکائے ریلی کے نعروں سے اسکردو کی فضا گونجتی رہی ۔ ریلی بلتستان کی تاریخ کی سب سے بڑئی ریلی کہا جائے تو بے جا ہو گا۔
ریلی جہاں جہاں سے گزرتی بچے، بوڑھے اور خواتین استقبال کرتے رہے اور مختلف مقامات پر ریلی میں موجود مہمانوں اور قیادتوں کو پھولوں کے ہار بھی پہنچائے۔ ریلی صبح نو بجے کچورا سے شروع ہوگئی اور ریلی امامیہ چوک اسکردو، علی چوک، پریشان چوک، الڈینگ، نیابازار، اور یادگار شہدا اسکردو پر پہنچ گئی تو وائس آف شہدا ئے پاکستان کے سربراہ سید فیصل رضا عابدی نے شرکاء ریلی سے خطاب کیا انہوں نے اپنے خطاب میں کہا کہ بلتستان کی عوام نے جتنی انکو محبت دی ہے اس پر احسان مند ہواور امید کرتا ہوں کہ غیرت مند قوم 8جون کو اپنی ٖغیرت و شجاعت کا مظاہر ہ کرتے ہوئے دہشتگرد جماعتوں کی سیاسی ونگ نواز لیگ کو بدترین شکست دے کے نئی تاریخ ثبت کر ے گی۔انکے خطاب کے بعد ریلی امامیہ چوک اسکردو پہنچ گئی وہاں سے یولتر روڈ سے ہوتی ہوئی عظیم الشان ریلی گمبہ اسکردو پہنچ گئی ۔
وحدت نیوز(سکردو) فیصل رضا عابدی کی آمد سے حاجی فدا محمد ناشاد بوکھلا گئے فیصل رضا عابدی کی حلقے میں داخلے پر پابندی کی درخواست لے کر ڈپٹی کمشنر آفس پہنچ گئے تفصیلات کے مطابق مجلس وحدت مسلمین کی الیکشن کمپین چلانے کیلئے پاکستان پیپلز پارٹی کے سابق سینیٹر و وائس آف شہداء کے چیئرمین فیصل رضا عابدی ان دنوں گلگت بلتستان کے مختلف حلقوں میں جلسے اور ریلیوں میں بھرپور شرکت کر رہے ہیں اور ان کی شرکت سے مجلس وحدت مسلمین کے امیدواروں کو پزیرائی مل رہی ہے.
مختلف حلقوں میں مجلس وحدت مسلمین کے بڑھتے ہوئے گراف کو دیکھتے ہوئے سابق ڈپٹی چیف ایگزیٹیو اور امیدوار پاکستان مسلم لیگ ن حلقہ نمبر 3 حاجی فدا محمد ناشادنے فیصل رضا عابدی کو حلقہ نمبر 3میں آنے سے رکوانے کیلئے درخواست لے کر ڈپٹی کمشنر آفس پہنچ گئے اور ڈپٹی کمشنر سے فیصل رضا عابدی کو حلقے میں آنے پر پابندی عائد کرنے کی گزارش کی ذرائع کے مطابق ڈپٹی کمشنر نے حاجی فدا محمد ناشاد سے اس پر عمل کرنے سے معذرت کر لی جس کے بعد حاجی فدا محمد ناشاد مایوسی کے عالم میں اپنے حلقے چلے گئے دوسری جانب مجلس وحدت مسلمین پاکستان بلتستان ڈویژن کے کارکنوں کے اصرار پر فیصل رضا عابدی حلقہ نمبر 3کے دورے پر روانہ ہو گئے ہیں جہاں انہیں مختلف جگہوں پر روک کر ان کا پر تباک استقبال کیا گیا۔
وحدت نیوز (سکردو) مجلس وحدت مسلمین پاکستان بلتستان ڈویژن کے زیر اہتمام گلگت بلتستان قانون ساز اسمبلی انتخابات کے سلسلے میں منعقدہ سیاسی جلسے سے خطاب کرتے ہوئے کیامجلس وحدت مسلمین بلتستان کے سیکریٹری جنرل علامہ آغا علی رضوی اور ایم ڈبلیو ایم قم کے سیکریٹری جنرل شیخ غلام فخرالدین نے خطاب کرتے ہوئے نواز حکومت کی گلگت بلتستان کیساتھ ہمدردی کا سلسلہ 8 جون تک محدود ہے اس کے بعد وہ تمام وفاقی سیاسی جماعتیں جنہوں نے گلگت بلتستان کو آئینی حقوق سے محروم رکھا ہے موسمی پرندے کی طرح غائب ہو جائیں گی اور موڑ کے نہیں پوچھیں گی لیکن مجلس وحدت مسلمین واحد جماعت ہے جو ہر حال میں عوام کے درمیان رہنے والی جماعت ہے،سکردو کی کامیاب انتخابی ریلی ایم ڈبلیوایم کی فتح کا نوشتہ دیوار ہے، وہ تمام قوتیں جو اس خطے کو حقوق سے محروم رکھنے کے ذمہ دار ہیں انکا یہ عمل خیانت ہے اور گلگت بلتستان کو حقوق سے محروم رکھنا پاکستان دشمنی کے سوا کچھ نہیں کیونکہ جتنا محب وطن گلگت بلتستان کے عوام ہے ملک میں کہیں نہیں اس خطے کے عوام نے پاکستان کو سب کچھ دیا اور پاکستان سے کچھ بھی نہیں لیا۔ انہوں نے کہا کہ ہم گلگت بلتستان میں انتخابات اہلیت اور کارکردگی کی بنیاد پر لڑیں گے مذہب کے نام پر ووٹ بٹورنا درست نہیں سمجھتے۔ہم مذہب کو سیاست کے لیے استعمال کرنے کے مخالف ہیں اور اہلیت اور معیارات کی بنیاد پر انتخابات میں حصہ لیں گے۔مجلس وحدت مسلمین نے گلگت بلتستان انتخابات میں شمولیت کارکردگی کی بنیاد پر اختیار کی ہے اور مجلس وحدت ہی عوامی دردوں کا مداوا کر سکتی ہے۔ انہوں نے مزید کہا کہ گلگت بلتستان کے انتخابات کے سلسلے جس سطح پہ قبل از انتخابات دھاندلی ہوئی ہے اور دوران انتخابات الیکشن کی تیاریاں مکمل ہیں ۔ انہوں نے کہا کہ 8جون کا سورج گلگت بلتستان کی سرزمین پر نئی امید لے کر طلوع ہوگا محروموں اور کمزوروں کے لیے آٹھ جون فتح و کامیابی کا دن ہوگا اور مجلس وحدت مسلمین کامیابی کا پرچم گاڑے گی۔آغا علی رضوی نے کہا کہ آج کی ریلی نے واضح کر دیا کہ انتخابات میں مجلس وحدت برتری حاصل کرے گی۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری فلاح وبہبود اور خیرالعمل فاؤنڈیشن کے چیئرمین نثارعلی فیضی نے کہا کہ 8 جون کو گلگت بلتستان کے عوام اپنی قسمت بدلنے کے لیے خیمے پر مہر لگا ئیں گے وہ ہوشیار اور بیدار ہو چکے ہیں ووٹ کی قدروقیمت کو سمجھتے ہیں اب وہ کسی کے جھانسے میں نہیں آنے والے باریوں کی سیاست کرنے والوں کو مسترد کر دینگے اور ان لوگوں کو اسمبلی میں پہنچائیں گے جو انکی حقیقی معنوں میں خدمت کا جذبہ رکھتے ہیں مجلس وحدت مسلمین پاکستان کے تاریخی جلسے اس بات کا ثبوت ہیں کہ گلگت بلتستان کے عوام نے باریوں کی سیاست کرنے ،کرپٹ اور اپنے حقوق پر ڈاکہ ڈالنے والوں کو مسترد کرکے اپنا فیصلہ ایم ڈبلیو ایم کے حق میں دے دیا ہے گلگت بلتستان میں مجلس وحدت مسلمین کی رفاہی خدمات نے عوام کو یہ احساس دلایا ہے کہ علاقے کی خوشحالی اور ترقی کے لیئے اسی جماعت کو آگے آنا ہو گا ، ان خیالات کا اظہار انہوں نے گلگت بلتستان کے تفصیلی دورہ کے بعد واپسی پر صحافیوں سے گفتگو کرتے ہوئے کیا ۔
چیئر مین خیرالعمل فاؤنڈیشن نثار علی فیضی نے اپنے گلگت بلتستان کے دورہ کے دوران خیرالعمل فاؤنڈیشن کی طرف سے مختلف علاقوں میں جاری منصوبوں کا معائنہ کیا اور تعمیراتی کاموں کا جائزہ لیا اور اطمینان کا اظہار کرتے ہوئے ڈویژنل مسؤلین کو کام کو مزید تیز کرنے کی ہدایات جاری کی نثار علی فیضی نے اپنے دورہ کے دوران طورمک واٹر پروجیکٹ ، ہلدی خپلو میں امام بارگاہ کے پروجیکٹ، شروٹ اور نروٹ گلگت میں مکانات کی تعمیراتی کام کا جائزہ لیا، صادق آباد گمبہ سکردو میں امام بارگاہ کے پروجیکٹ کا معائنہ کیا اور نلتر گلگت میں مسجد کا افتتاح بھی کیا اس موقع پر انہوں نے علاقو ں کے معززین سے ملاقاتیں کیں جنہوں نے خیرالعمل فاؤنڈیشن کے فلاحی کاموں کو سراہتے ہوئے انہیں اپنے اپنے علاقوں کی عوام کے لیے فائدہ مند قرار دیا ، اس موقع پر مجلس وحدت مسلمین کے مرکزی سیکر ٹری فلاح وبہبود نثار علی فیضی نے معززین سے بات کرتے ہوئے کہا کہ گلگت بلتستان کے غیور عوام کے حقوق کی جنگ لڑ رہی ہے اور عوامی خدمت اسکا شعار ہے ہم پچھلے کئی سالوں سے گلگت بلتستان میں عوامی خدمت میں مشغول ہیں جو اس بات کا ثبوت ہے کہ ایم ڈبلیو ایم کی قیادت جی بی کی عوام کو خوشحال اور مضبوط دیکھنا چاہتی ہے ۔
وحدت نیوز (گلگت) مجلس وحدت مسلمین کے مرکزی سیکریٹری سیاسیات سید ناصر شیرازی نے کہا ہے کہ ایم ڈبلیو ایم کے الیکشن مانیٹرنگ سیل نے مسلم لیگ نون کی طرف سے گلگت بلتستان انتخابات کے موقعہ پر متوقع انتخابی بے ضابطگیوں اور طے شدہ دھاندلی پر رپورٹ تیار کر لی ہے۔ایم ڈبلیو ایم کی طرف سے ایسے عناصر پر نظر رکھنے کے لیے تربیت یافتہ ٹاسک فورس کی تشکیل کا عمل بھی مکمل کر لیا گیا ہے جوانتخابی مراحل کی بھرپور نگرانی کرے گی۔وحدت ہاؤس گلگت سے جاری اپنے بیان میں ان کا کہنا تھا کہ گلگت بلتستان کا امن و سکون شفاف الیکشن سے مشروط ہے۔ حکومت کی طرف سے دھاندلی کی کسی بھی کوشش کو شدید عوامی ردعمل کا سامنا کرنا پڑے گا ۔مسلم لیگ ن کو عوامی رائے کا احترام کرتے ہوئے انتخابی عمل کو شفاف انداز میں درست سمت بڑھنے دینا چاہیے۔ گلگت بلتستان میں ہمارے تاریخ ساز جلسوں نے مخالفین کوذہنی طور پر شکست کے لیے آمادہ کر لیا ہے۔یہی وجہ ہے کہ وہ بوکھلاہٹ میں اپنے روایتی حربوں پر اتر آئے ہیں۔جی بی کے الیکشن میں قومی وحدت پر کاری ضرب لگانے کے لیے مسلم لیگ نون کچھ شخصیات سے سودا بازی کرنا چاہ رہی ہے لیکن شاید وہ اس حقیقت سے آگاہ نہیں کہ یہاں کی باشعور عوام نے ووٹ کو کردار کے ساتھ مشروط کر لیا ہے۔ عوامی قوت کی حقدار فقط وہی جماعت ہو گی جس نے دعووں کی بجائے میدان عمل میں رہ کر قوم کی خدمت کی ہے۔مسلم لیگ نون ان کالعدم تنظیموں اور طالبان کی سرپرست ہے جن کے ہاتھ ہزاروں بے گناہ پاکستانیوں کے خون میں رنگے ہوئے ہیں۔ان کے ساتھ تعاون شہداکے خون سے غداری کے مترادف ہے۔انہوں نے کہا کہ قوم نے ایم ڈبلیو ایم کے حق میں فیصلہ دے دیا ہے۔ گلگت بلتستان کے تین سو سے زائد شیعہ سنی علما ایم ڈبلیو ایم کا حصہ بن کر ان کی انتخابی مہم میں دن رات مصروف ہیں۔اس کے علاوہ بیشتر نامور سیاسی و سماجی شخصیات بھی مجلس وحدت میں شمولیت کا اعلان کر چکی ہیں جس کے باعث ہمیں شانداراور حوصلہ افزا نتائج ملنے شروع ہو گئے ہیں۔
وحدت نیوز (کوئٹہ) مجلس وحدت مسلمین کے مرکزی رہنما علامہ سید ہاشم موسوی نے کہا ہے کہ برما کے مسلمانو ں کا قتل عام، اجتماعی قبروں کی دریافت اور انکے ساتھ غیر انسانی سلوک ناصرف مسلم امہ کیلئے لمحہ فکریہ ہے بلکہ یہ انسانی حقوق کے عالمی اداروں اور مہذب دنیا کے چہرے پر بد نما داغ ہے جو مسلمانوں پر جاری مظالم پر خاموش تماشائی بنی بیٹھی ہے ۔اقوم متحدہ سمیت تمام عالمی اداروں کو برما کے مسلمانوں پر جاری مظالم کا نوٹس لینا چاہیئے ۔ہزاروں برمی مسلمان پناہ کی تلاش میں سمندر میں بھٹک رہے ہیں مگر کوئی ملک انھیں قبول کرنے کیلئے تیار نہیں۔
برمی مسلمانوں کے قتل عام پر نام نہاد ،این جی اوزاور سول سوسائٹی کی خاموشی سوالیہ نشان ہیں ۔انہوں نے کہا کہ عالم اسلام اور اوآئی سی برما کے مسلمانو ں کی حالت زار پر رحم کھائیں ۔اقوام متحدہ اور برما پر دباؤ بڑھایا جائے تاکہ مسلمانوں کو برما سے بے دخل نہ کیا جائے انہوں نے کہاکہ بنگلہ دیش ،ملائیشیا اور انڈونیشیا کی بے حسی قابل افسوس ہے کہ وہ مصیبت زدہ مسلمانوں سے تعاون کرنے کی بجائے انہیں اپنی سرحدوں میں داخل ہونے روک رہے ہیں اور سمندور کی لہروں سے جانیں بچاکر خشکی پر پہنچنے والے مہاجرین کو دوبارہ سمند ر میں دھکیل دیا جاتا ہے ۔حکومت پاکستان برما کے مسلمانو ں کی تحفظ کیلئے پارلیمانی اور سفارتی سطح پر اپنا کردار ادا کریں اور ساتھ ہی ساتھ تمام سیاسی و مذہبی جماعتیں اور میڈیا برما کے مظلوم مسلمانوں کیلئے آواز بلند کریں علاوہ ازیں مجلس وحدت مسلمین کے زیر اہتمام بعد از نماز جمعہ برما کے مسلمانوں سے اظہار یکجہتی کیلئے ایک احتجاجی ریلی علامہ سید ہاشم موسوی کی قیادت میں نکالی گئی۔
