The Latest
وحدت نیوز (سندھ) شہداء کمیٹی کی اپیل پر سندہ بھر میں دہشت گردی کے خلاف ریفرنڈم کیا گیا۔ اس مو قع پرمجلس وحدت مسلمین ،اصغریہ آرگنائزیشن اور شہداء کمیٹی کے زیر اہتمام شکارپور، شہدادکوٹ، جام صاحب، سکرنڈ، دوڑ، نوابشاہ، حیدر آباد، جیکب آباد، کنمب، ٹھری میرواہ،نصیر آباد، میرپورخاص و دیگر شہروں میں عوامی ریفرنڈم منعقد ہوا۔
شہدادکوٹ کے کوٹو موٹو چوک پر منعقدہ ریفرنڈم کیمپ پر خطاب کرتے ہوئے مجلس وحدت مسلمین کے مرکزی معاون سیاسی امور و شہداء کمیٹی کے چیئرمین علامہ مقصود علی ڈومکی نے کہا کہ سندہ کے عوام نے ایک مرتبہ پھر دہشت گردی اور مذہبی منافرت کے خلاف ریفرنڈم دیا ہے۔ سندہ حکومت نے عوام سے وعدہ کیا تھا کہ وہ دہشت گردوں کے خلاف آپریشن کرے گی اور کالعدم دہشت گرد تنظیموں کی فعالیت کو روکا جائے گا مگر اس سلسلے میں عملی اقدام نہیں ہورہا، آج بھی سندہ بھر میں کالعدم جماعتوں کی نفرت انگیز سرگرمیاں جاری ہیں۔ ۲۲ نکاتی معاہدے پر عمل در آمد سے امن کو فروغ ملے گا۔شہداء کمیٹی ، دہشت گردی کے خلاف اپنی جدوجہد جاری رکھے گی، دہشت گردی کو روکنے کے لئے سیاسی کارکنوں اور امن پسند قوتوں کو میدان میں آنا ہوگا۔
عوامی ریفرنڈم کے موقع پرمجلس وحدت مسلمین سندہ کے سربراہ علامہ مختار احمد امامی نے صوبائی کابینہ کے ہمراہ حیدر آباد میں اپنا ووٹ کاسٹ کیا۔ جبکہ چیئرمین شہدا کمیٹی علامہ مقصود علی ڈومکی نے شہداد کوٹ میں اپنا ووٹ دیا اس موقعہ پر سید علی اکبر شاہ، مولانا ممتاز ایمانی و دیگر موجود تھے۔
وحدت نیوز (حیدرآباد) سانحہ شکار پوراور پورے پاکستان میں دہشت گردی کے خلاف مجلس وحدت مسلمین ضلع حیدرآباد کی جانب سے حیدر چوک پر ریفرنڈم کیمپ لگایا گیا جس میں انسانیت سے تعلق رکھنے والے ہزاروں انسانوں نے اپنا ووٹ دہشت گردی کے خلاف کاسٹ کیا کیمپ میں حیدرآباد کے سیکریٹری جنرل مولانا امداد علی نسیمی کے علاوہ صوبہ سندھ کے سیکریٹری جنرل مولانا مختار امامی نے بھی کیمپ کا دورہ کیا اس کیمپ میں ہر مذہب کے لوگوں نے بڑی تعداد میں ووٹ کاسٹ کر کے یہ ثابت کر دیا کہ دہشت گردی ہمارے پیارے ملک پاکستان کے لیے ایک ناسور ہے اس لیے آج ہر شخص نے جو ظالم کے خلاف اور مظلوم کا ساتھ دینے کے لیے نکلا ہے وہ قابلِ تعریف ہے ہر شخص اس دہشت گردی سے نفرت کرتا ہے پر افسوس سے کہنا پڑھتا ہے کہ دہشت گردوں کی سرپرستی کرنے والے حکمران ابھی تک آپریشن کرنے میں تاخیر کیوں کر رہے ہیں اور پورے سندھ میں آپریشن کرنے سے حکومت سندھ کیوں ڈرتی ہے ؟ انشاء اللہ آج کا یہ ریفرینڈم جو دہشت گردی کے خلاف ہے اور مظلوم کی حمایت میں ہے یہ کامیابی کی طرف بڑھ رہا ہے ۔
وحدت نیوز(گلگت) مجلس وحدت مسلمین پاکستان کے ڈپٹی سیکرٹری جنرل و رکن اسلامی نظریاتی کونسل پاکستان علامہ محمد امین شہیدی تین روزہ دورے پر سکردو سے گلگت پہنچ گئے۔ عالم برج پر کارکنوں اور مجلس وحدت مسلمین گلگت کے رہنماؤں کا استقبال۔
وحدت ہاؤس گلگت میں کارکنوں سے گفتگو کرتے ہوئے علامہ امین شہیدی کا کہنا تھا کہ گلگت بلتستان کے انتخابات کو ہائی جیک کرنے نہیں دینگے۔ 67 سال سے آئینی حقوق سے محروم عوام کو ہردور کے وفاقی حکمران سبز باغ دکھاکر لوٹتے رہے اب گلگت بلتستان کے عوام بیدار اور باشعور ہیں اور کسی کو اپنے حقوق غصب کرنے کی اجازت نہیں دینگے۔گلگت بلتستان کے آئندہ الیکشن میں عوام دھاندلی کو کسی بھی صورت قبول نہیں کرینگے اور عوامی حقوق پر اگر ڈاکہ ڈالا گیا تو اس کے بھیانک نتائج برآمد ہونگے۔ مسلم لیگ ن مجلس وحدت مسلمین کے رہنماؤں اور کارکنوں کو سیاسی انتقام کا نشانہ بنارہی ہے اگر یہ سلسلہ جاری رہا تو گلگت بلتستان سمیت ملک گیر احتجاج پر مجبور ہونگے۔
انہوں نے کہا کہ گلگت بلتستان کے عوام اس وطن کے باوفا بیٹے ہیں اور ملک کا فطری دفاع ہیں لیکن بد قسمتی سے وفاقی حکمرانوں کی نظر میں یہاں کے عوام کی کوئی قدر وقیمت نہیں اور انہیں تیسرے درجے کے شہری کے برابر بھی حقوق دینے کو تیار نہیں۔مجلس وحدت مسلمین گلگت بلتستان کے عوام کے جائز آئینی و بنیادی انسانی حقوق کی جنگ میں کسی سے پیچھے نہیں رہے گی بلکہ ہراول دستے کا کردار ادا کریگی۔انہوں نے کہا کہ کچھ جماعتیں سبز باغ دکھاکر اقتدار تک پہنچنے کی ناکام کوشش میں مصروف عمل ہیں اور عوام سے جھوٹے وعدوں کے عوض ووٹ کے طلبگار ہورہے ہیں لیکن علاقے کے باشعور عوام ان کے جھانسوں میں آنے والے نہیں اور اس مرتبہ عوام کے خون پسینے کی کمائی کو عیش و عشرت میں لٹانے والے سیاسی مداریوں سے اپنے ووٹ کی طاقت سے انتقام لینگے۔
وحدت نیوز (کوئٹہ) مجلس وحدت مسلمین پاکستان کوئٹہ ڈویژن کے سیکریٹری جنرل سید عباس علی نے اپنے بیان میں کہا ہے کہ کوئٹہ کنٹومنٹ بورڈ کے بلدیاتی الیکشن میں مجلس وحدت مسلمین بھرپور حصہ لے گی۔سترہ سال بعد ہونے والے کوئٹہ کنٹومنٹ بورڈ کے بلدیاتی انتخابات میں مجلس وحدت مسلمین وارڈ نمبر 1سے محمد عامر ، وارڈ نمبر 2 سے مبین احمد، وارڈ نمبر 3سے حاجی بشیر احمد،وارڈ نمبر 4سے منظور علی نظری اور وارڈ نمبر 5 سے دوست محمد کی بھر پور حمایت کرتے ہیں اور اپنے تمام ووٹروں سے اپیل کرتے ہیں کہ وہ ان امید واروں کو ووٹ دے کر کامیاب کرائیں اور ساتھ ہی ساتھ تمام نامزد امیدواروں سے یہ امید رکھتے ہیں کہ وہ منتخب ہوکر عوام کے اعتماد پر پورا اتریں گے۔ تمام نامزد امیدواروں پر یہ ذمہ داری عائد ہوتی ہے کہ وہ عوام کے فلاح و بہبود کے لیے دیانت داری سے اپنے فرائض بخوبی سرانجام دینگے تاکہ زیادہ سے زیادہ لوگ ان کے ثمرات سے استفادہ کر سکیں اور مستقبل میں عوام کو تعلیم و صحت، سماجی بہبود ، امن و امان اور دیگر مسائل کے لیے راہ ہموار ہوجائے۔عوام کے مسائل ان کے دہلیز پر حل ہونے چاہیے ۔ مجلس وحدت مسلمین امید رکھتی ہے کہ نامزد امیدوار جمہوریت اور جمہوری اداروں کے استحکام اور عوامی مسائل کے حل کے لیے ایمانداری ، خلوص نیت اور قومی جذبے سے کام کرینگے کیونکہ خالق حقیقی کی خوشنودی خدمت خلق میں ہی پوشیدہ ہے۔
وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں ایم ڈبلیوایم کے رکن بلوچستان اسمبلی سید محمد آغارضانے کہا ہے کہ اگر پاکستان نے یمن کی جنگ میں شرکت کی تو اس کی آگ ہمیں جلا کر راکھ کر دے گی۔یمن تنازعہ کا حصہ بننے سے خطے کی صورتحال پر منفی اثرات مرتب ہونگے۔ پاکستان کو اس جنگ میں ملوث نہیں ہونا چاہیے ۔ صورتحال کی نزاکت اور سنگینی کو سمجھنا چاہیے۔ اس وقت وطن عزیز خود حالت جنگ میں ہیں۔ دہشت گردوں نے پاکستان کی سلامتی کو خطرے میں ڈال دیا ہے۔ یہ دہشت گرد ہمارے صفوں میں موجود ہیں۔ یہ دہشت گرد پاکستان دشمن عناصر کے اشاروں پر پاکستان کو بد امنی اور انتشار میں دھکیل رہے ہیں۔ پاکستان کے بہت سے علاقوں پر پاکستان کی ریاستی عمل داری موجود نہیں ہے۔ پاکستان کے حالات ایسے نہیں ہے کہ وہ دوسروں کی جنگ میں آنکھیں بند کرکے چھلانگ لگا دیں۔ہم پہلے ہی سے افغانستان کی جنگ میں حصہ لینے کا انجام بھگت رہے ہیں۔ ملک اس وقت مختلف مشکلات میں گھیرا ہوا ہے۔ جب تک ملک میں رہنے والے تمام قوموں کو ہر معاملات پر اعتماد میں نہیں لیا جاتا تو ان کے نتائج خطرناک برآمد ہوتے ہیں۔ ناکام خارجہ پالیسی کی وجہ سے پاکستان پہلے ہی تنہائی کا شکار ہیں۔ ماضی میں خارجہ پالیسی نہ ہونے کی وجہ سے افغانستان میں مداخلت کی گئیں اور وہاں ناکام بھی ہوگئے اور اس کی تمام تر ذمہ داری حکومت کی ناکام خارجہ پالیسی رہی ہے اور آج جس طرح یمن کے مسئلے پر قوم اور پارلیمنٹ کونظر انداز کیا جارہا ہے۔ اس کی بھی خطرناک نتائج برآمدہونگے۔
وحدت نیوز (ٹیکسلا) مجلس وحدت مسلمین خیبرپختونخواکے صوبائی سیکریٹری جنرل اور القائم ٹرسٹ ٹیکسلا کے سربراہ علامہ سبطین حسینی نے کہا ہے کہ زمانے کی جدت اور نت نئے وسائل سے دشمن کے ناپاک عزائم کو خاک میں ملانا اور پیروان علی علیہ السلام کے اداروں کا تحفظ جدید انداز کے ساتھ قابل تحسین ہے۔ شیعہ سیفٹی کی جانب سے القائم ٹرسٹ ٹیکسلا میں سیکیورٹی سسٹم کا قیام خوش آئندہے، ایسے اقدامات کو مل بھر میں جاری رکھا جائے۔ ملک میں بڑھتی ہو ئی دہشت گردی کے خلاف عملی اقدامات میں پیش پیش غیر سرکاری تنظیم شیعہ سیفٹی کے شکر گزار ہیں، تفصیلات کے مطابق آسٹریلیامیں پاکستانی نژاد نوجوان سیرت عباس کی قائم کردہ تنظیم شیعہ سیفٹی اس وقت پاکستان بھر میں عبادت گاہوں اور دہشت گردی کے خطرات سے دوچار مراکز کو سیکیورٹی آلات فراہم کر رہی ہے۔ مذکورہ تنظیم نے حال ہی ضلع ہنگو، صوبائی صدر مقام پشاور میں سیکیورٹی سسٹم قائم کیا گیا اور اب القائم کمپلیکس ٹیکسلا میں سیکیورٹی سسٹم کی تنصیب کا کام جاری ہے۔ اہلیان علاقہ نے اس اقدام کو سراہااور شہریوں کی حفاظت اور نگہداری کے اس اقدام کو جاری رکھنے پر زور دیا ۔ ٹیکسلا میں میڈیا سے بات کرتے ہوئے انہوں نے کہا کہ سیکیورٹی سسٹم کی تنصیب کے لئے ایک تقریب کا اہتمام کیا جائے گا جس میں میڈیا اہلکاروں کو بھی مدعو کرکے دہشت گردی کے لاحق خطرے سے نمٹنے کے لئے سیکیورٹی ایکشن پلان کا اعلان بھی کیا جائیگا۔
وحدت نیوز (کوئٹہ) مجلس وحدت مسلمین کے میڈیا سیل سے جاری شدہ بیان میں علامہ سید ہاشم موسوی نے کہا ہے کہ افغانستان کے علاقے مالستان غزنی میں کچھ عرصہ قبل اغوا کئے گئے سولہ ہزارہ مومنین میں سے چار افراد کو بے دردی سے شہید کرنا اس تکفیری ٹولے کی سفاکیت اور درندگی کی ایک اور مثال ہے ۔ اس تکفیری ٹولے نے پورے ریجن میں جس طرح ظلم و بربریت کا بازار گرام کر رکھا ہے یہ ہم سب کیلئے لمحہ فکریہ ہے معصوم انسانوں کا خون بہانا افغان حکومت کی کارکردگی پر سوالیہ نشان ہے ، افغان حکومت سے کسی خیر کی توقع کرنا حماقت ہے کیونکہ یہ دہشتگرد خود انکے پالے ہوئے ہیں افغان حکومت کی نا اہلی ،غفلت اور بے حسی کی وجہ سے دو ماہ قبل اغواء کئے گئے ہزارہ مومنین کا بازیاب نہ ہونا اس کی دلیل ہے ۔ عصر کے خوارج کی درندگی اپنی جگہ لیکن نا اہل افغان حکومت اور نا واقف سیکورٹی ایجنسیوں کی غفلت اور حکمرانوں کی بز دلی انکی درندگی سے زیادہ شرمناک ہے ۔ مجلس وحدت مسلمین اس واقعے کی شدید الفاظ میں مذمت کرتی ہے اور ساتھ ہی ساتھ افغان حکومت اور دیگر انسانی حقوق کے اداروں سے مطالبہ کر تی ہے کہ وہ اس تکفیری ٹولے کے خلاف ہنگامی بنیادوں پر سخت ترین اقدامات کریں اور دیگر تمام اغوا ء کئے گئے ہزارہ مومنین کو فوراً بازیاب کرائے ہم شہید کئے گئے افراد کے اہل خانہ سے دلی تعزیت کا اظہار کرتے ہیں اور یقین دلاتے ہیں کہ ہم ان کے غم و دکھ میں برابر کے شریک ہیں۔
وحدت نیوز (مظفرآباد) سرینگر سے نکالی جانے والی پاکستان زندہ باد ریلی نے مودی سرکار کی نیندیں حرام کردی ہیں ،عوامی مظاہرے نے ثابت کردیا کہ کشمیری عوام کے دلوں سے شعلہ چنار ابھی سرد نہیں ہوا ہے ان کی منزل آزادی اور بس آزادی ہے،کشمیری عوام کے دلوں میں بھارت کے لئے شدید نفرت اور پاکستان سے والہانہ محبت ہے سرینگر سے نکالی جانے والی ریلی اور پاکستانی پرچم لہرانا اس بات کا مظہر ہے، عوامی تحریک کو طاقت کے بل بوتے پر دبانے والی بھارت سرکار اس بات کو کبھی فراموش نہ کرے کہ آواز خلق نقارہ خدا ہوتی ہے بھارت کو اب نوشتہ دیوار پڑھتے ہوئے مظلوم اور نہتے کشمیریوں پر مظالم بند کردینے چاہئیں اوراس بات کو باور کر لینا چاہیے کہ دنیا میں کہیں بھی آزادی اورحریت کی تحریکوں کوطاقت سے نہیں کچلا جا سکتا بالآخر آزادی اور فتح حریت تحریکوں کی منزل ہوتی ہے پوری دنیا میں بیداری کی تازہ لہر کے کشمیر پر مثبت اثرات مرتب ہو رہے ہیں کشمیری عوام حریت قائدین پر اپنے اعتماد میں اضافہ کر رہے ہیں جس کو دبانے کے لئے بھارت سرکار اور کٹھ پتلی انتظامیہ نے حریت رہنماوں کی بلا جواز گرفتاریوں اور جھوٹے مقدمات قائم کرنے کاسلسلہ شروع کر رکھا ہے بزرگ حریت رہنما سید علی گیلانی کی نظربندی اور ان کے خلاف کالے قانون کے تحت غداری کا مقدمہ حکومت ہند کی بدنیتی پر مبنی ہیجولوگ اپنے حقوق کی جنگ لڑتے ہیں وہ باغی نہیں ہوتے بلکہ باغی وہ ہوتا ہے جو اپنے ملک کا قانون توڑے سید علی گیالانی سمیت کسی بھی کشمیری نے نہ بھارت کو اپنا ملک تسلیم کیا ہے اور نہ ہی اس کے ہی کبھی اس کے آئین کا حلف لیا نہ ہی کشمیر پر بھاتے کے غاصبانہ قبضہ کو کبھی تسلیم کیاان خیلات کا اظہار سیکرٹری جنرل مجلس وحدت مسلمین آزدکشمیرعلامہ سید تصور حسین نقوی الجوادی نے مظفرآباد میں صحافیوں سے گفتگو کرتے ہوئے کیا۔
انہوں نے کہا کہ ہندوستان کی حکومت نے جب تحریک آزادی کو پھر سے منظم ہوتے ہوئے دیکھا تو حریت رہنماوں کی بلاجواز گرفتاریوں اور مقدمات قائم کرنے کا سلسلہ شروع کر دیا کالے قانون کے تحت رہنماوں کی نظر بندی پکردھکڑ اور نہتے شہریوں پر تشدد کا سلسلہ شروع کر دیا ہے انسانی حقوق کی تنظیموں کو اس سلسلہ میں فوری اور موثر آوازاٹھانی چاہیے ،انہوں نے کہا کشمیریوں سے انتقام کی ایک اور مثال کشمیری طلباء کی یونیورسٹی سے بے دخلی ہے جو بھارت کی جمہوریت کے منہ پر تمانچہ ہے ہریانہ کی انجینئرنگ یونیورسٹی سے مودی سکالرشپ پر زیر تعلم ہونہار طلباء کو صرف پاکستان سے محبت کے جرم میں یونیورسٹی سے بے دخل کیا گیا جو قابل مذمت اور شرمناک ترین حرکت ہے انہوں نے حکومت پاکستان سے مطالبہ کیا کہ فوری طور پر ان کشمیری طلباء کی اعلیٰ تعلیم کے لئے پاکستان یابیرون پاکستان یونیوسٹیوں میں اہتمام کرے۔
وحدت نیوز (اسلام آباد) مجلس وحدت مسلمین کے سر براہ علامہ راجہ ناصرعباس جعفری نے کہا ہے کہ چین سے مضبوط دوستی پاکستان کی تر قی وخوشحالی کی ضمانت ہے اور آنیوالے وقت میں ملک سے بجلی کی لوڈشیڈ نگ کا خاتمہ اور تر قی وخوشحالی یقینی ہے ،ہر پاکستانی کو چین کے ساتھ دوستی پر فخر ہے اور ہم چین کو اپنا دوسر ا گھر سمجھتے ہیں ۔ مرکزی سیکریٹریٹ میں مختلف وفود سے گفتگو میں مجلس وحدت مسلمین کے سر براہ علامہ راجہ ناصر عباس جعفری نے کہا کہ چینی صدر کے کامیاب دور ہ پاکستان سے ملک کو بہت سے بحرانوں سے نجات ملے گی اور ملک میں جاری بدتر ین لوڈشیڈ نگ کا خاتمہ ممکن ہو سکے گا اور جب لوڈشیڈ نگ ختم ہو گی تو اس سے ملک میں مہنگائی اور بڑھتی ہوئی بے روز گاری کو بھی ختم کر نے میں مدد ملے گی ۔ انہوں نے کہا کہ ہر پاکستانی کو چین کے ساتھ اپنی مضبوط دوستی پر فخر ہے اور اس بات میں کوئی شک نہیں کہ چین نے ہر مشکل وقت میں پاکستان کاساتھ دیا ہے ۔ انہوں نے کہا کہ اب حکو مت پاکستان کی ذمہ داری ہے کہ وہ چین کے ساتھ ہونیوالے تمام معاہدوں کے مطابق منصوبوں کو جلد ازجلد شروع کر یں اور انکو مکمل طور پر شفاف طر یقے سے مکمل کیا جائے کیونکہ ان منصوبوں میں تاخیر کسی بھی صورت ملک اور قوم کے مفاد میں نہیں ہو گی ۔
وحدت نیوز (اسکردو) مجلس وحدت مسلمین پاکستان بلتستان ڈویژن کے ڈپٹی سیکرٹری جنرل علامہ محمد امین شہیدی نے گمبہ اسکردو میں عوامی ا جتماع سے خطاب کرتے ہوئے کہا ہے کہ وزیراعظم کے اعلانات کا اگر گلگت بلتستان کے مسائل اور انکے اعلانات کا موازنہ کیا جائے تو انکے اعلانات کی نسبت مسائل بہت بڑے ہیں اور اگر انہیں گلگت بلتستان کے حوالے کچھ کرنے ہوتے تو ان دوسالوں میں بہت کچھ کر چکے ہوتے۔ انہوں نے کہا کہ نواز لیگ کی حکومت گلگت بلتستان سے ہر گز مخلص نہیں اگر مخلص ہوتی تو پاک چین اقتصادی راہداری کے ثمرات سب سے زیادہ گلگت بلتستا ن کو منتقل کرنے کی منصوبہ بندی کرتے لیکن افسوس کیساتھ کہنا پڑ رہا ہے اکنامککوریڈورکیلئے نواز شریف کو اپنے داماد کی سرزمین حویلیاں تو نظر آئیں لیکن گلگت بلتستان کو یکسر فراموش کر دیا۔نواز شریف دورہ گلگت کے موقع پر جرات مندانہ فیصلہ کرتے اور جرائت مندانہ اقدام اٹھاتے ہوئے گلگت بلتستان کی حقوق سے محروم عوام کو سینٹ اور پارلیمنٹ میں نمائندگی دینے کا اعلان کرتے اور اس خطے کو محرومی سے نکالنے کے لیے جامع پلان دے دیتے مگر ایسا نہیں کیا انکی تقریرسے لگ رہا تھا انہیں گلگت بلتستان کے بارے میں چندان معلومات بھی نہیں اور انکے اعلانات گلگت بلتستان کے مسائل کا احاطہ کرنے سے مکمل قاصر ہے۔
علامہ محمد امین شہید ی نے اپنی گفتگو میں مزید کہا کہ گلگت بلتستان کے حقوق سے محروم اور پسماندہ خطے کو وفاق سے جو بجٹ مہیا کی جاتی ہے وہ آٹے میں نمک کے برابر ہے ۔ اگر ہم دریائے سندھ کی رائیلٹی، کے ٹو، نانگا پربت کی رائیلٹی بنتی ہے اور یہاں کی عوام باالواسطہ اور بلاواسطہ کھربوں روپے وفاق کی طرف منتقل ہوتے ہیں لیکن وفا ق سے گنتی کے کچھ رقم مہیا ہوتے ہیں۔اگر یہی گنتی کے پیسے بھی بنیادی مسائل پر خرچ ہوتے تو کسی حد تک ان مسائل کا مداوا ہو سکتا تھا لیکن وہ پیسے بھی مکمل طور پر کرپشن اور بدعنوانی کے نذر ہو تے ہیں اگر صالح سیاسی قیادت ہوتی اور صالح حکمران ہوتے تو کسی حد تک ان مسائل پر قابو پایا جا سکتا لیکن ایسا نہیں ہوا ۔ انہوں نے کہا مجلس وحدت چاہتی ہے مسلک ، لسان، علاقہ ، گروہ اور دیگر تعصبات سے بالاتر ہوکرصالح اور اہل قیادت کو سامنے لایا جائے تاکہ عوامی مسائل کا حل مکمل ہوں۔آئندہ انتخابات کے حوالے سے مجلس وحدت بھر پور کردار ادا کرے گی اور مسلکی اختلافات کو بالائے طاق رکھ کر اہل امیدواروں کو سامنے لائے گی اور آئینی حقوق کے لیے جدوجہد کی جائے گی۔
