وحدت نیوز(اسلام آباد) مجلس وحدت مسلمین کے مرکزی جنرل سیکریٹری علامہ راجہ ناصرعباس جعفری نے سنی اتحاد کونسل کے مرکزی رہنما طارق محبوب کے زیر حراست انتقال پر شدید غم وغصے کا اظہار کرتے ہوئے کہا ہے اس واقعہ کی فوری تحقیقات ہونی چاہیے اور اس المناک سانحہ کے اسباب کا پتا لگایا جائے۔اگر ان کی موت تشدد سے واقعہ ہوئی تو بشمول حکومت کے تمام ذمہ داران کے خلاف دہشت گردی اور اقدام قتل کی ایف آئی آر درج کی جائے۔انہوں نے کہا کہ ملک میں امن کی خواہاں محب وطن تنظیموں کو حکومت نے زیر عتاب کر رکھا ہے جبکہ دہشت گردوں اور ان کے سہولت کاروں کو کھلی چھٹی دے دی گئی۔ اس حکومتی روش کو تبدیل ہونا پڑے گا۔سنی اتحاد کونسل اس ملک میں بسنے والے لاکھوں سنی العقیدہ افراد کی نمائندہ جماعت ہے اور اس نے ہمیشہ اخوت و بھائی چارے کا درس دیا۔اسے شدت پسندی اور ملک دشمن عناصر کے خلاف آواز بلند کرنے کی سزا دی جا رہی ہے۔علامہ راجہ ناصر نے سنی اتحاد کونسل کے چیئرمین صاحبزادہ حامد رضا کو فون کر کے تعزیت کی اور کہا کہ ہم اس غم میں برابر کے شریک ہیں۔ ہم طارق محبوب کا خون رائیگاں نہیں جانے دیں گے۔ انہوں نے مرحوم کی بلندی درجات اور پسماندگان کے لیے صبر جمیل کی دعا کی ہے۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری سیاسیات سید ناصر شیرازی نے کہا ہے کہ کراچی حلقہ این اے 246 کی نشست کے لیے ہونے والے انتخابات میں ایم ڈبلیو ایم نے ابھی تک کسی بھی سیاسی جماعت سے اتحاد کا اعلان نہیں کیا ہے۔اس سلسلے میں ایم کیوایم اور پی ٹی آئی سمیت دیگر سیاسی جماعتوں نے بھی ہم سے رابطے کیے ہیں ۔انتخابی اتحاد کے لیے ہمارے شعبہ سیاسیات اور مرکزی کابینہ کے اراکین میں گفت و شنید جاری ہے اور بہت جلد اس کا فیصلہ ہو جائے گا۔انہوں نے کہا ایم ڈبلیو ایم بلدیاتی انتخابات میں ملک بھر سے حصہ لے گی۔ خیبر پختونخواہ میں ہمارے بہت سارے امیدواروں نے اپنے کاغزات نامزدگی جمع کروا دیے ہیں اور ہم بہترین نتائج کے لیے پُر امید ہیں۔گلگت بلتستان میں جاری انتخابی عمل میں بھرپور اندازسے حصہ لیا جائے گا اس سلسلے میں مرکزی ڈپٹی جنرل سیکریٹری علامہ امین شہیدی اپنے وفد کے ہمراہ گلگت سکردو کے دورہ پر ہیں اور مختلف شخصیات سے میٹنگز کا سلسلہ جاری ہیں۔ پندرہ حلقوں میں ہمارے امیدوار بھرپور طریقے سے حصہ لے رہے ہیں ۔کچھ علاقوں میں ہم خیال سیاسی و مذہبی تنظیموں سے اتحاد پر بھی غور کیا جا رہا ہے۔ناصر شیرازی نے کہا کہ مجلس وحدت مسلمین سیاسی و مذہبی اعتبار سے ایک مضبوط تنظیم کے طور پر ابھر کر سامنے آئی ہے۔ وحدت و اخوت کا پرچار اور حب الوطنی اس تنظیم کی انفرادی شناخت ہے جسے انشا اللہ ہر حال قائم رکھا جائے گا اور یہی ہماری کامیابی کا باعث بھی بنے گا۔

وحدت نیوز (کھرمنگ) مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی نے اسکردو کھرمنگ میں عظیم الشان عوامی اجتماع سے خطاب کرتے ہوئے کہا کہ یہاں کی عوام کے پورے ملک پر احسانات ہیں، پاکستان کے ازلی دشمن ہندوستان کی سرحد پر موجود کے ٹو سے بھی بلند عزم و ہمت کے مالک یہ عوام وطن عزیز پاکستان کی سرحدوں کے امین اور محافظ ہیں۔ حساس ترین سرحدی علاقہ ہونے اور ہندوستان سے ملحق ہونے کے باوجود ریاستی اور سکیورٹی ادارے اگر اس خطے سے مطمئن ہیں تو اس کی وجہ یہاں کے عوام کی بے مثال حب الوطنی ہے۔ یہاں کی عوام دوسروں کی نسبت زیادہ محب وطن ہیں کیونکہ گلگت بلتستان کی غیرت مند ملت نے انتہائی نامساعد حالات کے باوجود جنگ آزادی میں اپنی قوت بازو سے اس خطے کے ظالم ڈوگرہ راج کو مار بھگایا اور قدرتی و انسانی وسائل سے مالا مال اس خطے کا پاکستان کے ساتھ بلامشروط الحاق کیا، آج بھی اس سرزمین سے بہنے والے دریا سے پنجاب اور دیگر علاقے سیراب ہو رہے ہیں، اس کے فلک بوس پہاڑ دنیا کی بلند ترین چوٹیاں پاکستان کے لیے سیاحتی مد میں کثیر زر مبادلہ کا ذریعہ ہیں، اس خطے میں چھپے ہوئے وسائل اتنے ہیں کہ پاکستان کو درپیش مسائل کا حل یہاں سے نکالا جاسکتا ہے، لیکن افسوس کا مقام ہے کہ یہاں کے عوام کی حب الوطنی اور شرافت سے غلط فائدہ لیا گیا۔

علامہ امین شہیدی کا کہنا تھا کہ اس خطے کا کم از کم حق اتنا ضرور بنتا ہے کہ اس خطے میں بسنے والوں کے لئے اتنے تو حقوق میسر ہوں جتنے پاکستان کے دیگر خطے کے رہنے والوں کے ہیں۔ انڈیا کے قریب ہونے والے خطہ کھرمنگ کی صورتحال دیکھ کر اندازہ ہوتا ہے کہ یہاں پر حکمرانوں نے قومی وسائل کو لوٹنے کے علاوہ کچھ نہیں کیا۔ ایل او سیز تک جانے والی سڑکوں کی ناپختہ حالت انتہائی افسوسناک، شرمناک اور خطرناک ہے، کھرمنگ سڑک بارڈر سے شہر تک آمد و رفت کا واحد ذریعہ ہے لیکن اسکی تعمیر و توسیع پر کسی کی توجہ نہیں، اگر گلگت بلتستان اسمبلی کے سابقہ حکمران اپنے دو مہینے کے اخراجات کو یہاں خرچ کرتے تو کھرمنگ کی ترقی کی صورتحال اتنی خراب نہیں ہوتی۔ عوام پر اور ترقیاتی کاموں پر خرچ ہونے والے قومی وسائل کرپشن کے نذر ہوگئے۔ انہوں نے کہا کہ 67 سالوں کی وفاداری کا صلہ اس خطے کو محرومی اور حقوق سے محروم رکھ کر دیا گیا، اب ایسا نہیں ہوگا۔ اب گلگت بلتستان کے عوام کے حقوق کے لئے نہ صرف ملک بھر میں بلکہ پوری دنیا میں آواز بلند کی جائے گی۔ اب تک گلگت بلتستان کو حقوق سے محروم رکھنے کی اصل ذمہ دار وہ تمام متعصب وفاقی جماعتیں ہیں جنہوں نے باریاں بدل بدل کر یہاں حکومتیں کرتی رہیں لیکن کسی بھی حکومت نے گوارا نہیں کیا کہ انہیں آئین حقوق دیئے جائیں۔

ایم ڈبلیو ایم کے مرکزی رہنما کا کہنا تھا کہ اب وہ زمانہ گزر گیا کہ وفاقی حکومت لولی پاپ اور جعلی اعلانات کے ذریعے اس خطے کے عوام پر حکومت کرے، اس خطے کے عوام باشعور ہوچکے ہیں اور آزمائے ہوئے کو آزمانہ نہیں چاہتے۔ مسلم لیگ (ن) کے سربراہ نے اپنے دورہ کے دوران جتنے اعلانات کئے ان میں اکثر اعلانات ایسے ہیں جن پر سابقہ حکومتوں میں کام جاری ہے۔ اگر وفاقی حکومت گلگت بلتستان سے مخلص ہوتی تو انکو حکومت میں آئے تیسرا سال ہونے کو ہے، لیکن اب تک ان کو گلگت بلتستان کی یاد کیوں نہیں آئی۔ وزیراعظم کے اعلانات یہاں کے عوام پر احسان نہیں بلکہ انکا حق ہے جسے عشروں سے محروم رکھا گیا ہے۔ اگر نواز حکومت مخلص ہوتی تو پاک چین اقتصادی راہداری میں اکنامک زون کو اپنے داماد کی سرزمین حویلیاں اور ڈی آئی خان منتقل نہ کرتی۔ انہیں اپنے دورہ کے موقع پر اتنی ہمت کرنی چاہیے تھی کہ گلگت بلتستان کو سینیٹ اور پارلیمنٹ میں نمائندگی دی جاتی لیکن ایسا نہیں ہوا۔ علامہ امین شہیدی نے کہا کہ گلگت بلتستان کے عوام کی آواز کوئی دبا نہیں سکتی، یہاں کی عوام باشعور ہوچکی ہے اور کسی ایسی جماعت یا فرد کا ساتھ نہیں دے سکتی جنہوں نے اپنے بینک بیلنس بنانے، اقربا پروری کو ہوا دینے، کرپشن کو عام کرنے کے علاوہ کچھ نہیں کیا۔ گلگت بلتستان کے آئندہ انتخابات میں عوام جمہوری طاقت کے ذریعے اپنا فیصلہ کرے گی اور اب کسی کو عوامی استحصال کی اجازت نہیں دی جائے گی۔