The Latest
ایم ڈبلیو ایم بلتستان کے رہنماءشیخ علی محمد کریمی کیخلاف انتظامیہ کیجانب سے بلاجواز دھمکی آمیز نوٹس
وحدت نیوز (گمبہ اسکردو) اسسٹنٹ کمشنر اسکردو کیجانب سے جاری نوٹس میں انہیں قانونی شکنی کرنے اور عوام کو ریاست کے خلاف ورغلانے کے الزمات عائد کرتے ہوئے آئندہ ایسے اقدامات سے باز رہنے کی دھمکی دی ہے۔ تفصیلات کے مطابق گمبہ اسکردو کی عوام نے گمبہ میں جاری بدترین بجلی کی لوڈشیڈنگ کے خلاف گمبہ اسکردو مالک اشتر چوک پر احتجاجی مظاہرہ کیا تھا، احتجاجی مظاہرے سے مجلس وحدت مسلمین بلتستان کے رہنما شیخ علی محمد کریمی، شیعہ علماء کونسل کے رہنما سید احمد موسوی اور دیگر نے خطاب کیا تھا۔ انہوں نے اپنے خطاب میں محکمہ برقیات کی بدترین نااہلی کو ظلم سے تعبیر کرتے ہوئے محکمہ برقیات اور اسکردو انتظامیہ کی مذمت کی تھی۔ احتجاج کے دوران محکمہ برقیات کے افسران سے مذاکرات کے بعد احتجاج ختم کر دیا گیا تھا۔ احتجاج ختم ہونے کے بعد اسسٹنٹ کمشنر اسکردو عمر چٹھہ نے ایک دھمکی آمیز نوٹس جاری کر دیا ہے اور واضح کیا ہے قومی ایکشن پلان پر عملدرآمد گلگت بلتستان میں شروع ہوگیا ہے اور اکیسویں ترمیم کے بعد کسی بھی شہری کو یہ حق حاصل نہیں کہ وہ احتجاج کرے، لاوڈسپیکر کا استعمال کرے اور سرکاری سڑکیں بلاک کرے۔ یہ سب قانون شکنی کے زمرے میں آتا ہے۔ اگر دوبارہ اس قسم کی سرگرمی کی گئی تو سختی سے نمٹا جائے گا اور قانونی کارروائی کی جائے گی۔ دوسری طرف مجلس وحدت مسلمین گمبہ اسکردو کی جانب سے ضلعی انتظامیہ کے اس غیر قانونی عمل کو علماء کی توہین قرار دیتے ہوئ اس کے خلاف کل ساڑے نو بجے مالک اشتر چوک اسکردو پر احتجاج کا اعلان کیا گیا ہے۔
وحدت نیوز (میرپورآزاد کشمیر) مجلس وحدت مسلمین امامیہ سٹوڈنٹس آرگنائزیشن امامیہ آرگنائزیشن انجمن امامیہ اور شعبہ علماء کونسل کی اپیل پر گستاخانہ خاکوں کیخلاف میرپور احتجاجی ریلی مرکزی امام بارگاہ سے شروع ہو ئی جو کہ چوک شہیداں میں جلسہ عام کی شکل اختیار کر گئی جس سے خطاب کرتے ہوئے مولانا تنویر حسین شیرازی نے خطاب کرتے ہوئے فرانسیسی جریدے میں شائع ہونے والے خاکوں کی شدید الفاظ میں مذمت کرتے ہوئے کہا کہ مسلمان اپنے نبیؐ کی شان میں گستاخی برداشت نہیں کرینگے ۔ انہوں نے کہا کہ اس وقت پوری دنیا میں عالم اسلام کے خلاف صہیونی طاقتیں متحد ہو چکی ہیں مسلمان حکمران متحد ہو کر کفر کی اس ریلغار کو روکنے کیلئے ان کا بائیکاٹ کریں ۔ جلسہ سے سید محمود حسین بخاری ، صدر ڈسٹرکٹ بار خالد رشید ایڈووکیٹ ، سید مسلم رضا ، سید ناظر عباس ، سید منتظر عباس ، سید قیصر شیراز کاظمی ، پروفیسر سید طاہر نقوی ، سید خیام نقوی و دیگر نے بھی خطاب کیا مقررین نے گستاخانہ خاکوں کی شدید مخالفت کرتے ہوئے پاکستان کی حکومت سے سفارتی تعلقات ختم کرنے کا مطالبہ کیا ۔
وحدت نیوز(ملتان) مجلس وحدت مسلمین پاکستان اور امامیہ اسٹوڈنٹس آرگنائزیشن پاکستان کے زیراہتمام آرمی پبلک سکول پشاور میں شہید ہونے والوں بچوں کے چہلم کی مناسبت سے چوک نواں شہر ملتان میں تقریب منعقد کی گئی۔ تقریب کی صدارت مجلس وحدت مسلمین پنجاب کے ڈپٹی سیکرٹری جنرل علامہ سید اقتدار حسین نقوی، امامیہ اسٹوڈنٹس آرگنائزیشن پاکستان ملتان کے صدر ڈاکٹر قمر علی رضانے کی۔ اس موقع پر مجلس وحدت مسلمین اور آئی ایس او کے کارکنان کی ایک بڑی تعداد موجود تھی۔ چہلم کے موقع پر شہدائے کو خراج تحسین اور زخمیوں سے اظہار یکجہتی کے لیے شمعیں روشن کی گئیں۔ آخر میں شہدائے پشاور کی بلندی درجات اور زخمیوں کی صحتیابی کے لے خصوصی دعا کرائی گئی۔ اس موقع پر علامہ غلام مصطفیٰ انصاری، علامہ مظہر عباس، سید دلاور عباس زیدی، سخاوت علی، وسیم عباس زیدی اور حسنین انصاری، قاسم جعفری اور دیگر موجود تھے۔
وحدت نیوز (پشاور) مجلس وحدت مسلمین خیبر پختونخوا کے ڈپٹی سیکرٹری جنرل علامہ سید وحید عباس کاظمی نے کہا ہے کہ ایم ڈبلیوایم کی صوبائی شوریٰ کا دو روزہ اجلاس 31 جنوری کو پشاور میں طلب کیا گیا ہے، جس میں تنظیم کی فعالیت، شعبہ جاتی کارکردگی اور دیگر امور پر بحث اور فیصلہ جات کئے جائیں گے، ان کا کہنا تھا کہ اجلاس 31 جنوری بروز ہفتہ شروع ہوگا اور یکم فروری کو دوسرے روز تک جاری رہے گا۔ اجلاس کی صدارت صوبائی سیکرٹری جنرل علامہ سید سبطین الحسینی کریں گے، جبکہ صوبائی کابینہ کے اراکین اور تمام اضلاع کے مسئولین شریک ہوں گے۔
وحدت نیوز (ملتان) مجلس وحدت مسلمین پنجاب کے ڈپٹی سیکرٹری جنرل علامہ سید اقتدار حسین نقوی نے کہا ہے کہ سانحہ پشاور کو حکومت سنجیدگی سے لے اور ملک بھر میں موجود وزیرستان کے خلاف کارروائی کرے۔ پاکستان میں اسلحہ کی سیاست کرنے والوں کے خلاف بھی کارروائی کرنی چاہیئے۔ دارالحکومت میں واقع وزیرستان کو فی الفور مسمار کیا جائے۔ ان خیالات کا اظہار اُنہوں نے ملتان میں آرمی پبلک سکول کے شہداء کی چہلم کی تقریب سے خطاب کرتے ہوئے کیا۔ علامہ اقتدار نقوی کا مزید کہنا تھا کہ پشاور میں جس طرح بےگناہ بچوں کا خون بہایا گیا اگر پھر بھی حکمران خواب غفلت سے بیدار نہ ہوں تو ہم سمجھیں گے کہ حکومت دہشت گردی کو روکنے میں نہیں بلکہ دہشت گردی کرا رہی ہے۔ اُنہوں نے زخمیوں اور شہداء کے لواحقین کو خراج تحسین پیش کرتے ہوئے کہا کہ ہم سب دکھ کی اس گھڑی میں آپ کے ساتھ ہیں لیکن آپ نے اپنے بچوں کی شہادت کے باعث خدا کی قربت حاصل کرلی ہے۔
وحدت نیوز (خیبرپختون خواہ) مجلس وحدت مسلمین خیبر پختونخواہ کی صوبائی کابینہ کے وفدنے تین روزہ کوہاٹ ہنگو ، پشاور، ہری پور اور ایبٹ آباد کا دورہ کیا جہاں پر انہوں نے مجلس وحدت مسلمین کے ضلعی عہداروں سے ملاقاتیں کئے اور ضلع کے موجودہ مسائل جانے۔ اس دوران سیکرٹری سیاسیات برادر تنویر مہدی شعبہ سیاسیات کے افادیت پر روشنی ڈالی انہوں نے کہا مجلس وحدت مسلمین پاکستان نے فیصلہ کیا ہے کہ بلدیاتی الیکشن میں بھرپور طریقے سے حصہ لیں گے کیونکہ یہ وقت کی ضرورت ہے انہوں نے فوجی عدالتوں کے حوالے سے بتایا کہ سول عدالتیں انصاف دینے میں بالکل ناکام ہوچکی ہے یہ وقت کی ضرورت ہیں کہ دہشتگردوں سے اہنی ہاتھوں سے بغیر کسی مداخلت نمٹا جائے۔ اس موقع صوبائی سیکرٹری یوٹھ برادر صفدر بلوچ نے کہا وحدت اسکاوٹس پورے پاکستان میں احسن طریقے سے کام جاری رکھے ہوئے انشااللہ کے پی کے میں بہت جلد اسکاوٹس کیمپ کا آغاز کیا جائے گا انہوں نے کہا مرکزی اسکاوٹس کیمپ میں بھر شرکت کی جائے گی۔ دورہ ہزارہ کے دوران وفد میں مجلس وحدت مسلمین کے پی کے کے ڈپٹی سیکرٹری جنرل علامہ جہانزیب جعفری ،صوبائی سیکرٹر ی تنظیم سازی علامہ وحید کاظمی، صوبائی آفس مسئول ارشاد حسین بنگش بھی موجود تھے۔
وحدت نیوز (کوئٹہ) مجلس وحدت مسلمین پاکستان کے سیکرٹری سیاسیات ناصرعباس شیرازی نے کوئٹہ پریس کلب ميں پریس کانفرنس کے دوران حلقہ نمبر 10سے منتخب آزادکونسلر کربلائی عباس علی کی ایم-ڈبلیو-ایم میں شمولیت کا اعلان کیا۔ اس موقع پر مجلس وحدت مسلمین کوئٹہ کے رہنماء بشمول ممبر صوبائی اسمبلی آغا رضا ، ڈویژنل سیکریٹری جنرل عباس موسوی اور کونسلر کربلائی رجب علی بھی ان کے ہمراہ موجود تھے۔
واضح رہے کہ مجلس وحدت مسلمین پاکستان کے پلیٹ فارم سے عام انتخابات 2013ء میں ملت تشیع پاکستان کے مینڈیٹ سے آغا رضا بلوچستان اسمبلی کے ممبر منتخب ہوئے تھے اور بعدازاں بلدیاتی انتخابات ميں حلقہ نمبر 12 سے کربلائی رجب علی بھی مجلس وحدت مسلمین پاکستان کے پلیٹ فارم پر ملت تشیع پاکستان کے مینڈیٹ سے کونسلر منتخب ہوئے تھے، حلقہ نمبر9سے آزاد حیثیت سے منتخب ہونے والے کونسلر محمد مہدی بھی ڈویژنل سیکریٹری جنرل عباس موسوی کے ہمراہ پریس کانفرنس کرتے ہوئے ایم ڈبلیوایم میں باضابطہ شمولیت کا اعلان کیا تھا اور اب حلقہ نمبر 10 سے آزاد حیثیت ميں کونسلر کا انتخاب جیتنے والے کربلائی عباس علی نے بھی مجلسِ وحدت مسلمین پاکستان میں باضابطہ شمولیت کا اعلان کردیا ہے۔وحدت نیوزکوئٹہ کے نمائندے سید ہادی کے مطابق کوئٹہ کے میئر اور ڈپٹی میئر کے آئندہ انتخاب میں ایم ڈبلیوایم کے کونسلرز کا اہم کردار ہوگا، اس سلسلے میں ایم ڈبلیوایم اور پشونخواہ ملی عوامی پارٹی کے درمیان اتحاد بھی طے پا چکا ہے، امید کی جارہی ہے کہ ایم ڈبلیو ایم ڈپٹی میئر کوئٹہ کے انتخاب میں کامیاب ہو جائے گی۔
وحدت نیوز (ہنگو/بنوں) مجلس وحدت مسلمین خیبر پختونخوا کے سیکرٹری سیاسیات تنویر مہدی، سیکرٹری یوتھ ونگ صفدر بلوچ اور مرکزی سکاوٹس انچارج مجاہد تیمار نے ضلع بنوں، کوہاٹ اور ہنگو کا دورہ کیا، وفد نے دورہ بنوں کے دوران ضلعی کابینہ کے اراکین سے ملاقات کی، اس موقع پر صوبائی سیکرٹری یوتھ ونگ صفدر بلوچ نے مجاہد علی کو ضلعی وحدت سکاوٹس لیڈر کا سکارف پہنایا۔ علاوہ ازیں وفد نے ضلع کوہاٹ اور ہنگو کا بھی دورہ کیا، جہاں پر صوبائی ڈپٹی سیکرٹری جنرل علامہ ارشاد علی اور ضلعی سیکرٹری جنرل حاجی علی داد خان سے ملاقات کی۔ اس موقع پر ضلع ہنگو کے سیکرٹری یوتھ ونگ کے طور پر حجت علی کا انتخاب کیا گیا، دورہ کے دوران سیاسی صورتحال کے حوالے سے بھی گفتگو ہوئی، جس میں یہ طے پایا کہ بلدیاتی الیکشن میں بھرپور انداز میں حصہ لیا جائے گا، جس کے لئے رابطوں کا آغاز ہوچکا ہے۔
وحدت نیوز (کوئٹہ) بلوچستان نیشنل پارٹی کے مرکزی رہنماء اور سابق ایم پی اے میرمحمد اکبر مینگل نے مجلس وحدت مسلمین بلوچستان کے سیکریٹری جنرل علامہ مقصود علی ڈومکی سےوحدت ہاوس میں ملاقات کی۔ ملاقات میں ملکی سیاسی صورتحال اور بلوچستان کے مسائل پر تبادلہ خیال کیا گیا۔ اس موقع پر گفتگو کرتے ہوئے علامہ مقصود علی ڈومکی نے کہا ہے کہ مذہب کے نام پر ہونے والی دہشت گردی اور معصوم انسانوں کا قتل عام قابل مذمت ہے، تمام امن پسند قوتیں متحد ہوکر دہشت گردوں کے عزائم خاک میں ملا دیں، ہم نے ہمیشہ مذہب کے نام پر ہونے والی دہشت گردی کے خلاف موثر آواز بلند کی۔ بلوچستان کے عوام گذشتہ 67 سالوں سے محرومیت کا شکار ہیں ،یہاں کے عوام کو ان کے حقوق سے محروم رکھا گیا ہے۔ اس موقعہ پر گفتگو کرتے ہوئے میر محمد اکبر مینگل نے کہا کہ بلوچستان میں امن و امان کی صورتحال انتہائی مخدوش اور عوام احساس عدم تحفظ کا شکار ہیں۔ بی این پی مینگل نے ہمیشہ مذہبی منافرت اور دہشت گردی کی مذمت کی ہے، بلوچستان کے عوام آج بھی ضروریات زندگی سے محروم ہیں، یہاں کے باشندے بجلی ،گیس، صاف پانی، صحت اور تعلیم جیسی بنیادی ضروریات سے محروم ہیں۔ اس موقع پر مجلس وحدت مسلمین بلوچستان کے صوبائی سیکرٹری تنظیم سازی مولانا برکت علی مطہری، سیکرٹری فلاح و بہبود مولانا سہیل اکبر شیرازی اور مولانا سیف علی بلوچ بھی موجود تھے۔
وحدت نیوز (اسلام آباد) آل پارٹیزحریت کانفرنس مقبوضہ کشمیر کے رہنما سید حسن الموسوی الصفوی بڈگامی نے اسلام آباد میں مجلس وحدت مسلمین کے سیکرٹری امورسیاسیات ناصرعباس شیرازی سے ملاقات کی ہے۔ مرکزی سیکرٹریٹ میں ہونے والی ملاقات میں ایم ڈبلیوایم پنجاب کے ترجمان علامہ اصغر عسکری، اقرار ملک،علامہ ضیغم عباس ،علامہ محمد حسین مبلغی،علامہ علی شیر انصاری اور دیگر رہنما بھی موجود تھے۔ملاقات کے اختتام پر مشترکہ پریس کانفرنس کرتے ہوئے مجلس وحدت مسلمین کے سیکریٹری امورسیاسیات ناصر عباس شیرازی نے کشمیریوں کے حق خود ارادیت کی بھرپور تائید کرتے ہوئے مجلس وحدت مسلمین کی طرف سے اخلاقی تعاون کی مکمل یقین دہانی کرائی ہے۔ ناصر شیرازی کا کہنا تھا کہ کشمیریوں کو جب تک اقوام متحدہ کی قراردادں کے مطابق استصواب رائے کا حق نہیں ملتا اُس وقت تک خطے میں امن کا قیام ممکن نہیں ہے۔ہم ہر فورم پر کشمیر کی مظلوم عوام کی اخلاقی ،سیاسی اور سفارتی حمایت جاری رکھیں گے،کشمیر کاز کی حمایت دراصل انسانی حقوق کی حمایت ہے ،عالمی اور علاقائی امن کے لیے مسئلہ کشمیر کو جلد حل کرنے کی ضرورت ہے ،کشمیر کے مسئلے کا حل کشمیری عوام کی رائے کے مطابق ہونا چاہیے یہ ان کا بنیادی اور انسانی حق ہے جس کی توثیق متعددبار عالمی اداروں اور اقوام متحدہ کی جانب سے بھی کی گئی ہے ۔مجلس وحدت مسلمین پاکستان حریت کانفرنس کے اُٹھائے گئے ہر قدم کی حمایت کرتی ہے اور اپنے عزم کو دہرتی ہے کہ ہم کشمیری عوام کو تنہا نہیں چھوڑے گے۔
اس موقع پر حریت کانفرنس کے رہنما آغاسید حسن الموسوی الصفوی نے مجلس وحدت مسلمین پاکستان کا شکریہ ادا کرتے ہوئے کہا کہ مجلس وحدت مسلمین پاکستان کے رہنماوُں اور کارکنان کے جذبات کو انشااللہ کشمیری عوام تک پہنچاوُں گا ، ہم اقوام متحدہ کی قراردادوں کے مطابق کشمیر کا پرامن حل چاہتے ہیں،انہوں نے کہا کہ یہ کیسی جمہورت ہے جہاں لوگوں کی رائے کا احترام نہیں کیاجاتا، ہم نہ پہلے ہندوستان کا حصہ تھے اور نہ رہے ہیں اور نہ حصہ بنیں گے۔ عالمی برادری کشمیر کے مسئلے کو حل کرنے میں ناکام ہوچکی ہے۔ بھارت کو یوم جمہوریہ منانے کاکوئی حق نہیں ہے، کیوں کہ جمہوریت میں عوام کی رائے کو احترام دیا جاتا ہے جبکہ کشمیری عوام کی رائے کو کوئی اہمیت نہیں دی جارہی۔
