وحدت نیوز(پشاور) مجلس وحدت مسلمین خیبر پختونخوا کے رہنماء ارشاد حسین بنگش  نے جمعیت علمائے اسلام (ف) کے رہنماوں کی جانب سے اسلام آباد میں پاکستان عوامی تحریک اور اس کی اتحادی جماعتوں کی جانب سے دیئے جانے والے دھرنے کو تنقید کا نشانہ بنانے کی شدید الفاظ میں مذمت کرتے ہوئے کہا ہے کہ ملک و قوم کی خاطر گذشتہ دو ہفتے سے بھرپور استقامت اور ہمت کا مظاہرہ کرنے والے عوام کا مذاق اڑانا اور ان کی پاکیزہ اور حق پر مبنی جدوجہد پر اعتراضات اٹھانا انتہائی افسوسناک ہے، وحدت ہاوس سے جاری اپنے ایک بیان میں ان کا کہنا تھا کہ انقلاب مارچ میں شریک مائیں، بہنیں، جوان، بزرگ اور بچے اپنے اقتدار کیلئے نہیں بلکہ 20 کروڑ عوام کے حقوق کے حصول کیلئے گذشتہ دو ہفتوں سے سڑکوں پر ہیں، اور دھرنے میں فحاشی و عریانی کے نازیبا الزامات عائد کرنے والے شائد حقیقت سے واقف نہیں، انہوں نے کہا کہ انقلاب مارچ کے شرکاء ناچ گانوں کی بجائے نماز، دعا و مناجات، درود پاک، تسبیح اور دیگر عبادات الٰہی میں مصروف ہیں، ان مظاہرین نے اپنے نظم و نسق، اور رویئے سے عالمی میڈیا کو بھی اپنی جانب متوجہ کیا، ارشاد حسین بنگش نے کہا کہ دھرنے کے شرکاء درود والے ہیں، بارود والے نہیں، انقلاب مارچ کے شرکاء کو تنقید کا نشانہ بنانے والے پہلے اپنے گریبانوں میں جھانکیں، رسول اکرم (ص) اور نواسہ رسول (ع) کے ان عاشقوں کو کامیابی اللہ تعالیٰ کی مدد و نصرت سے جلد نصیب ہوگی۔

وحدت نیوز(کوئٹہ) مجلس وحدت مسلمین کے سربراہ علامہ مقصودعلی ڈومکی نے کہا ہے کہ لاہور ہائی کورٹ کے فیصلے کے بعد اب شہباز شریف ، نواز شریف اور سانحہ ماڈل ٹاون کے دیگر ذمہ داران کے خلاف عدالت کے فیصلے کے مطابق ایف ائی ار درج کی جائے ، اس ملک میں کمزور اور طاقتور کیلئے علیحدہ قانون ہے۔ جبکہ مظلوموں اور کمزوروں کی آواز سننے والا کوئی نہیں مگر لاہور ہائی کورٹ کے با ضمیر جج نے عدل و انصاف کے حق میں فیصلہ دے کر ایک نئی تاریخ رقم کی ہے۔

انہوں نے کہا کہ کوئٹہ میں گذشتہ پندرہ سالوں میں ہم نے سینکڑوں شھیدوں کے جنازے اٹھائے مگر ہمیں کسی ادارے سے انصاف نہیں ملا۔ مظلوم شہری اور وارثین شہداء کو انصاف دینے والا کوئی نہیں، ریاستی ادارے دہشت گردوں کے آگے بے بس اور لاچار نظر آتے ہیں۔ اعلیٰ عدالتیں بھی قاتلوں کو تختہ دار پر لٹکانے میں ناکام رہیں۔ سیکڑوں شہداء کے ورثاء کا اعتماد نظام عدل و انصاف سے اٹھ چکا ، ہم مظلوم ہیں اس لئے مظلوم کے درد کو سمجھتے ہیں۔

انہوں نے کہا کہ ڈاکٹرطاہرالقادری اور انقلاب مارچ مظلوموں کی آواز بن چکا ہے جمہوریت کے چیمپیئن اپنے قول اور فعل کے تضاد کوختم کرتے ہوئے غریبوں ، مسکینوں کے حال پر رحم کھائیں ۔ جنہوں نے دونوں ہاتھوں سے قومی دولت کو لوٹا اور بادشاہوں کی طرح محلات میں رہتے ہیں انہیں غریبوں اور مسکینوں سے کیا ہمدردی ہوگی۔ انہوں نے کہا کہ کوئٹہ کا گورنر ہاؤس شاھانہ زندگی گزارنے کی اعلٰی مثال اور بلوچستان کے مظلوموں اور غریبوں کا مزاق اڑانے کے مترادف ہے ،اب وقت آچکا ہے کہ اس نظام کو بدلہ جائے اور دور غلامی کے تمام آثار مٹائے جائیں۔

وحدت نیوز(اسلام آباد) مجلس وحدت مسلمین کے سربراہ علامہ ناصرعباس جعفری نے اپنے بیان میں کہا ہے کہ نجی ٹی وی پر سامنے والی جوڈیشل کمیشن کی رپورٹ سے واضح ہوگیا ہے کہ وزیر اعلیٰ شہباز شریف قاتل اعلیٰ ہیں اور انہیں کے ایماں پر ماڈل ٹاؤن میں خون کی ہولی کھیلی گئی، خدا کی لاٹھی بے آواز ہے، انشاء اللہ حکمران اپنے منطقی انجام کو پہنچیں گے۔ انہوں نے کہا کہ اڑتالیس گھنٹے کی ڈیڈلائن سے پہلے ہی حکمران اپنے انجام سے دوچار ہوجائیں گے۔ ہمارا پہلے دن سے یہی موقف رہا ہے کہ سانحہ ماڈل ٹاؤن میں ملوث افراد کیخلاف ورثاء کی جانب سے ایف آئی آر درج ہونی چاہیے، لیکن حکمرانوں نے پیسے اور طاقت کے بل بوتے پر یہ کام نہیں ہونے دیا ۔ ہم اپنے خون کے آخری قطرہ تک ڈاکٹر طاہرالقادری کے ساتھ ہیں اور مظلوموں کی حمایت سے پیچھے نہیں ہٹیں گے۔ انہوں نے لاہور ہائی کورٹ کی جانب سے سیشن کورٹ کے فیصلے کو برقرار رکھنے کے فیصلے کو خوش آئند قرار دیا ، علامہ ناصر کا کہنا تھا کہ اب بھی اگر ظالموں کے خلاف مقدمہ درج نہیں ہوتا تو پھر ثابت ہوجائیگا کہ پاکستان میں کوئی قانون نام کی چیز نہیں ہے۔انہوں نے تمام سیاسی جماعتوں سوال کیا کہ جوڈیشل کمیشن کی رپورٹ منظر عام پر آنے کے بعد انہیں اپنے لبوں کو کھولنا چاہیے، قبرستان جیسی خاموشی جمہوری معاشرے کی نفی ہے۔

وحدت نیوز(اسلام آباد) مجلس وحدت مسلمین پاکستان کے مرکزی رہنما نثارعلی فیضی نے کہا کہ نواز حکومت حواریوں کے ساتھ مل کر اپنی بادشاہت کو بچانے کے لیے پورا زور لگا رہی ہے لیکن وہ مظلوموں کے صبر و استقامت کے سامنے زیادہ دیر نہیں ٹھہر سکتے ،سانحہ ماڈل ٹاﺅن کے شہداءکا لہو انکی آمرانہ حکومت کی کشتی کو ڈبو کر ہی رہیگا دھرنے کے شرکاءشہداءکے خون کے امین ہیں اور اسوقت تک پیچھے نہیں ہٹیں گے جب تک نواز شریف کی خاندانی بادشاہت کی بساط لپیٹ نہ لیں، ان خیالات کا اظہار انہوں نے صحافیوں سے گفتگو کرتے ہوئے کیا۔

نثار علی فیضی نے کہا کہ مجلس وحدت مسلمین اور دیگر تمام اتحادی جماعتوں کا اس بات پر اتفاق ہے کہ سانحہ ماڈل ٹاﺅن کے شہداءکے ورثاءکو اسوقت ہی انصاف مل سکتا ہے جب نواز اور شہباز شریف مستعفی ہو کر قانون کے کٹہرے میں کھڑے ہونگے،بھڑکیں مارنے، جذباتی بیانات اور پیڈ ریلیوں سے حکمران اب اپنے جعلی اقتدار کو نہیں بچا سکتے اور انہیں ہر صورت میں جانا ہی ہو گا ۔مجلس وحدت مسلمین نے روز اول سے ہرمظلوم کا ساتھ دیا اور ہر ظالم کے خلاف آواز بلند کی اور آج بھی اسی بات پر عمل پیرا ہے۔انہوں نے کہا کہ سانحہ ماڈل ٹاﺅن پاکستانی تاریخ کا بد ترین واقعہ ہے جس میں ظالم اور کرپٹ حکمرانوں نے اپنے اقتدار کی خاطر چودہ افراد کو شہید اور درجنوں کو زخمی کر ا دیا اور آ ج تک ایف آئی آر بھی درج نہیں ہونے دے رہے جو کہ انسانی حقوق کی کھلی خلاف ورزی ہے اور جب مظلوم کو اس کا حق نہ ملے تو وہ انصاف کے لیے باہر نہ نکلے تو اور کیا کرے۔