وحدت نیوز(ملتان) سانحہ مستونگ میں بے گناہ زائرین کی شہادتوں کے خلاف علامہ راجہ ناصر عباس جعفری کی اپیل پر نواں چوک ملتان پر بھی احتجاجی دھرنا دیا گیا ، دھرنے کی قیادت مجلس وحدت مسلمین ملتان کے سیکرٹری جنرل علامہ سید اقتدار حسین نقوی، علامہ قاضی نادر حسین علوی، علامہ محمد حسین مہدوی، امامیہ اسٹوڈنٹس آرگنائزیشن پاکستان کے مرکزی جنرل سیکرٹری تہور حیدری، محمد عباس صدیقی اور دیگر کر رہے ہیں۔مجلس وحدت مسلمین پاکستان کے مرکزی سیکریٹری سیاسیات ناصر عباس شیرازی ایڈووکیٹ نے خصوصی خطاب بھی کیا

دھرنے سے خطاب کرتے ہوئے مجلس وحدت مسلمین ضلع ملتان کےسیکریٹری جنرل علامہ اقتدار نقوی کا کہنا تھا کہ نواز لیگ مظلوم اکثریت پر ظالم اقلیت کو مسلط کر نے سے باز رہے، جب تک شہداء کے ورثاء کے مطالبات تسلیم نہیں کیے جاتے ہمارا دھرنا جاری رہے گا۔ اُنہوں نے مزید کہا کہ جب تک کوئٹہ کے شہداء کی تدفین نہیں ہوجاتی ہمارا دھرنا اور احتجاج جاری رہے گا۔ اس موقع پر مرد، خواتین، بچے بوڑھے اور جوانوں کی بڑی تعداد موجود ہے۔ دھرنے کے شرکاء کے لیے لنگر، نیاز، چائے اور سوپ کا اہتمام کیا گیا ہے۔ دیگر مقررین کا کہنا تھا کہ وفاقی حکومت کی جانب سے ابھی تک رابطہ نہ کرنے سے معلوم ہوتا ہے دہشت گردوں کی حکومت ہے انسانوں کی نہیں۔ دھرنے کے شرکاء کا کہنا ہے ہمیں یہاں پر ایک مہینہ بھی بیٹھنا پڑے تو بیٹھیں گے لیکن شہداء کوئٹہ کے ورثاء کے ساتھ اظہار یکجہتی کرتے رہیں گے۔