وحدت نیوز(کراچی)مجلس وحدت مسلمین کراچی ڈویژن کی کابینہ کا اہم اجلاس صدر کراچی علامہ صادق جعفری کی سربراہی میں وحدت ہاؤس انچولی میں منعقد ہوا ،اجلاس سے خطاب کرتے ہوئے علامہ صادق جعفری نے کہا کہ غزہ کے مظلومین کی مدد ہمارا شرعی فریضہ ہے اور مجلس وحدت مسلمین پاکستان اس فریضے کی ادائیگی کیلئے مسلسل کوشاں ہے۔ مظلوم فلسطینیوں کی حمایت ہماری تنظیمی ترجیحات میں سب سے پہلی ترجیح ہے۔
اجلاس میں مولانا حیات عباس نجفی ،مولانا ملک غلام عباس ،مولانا نشان حیدر ،علامہ مبشر حسن ،زیشان حیدر عباس حیدر ،آصف صفوی ،زین عباس معمبر رضا سمیت دیگراراکین بھی موجود تھے۔
انہوں نے کہا کہ مظلوموں کی مدد و حمایت ہمارے آئمہؑ اور قائد شہید علامہ عارف حسینیؑ کا راستہ ہے، مجلس وحدت کی مسئولیت ہمارے پاس ایک امانت ہے۔ ہمیں چاہیئے کہ قائد شہید کے راستے کو مزید بہتر انداز میں جاری رکھنے کیلئے جامع منصوبہ بندی کریں۔
انہوں نے اس حوالے سے کابینہ کے سامنے متعدد نکات پیش کئے، جنہیں پر حاضرین نے سیر حاصل بحث کی۔، اس اجلاس میں زیادہ تر توجہ فلسطینی صورتحال، تنظیمی امور اور ملکی سیاسی حالات پر مرکوز رکھی گئی۔
