وحدت نیوز(کوئٹہ) پنجاب میں ٹارگٹ کلنگ اور دہشتگردی میں مسلسل اضافہ ہو رہا ہے اور اسکی روک تھام کے سلسلے میں کوئی بھی سنجیدہ اقدامات نہ کرنا پنجاب حکومت کی کارکردگی پر سوالیہ نشان ہے۔ اتحاد بین المسلمین کیلئے سرگرم افراد بالخصوص علمائے کرام کو مسلسل نشانہ بنایا جا رہا ہے، جسکی جتنی مذمت کی جائے کم ہے۔ گذشتہ کئی مہینوں سے عوام کا قتلِ عام ہو رہا ہے جبکہ حکومت اور انتظامیہ خاموش تماشائی کا کردار ادا کر رہی ہے۔ جو اس بات کا ثبوت ہے کہ حکومت عوام کی جان و مال کے تحفظ کیلئے سنجیدہ نہیں، جس سے دہشتگردوں کے حوصلے بلند ہو رہے ہیں۔ بعض سازشی عناصر اس طرح کے واقعات کروا کر ملک میں فرقہ واریت کو ہوا دینے کی کوشش میں مصروف ہیں۔ اس حوالے سے صوبائی وزیر قانون رانا ثناءاللہ کا کردار کافی مشکوک رہا ہے۔ان خیالات کا اظہار مجلس وحدت مسلمین کوئٹہ ڈویژن کے سیکریٹری جنرل سید عباس علی موسوی ، علامہ ولایت جعفری اور دیگر رہنمائوں نے وحدت ہائوس کوئٹہ سے جاری اپنے تعزیتی بیان میں کیا ۔
مجلس وحدت مسلمین نے سانحہ راولپنڈی کے بعد رانا ثناءاللہ کی برطرفی کا مطالبہ بھی کیا تھا اور کہا تھا کہ اُن کا تانا بانا دہشتگردوں کے ساتھ ہے اور وہ قائم جوڈیشل کمیشن پر اثر انداز ہونے کی کوشش کر رہے ہیں لیکن حکومت نے اس بات کا نوٹس نہیں لیا جو پنجاب کی امن و امان کے حوالے سے بہت اہم ہے۔ حکومت اگر پنجاب میں امن کا قیام چاہتی ہے تو اُسے فوری طور پر رانا ثناءاللہ کو اس کے عہدے سے برطرف کرنا ہو گا۔ بیان میں حکومت سے علامہ ناصر عباس کے قاتلوں کو فی الفور گرفتار کرکے قرار واقعی سزاء کا مطالبہ کیا گیا اور علامہ صاحب کے اہل خانہ سے دلی ہمدردی کا اظہار کیا گیا اور اُن کے درجات کے بلندی کیلئے دعا کی گئی۔
