وحدت نیوز(پشاور) مجلس وحدت مسلمین خیبر پختونخوا کے سربراہ علامہ سید وحید عباس کاظمی نے کہا ہے کہ نائجیرین حکومت نے معروف بزرگ مذہبی رہنماء علامہ شیخ ابراہیم ذکزکی کو کئی سالوں سے بے جرم و خطا قید میں رکھا ہوا ہے، حکومت پاکستان سفارتی ذرائع کا استعمال کرتے ہوئے ابراہیم ذاکزکی کی رہائی کیلئے کردار ادا کرے۔

 وحدت ہاوس پشاور سے جاری ایک اخباری بیان میں ان کا کہنا تھا کہ شیخ ابراہیم ذکزکی عالمی سطح پر جانے جانیوالی مذہبی شخصیت ہیں، انہوں نے نائجیریا جیسے ملک میں دین اسلام کی تبلیغ کیلئے تاریخی کردار ادا کیا، جس کی وجہ سے کروڑوں افراد مذہب حقہ کی جانب راغب ہوئے، امریکہ کے اشاروں پر نائیجرین حکومت نے محض اسلام دشمنی میں شیخ ابراہیم ذکزکی کے بیٹوں سمیت اب تک سینکڑوں مسلمانوں کو شہید اور خود شیخ صاحب کو ساڑھے تین برس سے زائد عرصہ سے پابند سلاسل کر رکھا ہے، جہاں ان کی حالت انتہائی نازک بتائی جاتی ہے۔

 علامہ وحید کاظمی نے مزید کہا کہ عالم اسلام کے اس عظیم رہنماء کی رہائی کیلئے نہ صرف مذہبی و سیاسی جماعتوں کو آواز بلند کرنے کی ضرورت ہے بلکہ پاکستانی عوام بھی اس حوالے سے اپنا مذہبی و اخلاقی فریضہ ادا کریں۔ حکومت پاکستان سفارتی ذرائع استعمال کرتے ہوئے شیخ ابراہیم  ذکزکی کی رہائی کیلئے کوششیں کرے، اقوام متحدہ اور دیگر انسانی حقوق کی تنظیموں سے بھی اپیل ہے کہ وہ اپنا کردار ادا کرتے ہوئے علامہ ذکزکی کو رہا کروانے کی کوشش کریں۔

وحدت نیوز(اسلام آباد) مجلس وحدت مسلمین کا4اگست پریڈگراؤنڈ پر ناصران ولایت کانفرنس کااعلان۔ کانفرنس کا انعقاد شہید علامہ سید عارف حسین الحسینی کی 31ویں برسی کی مناسبت سے کیا جارہا ہے اس حوالے سے باقاعدہ دعوتی مہم کا باقاعدہ بھی کردیاگیا ہے۔ ایم ڈبلیوایم کی مرکزی کابینہ کے اجلاس میں کانفرنس کے انعقاد کے حوالے سے انتظامات کا جائزہ لیا گیا اور مختلف امور پر کمیٹیاں تشکیل دی گیں ہیں ۔ دعوتی مہم کے سلسلے میں مختلف وفود بنائے گئے ہیں جو کہ اسلام آباد سمیت پنڈی ڈویژن میں بھی مختلف سیاسی سماجی اور مذہبی شخصیات کو کانفرنس میں شرکت کی دعوت دے رہے ہیں ۔ ناصران ولایت کانفرنس میں ملک بھر بالخصوص وسطی پنجاب سے ہزاروں کارکنان کی شرکت متوقع ہے۔

مرکزی کابینہ کے اجلاس سے خطاب کرتے ہوئے سربراہ مجلس وحدت مسلمین علامہ راجہ ناصرعبا س جعفری نے کہا کہ شہید علامہ عارف حسین الحسینی نے پاکستان میں بین المذاہب ہم آہنگی کے حوالے سے ناقابل فراموش خدامات انجام دی ہیں۔ شہید علامہ عارف حسین الحسینی ایک دلیر اور بابصیرت لیڈرتھے جو ضیا الحق کے سخت آمرانہ دور میں بھی آواز حق بلندکرتے رہے آپ نے پاکستان میں عوام کوعالمی سامراجیت کی ریشہ دوانیوں سے ناصرف آگاہ کرنے کی کوششیں کیں بلکہ خود بھی استعماری سازشوں کے خلاف سیسہ پلائی دیوار بن کر کھڑے رہے ۔ یہی وجہ تھی کہ عالمی استکباری قوتیں آپ کی دشمن ہو گئیں اور آپ کو منصوبہ بندی کے تحت شہید کر دیاگیا  اور یہ سمجھا گیا کہ شہید عارف حسین الحسینی کا رستہ روک لیاگیا ہے ۔

لیکن ہم ہر سال شہید کی برسی شایان شان طریقے سے انعقاد کرکے یہ پیغام دیتے ہیں کہ شہید کا رستہ رکا نہیں ہے ان کے معنوی فرزندان اب بھی میدان میں ان کا پرچم لئے آگے کی جانب گامزن ہیں اور وطن عزیزکی سلامتی کیلئے اور امن کے دشمنوں کے خلاف بر سر پیکار ہیں ۔اس سال بھی ہم بھرپور انداز میں شایان الشان طریقے سے شہیدعلامہ سید عارف حسین الحسینی کی برسی کا انعقاد کریں گئے ۔

وحدت نیوز(ملتان) جانثاران امام عصرؑ کنونشن ضلع ملتان کا انعقاد،برادر وجاہت علی مرزااگلے تین سال کے لئے مجلس وحدت مسلمین ضلع ملتان کے دوبارہ سیکریٹری جنرل منتخب ۔تفصیلات کےمطابق جانثارانِ امامِ عصر کنونشن المصطفیٰ ہاؤس ملتان میں منعقد ہوا جس میں ضلع بھر سے یونٹس کی بڑی تعداد نے شرکت کی ۔

 اس موقع پر صوبائی سیکرٹری برائے شعبہ خواتین علامہ قاضی نادر علوی صوبائی ڈپٹی سیکرٹری جنرل برادر سلیم عباس صدیقی نو منتخب ضلعی سیکرٹری جنرل برادر وجاہت علی مرزا نے شرکاء سےخطاب کیا۔جبکہ صوبائی سیکرٹری جنرل صوبہ جنوبی پنجاب علامہ اقتدار حسین نقوی نے کنونشن سے مرکزی خطاب کیا اور نو منتخب ضلعی سیکرٹری جنرل سے حلف لیا۔

وحدت نیوز(سرگودھا) مجلس وحدت مسلمین پاکستان ضلع سرگودھا غربی کے انٹرا پارٹی انتخاب میں سید مقصود حسین بخاری سیکرٹری جنرل منتخب ہو گئے ہیں ۔انتخابی  عمل کی نگرانی سابق صوبائی ترجمان اور صوبائی سیکرٹری جنرل کے نمائندہ راجہ امجد حسین نے کی علامہ سید محمد باقر شیرازی صاحب نے  نو منتخب سیکرٹری جنرل سے حلف لیا۔

انتخابی عمل کے  موقع میں علامہ غلام جعفر قمی پرنسپل مدرسہ دینیہ دارالحسین ؑ۔ علامہ ملک نصیر حسین پرنسپل دارالعوم محمدیہ سرگودھا۔ راجہ امجد حسین سیکرٹری جنرل انجمن اثناء عشریہ( رجسٹرڈ) بھلوال۔ اور دیگر علماء کرام۔ زعماء ملت۔مجلس وحدت مسلمین کےیونٹس کے ممبران نے شرکت کی۔

وحدت نیوز(ملتان) ملی یکجہتی کونسل کے مرکزی سیکر ٹری جنرل لیاقت بلوچ نے کی زیر صدارت جنوبی پنجاب کی صوبائی کونسل کا پہلا اجلاس ہوا جس میں مرکزی نائب صدر مولانا حافظ اللہ وسایا، مرکزی ڈپٹی سیکر یٹری جنرل ثاقب اکبر سمیت 14جماعتوں کے قائدین نے شرکت کی۔ اجلاس میں ملی یکجہتی کونسل جنوبی پنجاب کے عہدیداران کا اتفاق رائے سے چناؤ ہوا۔ صدر میاں آصف محمود اخوانی(جماعت اسلامی)، سیکر ٹری جنرل ایوب مغل جے یو پی، نائب صدور مولانا ابو بکر عثمان جے یو آئی (س)،علامہ سید اقتدار حسین نقوی مجلس وحدت مسلمین، مولاناعبدالرزاق جمعیت اتحاد العلماء پاکستان، بشارت عباس قریشی اسلامی تحریک، ڈپٹی سیکرٹریز راؤ عارف رضوی، بلال انصاری تحریک نوجواناں پاکستان، محمد انس عالمی مجلس تحفظ ختم نبوت سہیل عابدی انصیرہ، سیکر ٹری اطلاعات کنور محمد صدیق، سیکر ٹری رابطہ حافظ محمد اسلم جمعیت اتحاد العلاماء، سیکر ٹری مالیات وچیئر مین علمی تحقیقاتی کمیشن مولانا مجاہد گردیزی ابصیرہ، چیئر مین خطبا ت جمعہ کمیشن ڈاکٹر صفدر اقبال ہاشمی، جے یو آئی چیئر مین مصالحتی کمیشن مولانا ایاز قاسمی جے یو آئی نو منتخب۔

 عہدیداران کا پہلا اجلاس19/جولائی کو ہوگا۔اس موقع پر لیاقت بلوچ نے صدارتی خطاب کرتے ہوئے کہا کہ ملی یکجہتی کونسل ہوا کا تازہ جھونکا ہے پاکستانی قوم کی امیدوں کا مرکزہے فرقہ واریت،لسانیت،قوم پرستی ملک میں ظالمانہ فرسودہ نظام کے خاتمہ اور اقامت دین اور ملک کو اسلام کا گہوارہ بنانے کیلئے تمام دینی جماعتیں ملکر جدوجہد کر رہی ہیں۔

 انہوں نے کہا کہ تمام مسالک کا مشترکہ پلیٹ فارم ہے لہذا مقاصد اور اہداف واضح ہیں۔ انہوں نے مزید کہا کہ ناموس رسالت ﷺ کا تحفظ ہمارے ایمان کا حصہ ہے جس پر کسی قسم کا سمجھوتہ نہیں کیا جائے گا۔حکومت عالمی استعماری قوتوں کی سازشوں کا حصہ بنی ہوئی ہے اور وقتا فوقتا تحفظ ناموس رسالت ﷺ کے قانون پر حملہ کرتی رہتی ہے حکومتی سرپرستی کی وجہ سے قادیانیوں کی سرگرمیوں میں تیزی آ رہی ہے۔

انہوں نے کہا کہ حکومت ریاست مدینہ کا نام لیتی ہے مگر ملک میں بے حیائی،فحاشی عریانی،اور بد تہذیبی کو فروغ دے رہی ہے انہوں نے کہا کہ سابقہ حکمرانوں کی لوٹ مار اورشاہانہ طرز حکمرانی نے قوم کو مایوس کیا۔ انہوں نے کہا کہ انٹرنیشنل ایجنڈے کی تکمیل کی خاطر ملک میں بے حیائی،بد تہذیبی فروغ اور اسلامی قوانین کا مذاق اڑایا جا رہاہے حکومتی اقدامات سے ناموس رسالت کے قانون کے لئے خطرات پیدا ہورہے ہیں کیونکہ قرض دینے والوں کا ابتداء سے ہدف رہا ہے کہ پاکستان کو سیکولر اور مادر پدر آزاد ملک بنانا چاہتا ہے تمام دینی جماعتیں اور علماء کرام کو ملکر اس کا راستہ روکنا ہوگا۔

 اجلاس میں،مجلس وحدت مسلمین، جماعت اسلامی، جمعیت اتحاد العلماء پاکستان، تنظیم اسلامی، پاکستان عزا داری کونسل، اسلامی تحریک، متحدہ جمعیت اہل حدیث، امامیہ آرگنائزین ملتان، جمعیت علماء اسلام، تحریک منہاج القرآن، جماعتہ الدعوۃ /تحریک حرمت رسول، انجمن خدام القر آن پنجاب، جمعیت علماء پا کستان، جماعت اہل حدیث، تحریک جواناں پاکستان، مجلس بصیرت کی نمائندہ جماعتوں کے قائدین نے شرکت کی۔

وحدت نیوز(جیکب آباد) نائیجرین حکومت کی جانب سے عالمی شہرت یافتہ عالم دین اور قائد تحریک اسلامی علامہ محمد ابراھیم زکزاکی کو بے گناہ قید کرنے اور جیل میں زھر دینے کے خلاف آج عالمی یوم احتجاج کے موقع پرقائد وحدت علامہ راجہ ناصر عباس جعفری کی اپیل پر پاکستان کے مختلف شہروں میں یوم احتجاج منایا گیا۔

جیکب آباد میں مجلس وحدت مسلمین اور آئی ایس او کی جانب سے ایم ڈبلیوایم کے مرکزی ترجمان علامہ مقصود علی ڈومکی کی زیر قیادت احتجاجی ریلی نکالی گئی۔ اس موقعہ پر مظاھرین سے خطاب کرتے ہوئے علامہ مقصود علی ڈومکی نے کہا کہ نائیجرین پارلیمنٹ کے سامنے زکزاکی،کی رہائی کا مطالبہ کرنے والے عوامی اجتماع پربوہاری حکومت نے گولیاں چلا کر بربریت کی انتہا کردی ہے۔ علامہ محمد ابراھیم زکزاکی کی بے گناہ قید کو تین سال گذر گئے، نائیجیرین سپریم کورٹ کے واضح احکامات کے باوجود نائجیرین حکومت انہیں آزاد نہیں کررہی ہے۔بلکہ زکزاکی کو جیل میں سلو پوائزن دے کر قتل کیا جا رہا ہے۔

انہوں نے کہا کہ ابراہیم زکزاکی، کروڑوں انسانوں کے محبوب لیڈر ہیں وہ کسی ایک ملک کے نہیں بلکہ اقوام عالم کی محبوب شخصیت ہیں، انہوں نے مطالبہ کیا کہ حقوق انسانی کے عالمی ادارے مظلوم زکزاکی کی رہائی کے لئے کردار ادا کریں۔ اس موقع پر ضلعی سیکریٹری جنرل علامہ سیف علی ڈومکی نے بھی خطاب کیا۔ مظاہرے میں سید احسان شاہ اور آئی ایس او کے کارکن بھی شریک تھے۔