وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری حفظہ اللہ اور دیگر قائدین نے معروف عالم دین اور ریسرچ اسکالر علامہ سید علی مرتضیٰ زیدی کے جواں سال فرزند سید علی محمد زیدی کی ناگہانی وفات پر دلی رنج وغم اور افسوس کا اظہار کیا ہے ۔

مرکزی سیکریٹریٹ سے جاری تعزیتی پیغام میں انہوں نے علامہ سید علی مرتضیٰ زیدی اور تمام پسماندگان سے اظہار تعزیت کرتے ہوئے کہاکہ جواں سال فرزند کا فرق دنیا کا سب سے بڑا زخم ہے جو آخری سانس تک درد کا احساس دلاتا ہے ۔ ہمارے پاس تمام بڑے سے بڑے دکھوں کا مرہم غم امام حسین ؑ ہے ، جنہوں نے اپنے جواں سال فرزند کی پامال شدہ لاش کو خدا کی خوشنودی کی خاطر اپنے کاندہوں پر اٹھا کر اس خدا وند متعال کی رضا میں راضی ہونے کا اعلان کیا۔

علامہ راجہ ناصرعباس نے کہاکہ خدا ئے عظیم وبرتر اس سانحہ ارتحال پر برادر عزیز سید علی مرتضیٰ زیدی اور ان کے تمام اہل خانہ کو سید علی محمد زیدی کی اچانک رحلت پر اپنی بارگاہ سے صابروں کا عظیم اجر نصیب فرمائے اور مرحوم کو جوار شہزادہ علی اکبر ؑ میں محشور فرمائے ۔

وحدت نیوز(اسلام آباد) اتحاد امت فورم کے زیراہتمام آبپارہ اسلام آباد سےعظیم الشان ”امریکہ مردہ باد“ ریلی نکالی گئی، جس میں مرد و خواتین کی بڑی تعداد نے شرکت کی۔ ریلی کے شرکاء نے بینرز اور پلے کارڈز اٹھار رکھے تھے، جن پر امریکہ مخالف نعرے درج تھے۔ مظاہرین نے امریکہ، اسرائیل اور شیطانی طاقتوں کے اتحادیوں کے خلاف فلک شگاف نعرے لگائے، ریلی کے شرکاء نے شہید قاسم سلیمانی سے عقیدت کا اظہار کرنے کے لیے ان کی تصاویر بھی اٹھا رکھی تھی۔

ریلی کی قیادت مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کی۔ مظاہرین سے خطاب کرتے ہوئے ایم ڈبلیو ایم کے سربراہ علامہ ناصر عباس جعفری نے کہا کہ امریکہ، اسرائیل اور بھارت کے شیطانی ٹرائیکا نے پوری دنیا کے امن کو داؤ پر لگا رکھا ہے۔ مسلم ممالک کو اگر اپنی سالمیت اور بقا عزیز ہے تو انہیں چاہیئے کہ امریکہ سمیت کسی بھی ملک کو اپنے داخلی معاملات میں مداخلت کی اجازت نہ دیں۔ امریکہ کی دوستی پر اترانے والے امریکہ کے ماضی کے کردار کو سامنے رکھیں۔اس آستین کے سانپ نے مسلمانوں کو ہمیشہ دوست بن کر نقصان پہنچایا ہے۔ انہوں نے کہا کہ وقت آگیا ہے کہ امریکا کو اس خطے سے نکالا جائے۔

علامہ ناصر عباس نے کہا کہ پاکستان کی خارجہ پالیسی مکمل طور پر ناکام ہوچکی ہے۔ وزیر خارجہ شاہ محمود قریشی نے قومی وقار پر امریکی ترجیحات کو مقدم رکھا۔ وزیر خارجہ کو وائٹ ہاوس کی ترجمانی زیب نہیں دیتی۔ انہیں اپنے عہدے سے فی الفور الگ ہو جانا چاہیئے۔ ہمارے حکمرانوں نے اپنے پڑوسی برادر اسلامی ملک کی فوج کے سربراہ کی شہادت پر افسوس کا اظہار نہ کرکے یہ ثابت کر دیا کہ ان کی خارجہ پالیسی آزاد نہیں بلکہ امریکہ کے تابع ہے۔ امریکی اطاعت ہی تمام خرابیوں کی جڑ ہے۔ جب تک اس جڑ کو اکھاڑا نہیں جاتا، تب تک عوام کے وقار کو اسی طرح داغدار کیا جاتا رہے گا۔

شیعہ علماء کونسل کے رہنما علامہ عباس قمی نے اپنے خطاب میں کہا کہ امریکہ ایک بار پھر پاکستان کو ایک نئی پراکسی وار میں دھکیلنے کے لئے پر تول رہا ہے۔ امریکہ نے مسلمانوں کے خلاف ہمیشہ مسلمانوں کے ملک میں بیٹھ کر جنگ لڑی، تاکہ دونوں طرف مسلمانوں کا نقصان ہو۔ امریکہ سے اتحاد کا انجام پاکستان کو دہشت گردی کی صورت میں بھگتنا پڑا۔ دہشت گردی کے اس عفریت نے وطن عزیز کے ستر ہزار سے زائد افراد کو نگل لیا اور اس کے خلاف آج تک جنگ لڑی جا رہی ہے۔ امامیہ آرگنائزیشن کے رہنما اسد اللہ نے خطاب کرتے ہوئے کہا کہ حاج قاسم سلیمانی کس ایک فرقے کے نہیں بلکہ پوری امت مسلمہ کے عظیم مجاہد تھے۔ انہوں نے عراق اور فلسطین کے مسلمانوں کے دفاع کے لئے جو کارنامے سرانجام دیئے، انہیں تاریخ میں سنہرے حرفوں سے لکھا جائے گا۔

انہوں نے مزید کہا کہ جو لوگ امریکی دہشت گردی کو ایران اور امریکہ کا ذاتی جھگڑا سمجھتے ہیں، وہ عالمی حالات سے باخبر نہیں۔ عالمی ذرائع ابلاغ اس بات کو بارہا دہرا چکا ہے کہ امریکہ کا اگلا ہدف پاکستان اور ایران ہے۔ امریکہ کی ایران کی طرف پیش قدمی ارض پاک کی سالمیت کے لیے بھی سنگین خطرہ ثابت ہوسکتی ہے۔ آئی ایس او کے رہنماء زاہد مہدوی نے کہا کہ اس وقت پوری دنیا میں مسلمانوں کے مقابلے میں باطل قوتیں یکجا ہو رہی ہے۔ مسلمانوں کے ایک دوسرے کے قریب آنے کا یہ سب سے نادر موقع ہے۔ احتجاجی ریلی سے تحریک بیداری امت مصطفیٰ کے رہنما علامہ تنویر حسین جعفری، آئی ڈی سی کے مرکزی رہنما فدا حسین، انجمن جانثاران اہلبیت کے رہنما زاہد حسین جعفری سمیت دیگر مقررین نے بھی خطاب کیا۔

وحدت نیوز(گڑھی یاسین) مجلس وحدت مسلمین ضلع شکارپور، تحصیل گڑھی یاسین کا جانثاران امام عصر عج کنونشن منعقد ہوا،کنونشن میں مہمان خصوصی طور پر مدرسہ حوزہ علمیہ بقیتہ اللہ کے پرنسپل علامہ عبدالله مطہری اور مجلس وحدت مسلمین ضلع لاڑکانہ کے سیکرٹری جنرل عبدالرزاق جلبانی، اصغریہ اسٹوڈنٹس آرگنائزیشن تحصیل گڑھی یاسین کے صدر امجد علی ابڑو نے شرکت کی جانثاران امام عصرعج کنونشن میں آئندہ تین سال کے لئے نئے سیکرٹری جنرل کا انتخاب مجلس وحدت مسلمین ضلع شکارپور کے سیکرٹری جنرل اصغر علی سیٹھار کی نگرانی میں ہوا جبکہ اکثریت رائے سے آئندہ تین سالوں کے لئے مستنصر مہدی ابڑو ایم ڈبلیوایم تحصیل گڑھی یاسین کےسیکرٹری جنرل منتخب ہوگئے

جبکہ ڈپٹی سیکرٹری لطف علی چانڈیو، حسنین عباس جوادی سیکرٹری سیاسیات، مدثر علی میمن سیکرٹری فلاح بھبود،شفقت علی اجن سیکرٹری تحفظ عزاداري،مقصود علی جلبانی سیکرٹری تعلیم و تربیت،مولانا برکت علی کربلائی سیکرٹری تعبليغات، سید رمضان علی شاہ سیکرٹری تنظیم سازی،طارق علی کنبھر سیکرٹری شماریات، نوید علی میمن میڈیا سیکرٹری، اسحاق علی ادھو سیکرٹری یوتھ، سید نوید علی شاہ رابط سیکرٹری، محمد ملوک چانڈیو آفیس سیکرٹری، نامزد ہوئے اس موقع پر نئے کابینہ کے اراکین کو پھولوں کے ہار پہنا کر مبارکباد پیش کی گئی۔

وحدت نیوز (اسلام آباد) راولپنڈی اسلام آباد کی مختلف شیعہ تنظیموں نے عالم اسلام کے عظیم مجاہدقاسم سلیمانی اور ان کے رفقا پرحملے اور امریکی پالیسیوں کے خلاف ایم ڈبلیو ایم کے مرکزی سیکرٹریٹ میں پریس کانفرنس سے خطاب کرتے ہوئے کہا ہے کہ ملک کی مختلف شیعہ سنی جماعتوں کے زیر اہتمام اتوار کے روز سہ پہر دو بجے آب پارہ چوک سے امریکن ایمبیسی تک بھرپوراحتجاجی ریلی کا انعقاد ہو گا جس کا مقصد خطے میں امریکہ کی بڑھتی ہوئی جارحیت کے خلاف اپنا احتجاج ریکارد کرانا ہے۔ ساری دنیا کے سامنے امریکی کے ناپاک ارادوں کا پردہ چاک ہو چکا ہے۔ امریکی پالیسیاں عالم اسلام اور خطے کے امن کے لیے سنگین خطرہ ہیں۔اسلامی ممالک کی سالمیت  امریکی مداخلت کے خاتمے سے مشروط ہے۔امریکہ کے جارحانہ عزائم کے خلاف ایران کا جرات مندانہ موقف ایمانی غیرت کا عملی اظہار ہے۔اس عالمی دہشت گرد سے نجات حاصل کرنے کے لیے امت مسلمہ کو ایران کے ساتھ کھڑا ہونا چاہیے۔

انہوں نے کہا کہ حاج قاسم سلیمانی عراق کی دعوت پر سرکاری دورے پر تھے۔وہ اہم مسلم ممالک کےدرمیان دوریاں ختم کرنے کے لیے اہم کردار ادا کر رہے تھے۔کسی ملک کی انتہائی اہم اور ذمہ دار شخصیت کو نشانہ بنا کر امریکہ نے بدترین دہشت گردی کا مظاہرہ کیا۔قاسم سلیمانی نے عالمی دہشت گرد تنظیم داعش کو شکست دے کرعراق سے باہر نکالا۔امریکہ کے ہاتھوں قاسم سلیمانی کی شہادت اس حقیقت کا ثبوت ہے کہ امریکہ اسلام دشمن تنظیم داعش کی پشت پر کھڑا ہے اور اس کے لیے راستے ہموار کر رہا ہے۔امریکہ کا وجود پورے خطے کے لیے خطرے کی علامت بن چکاہے۔امریکہ اور اس کے حواری ایران کے اس لیے مخالف ہیں کہ امریکہ کے ناپاک عزائم کی راہ میں سب سے بڑی رکاوٹ ہے۔

انہوں نے کہا کہ عالم اسلام کے مقدسات ہر مسلمان کو اپنی جان سے زیادہ عزیز ہیں۔شیعہ سنی کسی کو آل رسولۖ کے مزارات کی طرف میلی آنکھ سے دیکھنے کی اجازت نہیں دیں گے۔عراقی پارلیمنٹ کی طرف سے امریکی فوج کے انخلا کی منظوری کے بعد ان کے خطے میں قیام کا کوئی جواز باقی نہیں۔امریکہ کو فوراََ اپنی افواج واپس بلانا ہوں گی۔

پریس کانفرنس میں ایم ڈبلیو ایم کے مرکزی رہنما علامہ اعجاز حسین بہشتی،ضلع راولپنڈی کے سیکرٹری جنرل علامہ علی اکبر کاظمی ،اسلام آباد کے سیکرٹری جنرل ظہیر نقوی ،آئی ایس او کے ڈویژنل صدر صابر علی،آئی ڈی سی کے سیکریٹری جنرل فدا حسین زیدی ، انجمن جانثاران اہل بیت ؑکے سینئر عہدیدارمسعود حیدر زیدی ،،صوبائی وحدت یوتھ سیکرٹری سجاد نقوی،تحریک بیداری امتمصطفیؐ کے رہنمامودت حسین اور صوبائی رہنما ایم ڈبلیوایم نیاز بخاری سمیت دیگر اہم شخصیات بھی شریک تھیں۔

وحدت نیوز (شکارپور) جامع مسجد سید الشھداء کربلا معلی امام بارگاہ شکارپور میں نماز جمعہ کے اجتماع سے خطاب اور وارثان شہداء کے اہم اجلاس سے خطاب کرتے ہوئے مجلس وحدت مسلمین پاکستان کے مرکزی ترجمان اور وارثان شہداء کمیٹی کے چیئرمین علامہ مقصود علی ڈومکی نے کہا ہے کہ شہداء شکارپور کی پانچویں برسی کے موقع پر سندھ سطح کا بڑا اجتماع منعقد کیا جائے گا۔ اجتماع میں بزرگ علماء کرام اکابرین اور وارثان شہداء شریک ہوں گے۔

 انہوں نےکہا کہ شہداء کی یاد منانا ان کے مشن اور مقصد کے ساتھ تجدید عہد ہے ہم نے اللہ تعالی سے عہد کیا ہے کہ ہم شہداء کے مشن اور مقصد کو پایہ تکمیل تک پہنچائیں گے۔

انہوں نےکہا کہ شکارپور حساس ضلع ہے یہاں ماضی میں پولیس اور حکومت کی غفلت کے سبب دھشت گردی کے متعدد سانحات رونما ہونے ہیں لہذا مساجد اور امام بارگاہوں کے ساتھ ساتھ شیعہ اکابرین اور وارثان شہداء کے وکیل کی سیکورٹی پر خصوصی توجہ دی جائے۔

انہوں نے مطالبہ کیا کہ شکارپور کے ڈپٹی کمشنر اور ایس ایس پی جن امام بارگاہوں اور مساجد و شخصیات کی سیکورٹی کلوز کی گئی ہے ان کی سیکورٹی بحال کرتے ہوئے وارثان شہداء کے خدشات کا جلد ازالہ کریں۔

وحدت نیوز(ملتان) مجلس وحدت مسلمین پاکستان کے مرکزی ڈپٹی جنرل سیکرٹری علامہ سید احمد اقبال احمد رضوی کا کہنا تھا کہ امریکہ نے پاکستان کو ایڈ نہیں ایڈز دی ہے، جنرل قاسم سلیمانی اسلام اور انسانیت کی بات کرتے تھے، امریکہ پاکستان سمیت مشرق وسطٰی کا دشمن ہے، پاکستان کی سالمیت مشرق وسطیٰ کے امن کےساتھ منسلک ہے، اگر ایران و افغانستان میں امن ہوگا تو پاکستان بھی پرامن ہوگا۔ ان خیالات کا اظہار اُنہوں نے ملتان میں آل پارٹیز کانفرنس سے خطاب کرتے ہوئے کیا۔

 علامہ احمد اقبال رضوی کا مزید کہنا تھا کہ ہمارا یوں ساتھ بیٹھنا اس بات کی دلیل ہے کہ ہم پاکستان کے لئے متحد ہیں اور اسلام کے لئے بھی متحد ہیں، امریکہ نے عراق میں کیمیائی ہتھیاروں کی موجودگی کا جھوٹا الزام لگا کر وہاں حملہ کیا، امریکہ کی وجہ سے آج ہمارے ملک میں تفرقہ بازی ہے، جس معاشرے کے اندر انسانیت کو پامال کیا جائے وہ معاشرہ یقینی طور پر تباہی کے دہانے پر پہنچتا ہے، اور وہاں کے لوگوں میں ایک خلاء پیدا ہو جاتا ہے، امریکہ کے لئے سب سے بڑی رکاوٹ اسلام ہے، اس اسلام میں شیعہ، سنی، وہابی سب شامل ہیں، بس ہمیں ایک سنجیدہ ارادے کی ضرورت ہے، ہمیں اپنی ذات سے نکل کر اکٹھے ہونا چاہئے اور طاغوتی طاقتوں کا مقابلہ کرنا چاہئے۔