وحدت نیوز(رحیم یارخان) مجلس وحدت مسلمین رحیم یار خاں کی ضلعی شوریٰ کا اجلاس مرکزی امام بارگاہ میں منعقد ہوا، جس میں تمام یونٹس اور ضلعی کابینہ کے رہنمائوں نے شرکت کی، اجلاس میں مجلس وحدت مسلمین جنوبی پنجاب کی شعبہ خواتین کے سیکرٹری علامہ قاضی نادر حسین علوی، ڈپٹی سیکرٹری جنرل جنوبی پنجاب سلیم عباس صدیقی، سیکرٹری تنظیم سازی سید علی رضا زیدی، سیکرٹری روابط سید ندیم عباس کاظمی نے خصوصی طور پر شرکت کی۔ ضلعی شوریٰ کے اجلاس میں سابق ضلعی سیکرٹری جنرل نے اپنی کارکردگی رپورٹ پیش کی اور اپنی کابینہ سمیت مستعفی ہونے کا اعلان کیا۔
بعدازاں صوبائی کابینہ کے اراکین کی موجودگی میں نئے سیکرٹری جنرل کے لیے خفیہ رائے شماری کی گئی، جس کے نتیجے میں سید حسنین حیدر نقوی کو دوبارہ سیکرٹری جنرل منتخب کیا گیا۔ نومنتخب سیکرٹری جنرل سے علامہ قاضی نادر حسین علوی نے حلف لیا۔ نومنتخب سیکرٹری جنرل نے اپنے خطاب میں کہا کہ مجلس وحدت مسلمین مظلوموں، غریبوں اور پسے ہوئے طبقے کی آواز بلند کرتی رہے گی، پاکستان کی موجودہ حکومت کا عالم اسلام کے لیے کوئی خاطر خواہ اقدام نہیں ہے، پاکستان کو امت اسلامی کے ساتھ کھڑا ہونا چاہیئے تھا، ہمارے حکمرانوں نے کوالالمپور سمٹ میں نہ جا کر بہت بڑی غلطی کی، ہمیں اپنے ملک کو اغیار کے لیے استعمال کرنے کی اجازت نہیں دینی چاہیئے۔
وحدت نیوز(لاہور) مجلس وحدت مسلمین شعبہ خواتین لاہور کی جنرل سیکرٹری محترمہ حنا تقوی نے گڑھی شاہو یونٹ میں ایام فاطمیہ کے سلسلے میں منعقد کردہ مجلس عزا سے خطاب کیا۔مجلس عزا میں حالات حاضرہ پر گفتگو کی گئی اور فضائل و مصائب جناب زہرا سلام اللہ علیہا بیان کیےگئے۔
مجلس عزا سے خطاب کرتے ہوئے محترمہ حنا تقوی کا کہنا تھا کہ دور حاضر کی مسلم خاتون حضرت زہراء سلام اللہ علیہا کی کنیزی کا دعویٰ تو کرتی ہے لیکن اپنی عملی زندگی میں ان کی سیرت سے بہت دور نظر آتی ہے۔
ان کا مزید کہنا تھا کہ اسلام کو ایسی بلند کردار خواتین کی ضرورت ہے جن کی جھولیوں سے سرفروشان اسلام مل سکیں۔انہوں نے کہاکہ سیدہ نساءالعالمینؑ پیکر عفت و حیا،سراپا صبر و رضا، مخدرہ عصمت و طہارت اور خواتین کیلئےبہترین نمونہ عمل ہیں۔
حالات حاضرہ پر گفتگو کرتے ہوئے محترمہ حنا تقوی کا کہنا تھا کہ عراقی عوام کی جانب سے گیٹ آؤٹ امریکہ ریلی کا بھرپور انعقاد طاغوتی طاقتوں کے منہ پر طمانچہ ہے۔
وحدت نیوز(حیدرآباد) مجلس وحدت مسلمین شعبہ خواتین کی مرکزی سیکرٹری نشرو اشاعت محترمہ عظمیٰ تقوی اور سیکرٹری جنرل حیدرآباد محترمہ ارم محسن کی جانب سے شھید قاسم سلیمانی اور رفقاء کی یاد میں مجلس ترحیم کا انعقاد کیا گیا جس میں شہر بھر کی نامور ذاکرات و مدیراتِ مدارس خواتین نے شرکت کی اور شھید راہ حق حاج قاسم سلیمانی سے اظھار عقیدت کرتے ہوئےاور ان کے عظیم کارناموں اور مجاھدانہ زندگی پر خراج عقیدت پیش کرتے ھوئے اپنے اپنے خیالات کا اظھار کیا ،محترمہ عظمی تقوی نے نظامت کے فرائض انجام دیے پروگرام میں علاقے بھر سے خواتین کی کثیر تعداد نے شرکت کی۔
وحدت نیوز(کراچی) مجلس وحدت مسلمین ضلع غربی بلدیہ ٹاؤن کے تحت جامع مسجد خدیجه الکبریٰ میں شہید قاسم سلیمانی ، ابو مہدی المہندس و رفقاء کی یاد میں مجلس ترحیم و چراغاں کا انعقادکیا گیا جسمیں مومنین و مومنات ، علمائے کرام ، مذہبی ، سماجی شخصیات نے شرکت کی ۔
مجلس وحدت مسلمین صوبہ سندھ کے سیکریٹری جنرل علامہ باقر عباس زیدی نے مجلس سے خطاب کرتے ھوئے کہا کہ شہید قاسم سلیمانی ، شہید ابو مہدی المندس وہ مخلص با بصیرت و شجاع جرنیل تھے جس نے مختلف ممالک کے سخت و طولانی محاذ پر دشمنان اسلام کے خلاف جنگ کیلئے تربیت دیکر منظم کیا اور مشرق وسطیٰ میں امریکہ و اسرائیلی سازشوں کو ناکام بنایا اور داعش کو شکست سے دو چار کیا آج اگر شہید قاسم سلیمانی جیسے جرنیل نہ ھوتے تو امریکی و اسرائیلی داعش مشرق وسطیٰ کو فتح کرتے ھوئے پاکستان میں داخل ھو جاتے اور ہمارا حشر بھی شام ، عراق جیسا کرتے شہید قاسم سلیمانی کا پوری دنیا و انسانیت پر احسان ہے۔
اس موقع پر مولانا عامر زیدی ، مولانا صغیر عباس ، مولانا حیدر عباس نجفی ، مولانا عباس کمیلی ، صوبائی رہنما ناصر الحسینی ، انور شاہ بخاری ، سبط اصغر ، امتیاز حسین زیدی ، علی اصغر جعفری ، اعظم بھائی ، وسیم عباس ، ضیغم عباس ، شبر رضا ، نوید قمر ، عباس علوانی ، محمد علی شاہ ،مطلوب اعوان اور شہید قائد یونٹ کے سیکرٹری جنرل نور واس خان ، سرفراز بھی موجود تھے بعدازاں شہداء کی یاد میں شمعیں روشن کی گئی۔
وحدت نیوز (شکارپور) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے سانحہ شکار پور کے شہدا ءکی پانچویں برسی کے مرکزی اجتماع سے خطاب کرتے ہوئے کہا ہے کہ عدل و انصاف کی بالادستی اور ظالموں کے خلاف جدوجہدکا جو راستہ ہم نے اختیار کر رکھا ہے وہ انبیاء، اولیاءاور شہدا ءکا راستہ ہے۔تشیع کی تاریخ گواہ ہے کہ ہم نے ہر دور کی یزیدیت کے سامنے پوری جرات کے ساتھ کلمہ حق بلند کیا، ہمارے سر کٹے ضرور مگر کسی یزید کے سامنے جھکے نہیں۔
انہوں نے کہا کہ ہماراد دشمن مکار اور فریب کار ہے اس نے ہمیشہ دغا دے کر ہم پر وار کیا ہے۔اگر خیبر و بدر جیسا معرکہ رونما ہوتا تو پھر ساری دنیا پر یہ حقیقت کھل کر آشکار ہو جاتی ہے کہ کرار کے ماننے والوں اور فرار کے ماننے والوں میں کیا فرق ہے۔ انقلاب ایران اور شام و عرا ق میں امریکی کی لے پالک دہشت گرد تنظیم داعش کی شکست کے بعد امریکہ اور دوسری استعماری طاقتیں مرجعیت سے سخت خائف ہیں ۔و ہ اس حقیقت سے باخبر ہیں کہ عالم استکبار کے خلاف جو لڑائی جدید جنگی ہتھیاروں سے نہیں جیتی جا سکتی و ہ مرجعیت کی ایک آواز کے ساتھ جیتی جا سکتی ہے۔باطل قوتیں دنیا کی کسی طاقت سے اتنے خوفزدہ نہیں جتنے ملت تشیع سے خائف ہیں۔ہمارے خلاف دشمن تسلسل کے ساتھ جنگ میں مصروف ہے ۔کبھی ہمیں عالمی دہشت گردی کا نشانہ بنایا جاتا ہے اور کبھی تکفیری گروہوں کو ملت تشیع کے خلاف فعال کر دیا جاتا ہے۔
انہوں نے مزید کہاکہ ہماری قوم کو اندر سے تقسیم کرنے کی سازش بھی پوری مکاری کے ساتھ جاری ہے۔ایسی صورتحال میں دانشمندی اور بصیرت کا مظاہرہ ہماری اولین ترجیح ہونی چاہیے۔انہوں نے کہا کہ سانحہ شکار پور پاکستان کی تاریخ کا سیاہ ترین باب ہے۔اس ملک کو جتنا نقصان تکفیری طاقتوں نے پہنچایا ہے اتنا کسی اور نے نہیں پہنچایا۔صرف انہی عناصر کا تعلق دہشت گردوں سے نہیں جو مسلح کاروائیوں کا حصہ بنتے ہیں بلکہ ہر وہ شخص دہشت گردکی تعریف پر پورا اترتا ہے جو فکری طور پر دوسروں کو گمراہ کر کے ملک و قوم کے خلاف بدامنی پر اکساتا ہے۔قومی سلامتی کے ہر دشمن کو انصاف کے کٹہرے میں لا کر دہشت گردی کے باب کو ہمیشہ کے لیے بند کیا جا سکتا ہے۔
برسی کے اجتماع سے مجلس وحدت مسلمین کے مرکزی رہنماؤں علامہ مختار امامی، علامہ مقصود ڈومکی،علامہ باقر زیدی ،علی حسین نقوی،جامعہ مدارس امامیہ سندھ کے صدر علی بخش سجادی اور علامہ عبد اللہ مطہری ، علامہ صادق جعفری سمیت دیگر علما اور نامور شخصیات نے بھی خطاب کیا۔
وحدت نیوز(حیدرآباد) مجلس وحدت مسلمین پاکستان حیدر آباد کی جانب سے بروز جمعة المبارک امریکہ مردہ باد ریلی نکالی گئی جس میں ضلع حیدرآباد کے علاوہ مرکزی و صوبائی نمائندگان اور بچوں اور خواتین کی کثیر تعداد نے شرکت کی اس احتجاجی ریلی میں علمائے کرام کی جانب سے خطے میں امریکی دھشت گردی ، جنرل قاسم سلیمانی اور ابو مھدی المھندس کی شھادت اور امریکہ کا دنیا کو جنگ کی طرف دھکیلنے کے خلاف پر زور مذمتی خطاب کیے گئے۔
ریلی کے نظم و ضبط کو برقرار رکھنے میں ایم ڈبلیو ایم شعبہ خواتین کی مرکزی رابطہ سیکرٹری محترمہ سیدہ سیمی نقوی کی زیر نگرانی معصومہ قم گرلز گائیڈ نے اھم کردار ادا کیا اور شرکاے ریلی سے بھرپور تعاون کیا خواتین نے شھید قاسم سلیمانی اور شھید ابو مھدی المھندس کی تصاویر اٹھا کر عقیدت کا اظھار کیا اور امریکہ و اسرائیل مخالف نعرے لگا کر اظھار نفرت کیا۔
