مصرکے صدر محمد مرسی نے فلیڈمارشل طنطاوی کو برطرف کردیا ٹی وی پر مصری عوام سے مخاطب ہوتے ہوئے انہوں نے کہا کہ ان کا مقصد کسی فرد کو ہدف بنانا یا کسی خاص ادارے کو شرمندہ کرنا نہیں ہے
محمد مرسی کا کہنا ہے کہ ان کا یہ فیصلہ ملک کی فوجی قیادت کو اپنے عسکری کردار پر توجہ دینے کا موقع فراہم کرے گا۔ انہوں نے کہا کہ میں نے آج جو فیصلہ کیا اس کا مقصد مخصوص افراد کو نشانہ بنایا یا اداروں کو شرمندہ کرنا نہیں تھا اور نہ ہی میں آزادیاں سلب کرنا چاہتا ہوں‘۔
ان کا کہنا تھا کہ ’میں کسی کو کوئی منفی پیغام نہیں دینا چاہتا بلکہ میرا مقصد صرف اس قوم اس کے عوام کا فائدہ ہے‘۔
صدارتی ترجمان یاسر علی کی جانب سے اتوار کو جاری ہونے والے ایک بیان میں کہا گیا کہ ’فیلڈ مارشل طنطاوی کو آج سے ریٹائر کر دیا گیا ہے‘۔ ترجمان کے مطابق جنرل عبدالفتاح کو ملک کا نیا فوجی سربراہ اور وزیرِ دفاع مقرر کیا گیا ہے۔
ترجمان کا یہ بھی کہنا تھا کہ صدر کے اختیارات کم کرنے کے آئینی حکم کو بھی منسوخ کر دیا گیا ہے۔
ادھر اس فیصلے کے سامنے آنے کے بعد ہزاروں افراد قاہرہ کے تحریر سکوائر میں جمع ہوگئے ہیں اور انہوں نے صدر کے فیصلے سے یکجہتی کا اظہار کیا ہے اور فوج کے سربراہ کی طرفی پر خوشی منائی 
"محمد مرسی جن کا تعلق اخوان المسلین سے ہے جو عوامی انقلاب کے بعدجون کے عام انتخابات میں صدر منتخب ہوئے تھے۔ 
فوجی سربراہ پر اس سے قبل بھی عوام کی جانب سے مختلف الزامات لگتے رہے ہیں جبکہ فوج اور اخوان المسلمین کے درمیان بھی ہمیشہ سے ایک تناو رہا ہے جس کی ایک وجہ فوج کی جانب سے ڈکٹیٹروں کی حمایت بھی بتائی جاتی ہے 
اب یہ واضح نہیں ہے کہ مصری صدر کے پاس فوجی سربراہ کو ریٹائر کرنے کا اختیار ہے یا نہیں اور کیا چھہتر سالہ فیلڈ مارشل طنطاوی اس فیصلے کو قبول کریں گے یا نہیں

اسلامی جمہوریہ ایران کے مقدس شہر قم میں شہید قائد علامہ عارف حسین الحسینی کی یاد میں مجلس وحدت مسلمین قم کی جانب سے عظیم الشان سیمینار کا اہتمام کیا گیا۔ اس سیمینار سے حجت الاسلام و المسلمین سید شفقت شیرازی سیکریٹری امور خارجہ مجلس وحدت مسلمین پاکستان اور مرکزی سیکریٹری جنرل مجلس وحدت مسلمین پاکستان حجت الاسلام و المسلمین ناصر عباس جعفری نے خطاب کیا ۔ سیمنار میں بڑی تعداد میں علما اور حوزہ علمیہ قم میں موجود دینی طلاب نے شرکت کی۔ پروگرام کے آغاز میں یکم جولائی قرآن و سنت کانفرنس کے حوالے سے ایک ویڈیو کلپ کی نمائش کی گئی ۔ مجلس وحدت مسلمین قم نے پروگرام کے اختتام پر دینی طلاب کے اعزاز میں افطار اور کھانا دیا۔
شہید قائد کی چوبیسویں برسی سے خطاب کرتے ہوئے حجت الاسلام سید شفقت شیرازی نے کہا کہ شہید علامہ عارف حسین الحسینی اپنی شہادت کے وقت بہت کم عمر تھے اور عین جوانی کے عالم میں شہید ہوئے لیکن آج تک پاکستان کی ملت تشیع آپ کو نہیں بھلا سکی اور اسکی وجہ آپ کا خلوص اور خدا کی خاطر کام کرنا تھا۔ سیکرٹری امور خارجہ مجلس وحدت مسلمین پاکستان نے مزید کہا کہ : آپ شجاع، نڈر اور مبارز انسان تھے۔ ایک وقت جب قبلہ مفتی جعفر حسین کے دور میں اسلام آباد مظاہرے کے دوران حالات بہت کشیدہ ہو گئے اور علما پریشان ہونے لگے کہ اگر پولیس اور فوج کی طرف سے کسی سخت اقدام کی صورت میں جوانوں کی شہادت ہوگئی تو ان کے خون کا ذمہ دار کون ہوگا اور اسی وجہ سے بعض بغیر مطالبات کے واپس پلٹ جانے کا فیصلہ رکھتے تھے تو آپ نے آگے بڑھ کر سب کو مخاطب کیا اور کہا کہ اگر چہ یہاں افراد کی موت کا مسئلہ ہے لیکن اگر ہم بغیر مطالبات منوائے واپس پلٹ جائیں گے تو یہ نظریہ کی موت کا باعث بنے گا۔ شہید فرمایا کرتے تھے کہ ہمیں اپنی حفاظت خود کرنی ہے۔ آپ نے کہا کہ شہید کی ایک اور صفت معرفت ولایت، اطاعت ولایت، اور ربط با ولایت ہے۔ آپ ہمیشہ ولایت کے ساتھ مربوط رہے اور اس نظریہ سے ایک انچ بھی پیچھے نہ ہٹے۔ آپ نے شہید کی زندگی کے پہلووں کو اجاگر کرتے ہوئے کہا کہ : شہید عارف حسین الحسینی سارا دن فعالیت کرتے رہتے اور رات کو مصلی عبادت پر گذارتے۔
شہید علامہ عارف حسین الحسینی کی برسی سے خطاب کرتے ہوئے مجلس وحدت مسلمین پاکستان کے مرکزی سیکرٹری جنرل حجت الاسلام و المسلمین علامہ ناصر عباس جعفری نے کہا : کہ اس بات میں کوئی شک نہیں ہے کہ تاریخ گذرنے کے ساتھ ساتھ مذاہب اور مکاتیب فکری میں تبدیلیاں آتی رہتی ہیں جہاں دوسرے ادیان اور مذاہب میں تبدیلیاں آئی ہیں وہیں شیعہ مسلمانوں میں بھی تاریخ گذرنے کے ساتھ ساتھ تبدیلی آتی رہی۔ ہم مذہب تشیع کی تاریخ میں دیکھتے ہیں کہ کہیں زیدیہ فرقہ قیام میں آیا اور کہیں واقفیہ فرقہ وجود میں اور اسی طرح غیبت کبری کے بعد شیعہ اثنا عشریوں کے درمیان بھی بعض ایسے افراد نے جنم لیا کہ جنہوں نے علما اور فقہاء کے دامن کو چھوڑ دیا اور ان کی اس جدائی نے انہیں اخلاقی برائیوں اور بے راہ رویوں کی جانب گامزن کردیا۔ وہ علما اور فقہا اور تقلید سے دوری کی وجہ سے قرآن اور تعلیمات محمد و آل محمد سے بھی دور ہوگئے اور یہ بات ان کی فکری بے راہ روی کا سبب بنی۔ علامہ ناصر عباس جعفری نے مزید کہا: ایک اور اہم انحراف جو شیعہ اثنا عشری مسلمانوں کے درمیان وجود میں آیا وہ سیاست اور دین کی جدائی کا نظریہ تھا یعنی ولایت سے دوری۔ آپ نے کہا شیعہ اثنا عشری نے کبھی بھی سقیفہ کو قبول نہیں کیا، گویا ہم دین کو سیاست سے جدا نہیں کرسکتے ہم اس بات کے قائل نہیں ہوسکتے کہ سیاسی لیڈر تو اہل بیت کے علاوہ کوئی اور ہوں اور دینی رہبروں کی جگہ ہم اہل بیت کو قبول کریں۔ آپ نے فرمایا: ہمارے دینی اور سیاسی دونوں میدانوں میں رہنما اہل بیت اور آئمہ ہی ہیں۔ اگر سیاست کو دین سے جدا سمجھا جائے تو بقول اقبال یہ چنگیزیت ہوتی ہے اور یہی سیکولر فکر بعد میں یزیدیت کی پیدائش کا سبب بنتی ہے۔ آپ نے کہا یہ غلط فکر حوزات علمیہ میں بھی رواج پاگئی اور اسی کے سبب ہم حوزات میں صرف توضیح المسائل کے وجود کو دیکھتے ہیں جو فردی مسائل کا حل ہے لیکن دوسرے انسانی علوم اور معاشروں کے مسائل کے بارے میں علوم کو نہیں پاتے۔ آج ہم دینی فکر کو علما سے لیتے ہیں لیکن اقتصادی، اجتماعی اور معاشرتی فکروں کو آکسفورڈ اور کیمبرج سے حاصل کرتے ہیں کہ جو دین اور سیاست میں جدائی کا شاخسانہ ہے۔ آپ نے کہا یہی سوچ باعث بنی کہ آج معاشروں پر لبرل ڈیموکریٹک نظام رائج ہے یعنی عوام کی عوام پر حکومت جبکہ ہمارا دینی اور اسلامی نظریہ خدا کی عوام پر حکومت ہے۔ اس نظریہ کہ وجہ سے ملت تشیع کے جوان بھی اصل ہدف سے پیچھے رہ گئے آج معاشروں میں عزاداری تو موجود ہے لیکن یزیدیت کا تعاقب موجود نہیں ہے۔ اس نظریہ کے باعث اور غدیر سے دوری نے ہمیں امریکی اور یورپی نظاموں کا گرویدہ کر دیا۔ ہما را نعرہ ''اشھد ان علیا ولی اللہ'' ہے لیکن عملی طور پر ہم امریکہ اور یورپ کو اپنا سرپرست مانتے ہیں۔ علامہ ناصر عباس جعفری نے کہا کہ: اب یہاں مصلحین کا کردار آتا ہے ، سب سے پہلی مصلح جناب سیدہ زہرا ''س'' کی ذات ہے، آپ نے انحراف کے خاتمے اور معاشرے میں اصلاح کی کوشش کی اور اس راہ میں اپنی جان بھی فدا کردی۔ آپ نے فرمایا ہمارے بارہ آئمہ میں سے گیارہ شہید ہیں اور انہوں نے معاشرے میں اصلاح کا کام انجام دیا۔ آپ نے کہا کہ آج کے زمانے میں اس انحراف کا مقابلہ امام خمینی ''رح'' نے انجام دیا اور معاشرے میں اصلاح کا کام کیا ۔ آپ نے سیاست اور دیانت کی جدائی کے نظریہ پر خط بطلان کھینچا اور ولایت کے فقیہ کے نظریہ کو متعارف کروایا۔ آپ نے مزید کہا کہ : ہم اپنے اہل سنت بھائیوں کی طرح یہ نظریہ قبول نہیں کرسکتے کہ غیبت کبری میں آئمہ ہمیں کوئی نظام نہیں دے کر گئے اور اپنے جانشین کے بارے میں ہمیں کوئی حکم نہیں دیا۔ لوگوں نے غیبت کبری میں بھٹو، نوازشریف اور شاہ جیسے حکمرانوں کو اپنا سیاسی پیشوا تسلیم کر لیا۔ نظام خلافت میں رہنے کے نتیجے میں امام علی علیہ السلام کے سامنے صفین میں اور امام حسین علیہ السلام کے سامنے کربلا میں تلواریں نکالی گئیں۔ پاکستان کی سرزمین پر اس نظریہ کی ترویج کرنے والی شخصیت کا نام شہید علامہ عارف حسین الحسینی ہے۔آپ نے کہا:جو لوگ شہید باقر الصدر اور شہید بہشتی کے قاتل تھے شہید علامہ عارف حسین الحسینی کے بھی وہی قاتل تھے۔ شہید علامہ عارف حسین الحسینی قوم کو کہا کرتے تھے کہ اپنے سیاسی کردار کو ادا کریں، دشمنوں نے آپ کو ہٹانے کیلئے اندرونی رکاوٹیں بھی کھڑی کیں، ۸۰ کیلومیٹر پیدل چل کر امام علی علیہ السلام کی زیارت کیلئے جانے والے شخص یعنی علامہ عارف حسین الحسینی کو مقصر کہا گیا، لیکن جب آپ نے تمام رکاوٹیں کو عبور کر لیں تو آپ کو شہید کر دیا گیا۔
سیکرٹری جنرل مجلس وحدت مسلمین پاکستان نے مزید کہا کہ : خدا شہیدوں کا خون رائیگان نہیں جانے دیتا اور ان کو آرزوں کو برآوردہ کرتا ہے۔ آج مجلس وحدت مسلمین پاکستان شہدا کی وارث ہے۔ شہید علامہ عارف حسین الحسینی کی خواہش تھی کہ ملت میں اتحاد و اتفاق ہو ، ماتمی اور تنظیمی ایک جگہ جمع ہوں اور ہم نے شہید کی اس خواہش کو شہید کی یاد میں اور ان کی قرآن و سنت کانفرنس کی یاد میں جولائی کے مہینے میں مینار پاکستان پر قرآن و سنت کانفرنس کو منعقد کیا اور ملی وحدت ما ثبوت دیا اور شہید کی اس آرزو کو پورا کیا۔ ہمیں بصیرت کے ساتھ آگے چلنا ہے، صبر کے دامن کو ہاتھ سے جانے نہیں دینا، ہم نے آپس میں نہیں الجھنا۔ آپ نے کہا ہم کسی بھی شیعہ سے نہیں لڑنا چاہتے اور کوشش کریں گے کہ حتی کسی بھی داخلی مسئلہ کا گلہ بھی نہ کریں۔
علامہ راجہ ناصر عباس جعفری نے ملکی حالات کی طرف اشارہ کرتے ہوئے کہا کہ : کچھ عرصے بعد الیکشن آرہے ہیں ہم ان الیکشن میں بھر پور کردار ادا کریں گے۔ اس سلسلے میں قم کے علما ہماری مدد کریں۔ ہم نے جنگی بنیادوں پر قوم میں کام کرنا ہے۔ ہم نے قوم کوووٹ کی طاقت کی اہمیت بتانی ہے، ہم اس ووٹ کے ذریعے نظام کو بھی تبدیل کرسکتے ہیں۔ ہم ملت شیعہ کے کروڑوں جوانوں کو پیغام دیتے ہیں کہ وہ اپنے کردار کو ادا کرنے کیلئے تیار ہوجائیں۔