وحدت نیوز(اسلام آباد) مجلس وحدت مسلمین کے سربراہ علامہ ناصرعباس جعفری نے پاکستان تحریک انصاف کے وائس چیئرمین شاہ محمود قریشی کو ٹیلی فون کیا ہے اور ملتان جلسے میں ہونے والی کارکنان کی ہلاکتوں پر اظہار افسوس کیا ہے۔ علامہ ناصرعباس جعفری نے ملتان انتظامیہ کی غفلت اور کوتاہی کی بھی شدید مذمت کی۔ مرکزی سیکرٹری جنرل نے شاہ محمود قریشی کو تحریک انصاف کی جانب سے ملتان میں تاریخ ساز جلسہ کرنے پر مبارکباد پیش کی اور کہا کہ ملک کو جلد غیر مقبول وزیراعظم سے نجات ملے گی، موجودہ حکومت عوام سے کئے گئے تمام وعدوں کو پورا کرنے میں مکمل طور پر ناکام ہوگئی ہے۔ اس موقع پر شاہ محمود قریشی نے علامہ ناصر عباس کا شکریہ ادا کیا اور کہا کہ تحریک انصاف مجلس وحدت مسلمین کی جدوجہد کو قدر کی نگاہ سے دیکھتی ہے۔ شاہ محمود قریشی نے اس امید کا بھی اظہار کیا کہ مجلس وحدت مسلمین ملتان میں پنجاب انتظامیہ کی طرف سے ہونے والے ظلم کیخلاف عوامی سطح پر آواز اٹھائے گی۔ وائس چئیرمین تحریک انصاف نے پاکستان عوامی تحریک، مجلس وحدت مسلمین اور سنی اتحاد کونسل کی طرف فیصل آباد میں ہونے والے جلسے کیلئے نیک خواہشات کا بھی اظہار کیا۔

وحدت نیوز (اسلام آباد) پنجاب حکومت نے مجلس وحدت مسلمین پاکستان کے مرکزی سیکرٹری جنرل علامہ ناصرعباس جعفری کی فیصل آباد اور چنیوٹ میں داخلے پر ایک ماہ کیلئے پابندی عائد کردی ہے۔ ذرائع کے مطابق یہ پابندی کالعدم اہلسنت والجماعت سے تعلق رکھنے والے رکن پنجاب اسمبلی الیاس چنیوٹی کے کہنے پر لگائی گئی ہے۔ یاد رہے کہ علامہ ناصرعباس جعفری نے اتوار کے روز دھوبی گھاٹ ہونے والے جلسے عام میں شرکت کرنی ہے، جلسے عام سے پاکستان عوامی تحریک کے سربراہ علامہ طاہرالقادری اور سنی اتحاد کونسل کے چئیرمین حامد رضا نے بھی خطاب کرنا ہے۔ یہ جلسہ تینوں جماعتوں کی مشترکہ کاوش کے نتیجے میں منعقد ہونے جا رہا ہے۔ ضلعی انتظامیہ نے یہ پابندی نقص امن کا بہانہ بنا کر عائد کی ہے، تاہم ذرائع کا کہنا ہے کہ صوبائی حکومت پنجاب بھر میں حکومت مخالف ہونے والے جلسوں سے خوفزدہ ہے، اس لئے یہ پابندی لگائی گئی ہے۔ دوسری جانب علامہ ناصر عباس جعفری نے ہر صورت فیصل آباد جلسہ میں جانے کا اعلان کیا ہے۔

وحدت نیوز(کراچی) مجلس وحدت مسلمین پاکستان کے سربراہ علامہ ناصر عباس جعفری نے اپنے دو روزہ دورہ کراچی کے موقع پر معروف ذاکر اہل بیت علیہ السلام علامہ طالب جوہری سے ان کی رہائش گاہ پر ملاقات کی اور ان کے داماد سید مبارک کاظمی کی شہادت پر اظہار تعزیت کیا اور شہید کی بلندی درجات کے لئے فاتحہ خوانی کی۔ اس موقع پر علامہ ناصر عباس جعفری کا کہنا تھا کہ شہر کراچی میں جاری ٹارگٹ کلنگ کا مسئلہ ایک قومی مسئلہ ہے جس پر شیعہ قوم کے تمام طبقات کو مل کر آواز بلند کرنی چاہیئے، انشاء اللہ مجلس وحدت مسلمین کبھی بھی اپنے شہداء کی مظلومیت کی آواز کو نہیں دبنے دے گی اور ہمیشہ اپنے شہداء کی قربانیوں کو زندہ رکھتے ہوئے میدان عمل میں حاضر رہے گی۔ انہوں نے مزید کہا کہ ہم سب کی ذمہ داری ہے کہ حضرت ثانی زہرا (س) کی سیرت پر عمل پیرا ہوتے ہوئے مظلومیت کی آواز کو بلند کریں، ہمارے منبروں سے ہمیشہ حق کی حمایت کی گئی یہی ہمارا طرہ امتیاز رہا ہے اور انشاء اللہ یہ کام صدا جاری رہے گا۔

اس موقع پر علامہ طالب جوہری نے شیعہ نسل کشی کا اصل ذمہ دار حکومت کو قرار دیا اور کہا کہ اگر حکومت نے قاتلوں کو کیفر کردار تک پہنچایا ہوتا تو آج صورتحال شاید یہ نہ ہوتی۔ انہوں نے مزید کہا کہ اب بھی وقت ہے کہ حکومت وقت ہوش کے ناخن لے اور وطن بچانے کیلئے دہشت گردوں کے خلاف کاروائی کرے۔ علامہ طالب جوہری نے علامہ ناصر عباس جعفری کی آمد پر ان کا شکریہ ادا کیا اور مجلس وحدت مسلمین کیلئے نیک تمناوں کا اظہار کیا اور ایم ڈبلیو ایم کی جانب سے شیعہ سنی وحدت کیلئے علامہ طاہر القادری کے ساتھ اتحاد کی پالیسی کو سراہا۔ ملاقات میں علامہ ناصر عباس جعفری کے ہمراہ ایم ڈبلیو ایم کراچی ڈویژن کے رہنما انجینئر رضا نقوی، علی حسین نقوی، علامہ علی انور، مبشر حسن اور میثم عابدی بھی موجود تھے۔

وحدت نیوز(اسلام آباد) مجلس وحدت مسلمین پاکستان کے سربراہ علامہ ناصرعباس جعفری نے عید الضحیٰ کا پہلا روز ڈی چوک پارلیمنٹ ہاوس اسلام آباد کے سامنے انقلاب دھرنے کے شرکاء کے ساتھ گذارا، علامہ ناصرعباس جعفری نے نماز عید بھی ڈی چوک پر علامہ ڈاکٹر طاہر القادری کی ذیر اقتداء ادا کی، اس موقع پر وحدت اسلامی اور بھائی چارگی کے دلنشین مناظر دیکھنے میں آئے ، نمازعید کی ادائیگی کے وقت مختلف دینی و سیاسی جماعتوں کے قائدین اور رہنماوں سمیت شیعہ سنی عوام کی بڑی تعداد نے اکٹھا نماز عید ادا کی، پاکستان تحریک انصاف کے سربراہ عمران خان، پاکستان عوامی تحریک کے سربراہ شیخ رشید احمد اوردیگر سیاسی جماعتوں کے قائدین بھی پہلی صف میں علامہ ناصر عباس جعفری کے ہمراہ موجود تھے، نماز عید کی ادائیگی کے بعد علامہ ناصر عباس جعفری عوام میں گھل مل گئے، لوگوں سے عید ملےاور عید کی مبارک باد دی، علامہ ناصر عباس جعفری آج عید الضحیٰ کے دوسرے روز کراچی پہنچ چکے ہیں ، جہاں وہ دو روز قیام کے دوران ٹارگٹ کلنگ کا نشانہ بننے والے شہدائے ملت جعفریہ کے گھروں پر جا کر انکے اہل خانہ سے تعزیت کا اظہار کریں گے، جبکہ مختلف سیاسی و مذہبی شخصیات سے ملاقاتیں بھی متوقع ہیں۔

وحدت نیوز (اسلام آباد) گلگت سے ہراموش اور پشاورسے پاراچنارجانے والی بس پر ہونیوالے بم حملے کی شدید مذمت کرتے ہیں۔ایک مرتبہ پھر منظم انداز میں محب وطن اہل تشیع شہریوں کونشانہ بنایا گیاہے، وفاقی حکومت کی جانب سے کالعدم جماعتوں کو فری ہیڈ دی دیا گیا ہے ۔گلگت اور پاراچنار روٹ پر دہشتگردی کا یہ پہلا واقعہ نہیں ا گر اسلام آباد کو دہشت گردوں سے محفوظ رکھنے کے لئے آرٹیکل 245کا نفاذ کیا جا سکتا ہے تو ملک کے دیگر حساس شہروں میں بھی دہشتگردی کے خاتمے کیلئے آرٹیکل 245 کے نفاذ کے ساتھ آپریشن کیا جائے ۔دہشتگردوں کے خلاف ملک گیر آپریشن کیا جائے اور ساتھ ہی قومی سلامتی پالیسی برائے انسداد دہشت گردی اور فرقہ واریت وضع کی جائے۔ان خیالات کا اظہار مجلس وحدت مسلمین کے سر براہ علامہ ناصرعباس جعفری نے گلگت سے حراموش ا ور پشاوراسکیم چوک سے پاراچنارجانے والی بس پر دہشتگردوں کی جانب سے بم دھماکے کا نشانہ بنانے کے خلاف اپنے مذمتی بیان میں کیا

اُن کا کہنا تھا کہ دہشت گردی کی ممکنہ واقعہ سے وزارت داخلہ نے تین روز پہلے ہی گلگت انتظامیہ آگاہ کر دیا تھا،اُس کے باو جود صوبائی حکومت کی جانب سے کوئی انتظامات نہیں کئے گئے دشمن ملک میں خانہ جنگی کے درپے ہیں گلگت میں دہشت گردوں کیخلاف آپریشن میں تاخیر ایک سوچی سمجھی سازش ہے ،مجلس وحدت مسلمین کے کارکنان ملک و اسلام دشمنوں کی تمام سازشوں کو ناکام بنائیں اور پر امن رہیں،ملک سے انتہا پسندی اور دہشت گردی کے خاتمے کے لئے موثر قانون سازی کی ضرورت ہے،اس المناک واقعہ کی ذمہ دار گلگت بلتستان کی انتظامیہ اور نااہل وزیر اعلیٰ ہے، گلگت بلتستان سمیت پورے ملک میں شیعہ و سنی متحد ہیں ، گذ شتہ ایک ہفتے سے دہشت گردی کی ممکنہ اطلاعات کے باوجودصوبائی حکومت نے کوئی حکمت عملی مرتب نہیں کی ۔

علامہ ناصر عباس جعفری نے وفاقی حکومت اور چیف جسٹس آف پاکستان ،اورآرمی چیف جنرل راحیل شریف سے مطالبہ کیا کہ ملک دشمن اور اسلام دشمن دہشت گردانہ کاروائیوں میں ملوث دہشتگردوں کے خلاف ملک گیر آپریشن کیا جائے اور ان دہشتگردوں کے پیچھے اُن سیاسی و مذہبی وابستگیاں کو بھی ملکی میڈیا اور عوام کے سامنے لایا جائے اس کے ساتھ ساتھ مذہبی انتہاپسندی و دہشت گردی میں ملوث دہشت گردوں کو سزا دینے کیلئے فی الفور خصوصی عدالتیں قائم کی جائیں اور جرم ثابت ہونے کے بعد ایسے عناصر کو فی الفور سزائیں دیکر نشان عبرت بنایا جائے ۔ حکومت بین المذاہب اور بین المسالک ہم آہنگی کے لئے حکومتی سطح پر ایک علماء بورڈ تشکیل دے جو عملی طور پر بین المسالک ہم آہنگی قائم کرنے میں اپنا بھرپور کردار ادا کرے۔آپریشن ضرب ازب کے بعد دہشتگردوں کے ٹھکانے پورے ملک میں قائم ہو چکے ہیں طالبان دہشتگردوں کی بغل بچہ کالعدم جماعتوں کو وفاقی حکومت میں شامل وزراء کی مکمل حمایت حاصل ہے اور نواز حکومت کی جانب سے ان کالعدم دہشتگرد جماعتوں کو شیلٹر دینے کی ریت اگر اس ملک میں قائم ہوئی تو بھر مملکت خدادا د پاکستان میں امن و امان کا قیام صرف خواب بن کر رہ جائے گا۔

وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ ناصر عباس جعفری ، ڈپٹی سیکریٹری جنرل علامہ امین شہیدی ، علامہ حسن ظفر نقوی ، علامہ شفقت حسین شیرازی، ناصر عباس شیرازی و دیگر نےبرادر تہور عباس حیدری کےامامیہ اسٹوڈنٹس آگنائزیشن پاکستان کےنئےمیر کاروان منتخب ہونے پر مرکزی سیکریٹریٹ سے جاری اپنے مشترکہ تہنیتی پیغام میں کہا ہے کہ مجلس وحدت مسلمین کی جانب سے برادر تہور عباس حیدری کو طلبہ امامیہ کا روح رواں منتخب ہونےپر دل کی اتہا گہرائیوں سے مبارک باد پیش کرتے ہیں ، خدا وند متعال کی بارگاہ میں ان کی نیک توفیقات میں اضافے کی دعا کرتے ہیں اور ساتھ ہی   امید ہے کہ نومنتخب میر کاروان طلاب امامیہ کی رہنمائی، ملک قوم کی سربلندی اور طلباء کے حقوق کے لئے اپنی تمام ترصلاحیتوں کو بروئے کار لاتے ہوئے پرامن اور مستحکم پاکستان کے لئے کردار ادا کریں گے۔