وحدت نیوز (لاہور)  مجلس وحدت مسلمین پاکستان کے زیراہتمام لاہور کے صحافیوں کے اعزاز میں خصوصی افطار ڈنر کا اہتمام کیا گیا، جس میں لاہور بھر کے سینئر صحافیوں، کالم نگاروں، اینکر پرسنز اور صحافتی تنظیموں کے رہنماؤں نے شرکت کی۔ تقریب کی صدارت مجلس وحدت مسلمین پاکستان کے سیکرٹری جنرل علامہ ناصر عباس جعفری نے کی جبکہ ایم ڈبلیو ایم پنجاب کے سیکرٹری جنرل علامہ عبدالخالق اسدی، ایم ڈبلیو ایم لاہور کے سیکرٹری جنرل علامہ سید امتیاز کاظمی، ایم ڈبلیو ایم کے سینئر رہنما سید اسد عباس نقوی، سیکرٹری اطلاعات مظاہر شگری، رائے ناصر عباس، رائے ماجد علی سمیت دیگر رہنماء بھی شریک ہوئے۔ صحافیوں کی جانب سے صدر لاہور پریس کلب ارشد انصاری اور سینئر صحافی امتیاز راشد مہمان خصوصی تھے۔

اس موقع پر مجلس وحدت مسلمین پاکستان کے مرکزی سیکرٹری جنرل علامہ ناصر عباس نے خطاب کرتے ہوئے کہا کہ امریکہ زوال پذیر ہوچکا ہے اور بہت جلد دنیا اس کی تباہی دیکھے گی۔ انہوں نے کہا کہ امریکہ ورلڈ پاور تو ہے لیکن سپر پاور نہیں رہا، کیونکہ مظلوموں کا استحصال کرنے والے کو فنا ہونا پڑتا ہے، باطل مٹ جانے کیلئے ہی ہوتا ہے۔ انہوں نے کہا کہ جس طرح روس کے غبارے سے ہوا نکلی تھی اسی طرح امریکہ کے غبارے سے بھی ہوا نکلنے والی ہے۔ انہوں نے کہا کہ امریکہ جہاں بھی گیا اس نے شکست کھائی، ویت نام سے عراق اور عراق سے افغانستان تک ہر جگہ اسے ہزیمت اٹھانا پڑی اور آج امریکہ اعتراف کر رہا ہے کہ پاکستان کے تعاون کے بغیر وہ دہشت گردوں کا مقابلہ نہیں کرسکتا۔

انہوں نے کہا کہ امریکہ اندر سے کھوکھلا ہوچکا ہے یہی وجہ ہے کہ وہ ڈیوائیڈ اینڈ رول کی پالیسی پر عمل پیرا ہے، امریکہ شیعہ کو شیعہ سے اور سنی کو سنی سے لڑا رہا ہے۔ علامہ ناصر عباس جعفری نے کہا کہ مستقبل ایشیاء کا ہے، ایشیاء تمام وسائل سے مالا مال ہے، اب امریکی زوال کے بعد دنیا کی رہنماؤں کا تاج ایشیاء کے سر پر سجنے والا ہے۔ انہوں نے شام میں حضرت زینب (س) کے روضہ مبارک پر حملے کی شدید مذمت کرتے ہوئے کہا کہ مخصوص ٹولے نے بنت علی (ع) کے مزار کو نشانہ بنا کر ثابت کر دیا ہے کہ ان کا اسلام سے کوئی تعلق نہیں، اس سے قبل اسی دہشت گرد تکفیری گروہ نے صحابی رسول حضرت حجر بن عدی (رض) کے مزار کی بھی توہین کی اور ان کے جسد خاکی کی قبر سے نکال کر بے حرمتی کی گئی۔

انہوں نے کہا کہ ہم جناب زینب (س) کے روضے پر مارٹر حملے کی مذمت کرتے ہیں اور واضح کرتے ہیں کہ پاکستانی حکومت اور عالمی ادارے اس دہشت گردی کا نوٹس لیں۔ انہوں نے کہا کہ شام میں بدامنی پھیلانے والا گروہ امریکہ کا ہی پیدا کردہ ہے، جس کو پہلے افغانستان میں استعمال کیا گیا اور اب اسے شام میں لڑایا جا رہا ہے۔ انہوں نے کہا کہ امریکہ کی ترجیح اسرائیل کا تحفظ ہے، اسی لئے مصر میں عوام کی منتخب حکومت کو گرا دیا گیا، جس ملک سے اسرائیل تنگ ہوگا امریکہ کی اسی سے دشمنی ہوگی۔

انہوں نے کہا کہ پاکستان کا سب سے بڑا مسئلہ دہشت گردی اور بدامنی ہے، جب تک ملک سے دہشت گردی کا خاتمہ نہیں ہوتا ملک میں نہ معاشی بہتری ہوسکتی ہے اور نہ توانائی بحران ختم ہوسکتا ہے۔ انہوں نے کہا کہ ملک سے دہشت گردی کا خاتمہ حکومت کی ترجیح ہونی چاہئے۔ اس کے علاوہ تمام سیاسی و مذہبی جماعتوں کو بھی ملک کیلئے سوچنا ہوگا، ہمیں جماعتوں اور مسلکوں کے حصاروں سے نکل کر صرف پاکستان کیلئے سوچنا ہوگا۔ انہوں نے کہا کہ افسوس کا مقام ہے کہ کراچی میں فوج اور رینجرز نے ایم کیو ایم کو دھاندلی سے الیکشن میں جتوایا ہے، یہی وجہ ہے کہ کراچی میں قتل و غارت کا بازار گرم ہے۔

وحدت نیوز (ملتان)  مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کی اپیل پر ملک کے دیگر شہروں کی طرح جنوبی پنجاب میں بھی گزشتہ روز نواسی رسول (ع) حضرت زینب سلام اللہ علیھا کے روضے مبارک پر حملے کے خلاف احتجاجی مظاہرے اور ریلیاں نکالی گئیں۔ جنوبی پنجاب میں سب سے بڑا احتجاجی مظاہرہ ملتان میں کیا گیا جو کہ علمدار روڈ سے شروع ہوا اور فوارہ چوک پر اختتام پذیر ہوا۔ مظاہرے کی قیادت مجلس وحدت مسلمین پاکستان ملتان کے سیکرٹری جنرل علامہ سید اقتدار حسین نقوی اور علامہ قاضی نادر حسین علوی نے کی۔ مظاہرین نے ہاتھوں میں بینرز اور پلے کارڈز اُٹھائے ہوئے تھے۔

 مظاہرین نے اس موقع پر بھرپور نعرے بازی کی۔ مظاہرین سے خطاب کرتے ہوئے مجلس وحدت مسلمین ملتان کے سیکرٹری جنرل علامہ سید اقتدار حسین نقوی کا کہنا تھا کہ شام میں باغیوں کی جانب سے نواسی رسول حضرت زینب سلام اللہ علیھا کے روضے پر حملے پورے عالم اسلام کے قلب کو مجروح کیا ہے۔ علامہ قاضی نادر حسین علوی کا کہنا تھا کہ شام میں ایک ناصبی ٹولہ آل محمد (ص)کی دشمنی میں شعائراللہ کی حرمت پامال کر رہا ہے۔ ملتان کے علاوہ بہاولپور، رحیم یارخان، کبیروالا، شورکوٹ، جھنگ، فیصل آباد، جہلم، سرگودھا، ڈیرہ غازیخان اور دیگر شہروں میں بھی احتجاجی مظاہرے کیے گئے۔

وحدت نیوز (بلتستان)  مجلس وحدت مسلمین پاکستان بلتستان ڈویژن شعبہ خواتین کے زیر اہتمام شام میں بی بی زینب سلام اللہ علیہا کے روضہ اقدس پر تکفیریوں کی جانب سے راکٹ حملہ کے خلاف ایک احتجاجی پروگرام کا انعقاد الزہراء ہال اسکردو میں ہوا۔ احتجاجی مجلس سے خطاب ہوئے مجلس وحدت مسلمین شعبہ خواتین کی رہنماء معلمہ سیدہ عصمت رضوی نے کہا کہ شام میں حضرت زینب کبری س کی روضہ اقدس پر حملہ یزید وقت کی کارستانی ہے۔ انہوں نے کہا کہ دنیا بھر کی ظالم طاقتیں فکر کربلائی اور سفیر کربلا کی فکر سے پریشان ہیں۔ روضہ زینب (س) پر حملہ دراصل خانواندہ نبوت و وحی پر حملہ ہے۔

عصمت رضوی نے کہا کہ رسول مکرم (ص) کی نواسی، علی کی بیٹی اور ثانی زہراء نے امام حسین (ع) کی شہادت کے بعد شام و کوفہ کے درباروں میں جا کر یزید اور یزید کے پیروکاروں کے تخت و تاج کو جس بہادری اور شجاعت کے ساتھ روند ڈالا وہ قیام قیامت تک کے یزیدیوں کے منہ پر طمانچہ اور یزیدیت کی شکست کی بین علامت ہے۔ یہی وجہ ہے کہ ابوجہل و یزید کے فرزندوں سے چودہ سو سال گزرنے کے بعد بھی خانوادہ رسالت سے بغض و عناد ختم نہیں ہوا اور اب بھی اہلبیت ع کے شعار کو مٹانے کے درپے ہیں۔ یزیدی طاقتوں کو یہ واضح ہو جانا چاہیے کہ اہل بیت ع کا نور کفر کی ہواوں سے بجھنے والا نہیں ہے۔

وحدت نیوز (نیشنل ڈیسک) شام کے شہر دمشق میں واقع نواسی رسول حضرت زینب سلام اللہ علیہا کے مزار اقدس پر تکفیریوں کے حملے کیخلاف سربراہ مجلس وحدت مسلمین پاکستان حضرت علامہ راجہ ناصر عباس (حفظ اللہ) کی اپیل پرآج دوسرے روز بھی ملک بھر میں احتجاجی مظاہرے کیے گئے اور ریلیاں منعقد کی گئیں۔ جڑواں شہروں راولپنڈی، اسلام آباد، کراچی، بہاولپور، سکردو، کوئٹہ، کراچی اور ملک کے کئی چھوٹے بڑے شہروں قصبوں میں احتجاجی ریلیاں نکالی گئیں اور واقعہ کی پرزور مذمت کی گئی۔

 صوبائی دارالحکومت لاہور میں ایم ڈبلیو ایم کے زیراہتمام بڑے پیمانے پر احتجاج کیا گیا جس میں ہزاروں مرد و خواتین نے شرکت کی۔ مال روڈ الحمرا ہال سے لاہور پریس کلب تک نکالی گئی احتجاجی میں خواتین اور بچوں کی بھی بڑی تعداد نے شرکت کی۔ مظاہرین سے خطاب کرتے ہوئے مجلس وحدت مسلمین کے مرکزی ڈپٹی سیکرٹری جنرل علامہ حسن ظفر نقوی نے کہا کہ شام کے تکفیری دہشت گردوں نے ثابت کر دیا کہ ابو جہل، ابو لہب اور یزید کے اولاد آج بھی زندہ ہے اور خاندان رسالت صلی اللہ علیہ وآلہِ وسلم کے خلاف آج بھی برسر پیکار ہے۔ انہوں نے کہا کہ پاکستانی حکومت اپنا موقف وضاحت کرے اور اس دل خراش سانحے پر اقوام متحدہ میں آواز اُٹھائے۔

علامہ حسن ظفر نقوی کا کہنا تھا کہ پاکستان کے غیرت مند شہری شام میں اہل بیت علیہ السلام اور اصحاب رسول صلی اللہ علیہ وآلہِ وسلم کے دشمنوں اور معصوم انسانوں کے قاتلوں کو وافر مقدار میں اسلحہ اور امداد دینے پر سعودی عرب، بحرین، مصر اور قطر سمیت امریکہ ، برطانیہ کی مذمت کرتے ہیں۔ علامہ حسن ظفرنقوی نے پاکستانی میڈیا کی مجرمانہ خاموشی کی بھی شدید مذمت کی اور شام میں اسرائیلی اور سعودی کھیل کے خلاف برسرپیکار حزب اللہ اور شامی حکومت کی حمایت کا اعلان کیا۔ مظاہرین سے سیکرٹری جنرل مجلس وحدت مسلمین پنجاب علامہ عبدالخالق اسدی نے بھی خطاب کیا۔ اُنہوں نے کہا کہ آج ناموس رسالت صلی اللہ علیہ وآلہِ وسلم پر حملہ کر کے امریکی و اسرائیلی گماشتوں نے ایک دفعہ پھر مسلمانوں کی غیرت کو للکارا ہے۔ ہم جناب زینب( س)کے روضے پر مارٹر حملے کی مذمت کرتے ہیں اور واضح کرتے ہیں کہ پاکستانی حکومت اور عالمی ادارے اس دہشت گردی کا نوٹس لیں۔ انہوں نے کہا کہ شام میں بدامنی پھیلانے والا گروہ امریکہ کا ہی پیدا کردہ ہے، جس کو پہلے افغانستان میں استعمال کیا گیا اور اب اسے شام میں لڑایا جا رہا ہے۔ علامہ اسدی کا کہنا تھا کہ مجلس وحدت مسلمین دس ورزہ سوگ کے دوران ملک بھر میں مظاہرے اور عزاداری کے اجتماعات ہونگے اور صدائے احتجاج بلند کرتے رہیں گے۔

مجلس وحدت مسلمین خواتین ونگ کی سیکرٹری جنرل خانم سکینہ مہدوی نے کہا کہ شام میں محسنہ اسلام کے روضہ اقدس پر حملہ دراصل اسلام پر حملہ ہے ۔انہوں نے کہاکہ اس بہادر بی بی نے واقعہ کربلا کے بعد فوج یذید اور یذیدی سوچ کو شکست دی، آج بھی اولاد یذید بی بی زینب (س) سے خوفزدہ ہے، سابق رکن پنجاب اسمبلی عاصمہ ممدوٹ نے کہاکہ بی بی زینب (س) کے مزار پر حملے کے خلاف ہر عزت اور غیرت مند ماں بہن بیٹی کو آواز احتجاج بلند کرنا چاہیے کیونکہ اس محسنہ اسلام بی بی نے کربلا میں اپنی پاک چادر قربان کرکے قیامت تک عورت کے پردے کو بچا لیا۔ مظاہرے میں شیعہ علما کونسل کے رہنما علامہ حافظ کاظم، علامہ افضل حیدری، علامہ مصطفٰی مہدی، سید اسد عباس نقوی، سید حسن رضا، سید حسین جعفر، آئی ایس او کے مرکزی سیکرٹری اطلاعات سید زین زیدی نے بھی شرکت کی۔

شہر اقتدار اسلام آباد میں بھی مجلس وحدت مسلمین اور تحفظ مزارات کمیٹی کے زیر اہتمام شام میں حضرت زینب (س) کے روضہ مبارک پر حملوں کے خلاف احتجاجی ریلی نکالی گئی اور ان حملوں کی مذمت کیلئے دفتر خارجہ کو یادداشت پیش کی گئی۔ مجلس وحدت مسلمین کے زیر اہتمام ریلی اسلام آباد کی مرکزی امام بارگاہ اثنائےعشری جی 6 ٹو سے نکالی گئی جو وزارت خارجہ تک جانا چاہتی تھی تاہم انتظامیہ نے ریلی کو ریڈیو پاکستان چوک کے قریب شاہراہ دستور پر روک دیا جہاں پر دفتر خارجہ کے قائم مقام ڈائریکٹر جنرل مشرق وسطیٰ محمد جانباز خود آئے اور یادداشت وصول کی۔ یادداشت میں حکومت پاکستان سے مطالبہ کیا گیا تھا کہ وہ اقوام متحدہ سے ایسے شرمناک واقعات کی روک کیلئے احتجاج ریکارڈ کرائے۔ ریلی کی قیادت مجلس وحدت مسلمین پاکستان کے ڈپٹی جنرل سیکریٹری علامہ امین شہیدی اور راولپنڈی اسلام آباد کے تحفظ مذاکرات کمیٹی کے چیئرمین تطہیر عالم رضوی نے کی۔

شہر قائد کراچی میں بھی مجلس وحدت مسلمین پاکستان کراچی ڈویژن اور امامیہ اسٹوڈنٹس آرگنائزیشن پاکستان کراچی ڈویژن کے زیراہتمام احتجاجی و ماتمی جلوس نکالے گئے جس میں ہزاروں خواتین اور مرد حضرات نے شرکت کی جبکہ اس موقع پر بچوں کی بڑی تعداد بھی موجود تھی۔ احتجاجی و ماتمی جلوس کے شرکاء نے ہاتھوں میں بینرز اور پلے کارڈز اٹھا رکھے تھے جن پر ہماری جان سیدہ زینب سلام اللہ علیہا پر قربان ہو، لبیک یا رسول اللہ (ص)، لبیک یا حسین (ع)، لبیک یا زینب (س)، مردہ باد امریکہ، اسرائیل منظور نعرے درج تھے۔ اس موقع پر شرکاء نے حکومت پاکستان سمیت عالمی برادری سے مطالبہ کیا کہ وہ نواسی رسول اکرم (ص) کے روضہ مبارک پر ہونے والے امریکی و اسرائیلی حملوں کے خلاف احتجاج کرے۔ شدید گرمی اور روزے کے باوجود شرکاء کا جذبہ دیدنی تھا۔

وحدت نیوز (کراچی)  نواسی رسول اکرم (ص) سیدہ زینب سلام اللہ علیہا کے روضہ مبارک پر ہونے والے حملے حرم پیغمبر اکرم (ص) پر حملوں کے مترادف ہے۔ نواسی رسول اکرم (ص) سیدہ زینب سلام اللہ علیہا کے روضہ مبارک پر ہونے والے حملے میں امریکہ اور اسرائیل براہ راست ملوث ہیں، عالم اسلام سراپا احتجاج بن جائے۔ ان خیالات کا اظہار مجلس وحدت مسلمین پاکستان کے مرکزی رہنما علامہ اعجاز حسین بہشتی، صوبہ سندھ کے ڈپٹی سیکرٹری جنرل علامہ صادق رضا تقوی، کراچی ڈویژن کے ڈپٹی سیکریٹری جنرل مولانا دیدار علی جلبانی، مجلس ذاکرین امامیہ پاکستان کے رہنما علامہ جعفر رضا نقوی، آئی ایس او کراچی کے ڈویژن صدر محمد عابدی، علامہ علی انور جعفری و دیگر نے خراسان روڈ تا سی بریز چوک تک منعقد کی جانے والی احتجاجی ریلی بعنوان ’’ لبیک یا زینب (س) ریلی ‘‘ سے خطاب کرتے ہوئے کیا۔

احتجاجی ریلی کا اہتمام قائد وحدت علامہ راجہ ناصر عباس جعفری کی اپیل پرمجلس وحدت مسلمین پاکستان کراچی ڈویژن اور امامیہ اسٹوڈنٹس آرگنائزیشن پاکستان کراچی ڈویژن کی جانب سے کیا گیا تھا۔ نواسی رسول اکرم (ص) سیدہ زینب سلام اللہ علیہا کے روضہ مبارک پر پر ہونے والے حملے کے خلاف نکالی جانے والی احتجاجی ریلی و ماتمی جلوس میں ہزاروں خواتین اور مرد حضرات نے شرکت کی جبکہ اس موقع پر بچوں کی بڑی تعداد بھی موجود تھی۔ احتجاجی و ماتمی جلوس کے شرکاء نے ہاتھوں میں بینرز اور پلے کارڈز اٹھا رکھے تھے جن پر ہماری جان سیدہ زینب سلام اللہ علیہا پر قربان ہو، لبیک یا رسول اللہ، لبیک یا حسین، لبیک یا زینب، مردہ باد امریکہ، اسرائیل منظور نعرے درج تھے۔ اس موقع پر شرکاء نے حکومت پاکستان سمیت عالمی برادری سے مطالبہ کیا کہ وہ نواسی رسول اکرم (ص) کے روضہ مبارک پر ہونے والے امریکی و اسرائیلی حملوں کے خلاف احتجاج کرے۔

احتجاجی ریلی سے خطاب کرتے ہوئے مجلس وحدت مسلمین پاکستان کے مرکزی رہنما علامہ اعجاز حسین بہشتی کا کہنا تھا کہ امریکہ اور اسرائیل اسلام کے کھلے دشمن ہیں جو مسلمانوں کے مقدسات کی توہین کرکے اور ان پر حملے کرکے مسلمانوں کے جذبات کو مجروح کر رہے ہیں اور عالمی دہشت گرد امریکہ چاہتا ہے کہ کسی طرح پوری دنیا کو فرقہ واریت کی لعنت میں دھکیل دیا جائے اور مسلمانوں کو آپس میں دست و گریباں کر دیا جائے۔ ان کا کہنا تھا کہ ان تمام تر شیطانی ایجنڈوں اور مکر و فریب کا بنیادی مقصد غاصب صیہونی ریاست اسرائیل کو تحظ فراہم کرنا ہے اور مسلم امہ کو منتشر کرنا ہے۔

انہوں نے مزید کہا کہ سیدہ زینب سلام اللہ علیہا کے روضہ مبارک پر ہونے والے حملوں میں امریکی اور صیہونی دہشت گرد براہ راست ملوث ہیں، امت مسلمہ اپنے مشترکہ دشمن امریکہ اور اسرائیل کو سنگین جرائم کے ارتکاب پر معاف نہیں کر سکتی۔ ان کا کہنا تھا کہ اب وہ وقت نہیں ہے کہ سامراجی ایجنٹ تکفیری دہشت گرد عناصر صحابہ کرام، ازواج رسول اکرم (ص) اور اہل بیت اطہار (ع) کے مزارات کو منہدم کریں اور دنیا خاموش تماشائی بنی رہے بلکہ اب وقت ہے کہ مسلم امہ اٹھ کھڑی ہو اور اسلام کے مقدسات اور شعار کی حفاظت کے لئے سامراجی ایجنٹ تکفیری دہشت گردوں کے خلاف سراپا احتجاج بن جائے۔ علامہ بہشتی کا کہنا تھا کہ پاکستان کے عوام اہل بیت اطہار علیہم السلام کے مزارات مقدسہ کی توہین پر سراپا احتجاج ہیں اور اپنے ازلی دشمن امریکہ اور اسرائیل کو اس اہانت کا براہ راست ذمہ دار سمجھتے ہیں۔

احتجاجی و ماتمی جلوس سے خطاب کرتے ہوئے امامیہ اسٹوڈنٹس آرگنائزیشن پاکستان کراچی ڈویژن کے صدر محمد عابدی کا کہنا تھا کہ اگر سیدہ زینب سلام اللہ علیہا کے روضہ مبارک پر حملوں کا سلسلہ نہ رکا تو ملک بھر میں احتجاج کیا جائے گا اور دہشت گردی کے مراکز امریکی سفارتخانوں کا گھیراو کریں گے۔ اس موقع پر علامہ صادق رضا تقوی اور مولانا دیدار علی جلبانی نے کہا کہ نواسی رسول اکرم (ص) جناب سیدہ زینب سلام اللہ علیہا کے روضہ مبارک کے تحفظ کے لئے ہماری جان بھی حاضر ہے اور اس حوالے سے کسی قسم کی قربانی سے دریغ نہیں کیا جائے گا۔ ان کا کہنا تھا کہ پاکستان میں روز بروز دہشت گردی عروج پر پہنچ رہی ہے جس کا واحد علاج دہشت گردوں کے خلاف آپریشن کرنا ہے تاہم حکومت پاکستان دہشت گردی کے خاتمے کے لئے عملی اقدامات کرے اور دہشت گردوں کے خلاف آپریشن کرے۔ اس موقع پر شرکائے احتجاجی ریلی نے لبیک یا رسول للہ، لبیک یا حسین، لبیک یا زینب اور لبیک یا نصر اللہ کے نعرے بلند کئے اور ریلی کے اختتام پر امریکی اور صیہونی اسرائیلی پرچم بھی نذر آتش کئے گئے۔

وحدت نیوز (اسلام آباد) تکفیری دہشت گردوں نے حرم سیدہ زینب سلام اللہ علیہ پر حملہ کر کے ایک مرتبہ پھر جنت البقیع کی تاراجی کی یاد تازہ کر دی ہے ، دنیا بھر سے شام لا ئے گئے دہشت گردوں کا اہم اور آخری حدف حرم سیدہ زینب (س)پر حملہ تھا۔ہم آخری سانس تک شعائر اللہ، شعائر رسول اللہ (ص)اور شعائر اہل بیت (ع) کا دفاع کرتے رہیں گے ،مجلس وحدت مسلمین پاکستان ا س عظیم سانحے پر 10روزہ ملک گیر یوم سوگ اور 3روزہ یوم احتجاج کا اعلان کر تی ہے ۔ ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری (حفظ اللہ )نے شام ( دمشق) میں حرم سیدہ زینب(س) بنت علی (ع)پر تکفیری و خارجی دہشت گرد گروہ کی جانب سے راکٹ حملے کے خلاف مرکزی سیکریٹریٹ سے جاری اپنے مذمتی بیان میں کیا۔

ان کا کہنا تھا کہ ان دہشت گردوں کا نہ تو کوئی دین ایمان ہے نہ ہی کوئی زبان ، جس طرح امریکانے افغانستان پر حملہ کے لئے 9/11کو جواز بنایا ، پھر عراق پر حملے کے لئے کیمیکل ہتھیاروں کا بہانہ بنایااور آج اسی امریکا نے شام (حرم سیدہ زینب سلام اللہ علیہ )پر حملے کے لئے عوامی حقوق کی پامالی کا واویلہ کرکے اپنے نام نہاد مسلمان جہادی (فسادی)ایجنڈوں سے لشکر کشی کروائی ہے ۔ اگر یہ فسادی تکفیری ٹولہ عوامی حقوق کی بازیابی کے لئے اتنا ہی سنجیدہ تھا تو کسی حکومتی سرکاری عمارت پر حملہ آور ہوتا ، مومنین کے دل کی ٹھنڈک ہمارے عشق و محبت کے محور ہماری پاک بی بی (س) کے حرم مطہر پر کیوں راکٹ داغے ؟
آج آل سعود کے روحانی فرزندوں نے اپنے اجداد کی سیرت پر عمل کرتے ہو ئے ایک مرتبہ پھر دختر سیدہ کونین جناب فاطمتہ الزہرا سلام اللہ علیہ جناب سیدہ زینب الکبریٰ سلام اللہ علیہ کے روضہ اطہر پر حملہ کیا ہے ۔

ان کا مزید کہنا تھا کہ اگر امریکا اس حملے کو ٹیسٹ کیس سمجھ رہا ہے تو حماقت کر رہا ہے ، امریکا اور اس کے وہ تمام اتحادی (فسادی)جو اس وقت شام کی انقلابی حکومت اور عوا م سے برسر پیکار ہیں انہیں اس کا جلد حساب دینا ہو گا ، اللہ کے لشکر یعنی حزب اللہ کا اعلان سے فان حزب اللہ ہم الغالبون بیشک ایک دن اللہ کے لشکر کو ہی ظالموں پر غالب آنا ہے ، اور انشاء اللہ وہ دن دور نہیں کہ جب امریکا ، اسرائیل اور سعودیہ عرب شام میں بھی اسی طرح ذلت و رسوائی کا سامنا کریں گے جیسے 2006میں لبنان میں کر چکے ہیں ۔

انہوں نے مذید کہا ہے کہ امریکی ، اسرائیلی و سعودی حکمران ایک بات اور اپنے ذہن نشین کر لیں کہ ابھی صرف شام کے مقامی اور پڑوسی ممالک کے چند سو غلامانِ سیدہ زینب بنت علی علیہ السلام کا مقابلہ تمہارے بس میں نہیں ڈرو اس وقت سے کہ جب عالم تشیع کے تمام مراجعین ، بزرگان ، علماء کرام اور خصوصاً ولی امر مسلمین جہان امام سید علی خامنہ ایٰ (حفظ اللہ تعالیٰ) تمہارے خلاف جہاد کا فتویٰ صادر فرمادیں تو اس زمین پر تمہارے تمام مفادات تباہ و برباد کر دیئے جا ئیں ۔

علامہ راجہ ناصر عباس جعفری (حفظ اللہ ) نے حرم سیدہ زینب سلام اللہ علیہ پر ہو نے والے اس دل خراش سانحے کے خلاف مجلس وحدت مسلمین پاکستان کی جانب سے10روزہ ملک گیر یوم سوگ اور 3روزہ یوم احتجاج کا اعلان کیا اور تمام غیرت مند مسلمانوں سے اپیل کی ہے کہ وہ اہانت پر خاموش نہ بیٹھیں بلکے اسے توہین رسالت (ص) محسوس کر تے ہوئے اپنے گھروں سے باہر نکلیں اور شاتمین رسول (ص )وآل رسول (ع) کے خلاف صدائے احتجاج بلند کریں ۔