The Latest
وحدت نیوز(اسلام آباد) وفاقی وزیرداخلہ چوہدری نثارعلی خان حکومت پاکستان کے نہیں طالبان کے نمائندے ہیں ، نواز لیگ پاک فوج کے کردار کو داغ دار بنانے کے لئے مذکراتی کمیٹی میں شامل کر نا چاہتی تھی، پاک فوج نے طالبان کے ساتھ مذاکرات میں شرکت سے انکار کر کے خون شہداء کی پاسداری کی ہے،طالبان وہ سانپ ہیں جنہیں جتنادودھ پلایا جائے گا اتنا ان کے زہر میں اضافہ ہی ہو گاان خیالات کا اظہار مجلس وحدت مسلمین پاکستان کے مرکزی سیکریٹری امور تبلیغات علامہ شیخ اعجاز بہشتی نے مرکزی سیکریٹریٹ سے جاری اپنے بیان میں کیا ۔
انکا کہنا تھا کہ وفاقی وزیر داخلہ نے ضلع کچہری میں جسٹس ملک رفاقت اعوان شہید کے قتل کا ذمہ دار طالبان کے بجائے ان کے محافظ کو قرار دینا شہید کے خون سے غداری کے مترادف ہے، چوہدری نثار بھول گئے کہ وہ ایوان میں عوام کے ووٹوں کی بدولت بیٹھے ہیں نہ کے طالبان کے ووٹوں کی بدولت، ملک رفاقت اعوان شہید کے محافظ اور دیگر عینی شاہدین کے بیانات کے بعد چوہدری نثار کو مسند وزارت پر بیٹھنے کا کو جواز باقی نہیں رہتا، اگر چوہدری نثار تھوڑے بھی غیرت مند ہیں تو مستعٰفی ہو جائیں ، نواز لیگ نے طالبان سے مذکرات میں فوج کو شامل کرنے کی کوشش پاک فوج کے کردار کو مشکوک بنانے کے لئے کی ، جسے پاک فوج نے ناکام بنا دیا ، کور کمانڈرز اجلاس میں مذاکراتی کمیٹی کا حصہ نا بننے کا فیصلہ عوام کی آواز کی ترجمانی ہے ، پاک فوج نے طالبان کے ہاتھوں شہید ہونے والے ہزاروں فوجی و سول شہریوں کے خون کی پاسداری کا بہترین حق ادا کیاہے، جس پر ہم اٹھارہ کروڑ عوام کی جانب سے پاک فوج کو خراج تحسین پیش کرتے ہیں۔
وحدت نیوز(مظفرآباد) شہیدڈاکٹر محمد علی نقوی آیت قرآنی’’رجال صدقوا ما عہدوا‘‘ کے مصداق ، یہ آیت مجیدہ صرف صدر اسلام کے لیئے نہ تھی، بلکہ ہر زمانے کے وہ مرو جو اللہ سے کیئے ہو ہر عہد کو نبھاتے ہوں وہ اس آیت مجیدہ کی عملی تفسیر ہیں ،سرزمین پاکستان پر شہید اس کا عملی نمونہ تھے، ڈاکٹر کی زندگی اسلامی انقلاب کے لیئے جدوجہد ، محنت و لگن سے عبارت تھی، شہید ڈاکٹر کی زندگی تقویٰ الہی اور نظم امر کے علوی اصول پر استوار تھی، شہید خود منظم تھے ، حلقہ احباب کو بھی منظم رہنے کا درس دیتے تھے، شہید نے اپنی اجتماعی فعالیت سے جوانان ملت کو اپنی خاص توجہات کا مرکز بنایا، ان خیالات کا اظہار سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی نے شہید ڈاکٹر کی برسی کے موقع پر مظفرآباد میں منعقد ایک سیمینار سے خطاب کرتے ہوئے کیا۔
انہوں نے کہا کہ یہی کردار شہید تھا جس کی بدولت ان کی جلائی ہوئی شمعیں آج تک روشن و منور ہیں، آج بھی ہر ملی تنظیم و جماعت میں کسی نہ کسی طرح شہید کے افکار شامل ہیں، شہید حقیقت میں مرد آہن تھے، وہ مرد جس کا ذکر آیت قرآنی کرتی ہے، وہ مرد جو میدان میں موجود رہتا ہے، وہ مرد جو دوسروں کو بھی میدان میں رہنے کا درس دیتا ہے، انہوں نے کہا کہ خیبر کا میدان دیکھا جائے، جہاں رسول ؐ نے فرمایا تھا کہ ’’لاعطین غداً‘‘ کہ کل میں علم اسے دوں گا جو مرد ہو گا ، کرار ہو گا، اللہ اور اس کے رسول سے محبت کرتا ہو گا، ان تمام باتوں کو دیکھا جائے تو شہید نے اپنی زندگی اس آیت مجیدہ و فرمان رسول ؐ کے مطابق وقف کر دی، مرد میدان رہے، اللہ کی خاص عنایات تھیں جو شہید کامیابیوں کے جھنڈے گاڑتے انقلاب اسلامی کی جدوجہد میں مصروف عمل رہے ۔
علامہ تصور جوادی نے کہا کہ حضرت علی ؑ کا قول کہ اس انداز میں رہو کہ اگر زندہ ہو تو لوگ ملنے کے مشتاق رہیں اور جب دنیا سے چلے جاؤ تو لوگ تم پر گریہ کریں، شہید خوش رفتا، خوش گفتار، ملنسار اور ہر دل عزیز شخصیت تھے، ہر ایک سے خندہ پیشانی سے پیش آنا ان کا شیوہ تھا، ضرور ت اس امر کی ہے کہ شہید کی سیرت و کردار میں آج کے جوان کو ڈھال لینا ہو گا، ہمیں اور ہمارے جوانوں کو اپنی منزل کی طرف جو سفر درپیش ہے اس میں کامیابی کے لیئے، اس منزل تک پہنچنے کے لیئے ’’رجال صَدَقُوا‘‘بننا ہو گا، وہ وقت کہ جب گل نرجس کے ظہور سے موسم خزاں بہار میں بدل جائے گا، اس موسم کے رنگ میں رنگنے کے لیئے آج سے اپنے آپ کو تیار کرنا ہو گا، جو قومیں شہداء کی یا مناتی ہیں وہ قومیں ہمیشہ زندہ رہتی ہیں ، کیوں کہ رہبر معظم فرماتے ہیں کہ شہداء کے آثار کو زندہ رکھیں اس میں قوموں کی حیات ہے، شب عاشور مظفرآباد کے شہدا ہوں یا شہید ممتاز مغل، شہید شوکت نقوی ہوں یا شہدائے پاکستان و کشمیر سب اسی راستے کے راہی ہیں جو راستہ شہید ڈاکٹر کا تھا، پروردگار شہداء کے مشن کو کامیابی سے ہمکنار کرے، سیمینار سے سید شبیر حسین بخاری، سید زوار نقوی، راجہ عبدالرحمن اخلاق، ڈویژنل صدر آئی ایس او سید وقار کاظمی، سید ذاکر حسین سبزواری و دیگر نے خطاب کیا۔
وحدت نیوز(دمشق) جشن ولادت با سعادت شریکتہ الحسین حضرت زینب سلام اللہ علیہا کے پر مسرت موقع پر حرم مطہر میں ہزاروں افراد کا عظیم الشان اجتماع منعقد ہوا، اس موقع پر حرم مطہر ھیھات من الذلہ کے فلک شگاف نعروں سے گونج اٹھا، مقامی بچے اپنے ہاتھوں میں پھول اٹھائے صحن شریف میں داخل ہونے والے ہر شخص کے درمیان تقسیم کررہے تھے،اور دنیا کے گوشہ وکنار سے آئے ہوئے زائرین کو مبارک باد پیش کررہے تھے،اور یہ پیغام دیاجارہا تھا کہ شام میں ہونے والا کوئی واقعہ انہِیں یہاں آنے سے کبھی بھی نہیں روک سکےگا۔
جشن میں مہمان خصوصی مقام معظم رھبری کے نمائندے برائے سوریا آیت اللہ سید محمد مجتبیٰ حسینی تھے جبکہ صدارت جمہوری عربی شام کے مفتی ڈاکٹر بدرالدین حسون کر رہے تھے جہاں انہوں نے سب سے پہلےحرم مقدس کے سامنے فاتحہ پڑھی اور بعدازآں محراب مین جا کر نمازادا کی۔اس کے بعد انہوں نے اپنے عوام،قائد اور فوج کو مبارک باد دی جو تین سالوں سے حالت جنگ میں ہیں ،اس کے بعدانہوں نے کہا کہ جوتکفیری گروہ شام میں داخل ہوکر جناب سیدہ زینب سلام اللہ علیہا کے اس پررونق روضے کو ختم کرنا چاہتے تھے وہ آج آکر دیکھ لیں کہ بی بی کا ذکر کتنا بلند ہورہا ہے، اور وہ لوگ یہ بھی چاہتے تھے کہ شام کے عوام کے اندرتفرقہ ڈالیں ،آج اپنی آنکھوں سے دیکھیں کہ شام آج بھی اپنے عوام،فوج،جوانان،قائد سمیت قائم ودائم ہے۔
وحدت نیوز(لاہور) مجلس وحدت مسلمین پاکستان کے ذیلی شعبے وحدت اسکائوٹس پاکستان کے نمائندہ وفد نے علی رضا آباد میں شہید ڈاکٹر محمد علی نقوی نے مرقد پر حاضری دی پھول چڑھائے ، سلامی دی اور فاتحہ خوانی کی ،شہید ڈاکٹر محمد علی نقوی کی یوم شہادت کے موقع پر مجلس وحدت مسلمین پاکستان مرکز کی جانب سے آغا اللہ بخش جعفری صاحب اور وحدت چیف اسکاوٹ پنجاب برادر تنصیر حیدر نے اسکائوٹ وفد کی قیادت کی ، شرکاء نے شہید کی قومی و ملی خدمات کو شاندار الفاظ میں خراج تحسین پیش کیا اور ان کی مشن کی تکمیل کے عزم کا اعادہ کیا ۔
وحدت نیوز(اسلام آباد)سندھ حکومت کی تھرپارکر میں بھوک اور پیاس کے سبب پیدا ہونے والے انسانی بحران پر خاموشی افسوس ناک ہے ،120سے بچوں کی قحط سالی سے موت حکمرانوں کے منہ پر تماچہ ہے ، وزیر اعلیٰ سندھ کی جانب سے ناکامی کا اعتراف کر نا ہی کافی نہیں ہے، عوام کو اس انسانی بحران اور مسائل سے باہرنکالنے کے لئے عملی اقدامات کیے جائیں۔ سندھ فیسٹول کے نام پرعوام کے اربوں روپوں کا ضیاع کیا گیا۔ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے تھر پارکر میں قحط سالی سے معصوم بچوں کی اموات پر مرکزی سیکریٹریٹ سے جاری اپنے مذمتی بیان میں کیا۔
ان کا کہنا تھا کہ ناکام پالیسیوں کی بدولت آج سندھ حکومت ہر شعبے میں ناکام نظر آرہی ہے وافر مقدار میں گندم کی موجودگی اور تھر میں قحط سالی سے انسانی جانوں کے ضیاع پر ذمہ داران کیخلاف فوری کاروائی عمل میں لائی جائےاور انہیں کڑی سزا دی جائے ، افسوس ناک بات یہ ہے کہ عوام بھوک و پیاس سے مر رہے ہیں ، اور حکمران فیسٹیول منانے میں مصروف ہیں ، بلاول بھٹو اور آصف ذرداری اس واقعے کاجلد از جلد نوٹس لیں ۔کراچی میں بے گناہوں کا قتل عام جاری ہے ٹارگٹ کلنگ روکنے میں حکومت بری طرح ناکام ہوئی ہے عوام کی جان مال کی تحفظ نہ کر سکنے والوں کو عوام پرحکمرانی کا کوئی حق نہیں ۔علامہ راجہ ناصر عباس جعفری نے مجلس وحدت مسلمین کے شعبہ فلاح وبہود خیرالعمل فاوُنڈیشن کو ہدایات جاری کردی ہے کہ وہ فوری طور پر تھرپارکر کا دورہ کر کے متاثرین کی بھر پور مدد کریں۔ مجلس وحدت مسلمین عوامی جماعت ہونے کے ناطے اس دکھ کی گھڑی میں اپنے غریب عوام کو کبھی تنہا نہیں چھوڑے گی ۔
وحدت نیوز(مشہد مقدس) سفیرانقلاب شہید ڈاکٹر محمد علی نقوی کی انیسویں برسی کے موقع پر مجلس وحدت مسلمین شعبہ مشہد مقدس کے زیر اہتمام تعزیتی اجتماع منعقد کیا گیا ، جس میں مجلس وحدت مسلمین کے مرکزی سیکریٹری امور تربیت علامہ احمد اقبال رضوی نے خطاب کیا جب کہ مجلس وحدت مسلمین پاکستان کے سربراہ علامہ راجہ ناصرعباس جعفری نے خصوصی خطاب کیا اور شہید ڈاکٹر نقوی کی قومی و ملی خدمات پر تفصیلی روشنی ڈالی ، اس موقع پر مجلس وحدت مسلمین پاکستان کی مرکزی کابینہ کے اراکین سمیت علمائے کرام ، طلاب دینیہ اور زائرین ثامن الآئمہ علیہ السلام کی بڑی تعداد بھی شریک تھی ۔
علامہ راجہ ناصر عباس جعفری کا کہنا تھا کہ پاکستان میں انقلاب اسلامی کی ترویج کی بھاری ذمہ داری شہید ڈاکٹر نے بخوبی انجام دی ، وسائل کے فقدان ، معاشرے کی دھتکار اور خواص کا نظر انداز کرنا شہید ڈاکٹر کے راستے کی دیوار نہ بن سکا، شہید اپنے انقلابی مشن پر کامل یقین کے حامل تھے، شہید کے پرورش کردہ افراد آج بھی پاکستان میں مظلوم ملت کی خدمت میں کوشاں ہیں ، جو شہید کی روح کی شادمانی کا زریعہ ہیں ، مجلس وحدت شہید قائد اور شہید ڈاکٹر کے اہدافات ، آرزوں اور امنگوں کے مطابق معاشرتی اصلاح کا کام انجام دے رہی ہے ۔
وحدت نیوز(لاہور) مجلس وحدت مسلمین پنجاب کے ڈپٹی سیکرٹری جنرل سید اسد عباس نقوی کی قیادت میں مجلس وحدت مسلمین کے رہنماوں و کارکنان کی سول سوسائٹی کے زیراہتمام امن ریلی میں شرکت۔ ریلی کے شرکاء سے خطاب کرتے ہوئے سید اسد عباس نقوی کا کہنا تھا کہ طالبان دہشت گردوں کی سوچ کو ہم مملکت خداداد پاکستان پر نافذ نہیں ہونے دینگے پاکستان میں انتہا پسندوں اور قتل و غارت گری کرنے والوں کے لئے کوئی جگہ نہیں، مذاکرات کا ڈھونگ رچا کر دہشت گردوں کو ہم پر مسلط کرنے کی کوشش کی ہو رہی ہے لیکن اب پاکستان میں سول سوسائٹی اور محب وطن عوام بیدار ہیں ہم ان دہشت گردوں اور ان کے حامیوں کو دنیا بھر میں رسوا کر کے دم لیں گے۔ سید اسد عباس نقوی کا کہنا تھا کہ پاکستان کے سول سوسائٹی نے دہشت گردوں کے خلاف جو بیداری مہم شروع کی ہے مجلس وحدت مسلمین انشااللہ ہر اول دستہ ثابت ہو گی۔
انہوں نے کہا کہ طالبانی شریعت دراصل شیطانی شریعت ہے جس میں معصوم لوگوں کا قتل عام اور مسلمانوں کے گلے کاٹے جاتے ہوں ایسی شریعت کا اسلام سے کوئی تعلق نہیں۔ اُن کا مزید کہنا تھا کہ شہدائے پاکستان کے ورثا اپنے پیاروں کے لہو کا سودا کرنے کی کسی کو اجازت نہیں دینگے، مذاکرات کے حامی طاقتیں دراصل طالبان کے سلیپر سیلز ہیں جو در پردہ پاکستان کی سالمیت پر وار کرنے میں مصروف ہیں ان کا مقصد خوارج کے ہاتھوں پاکستان کو یرغمال بنانا ہے۔ امن ریلی میں نامور صحافی امتیاز عالم نے بھی شرکت کی اور انہوں نے پاکستان میں دہشت گردوں کیخلاف حکومتی اقدامات کو مایوس کن قرار دیتے ہوئے دہشت گردوں سے مذاکرات کو مسترد کر دیا۔
وحدت نیوز(بلتستان) مجلس وحدت مسلمین پاکستان بلتستان ڈویژن کے زیراہتمام گندم سبسڈی کے خاتمے کے خلاف ڈویژنل سیکرٹریٹ میں آل پارٹیز اجلاس کا انعقاد ہوا، جس میں تمام سیاسی و مذہبی پارٹیوں نے شرکت کی۔ ان میں آل پاکستان مسلم لیگ، پاکستان تحریک انصاف، مسلم لیگ قاف، متحدہ قومی موومنٹ، جماعت اسلامی، انجمن تحفظ حقوق بلتستان، گلگت بلتستان یونائیٹڈ موومنٹ، صوفیہ امامیہ نور بخشیہ اور روندو یوتھ فورم نے شرکت کی۔ شرکائے اجلاس نے متفقہ طور پر فیصلہ کیا کہ گندم سبسڈی کے حوالے سے گلگت کی طرح پورے بلتستان میں پیر کے روز مورخہ دس مارچ کو شٹرڈاون ہڑتال ہوگی۔ شرکاء اجلاس نے صوبائی و وفاقی حکومت سے پرزور مطالبہ کیا کہ وہ گلگت بلتستان کو یا تو آئینی حقوق دے دیں یا تمام خوردنی اشیاء پر سبسڈی دیں۔ بصورت دیگر گلگت بلتستان کے عوام اور تمام سیاسی و مذہبی پارٹیاں سخت اقدامات اٹھانے پر مجبور ہو جائیں گی۔
وحدت نیوز(کوئٹہ) کوئٹہ کے علاقے علمدار روڈ پر مجلس وحدت مسلمین کی جانب سے بیاد شہدائے ملت جعفریہ محفل دعاء و منقبت کا انعقاد ہوا۔ دعائیہ تقریب سے علامہ ولایت حسین جعفری سمیت دیگر مقررین نے خطاب کیا۔ دعائیہ تقریب کا انعقاد شُہداء چوک پر کیا گیا تھا۔ اس موقع پر کوئٹہ کے مقامی اسکاؤٹس اور نوحہ خوانوں نے شہدائے ملت جعفریہ کو نوحوں اور منقبت کے ذریعے نظرانہ عقیدت پیش کیا۔ دریں اثناء دعائیہ محفل میں مرد و خواتین کی کثیر تعداد نے شرکت کی۔
وحدت نیوز(اسلام آباد) علامہ راجہ ناصرعباس جعفری کی خصوصی ہدایت پر مجلس وحدت مسلمین پاکستان اور وحدت لائرز فورم پاکستان کے مشترکہ وفد نے گزشتہ روز اسلام آباد بار ایسوسی ایشن کا دورہ کیا اور اسلام آباد کچہری میں دہشت گردوں کی جانب سے شہید کئے جانے والے وکلاء اور ADJملک رفاقت اعوان کے اقرباء ، ساتھیوں اور لواحقین سے انکے چیمبرز میں جا کر تعزیت کی ۔وفد کی نمائندگی علامہ چوہدری ضیغم عباس ، علامہ علی اکبر کاظمی ، علامہ نعیم رضا جعفری، علامہ سید ساجد شیرازی ، سید سعید الحسن رضوی ، علامہ علی شیرانصاری ، جناب سیدین مرکزی سیکرٹری قانون MWM، سینئر قانون دان سید وسعت الحسن شاہ ایڈووکیٹ سپریم کورٹ آف پاکستان، سید اجمل حسین زیدی اور وحدت لائرز فورم کے اصغر علی مبارک ، مس طاہرہ بانو مبارک ، راجہ شیراز احمد جنجوعہ ایڈووکیٹ نے کی ، اس مو قع پر اسلام آباد بار ایسوسی ایشن کے نائب صدر شوکت خان نے مجلس وحدت مسلمین کے وفد کو خوش آمدید کہا اور F-8کچہری کے تمام متاثرہ مقامات کا دورہ کروایا۔ شہید جج رفاقت اعوان صاحب کی عدالت کے دورہ پر وفد نے خصوصی تعزیتی دعا بھی کی ۔ MWMکے وفد کو بتایا گیاکہ F-8کچہری میں دہشت گردی کے نتیجے میں 11شہادتیں جبکہ 30زخمی ہو ئے ہیں۔ وفد نے مختلف چیمبرز اور گیلانی ھال کے دورے کے دوران ہینڈ گرینیڈ اور فائرنگ سے ہونے والے نقصانات کا معائنہ کیا اور افسوس کا اظہار کیا کہ مٹھی بھر پاکستان اور اسلام دشمن عناصر پاکستان میں قانون کی بالا دستی کے حامی شخصیات کو نشانہ بنا رہی ہیں۔
MWMکے وفد نے شہید خاتون وکیل فضہ ملک کے علاوہ سینٹ کے چیئر مین اور معروف وکیل سید نیر حسین بخاری ، معروف قانون دان وسعت الحسن شاہ ایڈووکیٹ ، راؤ رشید اقبال، رفاقت اعوان، شہادت حسین شاہ اور دیگر شہید اور مجروح وکلاء کے دفاتر کا مشاہدہ کیا اس موقع پر اسلام آباد با ر ایسوسی ایشن نے میاں اشتیاق ھال میں خصوصی تعزیتی جلسہ کا انعقاد کیا گیا جس سے خطاب کرتے ہو ئے MWMکے رہنماؤں نے حکومت وقت سے مطالبہ کیا کہ وکلاء کو ٹھوس سکیورٹی مہیا کی جائے اور گورنمنٹ کی رٹ چیلنج کرنے والوں کے خلاف آہنی ہاتھوں سے نپٹا جائے۔
MWMکے سر براہ علامہ ناصر عباس جعفری کی نمائندگی کرتے ہو ئے علامہ ضیغم عباس نے کہا کہ مجلس وحدت مسلمین دکھ کی اس گھڑی میں وکلاء کے ساتھ شانہ بشانہ کھڑی ہے اور وکلاء کے ساتھ آئندہ بھی ہر فورم پر اپنا کردر ادا کرتی رہے گی MWMکے رہنما علامہ امین شہیدی کے نمائندے علامہ سید علی اکبر کاظمی نے کہا دہشت گرد اس بزدلانہ کاروائی سے حق و انصاف کے راستے میں رکاوٹ کھڑی نہیں کر سکتے۔ شہدا نے اپنی جانیں دے کر اس مشن کوجاری رکھنے کا حوصلہ دیا ہے MWMشعبہ قانون کے سیدین زیدی نے کہا کہ حکومت وکلاء برادری کو مکمل تحفظ فراہم کرے۔ MWMاس واقع کی پرزور مذمت کرتی ہے اور دہشت گرد عناصر سے سختی سے نمٹا جائے۔
تعزیتی جلسہ سے اسلام آباد بار کے وسعت الحسن شاہ نے کہا کہ اسلام آباد کے وکلاء کے عزم و استقامت میں کو ئی کمی نہیں آئی۔ اس موقع پر آغانعیم رضا جعفری نے کہا کہ شہدا کے خون سے پاکستان میں امن کو دوام ملے گا انہوں نے کہا کہ حکومت پاکستان میں وکلاء برادری کو تحفظ فراہم کرنے کی پالیسی یقینی بائے ۔
تعزیتی جلسے سے علامہ سید ساجد شیرازی نے خطاب کرتے ہو ئے کہا کہ اسلام نے بے گناہ انسانوں کی ہلاکت کو ہمیشہ سے قابل مذمت قرار دیا ہے انہوں نے کہا کہ شہدا ء کے خون سے ہاتھ رنگنے والے کسی بھی مذہب میں انسان کہلانے کے لائق نہیں ہیں اس موقع پر علامی علی شیرازانصاری نے اپنے پر اثر خطاب میں کہا کہ پاکستان میں دہشت گردانہ کاروائیوں کے نتیجے میں ہزاروں افراد کی ہلاکت ہو چکی ہے جس سے ہماری مساجد، امام بارگاہیں ، گرجا گھر کچھ بھی محفوظ نہیں لہذا مذاکرات کی بجائے دہشت گردوں کے خلاف ٹھوس کاروائی کی جائے ۔
اسلام آباد ہائی کورٹ بار کی نمائندگی کرتے ہو ئے راجہ شیراز احمد جنجوعہ ایڈووکیٹ نے کہاکہ F-8میں دہشت گردی کی بزدلانہ کاروائی ہمارے حوصلے کو کم نہیں کر سکتی۔ MWMکے وفد کو بار کے دورہ پر خراج تحسین پیش کر تے ہو ئے انہوں نے کہا کہ علماء کی سر پرستی میں ہم دہشت گردی کے ناسور کو جڑ سے اکھاڑ پھینکیں گے۔شوکت خان نائب صدر نے حکومت وقت سے مطالبہ کیا کہ اسلام آباد بار کو سخت سے سخت سکیورٹی فراہم کی جائے آخر میں MWMلائرز فورم کے صدر اصغر علی مبارک نے شکریہ ادا کیا اورشہدا ء کی بلندی درجات اور زخمیوں کی صحت یابی اور ملک و قوم کی دہشت گردی کے ناسور سے نجات کے لئے دعا کروائی۔ راولپنڈی بار کی نمائندگی کرتے ہوئے اجمل زیدی ایڈووکیٹ نے کہا کہ راولپنڈی اور اسلام آباد بار جڑواں بارز ہیں اور اسلام آباد بار پر حملہ راولپنڈی بار پر حملہ اس دکھ کی گھڑی میں ہم ان کے ساتھ ہیں۔
