وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے کہا ہے کہ بلدیاتی انتخابات میں مجلس وحدت مسلمین پورے ملک میں بھر پور حصہ لے گی اور ملک کو لوٹنے والے حکمرانوں کو عوام ہمیشہ کیلئے مسترد کردیں گے،چیئرمین سنی اتحادکونسل صاحبزادہ حامد رضا کے خلاف ایف آئی آر کا اندراج پنجاب حکومت کی انتقامی کاروائی کا نتیجہ ہے،  سیاسی سیل کے اراکین سے خطاب کرتے ہوئے انہوں نے کہا ہے کہ (ن) لیگ اور پیپلزپارٹی سمیت تمام سیاسی جماعتوں نے قوم کو مایوسی کے سوا کچھ نہیں دیا، جسکی وجہ سے عوام ان نااہل اور کرپٹ سیاسی جماعتوں سے تنگ آچکے ہیں، انہوں نے کہا کہ عام انتخابات میں عوام سے جھوٹے وعدے کرنے والے حکمران بتائیں کہ وہ عوام سے کس بات کا انتقام لے رہے ہیں۔؟ (ن) لیگ کے قائدین چھ ماہ میں بجلی کا بحران ہمیشہ کیلئے ختم کرنے کا وعدہ کرتے رہے مگر اقتدار میں آنے کے بعد حکمرانوں نے بجلی کی لوڈشیڈنگ سمیت کوئی مسئلہ حل نہیں کیا بلکہ آج ملک اور عوام کو درپیش مشکلات میں خطرناک حد تک اضافہ ہو چکا ہے۔ انہوں نے کہا کہ ہم عوام کو کسی صورت تنہا نہیں چھوڑیں گے، اس کیلئے ہم نے فیصلہ کیا ہے کہ ہم پنجاب سمیت پورے ملک میں بلدیاتی انتخابات میں بھرپور حصہ لیں گے۔

وحدت نیوز (مانٹرنگ ڈیسک) اہل بیت(ع) نیوز ایجنسی ۔ ابنا ۔ کی رپورٹ کے مطابق رہبر انقلاب اسلامی آیت اللہ العظمی سید علی خامنہ ای نے جمعرات کو تہران میں ، اسلامی ماہرین کی کونسل مجلس خبرگان کے سربراہ اور اراکین سے خطاب میں ایران کی مذاکراتی ٹیم کی کاوشوں کو قابل تعریف بتایا -

آپ نے فرمایا کہ ایران کی مذاکراتی ٹیم امانتداری کے ساتھ سخت کوشش کررہی ہےلیکن فریق مقابل حیلہ گر ہے اور پیٹھ میں خنجر گھونپتا ہے -
رہبرانقلاب اسلام نے اس نظریئے کو مسترد کردیا کہ جو طاقتور ہوتے ہیں انہیں حیلے کی ضرورت نہیں ہوتی -
آپ نے فرمایا کہ بعض لوگ سمجھتے ہیں کہ امریکا کو اتنی سیاسی ، اقتصادی اور فوجی قوت کے ساتھ دھوکے اور فریب کی ضرورت نہیں ہے ، لیکن حقیقت کے اس برعکس ہے -

آپ نے فرمایا کہ امریکی دھوکے فریب اور حیلہ گری کے زیادہ محتاج ہیں -
رہبر انقلاب اسلامی نے فرمایا کہ امریکیوں کا طرزعمل بتاتا ہے کہ وہ اس وقت بھی دھوکے اور حیلہ گری سے کام لے رہے ہیں -
رہبرانقلاب اسلامی نے فرمایا کہ ایٹمی مذاکرات کی تکمیل کے لئے معینہ وقت قریب آتا ہے تو امریکیوں کا لہجہ زیادہ ‎سخت ہوجاتا ہے اور ان کی حیلہ گری بڑھ جاتی ہے - آپ نے امریکا کے ریپبلیکن سنیٹروں کے کھلے خط کے بارے میں کہا کہ یہ خط امریکی نظام ميں سیاسی اخلاقیات کی پستی کی نشاندہی کرتا ہے -

رہبر انقلاب اسلامی نے فرمایا کہ پوری دنیا میں سبھی ممالک میں مسلمہ بین الاقوامی اصول کے مطابق نئی حکومتیں ، سابقہ حکومتوں کے معاہدوں کی پابند ہوتی ہیں ، لیکن امریکی سنیٹروں نے سرکاری طور پر اعلان کیا ہے کہ موجودہ حکومت کے خاتمے کے بعد معاہدہ کالعدم ہوجائے گا -

رہبرانقلاب اسلامی نے امریکی کانگرس میں صیہونی حکومت کے وزیراعظم کی تقریر کی طرف اشارہ کرتے ہوئے فرمایا کہ ، صیہونی جوکرنے کانگرس میں کچھ باتیں کہیں ، امریکی حکام نے ان باتوں سے اظہار برائت کیا لیکن اسی کے ساتھ ایران پر دہشتگردی کی حمایت کا الزام بھی لگایا جو واقعی مضحکہ خیز ہے -
آپ نے فرمایا کہ امریکیوں اور ان کے علاقائی اتحادیوں نے اس خطے میں داعش جیسے وحشی ترین دہشتگردوں کو تیار کیا اور اب بھی ان کی حمایت کررہے ہیں ، اور ایران پر دہشتگردی کی حمایت کا الزام لگاتے ہیں
- آپ نے جعلی اور غیر قانونی صیہونی حکومت کی امریکا کی جانب سے حمایت کا ذکر کرتے ہوئے فرمایا کہ واشنگٹن سرکاری طور پر دہشتگرد صیہونی حکومت کی حمایت کرتا ہے جو اپنے دہشتگردانہ اقدامات کا اعتراف کرتی ہے -
آپ نے فرمایا کہ امریکی حکومت اس غیر قانونی حکومت کی بدترین شکل میں حمایت کرتی ہے اور ایران پر دہشتگردی کی حمایت کا الزام لگاتی ہے –

وحدت نیوز (لاہور) مجلس وحدت مسلمین پاکستان نے مسیحی برادری سے اظہار یکجہتی کے لئے ملک بھر میں یوم سیاہ منایا،سیکرٹری جنرل مجلس وحدت مسلمین پنجاب علامہ عبدالخالق اسدی نے لاہور میں منعقدہ کارکنان کے اجلاس سے خطاب کرتے ہوئے کہا کہ پاکستان میں امن دشمن اور انسانیت دشمن گروہ نے ظلم و بربریت کا بازار گرم کیا ہوا ہے ،دہشت گردی کا ہر صورت خاتمہ کرنا ہو گا،چاہے وہ مذہبی ہو یا سیاسی ،ملکی سلامتی و بقا کا تقاضا ہے کہ ان انسانیت دشمنوں کا خاتمہ کریں،ان کا کہنا تھا کہ غیرمسلموں کو تحفظ دینا ہماری شرعی و اخلاقی ذمہ داری ہے،اقلیتی برداری کے غم میں ہم برابر کے شریک ہیں،انسانیت و اسلام دشمن خارجیوں نے دنیا میں اسلام کو بدنام کر دیا ہے ،دراصل یہ گروہ درپردہ اسرائیل،امریکہ،اور انڈیا کے ایجنٹ ہیں،جو اپنے آقاوُں کے اشارے پر اسلامی تعلیمات اور اسلامی اقدار کو پامال کر رہے ہیں،الحمدللہ دنیا بھر میںیہ خارجی دہشت گرد گروہ شکست کھا رہا ہے اور انشااللہ پاک سر زمین سے ہماری افواج ان کے نا پاک وجود کا خاتمہ کر کے رہیگی،دہشت گردی کے ناسور سے نجات کے لئے قوم کو متحد ہو کر ہمارے سکیورٹی اداروں کا ساتھ دینا ہوگا۔

وحدت نیوز(لاہور) الحاج حیدر علی مرزا کی رسم قل امام بارگاہ گلستان زہرا وحدت روڈ ادا کی گئی،مجلس ترحیم سے خطاب کرتے ہوئے مجلس وحدت مسلمین لاہور کے سیکرٹری جنرل علامہ امتیاز کاظمی کا کہنا تھا کہ الحاج حیدر علی مرزا ایک سچے محب وطن پاکستانی اور اتحاد امت کے علمبردار تھے،انہوں نے ہمیشہ امت کی وحدت اور ملکی سلامتی اور دہشت گردی کے خلاف آواز اُٹھائی،آج تمام مکاتب فکر کے نمائندگان کی یہاں موجودگی اس بات کی دلیل ہے کہ کہ اُن کی شخصیت ایک ہر دل عزیز شخصیت تھی،علامہ امتیاز کاظمی نے لاہور دہشت گردی  کی مذمت کرتے ہوئے کہا کہ انتہا پسندوں کے خلاف اب بھی حکمران خاموش ہیں یہاں دہشت گردی کے نام پر بے گناہوں کو ہراساں کیا جا رہا ہے،پنجاب میں کالعدم تنظیموں کو مکمل آزادی اور پروٹوکول حاصل ہے،وزیر داخلہ موصوف دہشت گردوں کے سہولت کاروں کو صفائیاں پیش کرتے ہیں کہ آپ کے خلاف ہم کچھ نہیں کرینگے،رسم قل میں سیاسی سماجی شخصیات سمیت سینکڑوں لوگ شریک ہوئے۔

وحدت نیوز (سکھر) وارثان شہدائے شکارپور کمیٹی کی جانب سے ملک میں جاری دہشتگردی کے خلاف آل پارٹیز امن کانفرنس کا انعقاد کیا گیا، سکھر کے مقامی ہوٹل میں منعقدہ آل پارٹیز کانفرنس کی  صدارت چیئر مین  شہداء کمیٹی علامہ مقصودعلی  ڈومکی و ایم ڈبلیو ایم سندھ کے سیکریٹری جنرل علامہ مختار امامی نے کی، جبکہ کانفرنس میں مختلف سیاسی و مذہبی جماعت کے نمائندوں اور ہندو، مسیحی اور سکھ برادری کے نمائندگان نے بھی خصوصی   شرکت،کانفرنس سے خطاب کرتے ہوئے علامہ مقصودڈومکی نے کہا کہ پاکستان کو ایک منظم سازش کے تحت دہشت گردی کے ذریعے غیر مستحکم کرنے کی کوشش کی جارہی ہے، ملک بھر میں جاری دہشت گردی کو فرقہ واریت کا شاخسانہ قرار دینے کی مذموم کوششیں کی جاتی ہیں ، جبکہ پاکستان کے کسی حصے میں شیعہ سنی اختلاف یا جھگڑا نہیں بلکہ یک طرفہ دہشت گردی ہے جس میں شیعہ سنی ہی نہیں بلکہ ہندو ، سکھ اور مسیحی بھی نشانہ بن رہے ہیں ، انہوں نے کہا کہ سانحہ شکارپور کے بعد لانگ مارچ کے نتیجے میں سندھ حکومت کو شہداءکمیٹی کی جانب سے پیش کیئے جانے والے مطالبات پر عمل درآمد میں غیر سنجیدگی کا مظاہرہ کیا جارہا ہے،بعض مطالبات پر اب تک توجہ ہی نہیں دی گئی، اگر غیر سنجیدگی کی یہی صورتحال رہی تو سندھ کی تمام امن پسند قوتوں کے ساتھ ملکر نہ فقط دہشت گرد گروہوں بلکہ ان کی پشت پناہی کرنے والی حکومت کے خلاف پرروز احتجاجی تحریک کا آغاز کردیا جائے گا۔علامہ مقصودڈومکی نے کانفرنس کے اختتام پر تمام معزز مہمانان گرامی کا شکریہ اداکیا۔

وحدت نیوز (پشاور) مجلس وحدت مسلمین خیبر پختونخواکے سیکریٹری جنرل علامہ سید محمدسبطین حسینی نے لاہورچرچ میں بم دھماکے کی شدید الفاظ میں مذمت کرتے ہوئے اسے ایک انتہائی افسوسناک اوربزدلانہ اقدام قرار دیاہے۔ وحدت ہاوس سے جاری بیان میں سیکرٹری جنرل مجلس وحدت مسلمین خیبر پی کے نے کہا ہے کہ عبادت گاہوں کو نشانہ بنانیوالے دہشت گردانسان کہلانے کے حقدارنہیں۔ ایسی گھناونی کارروائیاں امریکہ و اسرائیل کے گماشتوں کی کارستانیاں ہیں۔ دھماکہ اسلام اورپاکستان کو بدنام کرنے کی مذموم سازش ہے۔ دنیا کا کو ئی مذہب نہتے انسانوں پرحملے کی ا جا زت نہیں دیتا۔حکومت اقلیتوں کی حفاظت کیلئے اپنی دینی، اخلاقی اورآئینی ذمہ داری پوری کرے۔ انہوں کا کہنا تھا کہ عیسائی عبادت گاہ پر کیا جانے والا دہشت گردانہ حملہ صرف اسلام دشمنی نہیں بلکہ انسانیت دشمنی ہے، آئین پاکستان اقلیتوں کو تحفظ فراہم کرتا ہے، ایسے سانحات آئین پاکستان کی دھجیاں اڑانے کے مترادف ہیں۔ عیسائی بھائیوں کے سوگ میں برابر کے شریک ہیں، گھناونی کارروائی کرنے والوں کو پاکستان حکومت کیفر کردار تک پہنچائے۔ مساجد ،امام بارگاہوں، مدارس،مزارات،گرجا گھروں اور بازاروں میں معصوم لوگوں کی زندگیوں سے کھیلنے والے کسی رعایت کے مستحق نہیں ۔انہوں نے کہا کہ امریکہ پاکستان میں دہشت گردی کو ہوا دے رہے ہیں اسی وجہ سے امریکہ سے پاکستانی سفیر واپس بلایا جائے ۔علامہ سید محمدسبطین حسینی نے کہاکہ پنجاب کے وزیر اعلیٰ کے طرف سے طالبان کو امن پیغامات دینے کا تحفہ طالبان کے طرف سے مل گیا۔اب پنجاب میں شرپسندوں کے خلاف کاروائی کا وقت آن پہنچا ہے۔