وحدت نیوز(خیبرپختونخوا) مجلس وحدت مسلمین شعبہ تنظیم سازی کے وفد نے مرکزی سیکرٹری تنظیم سازی یعقوب حسینی کی سربراہی میں ضلع ہنگو، کوہاٹ، پشاور، نوشہرہ  اورکزئی ایجنسی اورکرم ایجنسی  کے دورہ جات کئے، علی رضا طوری اور صوبائی سیکرٹری تنظیم سازی علامہ وحید عباس کاظمی بھی وفد میں شامل تھے۔ وفد نے ضلع ہنگو کے دورہ کے موقع پر مدرسہ جامعتہ العسکریہ میں ایم ڈبلیو ایم خیبر پختونخوا کے سابق سیکرٹری جنرل علامہ سبیل حسن مظاہری سے ملاقات کی، اس موقع پر ہنگو کے حالات اور تنظیمی امور پر گفتگو ہوئی، علاوہ ازیں وفد نے کوہاٹ کا دورہ کیا، جہاں ایم ڈبلیو ایم کوہاٹ کے سیکرٹری جنرل حاجی علی داد خان سے ملاقات کی، وفد نے دورہ پشاور کے موقع پر صوبائی آفس مسئول ارشاد حسین بنگش سے ملاقات کی، جبکہ دورہ نوشہرہ کے دوران سیکرٹری جنرل اورنگزیب جعفری سے ملاقات کی۔ وفد نے اورکزئی ایجنسی کا بھی دورہ کیا، جہاں کلایہ اور کوریز میں علمائے کرام اور عمائدین سے بھی ملاقاتیں ہوئی، جبکہ کرم ایجنسی میں دورے کے موقع پر مدرسہ جامعہ امام خامنہ ای کے پرنسپل علامہ سید عابد حسین الحسینی ، علمائے اہل بیت ؑ کے ذمہ داران،تحریک حسینی کے مسئولین سے ملاقاتوں کے علاوہ شہید قائد علامہ عارف حسین الحسینی کے مزار پر حاضری دی گئی اور فاتحہ خوانی کی گئی۔

وحدت نیوز (لاہور) دہشت گردی کے خلاف جنگ میں بلا تفریق کاروائی لائق تحسین ہے،شدت پسندی اور دہشت گردی کے خاتمے کے بغیر ملکی ترقی و استحکام ناممکن ہے،وزیر داخلہ کی جانب سے کالعدم جماعتوں کو وضاحتیں پیش کرنا لمحہ فکریہ ہے،انتہا پسندوں کے ہاتھوں موجودہ حکمران یرغمال ہیں،پنجاب میں کالعدم تنظیمیں بدستور نفرتیں بانٹنے میں مصروف ہیں،جنوبی پنجاب دہشت گردوں کی آماجگاہ بن چکا ہے،بھکر میں دن دہاڑے کالعدم تنظیم کے دہشت گرد حملے کر رہے ہیں،دہشت گردی کے خلاف جنگ کو منطقی انجام تک پہنچانے میں پنجاب کے حکمران مخلص نہیں،ان خیالات کا اظہار مجلس وحدت مسلمین پنجاب کے سیکریٹری جنرل علامہ عبدالخالق اسدی نے ایم ڈبلیوایم پنجاب کی کابینہ اجلاس سے خطاب میں کیا ،انہوں نے کہاکہ دہشت گردی کے خلاف ملک میں سب سے پہلے ہم نے آواز اُٹھائی،ہم نے ان قاتلوں اور درندوں سے مذاکرات کو شیطان سے مذاکرات قرار دیا تھا،نااہل سیاست دانوں نے اپنے مفادات کی خاطر دہشت گردوں کو منظم ہونے کا موقع دیا،وقت پر ان دہشت گردوں کے خلاف کاروائی ہوتی تو ہزاروں پاکستانی ان درندوں کی بربریت کا نشانہ نہ بنتے،آج وقت کا تقاضا ہے کہ قوم ان ملک دشمنوں کے خلاف متحد ہوں اور وطن عزیز سے اس ناسور کے خاتمے کے لئے اپنا کردار ادا کریں۔

وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں ڈویژنل سیکریٹری جنرل عباس علی، علامہ ولایت جعفری اور دیگر نے کہا ہے کہ  خطے پر چھائے ہوئے دہشت گردی کے خطرات کے پیش نظر حکمرانوں اور سیاست دانوں کو اپنے رویوں میں مثبت تبدیلی کو یقینی بنانا ہوگا۔سب کو ساتھ لے کر چلنے میں ہی ہماری بقاء ہے۔موجودہ حالات میں یکجہتی اور یکسوئی کی جس قدر ضرورت پاکستانی قوم کو آج ہے اس سے پہلے کبھی نہ تھی۔ اس وقت پاکستان کے لیے سب سے اہم اور ضروری چیز یہی ہے کہ دہشت گردی اور انتہا پسندی کا خاتمہ کیا جائے۔ یہ پاکستان کی بقاء اور ترقی کے لیے انتہائی ضروری ہے۔ آج وطن عزیز پاکستان چاروں طرف سے دشمنوں کے سازشوں کا شکارہے جس کی وجہ سے عام شہریوں کی زندگی بری طرح متاثر ہے اور ملک میں مایوسی اور بے چینی کی فضاء بڑھتی جارہی ہے۔ ایسے میں ملک کے ہر شہری کی ذمہ داری بنتی ہے کہ وہ ملک کے حالات کو بہتر بنانے میں اہم کردار ادا کرے۔

مجلس وحدت مسلمین پاکستان بلا تفریق، رنگ نسل و مذہب عوام کے مسائل کے حل پر یقین رکھتی ہے۔ ہم نے ہمیشہ اصولوں کی سیاست کی ہے۔ ہمیں عوام کے مفادات عزیز ہیں۔ علاقے کے عوام ہمارے ساتھ ہیں اور ہمیں کسی سے ڈکٹیشن لینے کی ضرورت نہیں ہے۔ ایم ڈبلیو ایم نفرت کی سیاست پر یقین نہیں رکھتی اور کبھی بھی اصولوں پر سودا بازی نہیں کی۔ عدم برداشت اور غیر جمہوری رویے کے قائل نہیں ہیں۔ایک محدود سیاسی جماعت اپنی تنگ نظری اور قوم دشمن پالیساں ترک کردے اور کالعدم تنظیموں اور شدت پسندوں سے ہم خیال ہوکر قوم کو نقصان پہنچانا بند کر دے ۔ہزاروں کی تعداد میں شہید دینے کے باوجود صبر و تحمل کا مظاہرہ کرنے والی قوم کو دہشت گردی سے جوڑنا قوم سے خیانت کے مترادف ہے۔ نفرت انگیز بیانات چھوڑ کر اگر مذکورہ پارٹی اپنی کارکردگی اور عوامی مسائل پر توجہ دے تو زیادہ بہتر نتائج حاصل ہوسکتے ہیں۔

وحدت نیوز (کویت) مجلس وحدت مسلمین پاکستان کے سربراہ علامہ ناصرعباس جعفری اپنےسات روزہ دورہ کویت کے بعد واپس وطن پہنچ گئے ہیں ، کویت ایئرپورٹ سے وطن روانگی کے موقع پر کویت میں مقیم پاکستانی کمیونٹی ، ایم ڈبلیوایم ، مسلم لیگ ق اور پاکستان عوامی تحریک کے رہنماوں نے علامہ ناصرعباس جعفری کو الوداع کیا، اس موقع پر علامہ ناصرعباس جعفری نے  میزبانوں کا بہترین مہمان نوازی اور پیارومحبت کے اظہار پر شکریہ ادا کیا،علامہ ناصرعباس جعفری نے اپنے دورہ کویت کے موقع پر وہاں مقیم پاکستانی کمیونٹی ، بزنس کمیونٹی ، سیاسی برادری ، صحافیوں اور دیگر سے ملاقاتیں کیں مجالس شہادت جناب فاطمہ زہرا (س)اور برسی شہید ڈاکٹر محمد علی نقوی سے خطاب سمیت مسلم لیگ ق اور پاکستان عوامی تحریک کی جانب سے اپنے اعزاز میں دیئے گئے ظہرانے اور عشائیے میں بھی خصوصی شرکت کی۔

وحدت نیوز (کویت) مجلس وحدت مسلمین پاکستان کے سربراہ علامہ ناصرعباس جعفری نے کویت میں مجلس شہادت دختر رسول حضرت فاطمہ زہرا(س)سے خطاب کرتے ہوئے کہا کہ شہادت ہمارے لیے سعادت ہے ،ہم میدان میں ہیں شجاع ہیں ،بہادر ہیں ظلم کے خلاف سینہ سپر ہیں، پهر ہم نے مظلوموں کا ساتھ دینے کا عہد کیا ظالم کا مقابلہ کرنے کیلئے کهڑے ہوئے مولا کی وصیت اور قائد شہید کا فرمان ہم ہر ظالم کے دشمن خواه وه شیعہ ہی کیوں نہ ہو اور ہر مظلوم کے حامی ہیں خواه کافر ہی کیوں نہ ہو ہم عوامی جدوجہد کے ساتھ ظلم کے ساتھ ٹکرانے کیلئے کهڑے ہیں ہم نے مظلومیت کو طاقت بنایا اور ظلم اور تکفیریت کو تنہا کیا ،ہم نے مذاکرات کی مخالفت کی ہم نے کراچی میں اس دور میں کہا تها کہ طالبان سے مذاکرات شیطان سے مذاکرات ہیں،ہمیں فخر ہے کہ ہم روز اول سے دہشت گردوں سے مذاکرات کے مخالف اور آپریشن کے حامی ہیں ، مظلوموں کی طاقت کیساتھ ہم نے مذاکرات کی مخالفت کی آج تکفیریوں  اور ان کے ہمنواوں کیلئے جواز تلاش کرنا مشکل ہو گیا ہے۔

ان کامزید کہنا تھا کہ دوطرح کے لوگ ہیں کچھ تمہاری خلقت میں بهائی ہیں اور کچھ تمہارے دینی بهائی ہیں ہم تمام انسانوں کی حرمت کے قائل ہیں ،ہماری جدوجہد سے ملک کے وزیر اعظم اور وزیر اعلی اور کابینہ پر FIRکٹی، میرا سلام ہو منہاج القرآن کی ان بیٹیوں پر جو لبیک یا حسین اور یا علی کہتے ہوئے گولیاں کها کر شہید ہوگئیں، ہم فاطمہ کی باندیاں ہم انقلاب زادیاں... یازہرا اور یازینب کا نعرہ لگانے والی ہماری بہنیں اسلام آباد میں 70 دن تک شجاعت کا رزق بانٹ رہی تهیں، پاکستان میں سنی شیعہ مشکلات میں اکٹهے ہوئے ہیں اور ہم نے خو ف کی فضا کو توڑا ہے ہم خوف سے گهروں میں نہیں بیٹهے ہم میدان میں ہیں دشمن اگر ہمیں ٹوکوں سے ٹکڑے ٹکڑے کر ڈالے ہم ڈرنے والے نہیں، حضرت قاسم 13 سال کے تهے دشمن کی صفوں میں گهس کے لڑے وہی قاسم ہمارے معلم ہیں،  کوفہ میں حضرت ثانی زہره کو سب جانتی تهیں اور پھر بهی ڈر کے مارے علی زادی پر سنگ باری کرنے آئے، بی بی نے ان لوگوں کو جو خوف سے سہمے تهے علی کے لہجے میں شجاعت کی دعوت دی بی بی کا لہجہ بهی حجاب میں تها، بے شک سر پر چادر نہیں تهی حریت کی پیغمبر نے خوف کے زندان کے قیدیوں کو مخاطب کیا اور انکی شجاعت کو زندہ کیا اور لوگ پہلے آبدیدہ اور پہر برانگیختہ هوکر کهڑے ہوئے یزیدیت کو شکست ہوئی۔

وحدت نیوز (گلگت ) نواز لیگ گلگت بلتستان میں ایک خاص ایجنڈے کی تکمیل کیلئے کوشاں ہے اور ہر جائز و ناجائز طریقے سے اقتدار تک پہنچنے کی ناکام کوشش میں پری پول رگنگ کی بد ترین مثالیں قائم کررہی ہے۔مجلس وحدت مسلمین گلگت بلتستان اسمبلی الیکشن میں نواز لیگ کا راستہ روکنے کی بھرپور پوزیشن میں ہے۔ان خیالات کا اظہار مجلس وحدت مسلمین پاکستان کے سیکریٹری امورسیاسیات ناصر عباس شیرازی نے نگر خاص، ہوپر نگر اور اسکرداس نگر میں عوامی اجتماعات اور عمائدین سے ملاقاتوں کے دوران کیا۔

انہوں نے کہا کہ مسلم لیگ نواز گلگت بلتستان اسمبلی کے انتخابات جیتنے کیلئے پری پول رگنگ میں مصروف ہے ۔نگران وزیر اعلیٰ کے انتخاب ، نگران کابینہ کا چناؤ اور غیر مقامی گورنر گلگت بلتستان کی تعیناتی میں گلگت بلتستان کے سیاسی و مذہبی جماعتوں کو اعتماد میں نہیں لیا گیا جس سے علاقے کے عوام پر تشویش پائی جاتی ہے۔مسلم لیگ نواز اور پیپلز پارٹی نے گندم سبسڈی تحریک کو کچلنے کیلئے ہر حربہ آزمایا لیکن گلگت بلتستان کے عوام کی استقامت و جرات نے اس وقت کی گلگت بلتستان میں قائم پیپلز پارٹی کی حکومت اور وفاق میں براجمان مسلم لیگ نواز کو گھٹنے ٹیکنے پر مجبور کردیا۔ مجلس وحدت نے گلگت بلتستان کے عوام کی گندم سبسڈی تحریک کی کامیابی اور حمایت میں پورے پاکستان میں دھرنے دئیے اور ہر سطح پر احتجاج ریکارڈ کروایا۔مجلس وحدت مسلمین نے پاکستان کی بڑی سیاسی و مذہبی جماعتوں کے قائدین سے ملاقاتوں میں گلگت بلتستان کے عوامی مسائل کو اجاگر کرنے میں اپنا بھرپور کردار ادا کیا ہے اور آئندہ بھی علاقے کے حقوق کیلئے ہر سطح پر کوششیں جاری رکھی جائینگی۔ انہوں نے کہا کہ مجلس وحدت آئندہ الیکشن میں گلگت بلتستان کیلئے 20 سالہ پروگرام اپنے منشور میں شامل کرے گی اور گلگت بلتستان کے وسائل کو استعمال کرکے علاقے کو خود کفالت سے ہمکنار کریں گے۔