وحدت نیوز (لاہور) ایام شہادت دختر رسول ص ، سیدہ دو عالم ، خاتون جناں حضرت فاطمتہ الزہرا سلام اللہ علیھا کے پرسوز موقع پر مرکزی صدر ایم ڈبلیوایم وومن ونگ محترمہ سیدہ معصومہ نقوی نے اپنے پیغام میں کہا کہ خداوند عالم نے جو فضائل صدیقہ طاہرہ کو عطا کئے کائنات کی کسی عورت کے لئے ممکن ہی نہیں ہے دختر پیغمبر عزت و عظمت میں اپنی مثال آپ تھی آپ شرافت کی بلندیوں پر رسائی رکھتی تھی آپ رسول خدا کا اعلیٰ و ارفع نمونہ تھی خاتون جنت اپنے مقام و منزلت میں کوئی ثانی نہیں رکھتی تھیں ۔

انہوں نے کہا کہ جناب سیدہؑ نے خدا کے نزدیک بلند و بالا رتبہ و مقام کی حامل ہونے کے باوجود اپنی زندگی میں بے انتہا مشکلات اور پیچیدہ ترین حالات کو تحمل کیا آپؑ نے خدا کے دین کی خاطر سخت ترین مصائب کا سامنا کیا ،آپؑ کی زندگی کے ہر لمحہ میں خواتین کے لیے بہترین درس اور اسوہ ہے۔

 ان کا مزید کہنا تھا یہ ایام حزن و غم فاطمہ زہرا سلام اللہ علیھا کی مصیبت پر گریہ و عزادای سے خود کو ولایت کے دفاع کے لیے تیار کرنے کے ایام ہیں تا کہ ہم بھی خود کو انقلاب فاطمی سلام اللہ سے منسلک کرسکیں۔

وحدت نیوز(لاہور) شہادت خاتون جنت ، سیدہ دو عالم ، دختر حضرت محمد مصطفی ص سیدہ فاطمتہ الزہرا سلام اللہ علیہا کے دردناک موقع پر تمام امت مسلمہ کو تعزیت پیش کرتے ہوئےمجلس وحدت مسلمین شعبہ خواتین کی مرکزی رہنماو رکن پنجاب اسمبلی محترمہ سیدہ زہرا نقوی کا کہنا تھا یہ ایام اس عظیم المرتبت بی بی کی شہادت کے ایام ہیں جس کى مرضی پیغمبر اکرم (ص) کى مرضی ہے اور پیغمبر (ص) کى مرضی خدا کى رضا ہے، جس کا غضب پیغمبر (ص)  کا غضب اور پیغمبر کا غضب خدا کا غضب ہے سیدہ فاطمتہ الزہرا سلام اللہ علیہا عالم انسانیت کے لیے کامل ترین نمونہ ہیں۔

 انہوں نے کہا جنابِ زہراء سلام اللہ علیہا وہ ہستی ہیں جن کی عظمت کا پتہ عام انسان کے بس میں نہیں ان ایام میں ہمیں موقعہ مل رہا ہے کہ ہم جناب زہراء سلام اللہ علیہا کی سیرت سے کچھ سیکھیں۔ کچھ معرفت حاصل کر لیں ان کا کہنا تھا دشمن اور فرعونی طاقتیں چاہتی ہیں کہ مکتب فاطمی کو حجاب سے دور کر دیا جائے، تاکہ بے حیائی کو عام کیا جاسکے حجاب وہ چیز ہے جس نے وقت کے یزید کو ہلا کر رکھ دیا ہے لھذا مکتب اہل بیت کی پیروکار ہماری مائیں بہنیں ان ایام میں تعلیمات و سیرت فاطمی کو زندہ کریں اور معاشرے میں فاطمی انقلاب کی شمعیں روشن کرنے میں اپنا کردار ادا کریں۔

وحدت نیوز(اٹک) مجلس وحدت مسلمین شعبہ خواتین اٹک کی جانب سے ایام فاطمیہ کی مناسبت سے خمسہ مجالس عزا کا اہتمام امامبارگاہ حسینیہ کاملپور سیداں میں کیا گیا ان مجالس عزا سے محترمہ چمن فاطمہ نے زن زندگی اور آزادی اسلام کی نگاہ میں کے عنوان سے خطاب کیا ان کا کہنا تھا کہ دین اسلام نے عورت کے مقام و منزلت بہت عمدہ انداز میں پیش کیا ہے ایک تربیت یافتہ ، دیندار اور مہذب خاتون نہ صرف اپنے گھر کی بلکہ معاشرے کی اصلاح میں اہم کردار ادا کرتی ہے۔

 آخری مجلس عزا سے خطاب کرتے ہوے محترمہ فائزہ بتول نے کہا کہ یہ ایک خاتون کی پرورش اور تربیت ہی تھی جو کربلا میں حضرت عباس ع ، و قاسم ع اور علی اکبر ع جیسے نگینے قربان ہوئے اور دین کے تحفظ اور بقا کا باعث بنے حضرت فاطمتہ الزہرا سلام اللہ علیھا کی ذات مقدسہ کو خواتین کے لیے اسوہ کامل بنا کر پروردگار نے ہم پر اپنا احسان اور لطف و کرم کیا ہے۔

وحدت نیوز(لاہور) پچیس دسمبر یوم قائد کی مناسبت سےجاری اپنے پیغام میں مرکزی صدر مجلس وحدت مسلمین شعبہ خواتین محترمہ سیدہ معصومہ نقوی نے کہا کہ قائد اعظم ایک عہد ساز شخصیت کے مالک تھے جن کی قائدانہ صلاحیتوں اور مدبرانہ سیاست نے پوری دنیا میں اپنا لوہا منوایا لیکن ہم نے بحیثیت قوم ان کے فرامین کو یکسر بھلا دیا اور اس مملکت خداداد کو اس مقام پر نہ پہنچا سکے جسکا خواب عظیم قائد نے دیکھا تھا انہوں نے کہا قائداعظم محمد علی جناح رح ایک ایسی مملکت چاہتے تھے جہاں ملک کے تمام شہریوں کو بلا امتیاز رنگ و نسل اور مذہب مساوی حقوق اور ترقی کے مواقع میسر ہوں، وطن عزیز کو قائد اعظم کے خوابوں کے مطابق بنانے کے لیے پوری قوم کو محنت اور لگن سے کام کرنے کی ضرورت ہے

انہوں نے کہا ہم بحیثیت قوم اپنے عظیم قائد کے ویژن کے عین مطابق اپنے اپنے دائرہ کار میں نظم وضبط، ایمان اور اتحاد کے اصولوں پر کاربند رہتے ہوئے اپنے وطن عزیز کے لئے بے لوث کام کریں اور صرف اسی طریقے سے ہم بانیٔ پاکستان کی روح کو حقیقی خراجِ تحسین پیش کر سکتے ہیں۔