The Latest
وحدت نیوز(کراچی) مجلس وحدت مسلمین سولجر بازار یونٹ (شعبہ خواتین) ضلع شرقی کراچی کی جانب سے مقابلہ مضمون نویسی ’بی بی زینبؑ کے خطبات کے اہم نکات ‘کے انعامات اور جشن ولادت پیغمبر اکرمؐ کی مختصر تقریب مجلس وحدت مسلمین صوبائی سیکریٹریٹ آفس سولجر بازار میں منعقد کی گئی ۔تقریب میں ایم ڈبلیو ایم کراچی شعبہ خواتین کی رابطہ سیکریٹری خانم سلمیٰ اور ایم ڈبلیو ایم اورنگی ٹائون کی صدر خانم سائرہ نے خصوصی شرکت کی اور اپنے خطاب میں ایم ڈبلیو ایم سولجر بازار شعبہ خواتین کی اس کوشش کو سراہا ۔
ان کا کہنا تھا کہ اہلیبیتؑ کی سیرت کو مختلف انداز میں معاشرے میں پہنچانے کا سلسلہ جاری رہنا چاہیے۔پروگرام کی نظارت ایم ڈبلیو ایم سولجر بازار خواتین یونٹ کی صدر خانم سمانہ نوشاد نے کی ۔اس موقع پر انہوں نے کہا کہ مقابلہ مضمون نویسی کا مقصد بچیوں میں مضمون نویسی کی صلاحیت کو پروان چڑھانا اور دیئے گئے موضوع کو حصہ لینے والوں تک پہنچانا ہے ۔مقابلہ مضمون نویسی میں ملک بھر کے مختلف شہروں سے اور بیرون ملک سے بھی بچیوں نے حصہ لیا ۔
اس موقع پر حدیث کساء زینب نوشاد ،حمدباری تعالیٰ فضا عادل اور ایشاء،نعت مقبول ام ابیہا،منقبت کومل،کنیز فاطمہ ،زینب نوشاد اور فاطمہ نوشاد نے پیش کیں ۔ماہا فاطمہ نےامام علیؑ کے فضائل بیان کئے۔پروگرام کے اختتام پر مقابلہ مضمون نویسی میں حصہ لینے والی بچیوں کے درمیان انعامات تقسیم کئے گئے۔
وحدت نیوز(سکردو)ایم ڈبلیو ایم کے رکن اسمبلی و مرکزی سیکرٹری سیاسیات شعبہ خواتین مجلس وحدت مسلمین کنیز فاطمہ اور صدر مجلس وحدت مسلمین بلتستان ڈویژن شعبہ خواتین خواھر کبریٰ بتول نے دورہ کچورا کے موقع پر پڑنگ،غلچو اور پوندس کے خواتین سے ملاقات کی،ملاقات میں علاقائی ایشوز سمیت معاشرے میں خواتین کی ذمہ داریوں کے حوالے سے تفصیلی گفتگو ہوئی۔رکن اسمبلی نے علاقے میں خواتین کو درپیش مسائل خاص کر تعلیمی مسائل کے حل کے لیے بھر پور تعاون کی یقین دہانی کی ۔
وحدت نیوز(سکردو) مجلس وحدت مسلمین کی رکن گلگت بلتستان اسمبلی ، پارلیمانی سیکریٹری برائے وومن ڈیویلپمنٹ و مرکزی سیکرٹری سیاسیات مجلس وحدت مسلمین شعبہ خواتین کنیز فاطمہ کا گورنمنٹ بوائز ہائی سکول سکیمدان کا دورہ۔
اس موقع پر انہوں نے حکومت گلگت بلتستان اور روپانی فاؤنڈیشن گلگت بلتستان کی جانب سے منعقدہ کمپیوٹر ایجوکیشن، STEM اور انٹرپرینیورشپ کے میگا پروجیکٹ کے لیے خدمات حاصل کرنے والے ٹیچرز ٹریننگ سینٹر کا معائینہ کیا ساتھ ہی سکول کے طلباء سے بھی ملاقات کی اور مختلف کلاس رومز کا بھی دورہ کیا۔
وحدت نیوز(ملتان) مجلس وحدت مسلمین پاکستان ضلع ملتان کے صدر علامہ وسیم عباس معصومی سے جامعہ شہید مطہری میں ایم ڈبلیو ایم حسن آباد یونٹ کے اراکین نے ملاقات کی۔ ملاقات میں یونٹ اراکین نے مختلف مسائل کے حوالے سے رہنمائی لی۔
علامہ وسیم عباس معصومی نے وفد سے ملاقات میں کہا کہ اس وقت پاکستان کو داخلی طور پر کئی چیلنجز کا سامنا ہے، سیاسی طور پر پاکستان کی صورت حال موزوں نہیں ہے، چند طاقتیں اس ملک میں عدم استحکام کو طول دینا چاہتی ہیں، تاکہ پاکستان نہ صرف داخلی بلکہ اقتصادی اور عالمی سطح پر مشکلات کا شکار رہے اور وہ اپنا ایجنڈا کٹھ پتلیوں کے ذریعے پورا کرا سکیں، ہم اس ملک میں غیر ملکی مداخلت کے شروع دن سے مخالف ہیں، غیرملکی طاقتیں پاکستان کو اپنی آماجگاہ بنانا چاہتی ہیں اور بدقسمتی سے ہمارے چند حکمران اس کے آلہ کار بنے ہوئے ہیں۔
وحدت نیوز(گلگت) صوبائی سیکرٹیریٹ مجلس وحدت مسلمین گلگت میں مرکزی صدر مجلس وحدت مسلمین شعبہ خواتین محترمہ معصومہ نقوی کی صدارت میں تنظیمی اجلاس ہوا جس میں گلگت کی فعال خواتین نے شرکت کی اس اجلاس کے آغاز میں دعائے کمیل کی تلاوت اور مصائب امام حسین علیہ سلام بیان کیے گئے بعد ازاں تمام شرکاء کی رائے اور مشاورت کے بعد سابقہ ممبر جی بی اسمبلی محترمہ بی بی سلیمہ کو ایم ڈبلیو ایم وومن ونگ گلگت کا صدر منتخب کیا گیا ۔
اس موقع پر مرکزی صدر سیدہ معصومہ نقوی نے نو منتخب صدر سمیت آٹھ دیگر کابینہ اراکین سے حلف لیا محترمہ معصومہ نقوی کا کہنا تھا کہ ان شاء اللہ اللہ تعالی اور امام زمان عج کی مدد سے یہ کابینہ گلگت میں اپنی دینی اور ملی ذمہ داری ادا کرنے کے لیے کوشاں رہے گی اور تین سال کے عرصے میں خواہر بی بی سلیمہ کی قیادت میں گلگت کی مومنات اپنے اجتماعی فرائض کو بھرپور انداز میں انجام دیں گی اختتام پر تمام مومنات نے مرکزی صدر کا شکریہ ادا کیا محترمہ معصومہ نقوی گلگت کے بعد اب بلتستان کے سفر پر روانہ ہو چکی ہیں اور وہاں بھی از سر نو تنظیمی سیٹ اپ تشکیل دیا جائے گا۔
وحدت نیوز(سکردو)مجلس وحدت مسلمین شعبہ خواتین کی مرکزی صدر سیدہ معصومہ نقوی گلگت کے بعد اب سکردو کے تنظیمی دورہ پر ہیں جہاں انہوں نے منعقدہ ایک اجلاس میں محترمہ کبری بتول کے نام کا بطور صدر مجلس وحدت مسلمین شعبہ خواتین سکردو اعلان کیا جبکہ ایم پی اے جی بی اسمبلی محترمہ کنیز فاطمہ کو مرکزی سیکرٹری سیاسیات کے طور پر اپنی کابینہ میں شامل کیا محترمہ کبری بتول دو ماہ میں اپنی کابینہ تشکیل دیں گی اور 29 یونٹس کو دوبارہ فعال کیا جاے گا اجلاس میں دونوں نو منتخب عہدیداران سے مرکزی صدر نے حلف لیا۔
وحدت نیوز(دنیور)سیدہ معصومہ نقوی نے گلگت کے علاقے دنیور کا دورہ کیا ۔مجلس وحدت مسلمین شعبہ خواتین کی مرکزی صدر سیدہ معصومہ نقوی نے مؤمنات کی خصوصی دعوت پر گلگت کے علاقے دنیور پہنچیں جہاں انہوں نے قرآن سنٹر کا بھی دورہ کیا۔
اس موقع پر بچوں نے خوبصورت آواز میں سورہ ملک کی تلاوت سنائی۔ مرکزی صدر نے دنیور میں تنظیمی خواہران اور علاقے کی فعال خواتین سے بھی ملاقات کی جنہوں نے تنظیم کے ساتھ بھرپور تعاون کی یقین دھانی کروائی ۔
وحدت نیوز(لاہور) معروف شیعہ عالم دین و مذہبی رہنما علامہ سید شہنشاہ حسین نقوی پر پنجاب کے مختلف اضلاع میں داخلہ پر پابندی کے خلاف مذمتی قرارداد پنجاب اسمبلی میں جمع کروادی گئی، یہ قرارداد مجلس وحدت مسلمین شعبہ خواتین کی مرکزی رہنما و رکن پنجاب اسمبلی سیدہ زہرا نقوی نے جمع کروائی۔
قرارداد کے متن میں کہا گیا کہ یہ ایوان معروف شیعہ عالم دین و رہنما سید شہنشاہ نقوی پر پنجاب کے مختلف اضلاع میں داخلہ پر پابندی کی شدید الفاظ میں مذمت کرتا ہے۔
قرارداد میں کہا گیا کہ علامہ سید شہنشاہ نقوی اہل تشیع اور اہل سنت مسالک میں یکساں مقبول ہیں ۔دونوں مسالک میں ان کے چاہنے والوں کی بڑی تعداد موجود ہے ۔ملک پہلے ہی سیاسی عدم استحکام اور احتجاجوں کی زد میں ہے اور معاشی سرگرمیاں نہ ہونے کے برابر ہیں۔
قوم میں بے یقینی اور شدید اضطراب کی سی کیفیت پائی جاتی ہے۔یکطرفہ، غیر منصفانہ اور جانبدارانہ اقدامات ملک کے لئے ایک نیا بحران پیدا کر سکتے ہیں۔قرار داد میں مطالبہ کیا گیا کہ علامہ سید شہنشاہ نقوی پر پنجاب کے مختلف اضلاع میں داخلے پر لگائی پابندی کو فلفور ہٹایا جائے کیونکہ ملک کسی مزید بحران کی متحمل نہیں ہو سکتا ۔
وحدت نیوز(گلگت) مجلس وحدت مسلمین شعبہ خواتین کی مرکزی صدر محترمہ سیدہ معصومہ نقوی کی صدارت میں مجلس وحدت مسلمین گلگت کے آفس میں تنظیمی اراکین کا ایک اجلاس منعقد ہوا جس میں سابقہ سیکرٹری یوتھ ایم ڈبلیو ایم وومن ونگ محترمہ سائرہ ابراہیم اور سابقہ رکن صوبائی اسمبلی محترمہ بی بی سلیمہ نے بھی شرکت کی۔
اس اجلاس میں مرکزی صدر نے خواتین کے تنظیمی و تربیتی امور پر مشتمل سوالات کے جوابات دیے، اجلاس میں طے پایا کہ کل محفل دعائے کمیل کا انعقاد کیا جاے گا جس میں نو منتخب صدر کے نام کا اعلان کیا جائےگا علاوہ ازیں محترمہ معصومہ نقوی نے آئی ایس او طلبات گلگت ڈویژن کی صدر محترمہ حرا روحانی سے بھی خصوصی ملاقات کی اور باہمی دلچسپی کے امور پر گفتگو کی۔
وحدت نیوز(خیرپورناتھن شاہ) المجلس ویلفیئر آرگنائزیشن کراچی ڈویژن مسلسل کئی ماہ سے سندھ کے سیلاب متاثرہ ہم وطنوں کی بحالی کیلئے میدان میں مصروف عمل ہے، گذشتہ دنوں زین رضوی ڈائریکٹر المجلس ویلفیئر آرگنائزیشن کراچی ڈویژن کی زیر نگرانی سندھ کے علاقوں خیرپور ناتھن شاہ ضلع دادو،ضلع خیرپوراور کنڈیارو میں سینکڑوں سیلاب متاثرہ خاندانوں میں راشن ،خیمے اور گرم کپڑے تقسیم کیئے گئے۔
اس موقع ایم ڈبلیوایم کے صوبائی رہنما شفقت لانگا،ضلع غربی کراچی کے صدر کلیم رضا زیدی، ضلع خیر پور کے صدر مولانا صفدر علی ملاح، ضلع دادو کے صدر اصغرعلی چانڈیو اور دیگر بھی زین رضا رضوی کے ہمراہ موجود تھے ۔
زین رضا نے وحدت نیوز سے گفتگو کرتے ہوئے کہاکہ المجلس ویلفیئر آرگنائزیشن کراچی ڈویژن سیلاب متاثرہ اہل وطن کی بحالی کیلئے ہر ممکن اقدامات جاری رکھے گی، ہم دکھ اور پریشانی کی اس گھڑی میں اپنے بہن بھائیوں کو تنہا نہیں چھوڑیں گے، وہ مخیرین جنہوں نے ان تمام امور خیریہ میں ہمارے ادارے کے ساتھ تعاون کیا ان کے انتہائی ممنون مشکور ہیں اور دیگر صاحبان ثروت افراد سے بھی ادارے کے ساتھ دل کھول کر تعاون کرنے کی اپیل کرتے ہیں۔
