The Latest
وحدت نیوز(لاہور) مجلس وحدت مسلمین شعبہ خواتین لاہور کے یونٹ نیشمن اقبال میں ضلعی سیکرٹری فلاح و بہبود محترمہ عالیہ رضوی اور یونٹ سیکرٹری جنرل محترمہ عندلیب کی انتھک کاوشوں کی بدولت ادارہ علوم قرآن و اہلبیتؑ کے عنوان سے بچوں اور بچیوں کے لیے ہفتہ وار دینی و اخلاقی تربیتی کلاسز کا آغاز کر دیا گیا ہے اس موقع پر ضلعی سیکرٹری جنرل محترمہ حنا تقوی نے خواہران کی کاوشوں کو سراہتے ہوئے کہا کہ تمام تنظیمی عہدیداران کو دینی ، تربیتی اور فلاحی کاموں میں بڑھ چڑھ کر حصی لینا چاہیے ہمیں بچوں کی تعلیم و تربیت کو اپنی اولین ترجیحات میں شامل رکھنا چاہیے ۔
وحدت نیوز(گلگت) مجلس وحدت مسلمین شعبہ خواتین کی مرکزی سیکرٹری یوتھ محترمہ سائرہ ابراہیم نے گلگت میں ٹریفک حادثات کی ذیادتی پر حکومت سے نوٹس لینے کی اپیل کرتے ہوئے کہا کہ گلگت میں خوفناک ٹریفک حادثات روزانہ کا معمول بن چکے ہیں ان حادثات میں قیمیتی جانوں کا ضیاع حکومتی نا اہلی اور لاپرواہی کا منہ بولتا ثبوت ہے۔
ان کا کہنا تھا کہ سلطان آباد موڑ قاتل موڑ بن گیا ہے ہمارے لوگوں کی زندگیوں کو معمولی نہ سمجھا جائے کے۔کے۔ایچ پر گزرنے والی گاڑیوں پرسخت قانونی کاروائی کی جائے سیاحت شروع ہوتے ہی ان راستوں پر رش بڑھ جاتا ہے میدانی علاقوں سے آنے والے سیاح یہاں کے راستے کی ناہمواریوں سے ناواقف ہیں جو حادثات کا باعث بنتے ہیں اگر قوانین کے عمل در آمد میں سختی کی جائے تو ان حادثات پر قابو پایا جا سکتا ہے ۔
ان کا کہنا تھا حکومت سے اپیل کرتے ہیں کہ ڈی ایچ کیو ہسپتال میں بہترین طبی امداد ، ایمرجنسی کی صورتحال سے نمٹنے کی سہولیات اور آپریشن کی سہولت کو بہتر بنایا جائے علاوہ ازیں نیور ڈیپارٹمنٹ کو تمام تر سہولیات مہیا کی جائیں کیونکہ ذیادہ تر اموات سر پہ چوٹ لگنے اور بر وقت طبی امداد نہ ملنے کی وجہ سے ہوتی ہیں ان کا مزید کہنا تھا حکومت اس سنگین معاملے کے حل اور انسانی جانوں کے تحفظ کے لیے سنجیدگی سے اقدامات کرے۔
وحدت نیوز(لاہور) مجلس وحدت مسلمین شعبہ خواتین کی مرکزی رہنما و رکن پنجاب اسمبلی سیدہ زہرا نقوی نے گھوٹکی میں ٹرینوں کے المناک حادثے میں قیمیتی جانوں کے ضیاع پر گہرے رنج اور دکھ کا اظہار کرتے ہوئے کہا کہ اس ہولناک سانحے کی فوری تحقیقات کروا کر غفلت برتنے والوں کا محاسبہ کیا جائے اور محکمہ ریلوے کی ناقص کارکردگی پر سخت پکڑ کی جائے تاکہ آئندہ ایسے قومی سانحات پیش نہ آئیں ان کا کہنا تھا کہ زخمیوں کے علاج معالجے کے لیے اور جانبحق افراد کے لواحقین کی مالی امداد کی جاۓ اللہ تعالی تمام جانبحق ہونے والوں کی مغفرت فرمائے اور پسماندگان کو صبر جمیل عطا فرمائے اس مشکل گھڑی میں لواحقین کے دکھ درد میں برابر کے شریک ہیں۔
وحدت نیوز(مشہد مقدس) مجلس وحدت مسلمین پاکستان شعبہ مشہد مقدس کے سیکرٹری جنرل حجتہ الاسلام والمسلمین آقائی عقیل حسین خان نے شہادت امام جعفر صادق علیہ السلام و برسی امام راحل روح اللہ الموسوی الخمینی رضوان اللہ علیہ کے موقع پر اپنے تعزیتی بیان میں کہا کہ رئیس مکتب امام جعفر صادق علیہ السلام وہ عظیم ہستی ہیں کہ جنہوں نے ہزاروں شاگردوں کو مختلف علوم کی تعلیم دی، امام جعفر صادق علیہ السلام نے اپنی پوری زندگی انسانیت کی بھلائی اور اسکی نجات کے لئے صرف کی۔
انہوں کہا کہ آج امام جعفر صادق علیہ السلام کے فرزند جسے زمانہ خمینی بت شکن کے نام سے جانتا ہے اس مرد قلندر نے آئمہ کی سیرت طیبہ پر عمل کرتے ہوئے ظالموں اور جابروں کے خلاف علم جہاد بلند کیا اور ایک عظیم ملت کو ان کے چنگل سے آزاد کرایا، امام خمینی کی حکیمانہ قیادت ہی ہے کہ جس نے ایرانی قوم کو سامراجی طاقتوں کی دلدل اور شہنشاہیت کے غلط بوسیدہ نظام سے نجات دلائی اور ایک عظیم اسلامی حکومت تشکیل دی۔
وحدت نیوز(گلگت) مجلس وحدت مسلمین گلگت کے سیکرٹریٹ وحدت ہاوس میں وحدت ویلفئیر ٹرسٹ ویمن کا ایک اہم اجلاس منعقد ہوا اجلاس میں این جی او کی چئیر پرسن خواہر زیبی حسن نے کہا کے اس این جی او کا مقصد خواتین کو باشعور بنانا ہے اور خواتین کو دور حاضر کے تقاضوں کے مطابق جدید اور کم خرچ روزگار فراہم کرنا ہے ۔
اس موقع پر مرکزی سیکٹرٹری یوتھ ایم ڈبلیو ایم شعبہ خواتین محترمہ سائرہ ابراہیم نے انہیں اپنے تعاون کا یقین دلاتے ہوئے کہا کے ہم ہر مثبت کام میں آپ کے ساتھ ہیں اور گلگت میں بڑھتی ہوئی بیرونی ثقافت اور بیروزگاری کے مسائل کے حل کے لئے ہمیں آپس میں تعاون سے ہی آگے بڑھنا ہو گا۔
اس موقع پر ایم ڈبلیو ایم کے مرکزی معاون سیکرٹری تربیت جناب آغا جان حیدری جو ان دنوں گلگت میں اپنے فرائض انجام دے رہے ہیں نے کہا کے اس قسم کی این جی او وقت کی ضرورت ہے جو کے وقت اور حالات کی نزاکت کے مطابق حکمت عملی کے تحت کام کرے اس اجلاس میں ایم ڈبلیو ایم شعبہ خواتین گلگت کی مسئول محترمہ صائقہ بھی موجود تھیں ۔
وحدت نیوز(مشہد مقدس) دفتر مجلس وحدت مسلمین پاکستان (موسسہ شہید عارف الحسینی) شعبہ مشہد مقدس کے زیر اہتمام شہادت امام جعفر صادق علیہ السلام اور امام خمینی رضوان اللہ کی 32ویں برسی دفتر مجلس شعبہ مشہد میں مجلس عزاء منعقد ہوئی۔ پروگرام میں علمائے کرام اور طلاب عظام کی کثیر تعداد نے شرکت کی۔ مہمان خصوصی اور سخنران حجت الاسلام و المسلمین جناب حجت گنابادی نژاد مشاور و معاون تبلیغات اسلامی آستان قدس رضوی تھے ۔
مجلس کا آغاز زیارت عاشورا سے ہوا جس کی سعادت برادر مظاہر حسین منتظری نے حاصل کی. اس کے بعد برادر قمر علی کشمیری نے اپنی سوز بھری آواز میں مرثیہ پڑھا۔ حجت الاسلام والمسلمین آقای حجت گنابادی نژاد نے اپنے خطاب میں امام جعفر صادق علیہ السلام کی سیرہ طیبہ پہ تفصیل سے گفتگو فرمائی۔
انہوں نے کہا کہ امام صادق علیہ السلام کا دور بنی عباس کا دور تھا اور بہت ہی سخت دور تھا امام صادق علیہ السلام نے امام محمد باقر علیہ السلام کے علوم کہ جنکی آپ نے بنیاد رکھی تھی انہیں علوم کو پروان چڑھایا اور تقریبا 4 ہزار شاگردوں کی تربیت فرمائ،تمام آئمہ معصومین علیہم السلام کی زندگی ھمیشہ مبارزہ و جہاد میں گزری لیکن امام جعفر صادق علیہ السلام کا دور بنی عباس کا دور اور بہت ہی مشکل دور تھا۔
آقائے گنابادی نژاد نےامام خمینی کے عظیم انقلاب کی وجوہات کو بیان کرتے ہوئے کہا کہ امام شیعہ اثناء عشریہ تھے لیکن انکی فکر اسلامی تھی وہ وسیع سوچ کے حامل تھے انکی وسعت نظری کی نظیر نہیں یہی وجہہ ہے کہ آج بھی لوگ انہیں فرزند اسلام کے نام سے یاد کرتے ہیں. امام خمینی نے اصل اسلام اور اسلام ناب سے لوگوں کو متعارف کروایا۔ امام نے دین کی خدمت میں کوئی کسر نہیں چھوڑی تھی اور مطمئن قلب کے ساتھ وداع کیا۔لوگ امام خمینی رح کو رہتی دنیا تک یاد رکھیں گے۔پروگرام کی نظامت کے فرائض حجت الاسلام شیخ عارف حسین نے انجام دئیے۔
وحدت نیوز(شگر) مجلس وحدت مسلمین ضلع شگر کے زیر اہتمام وحدت آفس میں ایم ڈبلیو ایم شعبہ خواتین کے تعاون سے خواتین کے لئے ""دور حاضر میں خواتین کی ذمہ داریاں"" کے عنوان سے ایک سیمینار منعقد ہوا ۔اس سیمینار میں سیکرٹری جنرل مجلس وحدت مسلمین گلگت بلتستان شعبہ خواتین و پارلیمانی سیکریٹری فار ویمن ڈیویلپمنٹ محترمہ کنیز فاطمہ علی نے خصوصی شرکت کی۔
سیمینار میں شعبہ خواتین کے عہدے دار خواتین کے علاوہ دیگر خواتین نے بھی بھرپور حصہ لیا۔محترمہ نجمہ مریم سبحانی سیکریٹری جنرل شعبہ خواتین ضلع نے خطبہ استقبالیہ پیش کیا جبکہ محترمہ سکینہ ، محترمہ حکیمہ اور سیمینار کی مہمان خصوصی ممبر اسمبلی محترمہ کنیز فاطمہ علی نے سیمینار کے مذکورہ عنوان کے تناظر میں خواتین کی ذمہ داریوں پر مفصل روشنی ڈالی ۔ضلعی سیکریٹری جنرل شیخ اشرف حسین شگری نے بھی اس اجتماع سے خطاب کرتے ہوئے خواتین کو مردوں کے شانہ بشانہ کام کرنے کی ضرورت پر زور دیا ۔
محترمہ کنیز فاطمہ نے ایم ڈبلیوایم شعبہ خواتین کی طرف سے تنظیمی فعالیت اور کارکردگیوں کو سراہا اور ان کی حوصلہ افزائی کرتے ہوئے شگر میں خواتین کو درپیش مشکلات کے حل اور انہیں معاشرے میں بہتر مقام دینے کے لئے تعاون کا یقین دلایا۔سیمینار کے آخر میں ممبر اسمبلی کے سامنے چند مطالبات پیش کئے ، جنہیں پارلیمانی سیکریٹری برائے وویمن ڈویلپمنٹ نے ترجیحی بنیادوں پر عملی اقدام کرنے کی یقین دہانی کرائی ۔
وحدت نیوز (قمراہ) سیکرٹری جنرل مجلس وحدت مسلمین گلگت بلتستان شعبہ خواتین و پارلیمانی سیکرٹری برائے وویمن ڈویلپمنٹ کنیز فاطمہ علی کا دورہ قمراہ۔اس دوران پرائمری بوائز اینڈ گرلز سکولوں کا دورہ کیا۔ٹیچرز اور کمیونٹی کے ذمہ داران سے ملاقات کی۔
اس موقع پر عمائدین علاقہ کی جانب سے رکن ممبر اسمبلی کو پارلیمانی سیکرٹری برائے ویمن ڈیولپمنٹ منتخب ہونے پر مبارکباد پیش کی اور عمائدین قمراہ کی جانب سے سیکرٹری جنرل مجلس وحدت مسلمین گلگت بلتستان مجاھد ملت آغا علی رضوی اور وزیر اعلیٰ گلگت بلتستان خالد خورشید کا خصوصی شکریہ ادا کیا۔
عمائدین نے سکولوں میں اساتذہ کی کمی اور عمارت کی کمی سے متعلق ممبر اسمبلی کو آگاہ کیا اور فوری طور پر اساتذہ کی کمی کو پورا کرنے کا مطالبہ کیا جس کو ممبر اسمبلی نے فوری اقدامات اٹھانے کی یقین دھانی کرائی۔
وحدت نیوز(گلگت) مجلس وحدت مسلمین شعبہ خواتین گلگت کی یوتھ ونگ کمیٹی کا اہم اجلاس وحدت ہاوس گلگت میں ہوا جس میں نوجوانوں کی تربیت اور کیریئر گائیڈنس کے حوالے سے لائحہ عمل طے کیا گیا ۔مرکزی سیکرٹری یوتھ ایم ڈبلیو ایم وومن ونگ محترمہ سائرہ ابراہیم نے اپنے خیالات کا اظہار کرتے ہوۓ کہا گلگت کے حالات معاشرتی و ثقافتی تقاضوں اور تبدیلیوں کا مدنظر رکھتے ہوۓ نوجوان طبقے کے لیے کام کرنے کی ضرورت ہے اور اس سلسلے میں اسکولوں کالجوں کے ساتھ ساتھ محلے کی سطح پر دعائیہ پروگرام منعقد کرواے جائینگے جس میں تربیت اولاد کے حوالے سے ماوں کو بھی آگاہی دی جاے گی۔
اس موقع پر کمیٹی کی رکن محترمہ رباب رضوی نے بھی مفید آراء و تجاویز پیش کیں ان کا کہنا تھا کہ ہمیں اپنی نوجوان نسل کو صرف دینی تربیت تک محدود نہ رکھیں بلکہ انھیں معاشرے کے فعال ترین افراد میں شامل کرنا ہے اس سلسلے میں میڈیکل کی فرسٹ ایڈ تربیت کسی بھی ہنگامی صورتحال سے نمٹنے کے گرلز گائیدنگ کی ٹریننگ اور انھیں ذہنی و جسمانی طور پر آمادہ رکھنا اور ایک مضبوط اعصاب کی حامل شخصیت بنانا بھی ہمارے ایجنڈہ میں شامل ہوگا۔
اجلاس میں شعبہ جوان کے تحت تمام اراکین کو مختلف ٹاسک کے حصول کے لیے ٹیمیں تشکیل دے کر جلد تربیتی امور پر کام کے آغاز کی ہدایات کی گئیں اجلاس میں محترمہ ثوبیہ بتول ، محترمہ شمسیہ ، محترمہ ناہیدہ اور معلمات مدرسہ باب العلم بھی شریک تھیں۔
وحدت نیوز(لاہور) یوم تکبیر کے موقع پر مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی سیدہ زہرا نقوی نے اپنے پیغام میں کہا کہ کسی بھی ملک کی سالمیت اور بقا اس کی جوہری صلاحیت میں پوشیدہ ہے پاکستان نے ایٹمی قوت حاصل کر کے اپنے دفاع کو ناقابل تسخیر بنایا ہے انہوں نے کہا ’یومِ تکبیر‘ جہاں پاکستانی قوم کے بے مثال جرات اور بہادری کی علامت ہے وہاں پاکستان کے دشمنوں اور بد خواہوں کے لیے بھی یہ پیغام ہے کہ پاکستان کے خلاف جارحیت کا مظاہرہ کرنے والوں کاانجام عبرت ناک ہوگا ۔
ان کا کہنا تھا 28 مئی کے اس عظیم کارنامے کا سہرا افواج پاکستان ، ڈاکٹر عبدالقدیر خان اور ان تمام افراد کے سر جاتا ہے جنہوں نے ابتدا سے لے کر تکمیلی مراحل تک اپنی جان خطرے میں ڈال کر وطن کا دفاع مضبوط کیا ان کا مزید کہنا تھا ملک کی ترقی اور استحکام کے لیے جہاں ایٹمی طاقت کو حصول ناگزیر ہے اسی طرح تعلیمی و معاشی ترقی بھی لازم ہے جس میں حکومت اور عوام دونوں کی محنت لگن اور جدوجہد درکار ہے۔
