وحدت نیوز (خیر پور) مجلس وحدت مسلمین صوبہ سندھ کے ڈپٹی سیکرٹری جنرل عالم کربلائی نے خیرپور میں لبیک یارسول اللہ کانفرنس کے حوالے سے عوامی رابطہ مہم سے کارنر میٹنگ خطاب کرتے ہوئے کہا کہ تھرپارکر میں قحط کے باعث درجنوں بچوں کی ہلاکت حکمرانوں کی نااہلی اور آئین پاکستان کی خلاف ورزی ہے، سپریم کورٹ چیف سیکرٹری کو عدالت طلب کرنے کے بجائے وزیراعلٰی سندھ اور وزیراعظم پاکستان کو طلب کرے۔ انکا کہنا تھا کہ عوام کو بنیادی حقوق نہ دینے پر آئین پاکستان کی خلاف ورزی کے مرتکب حکمرانوں کو نااہل قرار دیا جائے، عوام کو بھوک و افلاس کے تحفے دینے والے حکمرانوں کو اقتدار میں رہنے کا کوئی حق حاصل نہیں۔ حکمران اپنی عیاشیوں میں مگن ہیں انہیں عوام کی کوئی پرواہ نہیں۔ وہ اپنی کرسی بچانے کی فکر میں عوام سے کئے گئے وعدے بھول چکے ہیں، آئین کی خلاف ورزیوں پر انہیں ہمیشہ کیلئے سیاست سے آؤٹ کر دیا جائے۔