وحدت نیوز(کوئٹہ) مجلس وحدت مسلمین کوئٹہ ڈویژن کاایک ہنگامی اجلاس ڈویژنل ڈپٹی سیکریٹری جنرل علامہ ولایت حسین جعفری کی زیر صدارت منعقدہوا جس میں ایم ڈبلیوایم بھکر کے ضلعی سیکرٹری جنرل سفیرشہانی اوران کے چارساتھیوں کی امن دشمن دہشت گردوں کے ہاتھوں اغواء کی شدیدالفاظ میں مذمت کی گئی۔علامہ ولایت جعفری کا کہنا تھاکہ مجلس وحدت مسلمین پاکستان بھرمیں سنی شیعہ اتحاد، مذہبی و فرقہ وارانہ ہم آہنگی اورملک میں قیام امن کے لئے معتدل سیاسی ومذہبی جماعتوں کے ساتھ مل کرمخلصانہ کوششیں کررہی ہے۔ ملک دشمن اورامن دشمن عناصرہمیں امن کی راہ سے کبھی بھی نہیں ہٹاسکتیں۔نہ اتحاد اسلامی اورمظلوموں کے حقوق کے حصول کے لئے ہمارے ارادوں کو متزلزکرسکتے ہیں۔ مظلوموں کی حمایت، ظالموں سے نفرت ، پاکستان میں امن وبھائی چارے کا قیام ، جیواورجینودو ہمارے اصول ہیں۔امن کی راہ میں ہم نے پہلے بھی قربانیاں دی ہیں اورآئندہ بھی دیتے رہیں گے۔انسان دشمن دہشت گردوں کی جانب سے سیاسی کارکنوں کااغواء ایک بزدلانہ فعل ہے جس کی جتنی بھی مذمت کی جائے کم ہے۔
ان کا کہنا تھا کہ ملک میں قیام امن کی کوششوں میں مصروف کارمجلس وحدت مسلمین پاکستان کے پُرامن کارکنوں کااس طرح اغواء سے حکومت اورطالبان دہشت گردوں کے درمیان جاری نام نہادمذاکرات کی قلعی کُھل جاتی ہے۔امن دشمنوں کی طرف سے ایم ڈبلیوایم کے کارکنوں کی اغواء کی کاروائی اس بات کا ثبوت ہے کہ دہشت گردامن مذاکرات میں قطعی سنجیدہ نہیں بلکہ وہ پاکستان کی جیلوں میں قیداپنے مجرموں کورہائی دلوانے ،مذاکرات کے دوران زیادہ سے زیادہ مراعات وصول کرنے اور دہشت گردانہ کاروائیاں کرنے کے لئے پاکستان کے مختلف شہروں میں اپنی جڑیں مضبوط کرنے کے درپے ہیں ۔
انہوں نےپنجاب حکومت سے مطالبہ کیاگیاکہ مجلس وحدت مسلمین کے ضلع بھکرکے سیکرٹری جنرل سفیرشاہانی اوران کے چارساتھیوں کوفوراً بازیاب کرایاجائے۔ کارکنوں کی عدم بازیابی کی صورت میں حکومت کے خلاف ملک گیراحتجاج شروع کیا جائے گاجس کو روکناحکومت کے بس میں نہیں ہوگی۔
