وحدت نیوز (مظفرآباد) گلگت ، پارا چنار واقعات محرم سے قبل میں انارکی پھیلانے کی مذموم سازش ہیں، حکومت مجرمان کو کیفر کردار تک پہنچائے ، واقعات کی ذمہ دار نااہل حکومتیں ہیں، خصوصاً گلگت واقعہ نااہل وزیراعلیٰ کی بیڈگورننس کی مثال ہے، مجلس وحدت مسلمین آزاد جموں و کشمیر ان واقعات کی بھرپور مذمت کرتی ہے، ان خیالات کا اظہار مجلس وحدت مسلمین آزاد جموں و کشمیر کے سیکرٹری سیاسیات سید تصورعباس موسوی نے ریاستی دفتر مظفرآباد سے جاری مذمتی بیان میں کیا ۔
انہوں نے کہا کہ گلگت میں ہونے والی دہشت گردی کے حوالے سے وزارت داخلہ نے جی بی کی حکومت کو تین روز قبل بتادیا تھا ، مگر اس کا تدارک نہ کیئے جانے پر وزیراعلیٰ اور اس کی نااہل انتظامیہ ذمہ داری قبول کرے ، ہم یہ سمجھتے ہیں کہ محرم الحرام چونکہ بالکل قریب ہے ، عالمی استعمار منظم سازش کے تحت ملک میں افراتفری کا ماحول بنانے کی مذموم کوشش میں ہے، اور نااہل حکومتیں خاموش تماشائی کے کردار کے علاوہ کچھ نہیں کر پا رہیں، قومی سلامتی پالیسی کو نافذ العمل بنایا جانا چاہیے،اگر بے گناہ و نہتے شہریوں کو اٹھا کر دہشتگردی کے مقدمات بنائے جا سکتے ہیں ، تو اصل دہشتگردوں کا احتساب کیوں نہیں کیا جاتا؟ کیوں ان کو کاروائیوں کا موقع دیا جاتا ہے، کیوں آج تک کسی ایک بھی دہشتگرد کو سزانہیں ہوئی ، مملکت خداداد پاکستان کی نظریاتی و جغرافیائی سرحدوں کی محافظ قوم کو کیوں نشانہ بننے دیا جاتا ہے، محب وطن شہریوں کی شہادتوں پر عالمی انسانی حقوق کی تنظمیں کہاں مرجاتی ہیں ، یہ وہ سوالات ہیں کہ جن کا جواب ہر محب وطن جاننا چاہتاہے ۔ محب وطن شہریوں کو یوں منظم انداز میں مارنا قومی سلامتی اداروں کے لیئے لمحہ فکریہ ہے ، انہوں نے کہا کہ گلگت اور پشاور میں ہونے والے بم حملوں کی شفاف تحقیقات کرتے ہوئے مجرموں کو بے نقاب کیا جائے اور حکومت شہریوں کو ان کا بنیاد حق حقِ زندگی دے ۔
