وحدت نیوز (ملتان) مجلس وحدت مسلمین جنوبی پنجاب کا پہلا تنظیمی کنونشن یکم مئی کو جامعہ شہید مطہری (چوک کمہاراں والا) ملتان میں ہوگا۔ پہلے تنظیمی کنونشن میں جنوبی پنجاب کے اضلاع، ملتان، خانیوال، مظفرگڑھ، وہاڑی، لودھراں، بہاولپور، بہاولنگر، رحیم یارخان، ڈیرہ غازیخان، لیہ، بھکر، راجن پور کے نمائندگان شرکت کریں گے اور جنوبی پنجاب صوبہ کے لیے پہلے سیکرٹری جنرل کا انتخاب کریں گے۔ کنونشن میں مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری خصوصی طور پر شرکت کریں گے اور نومنتخب صوبائی سیکرٹری جنرل کا اعلان اور اُن سے حلف لیں گے۔ اجلاس میں مرکزی سیکرٹری تنظیم یعقوب حسینی، مرکزی سیکرٹری اطلاعات مہدی عابدی، سابق صوبائی سیکرٹری جنرل پنجاب علامہ عبدالخالق اسدی، نومنتخب سیکرٹری جنرل پنجاب علامہ اصغرعسکری اور اُن کی صوبائی کابینہ شرکت کرے گی۔

وحدت نیوز (لاہور) مجلس وحدت مسلمین  پنجاب کے نو منتخب سیکرٹری جنرل علامہ اصغر عسکری کا تقریب حلف برداری کے بعدشرکائے پیام وحدت کنونشن سے خطاب کرتے ہوئے کہنا تھا کہ مجلس وحدت مسلمین اتحاد امت اور بین مذاہب و مسالک ہم آہنگی کے لئے اپنی جدو جہد جاری رکھے گی،ہم دشمن کے ہر سازش کو باہمی تحاد و وحدت سے ناکام بنائیں گے،انہوں نے کہا کہ پنجاب میں ہمارے کارکنوں کیخلاف انتقامی کاروائیوں کو کسی بھی صورت برداشت نہیں کریں گے،ہم ہر ظالم کے خلاف اور ہر مظلوم کے حامی ہیں اور انشااللہ رہیں گے،حکومتی ایسے اوچھے ہتھکنڈے ہمارے عزم اور حوصلوں کو متزلزل نہیں کر سکتے،پنجاب میں دہشت گردوں کیخلاف آپریشن کی قیادت پاک فوج اور رینجرز کا حق ہے،سول انتظامیہ دہشت گردوں کے سامنے بے بس ہیں،پنجاب حکومت ملکی سلامتی اور عوام کی جان و مال کے تحفظ میں ناکام ہو چکی ہے،سانحہ گلشن اقبال پارک سمیت دہشت گردی کے متاثرہ ہزاروں خاندانوں کو انصاف دلانے کے لئے ہم اپنی کوشش جاری رکھیں گے،تخت لاہور پر پورے پنجاب کا سرمایہ خرچ کر کے پسماندہ علاقوں کو نظر انداز کیا گیا ہے،عوامی بنیادی مسائل جوں کا توں ہیں اور لاہور میں پلوں اور سڑکوں کا جال بچھایا جا رہا ہے،چولستان اور جنوبی پنجاب کے عوام پانی کی بوند بوند کو ترس رہے ہیں،جنوبی پنجاب سمیت دیگر پنجاب کے پسماندہ اضلاع میں صحت،تعلیم،زراعت کے شعبے زبوں حالی کا شکار ہے،پنجاب کے کسانوں اور مزدورں کے حقوق کے لئے ہم انشااللہ ہر اول دستہ ثابت ہونگے۔

انہوں نے کہا کہ دنیا بھر میں پیٹرولیم مصنوعات میں کمی اور ہمارے ہاں ان اشرافیہ کی تسکین کے لئے آئے دن قیمتوں میں اضافہ کیا جارہا ہے جو کسی بھی صورت قابل قبول نہیں،توانائی بحران کے سبب پنجاب میں زراعت اور انڈسٹریز کا شعبہ بدترین مشکلات کا شکار ہے،نندی پوری پروجیکٹ کے نام پر عوام کی آنکھوں میں دھول جھونک ملکی خزانے کو اربوں کا ٹیکہ لگایا گیا،ان حکمرانوں کی ترجیحات میں عوامی مسائل کا حل نہیں بلکہ لوٹ کھسوٹ کے ذریعے عوام کے خون پسینے کی کمائی پر ڈاکہ ڈالنا ہے،انہوں نے اپنے خطاب میں اس عزم کا اظہار کہا کہ انشااللہ مجلس وحدت مسلمین پنجاب میں اپنے تمام مکاتب فکر و مسالک کے بھائیوں کیساتھ مل کر ملکی استحکام و سلامتی کے سفر کو جاری رکھے گی،اور وطن عزیز کو امن کا گہوارہ بنانے میں کسی بھی قسم کے قربانی سے دریغ نہیں کرے گی۔

وحدت نیوز (اسلام آباد) علامہ سید احمد اقبال رضوی مجلس وحدت مسلمین پاکستان کے مرکزی ڈپٹی سیکریٹری جنرل، سید اسدعباس نقوی مرکزی سیکریٹری امورسیاسیات اور نثارعلی فیضی مرکزی سیکریٹری تعلیم نامزدکردیئے گئے ہیں، مرکزی میڈیاسیل سے جاری بیان کے مطابق مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے آئندہ تین سال 19-2016کیلئے اپنی کابینہ میں تین افراد کی شمولیت کا باقائدہ اعلان کردیا ہے، پہلے مرحلے میں تین شعبہ جات کے مرکزی سیکریٹریز کے ناموں کا اعلان کیا گیا ہے جن میں علامہ احمد اقبال رضوی، اسدعباس نقوی اورنثارعلی فیضی شامل ہیں باقی شعبہ جات کے سیکریٹریزکے ناموں کا جلد اعلان متوقع ہے، کابینہ کی تکمیل کے بعد تمام اراکین کابینہ کی حلف برداری کی تقریب منعقد کی جائے گی۔

وحدت نیوز (لاہور) مجلس وحدت مسلمین پاکستان کے سربراہ علامہ راجہ ناصر عباس جعفری نے لاہور میں صوبائی مجلس شوریٰ کے اجلاس کے بعد میڈیا سے گفتگو کرتے ہوئے کہا کہ پانامہ لیکس پر حکومت کی جانب سے بنائے گئے ٹی او آرز کو مسترد کرتے ہیں۔ انہوں نے کہا کہ حکومت اپوزیشن کو اعتماد میں لینے کی بجائے اپوزیشن جماعتوں میں دراڑ ڈال رہی ہے۔ انہوں نے کہا کہ پانامہ لیکس نے ثابت کر دیا ہے کہ حکمران کرپشن میں لتھڑے ہوئے ہیں، ان انکشافات کے بعد وزیراعظم کو اپنے اثاثوں کی تفصیلات سے قوم کو آگاہ کرنا چاہیے تاکہ قوم کو بھی پتہ چل سکے کہ حکمرانوں کے پاس اتنا پیسہ کہاں سے آیا ہے۔

 انہوں نے کہا کہ مجلس وحدت مسلمین تحریک انصاف اور پاکستان عوامی تحریک سمیت دیگر اپوزیشن جماعتوں کی حامی ہے اور ہم کرپٹ حکمرانوں کو گھر بھیج کر ہی دم لیں گے۔ علامہ راجہ ناصر عباس جعفری نے کہا کہ کرپٹ حکمرانوں نے پاکستان کی دولت لوٹ کر بیرون ملک بینکوں بھی رکھی ہوئی ہے اور بیرونی سرمایہ کاروں کو پاکستان میں سرمایہ کاری کی دعوت دے رہے ہیں، یہ حکمرانوں کا دوہرا معیار ہے۔ انہوں نے کہا کہ اپوزیشن جماعتیں حکومت کے مستقبل کا جو بھی فیصلہ کریں گی ہمیں قبول ہو گا۔