وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی  ودیگر رہنماؤں نے سعودی عرب منٰی کے مقام پر بھگڈر مچ جانے سے متعدد حجاج کرام کی شہادت کے واقعہ پر گہرے رنج و غم کا اظہارکیا ہے ۔وحدت ہاؤس کراچی سے جاری اپنے بیان میں ان کا کہنا تھا کہ منیٰ سانحہ سعودی حکومت کی نا اہلی ہے،حکومت کی جانب سے گمشدا ہم وطنوں کی تلا ش کیلئے فوری کاروائی عمل میں لائی جائے ،مکہ مکرمہ سعودی حکومت کی نا اہلی کا یہ دوسرا بڑا واقعہ ہے ،سعودی حکومت کی انتظامی نا اہلی سے سینکڑوں لوگ شہید اور لاپتہ ہیں اگر سعودی حکومت فریضہ کے دوران حجاج کرام کیلئے انتظامات کو بہتر نہیں بنا سکتی تو دیگر ممالک کو انتظامی معاملات میں شامل کیا جائے تاکہ پھر سے ایسے واقعات کا سامنا نہ کرنا پڑھے ،سیکریٹری اطلاعات سید مہدی عابدی نے کہا سانحہ منیٰ واقعات کی مکمل طور پر انکوائری کی جانی چاہئے ۔ دفتر خارجہ سے مطالبہ کیا کے وہ سانحہ منیٰ کے بعد گم ہونے والے پاکستانی حجاج کیلئے زبانی جمع خرچ کے بجائے ان کی تلاش کیلئے عملی اقدامات کئے جائیں اور حکومت کی جانب سے جلد از جلد وفد کو سعودی عرب روانا کیا جائے تاکہ ہم وطنوں کی تلاش کو ممکن بنایا جاسکے۔ دریں اثنا ء ایم ڈبلیو ایم رہنماؤں کی سانحہ منیٰ میں شہید ہونے والوں کے بلندی درجات اور پسماندگان کیلئے خصوصی دعائیں اللہ تعالیٰ اس سانحہ میں شہید ہونے والوں کے درجات بلند کرے اور پسماندگان کو صبر جمیل عطا کرے۔

وحدت نیوز (قم) گذشتہ روز نمازِ عید کے بعد ہر سال کی طرح اس مرتبہ بھی مجلسِ وحدت مسلمین شعبہ قم  نے پارک علوی میں ایک عید ملن پارٹی کا اہتمام کیا۔ پروگرام میں علمائے کرام اور دانشوروں کی کثیر تعداد نے شرکت کی۔ عید ملن پارٹی سے مختلف شخصیات اور دانش مندوں نے خطاب کرتے ہوئے فلسفہ عید اور قربانی کے علاوہ حالاتِ حاضرہ اور عالمِ اسلام کی اجتماعی صورتحال پر روشنی ڈالی۔ پروگرام سے خطاب کرتے ہوئے قائم مقام سیکرٹری جنرل گلزار احمد جعفری نے عالمِ اسلام کی وحدت اور فلسفہ قربانی کے حوالے سے اہم نکات بیان کئے۔ بعد ازاں منٰی میں حاجیوں کی شہادت کی خبر موصول ہونے پر ایم ڈبلیو ایم قم کے میڈیا سیکرٹری آغا نذر حافی، میڈیا ایکشن کمیٹی کے انچارج مدثر علی، آفس سیکرٹری مختار مطہری اور میڈیا آرگنائزنگ کمیٹی کے ممبران نے اپنے مشترکہ اعلامیے میں کہا ہے کہ رواں سال میں سعودی عرب نے اپنی جتنی توانائیاں دہشت گردی کے فروغ پر صرف کی ہیں، اگر اتنی حاجیوں کے پروگرامات پر صرف کرتا تو یہ دلخراش سانحہ پیش نہ آتا۔ انہوں نے اس سال حاجیوں کی پے در پے شہادتوں کی اصل وجہ یہ بتائی ہے کہ اس وقت سعودی حکومت اپنی تمام تر توانائیاں یمن، بحرین اور شام میں دہشت گردوں کی پشت پناہی میں صرف کر رہی ہے اور حجّاج کرام کے سلسلے میں انتظامات کو ثانوی حیثیت دی گئی ہے۔

وحدت نیوز (گلگت) مجلس وحدت مسلمین پاکستان گلگت ڈویژن کے آفس سے جاری ایک بیان میں صوبائی ترجمان الیاس صدیقی نے کہا ہے کہ پیپلز پارٹی نے گلگت بلتستان الیکشن میں کالعدم جماعتوں کا سہارا لیا، خود کو لبرل جماعت ظاہر کرنے والوں نے الیکشن میں کالعدم مذہبی جماعتوں کے پیر پکڑ لئے تھے۔ تھوک و پرچون ملازمتیں بیچنے والوں کو زیب نہیں دیتا کہ وہ عوامی حقوق کی بات کریں۔ پانچ سالہ دور اقتدار میں گلگت بلتستان کے عوام کو جو کچھ دیا اس کے عوض عوام نے پیپلز پارٹی کو الیکشن میں رسوا کر دیا ہے۔ پی ڈبلیو ڈی کے ورک آرڈر پر اپنا پیٹ بھرنے والے بھوکے جیالوں کی گزر اوقات مشکل ہونے سے بوکھلاہٹ کا شکار ہیں ہمارے پاس آجائیں، مال امام میں سے کچھ خیرات انہیں بھی بانٹ دینگے۔ پورے پاکستان میں ہماری حمایت سے ہمیشہ انتخابات جیتنے والی پیپلز پارٹی کا 2013ء کے انتخابات میں جو حشر ہوا اس سے سبق سیکھنے کی ضرورت ہے۔ وفاق کی علمبردار جماعت اب سمٹ کر ایک صوبے تک محدود ہو چکی ہے۔ الیکشن میں اپنی رسوائی کا ملبہ ایم ڈبلیو ایم پر گرانے والے یہ کیوں نہیں سوچتے کہ اپنے دور اقتدار میں انہوں نے کیا گُل کھلائے ہیں۔ سرکاری ملازمتوں کو تھوک و پرچون بیچنے والے ہی انتشار کے ذمہ دار ہیں۔ ہم پیپلز پارٹی کے باکردار رہنماؤں کو قدر کی نگاہ سے دیکھتے ہیں کردار کشی کرنا ہمارا وطیر ہ نہیں۔ جیالوں کو اقتدار کی بھوک نے بے حال کر دیا ہے مجلس وحدت کی کردارکشی سے اپنا پیٹ بھرنے کی کوشش کوئی رنگ نہیں لائے گی۔

وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل و سیکرٹری امور خارجہ ڈاکٹر علامہ سید شفقت حسین شیرازی نے سانحہ منٰی پر سعودی حکومت کی مذمت کرتے ہوئے کہا ہے کہ ان فرعون صفت آل سعود کی نظر میں دنیا اسلام میں قتل ہونے والی انسانیت ماسوائے اعداد و شمار کے اور کچھ نہیں ہے۔ سعودی حکمران اپنے علاوہ کسی اور کو انسان شمار ہی نہیں کرتے، ان کے ہاتھ لیبیا، مصر، شام، عراق، بحرین، کویت، افغانستان، یمن اور پاکستان کے مسلمانوں کے خون سے رنگین ہیں۔ دنیا میں جہاں کہیں بھی دہشتگردی اور خودکش حملہ ہوتا ہے کہ اس میں یا سعودی شہری یا سعودی فنڈڈ تکفیری وہابی ملوث پائے جاتے ہیں۔ ایم ڈبلیو ایم کے مرکزی رہنما کا مزید کہنا تھا کہ اس موسم حج کے آغاز میں بھی سینکڑوں حجاج اور خانہ خدا کے مہمان بے گناہ قتل ہوئے اور اب پھر سعودی انتظامیہ کی نااہلی کی وجہ سے پورے عالم اسلام میں صف ماتم بچھ گئی ہے۔ اس سانحہ کی جتنی مذمت کی جائے کم ہے، او آئی سی ممبر ممالک حج کے امور کو اپنی تحویل میں لیں اور سعودی حکومت پر دباؤ ڈالیں، کیونکہ سعودیہ مسلسل کئی سال سے حج کے انتظامی امور میں ناکام ہو رہا ہے۔ موجودہ سعودی حکمرانوں کو اپنی نااہلی کا اعتراف کرتے ہوئے مستعفی ہو جانا چاہیئے۔