ایران میں انقلاب کی کامیابی کے بعد شائد ہی دنیا کا کوئی لیڈر ایسا ہو جس کے دل میں یہ خواہش نہ جاگی ہو کہ وہ بھی دنیائے عالم میں امام خمینی جیسی عزت و مرتبت حاصل کرپائے اور عوام کے دلوں پر اسی طرح راج کرے کہ جیسے امام خمینی کی ایک آواز پر شیر خوار بچوں کی مائیں اپنے جگرگوشوں کو ہاتھوں پہ اٹھائے امام کے افکار پر قربان کرنے کیلئے ہمہ وقت تیا رملتی تھیں ۔ ڈاکٹر طاہر القادری کی آمد پر جس طرح ان کا استقبال کیا گیا اس سے ایک بات تو واضح ہوگئی کہ تحریک منہاج القرآن رابطہ اور انتظام کی بھرپور صلاحیتیوں سے مالا مال ہے ۔ مینار پاکستان پہ ایسے کامیاب تاریخی جلسوں کا اعزاز فقط چند جماعتوں کے ہی پاس ہے جن میں اب منہاج القرآن بھی شامل ہے ۔ بذات خود ریاست بچاؤ کا نعرہ ہی اپنے اندر اتنی جاذبیت اور کشش رکھتا ہے کہ کوئی بھی پاکستانی اس سے متاثر ہوئے بغیر نہیں رہ سکتا ۔ گرچہ ڈاکٹر صاحب کی تحریریں ، تقریریں ، عالمی سطح پر اسلام اور پاکستان سے متعلق ان کی کاوشیں کسی تعارف کی محتاج نہیں ہیں مگر سوال یہ پیدا ہوتا ہے کہ ڈاکٹر طاہر القادری اپنے اعلان کردہ ایجنڈے اور مقاصد میں کس حد تک کامیاب ہو پائیں گے ؟ ڈاکٹر صاحب کا سب سے زیادہ زور اس بات پر ہے کہ پاکستان میں کرپٹ ، نااہل حکمرانی اور خاندانی اجارہ داری کا سلسلہ ختم کیا جائے ۔ سب سے پہلے کرپٹ اور بدعنوان عوامی نمائندوں کو نااہل قرار دیا جائے ۔ ایسے انتخابات کا اہتمام کیا جائے جس کے ذریعے پہلے سے آزمائے گئے بدعنوان اور بدنام افراد پھر سے ایوان میں نہ آسکیں ۔ ڈاکٹر صاحب کی تجویز میں پہلے کرپشن سے پاک ایسی نگران حکومت کا قیام عمل میں لایا جائے جس میں حکومت میں شامل اور حکومت سے باہر تمام سیاسی قوتوں بشمول عدلیہ و فوج کو نمائندگی حاصل ہو ۔نگران حکومت کے لیے 90دن میں انتخابات کرانے کی پابندی کے قانون کو ختم کیا جائے ۔جس کی آئین میں گنجائش موجود ہے ۔ اپنے خطاب کے دوران انھوں نے غیرجماعتی طرز حکومت کا تذکرہ بھی کیا ۔جس میں طبقات کی بنیاد پر نمائندگی دی جائے ۔ ساتھ ہی انھوں نے 10جنوری تک مطالبات پورے نہ ہونے کی صورت میں 14جنوری کو اسلام آبادکی جانب40لاکھ افراد کے لانگ مارچ کا اعلان کیا۔ ان کے خطاب کا زیادہ ہدف پاکستان پیپلز پارٹی اور مسلم لیگ ن بنے ۔ انھوں نے ملکی حالات ، عوامی مسائل ، اور حکومت کی جن کمزوریوں کی نشاندہی کی ان سے شائد اختلاف ممکن نہیں ہے۔ مگر ڈاکٹر صاحب کے مطالبات سننے میں جتنے خوبصورت ہیں ان پر عملدرآمداتنا ہی مشکل ہے۔ 
ڈاکٹر صاحب کے مطابق 90دن سے زیادہ کی نگران حکومت کی گنجائش آئین میں ہے لیکن ڈاکٹر صاحب نے اپنے خطاب میں یہ واضح نہیں کیا کہ عدلیہ اور فوج کی کارِحکومت میں شمولیت کی آئین میں کتنی گنجائش ہے؟یہ فیصلہ کون کرے گا کہ کونسی جماعت اور کونسے نمائندے کرپشن سے پاک ہیں ۔ کس جماعت اور نمائندوں کا ایجنڈا سمگل شدہ نہیں ہے اور پاکستان و پاکستانی عوام کی تعمیر و ترقی کے لیے ہے۔ عدلیہ کا ایسا نظام جس میں لاکھوں افراد انصاف کے منتظر ہوں اور ہزاروں سزائیں کے احکامات جاری ہونے کے بعد ان پر عملدرآمد کے منتظر ہوں ۔ تھپٹراور بوتلیں سوموٹو ایکشن کا حصہ ہوں لیکن ملک بھر میں انتظامی اداروں کی نگرانی میں جاری ایک خاص مکتب فکر کی نسل کشی کو کوئی اہمیت حاصل نہ ہو۔ شکر زیادہ قیمت پر بیچنے والے سلاخوں کے پیچھے ہوں اور سینکڑوں انسانوں کے قاتل کے گھر کی حکومت کفالت کرتی نظر آئے ایسے عدلیہ کے نظام سے ڈاکٹر صاحب نہ ہی خائف ہیں اور نہ ہی اس میں اصلاحات کا ارادہ ظاہر کرتے ہیں ۔ ڈاکٹر صاحب ملک کی دونوں بڑی سیاسی جماعتوں سے خائف ہیں جن کے ذریعے پاک عوام ایک طویل عرصہ سے اپنی مشکلات کا حل تلاش کررہے ہیں ۔ نظام یا قوانین کی تبدیلی کے لیے لازمی طور پر ایوان بالا سے رجوع کرنا پڑے گا جہاں دونوں جماعتیں سب سے زیادہ اکثریت کی مالک ہیں اور قوانین کا کوئی بھی بل ان جماعتوں کی منظوری کے بناء کامیاب ہونا مشکل ہی نہیں ناممکن بھی ہے ۔ ایوان بالا میں بھی بل پیش کرنے کے لیے ڈاکٹر طاہر القادری کی موجودگی ضروری ہوگی ۔ ۔اس کے ساتھ ساتھ ڈاکٹر صاحب نے مطالبات کی منظوری کے لیے انتہائی مختصر وقت مقرر کیا ہے ۔ جس میں تبدیلی کی کوئی امید نہیں کی جاسکتی ۔ ڈاکٹر صاحب کے مطالبات کی سب سے زیادہ حمایت اب تک ایم کیو ایم اور تحریک انصاف کی جانب سے سامنے آئی ہے ۔ ایم کیو ایم پہلے ہی الیکشن کمیشن کی جانب سے کراچی میں نئی حلقہ بندیوں کے اعلان سے خائف ہے اور انتخابی اصلاحات کے اس عمل کو اپنے خلاف ساز ش قرار دے چکی ہے ۔ڈاکٹر طاہر القادری ایک طویل عرصہ کے بعد ملکی سیاست میں سرگرم ہوئے ہیں ۔ وہ روضہ رسول صلی اللہ علیہ و آلہ وسلم پر خشوع و خضوع سے یہ دعا بھی مانگ چکے ہیں کہ ان کی زندگی رسول اکرم ؐ کی زندگی سے کم ہو ۔ ان کا حلقہ مریداں اس بات پر بھی متفق ہے کہ ڈاکٹر صاحب کی دعاؤں میں قبولیت کا اثرہے ۔ اس ذمرے میں ڈاکٹر صاحب کے پاس تو وقت کی کمی ہوگی شائد کیونکہ وہ زندگی کی چھ دھائیاں دیکھ چکے ہیں ۔ مسلم لیگ ن نے ڈاکٹر صاحب کو برہ راست تنقید کا نشانہ بنایا ہے اور کہا ہے کہ ڈاکٹر صاحب عمران خان کے بعد اسٹیبلشمنٹ کا دوسرا مہرہ ہیں جن کا مقصد انتخابات کو ملتوی کرانا ہے ۔ فوج اور عدلیہ کو نگران حکومت میں شامل کرنے کی طاہر القادری صاحب کی تجویزکو مسلم لیگ ن دلیل کے طور پر پیش کررہی ہے ۔ ڈاکٹر طاہر القادری نے مینار پاکستان جلسے کے بعد مختلف انٹرویوز میں قومی و بین الاقوامی ایشوز پراپنے موقف سے پاک قوم کو آگاہ کیا ۔ جن میں سے ایک اہم ترین مسئلہ فلسطین ہے کیونکہ مختلف حلقے ان کی آمد کو کسی خاص بیرونی ایجنڈے کی تکمیل کا حصہ قرار دے رہے تھے ۔ ڈاکٹر صاحب کا مسئلہ فلسطین پر موقف کو عوامی حلقوں میں زیادہ پذیرائی حاصل نہیں ہوئی ۔ جس میں انھوں نے کہا کہ فلسطینی عوام کو ان کی سرزمین پر حقوق دیئے جائیں اور پھر اسرائیل کو تسلیم کیا جائے ۔ ڈاکٹر طاہر القادری صاحب کے اس موقف سے محسوس ہوتا ہے کہ وہ اسرائیل کو بطور ریاست تسلیم کرتے ہیں البتہ فلسطینی عوام پر ظلم و جبر و ستم کے خلاف ہیں ۔ اس کے ساتھ ساتھ ڈرون حملوں ، نیٹو سپلائی ، افغانستان سمیت اسلامی دنیا میں امریکی افواج کی موجودگی پر بھی ان کا موقف زیادہ عوامی نظر نہیں آتا۔ڈاکٹر طاہر القادری صاحب کے اعلان کردہ 14جنوری لانگ مارچ کے دن جتنے قریب آتے جارہے ہیں ۔سیاسی حلقوں میں ہلچل اتنی ہی شدید ہوتی جارہی ہے ۔مختلف سیاسی جماعتوں کے پس پردہ نمائندے ڈاکٹر صاحب سے مسلسل رابطہ میں ہیں۔ وزیر داخلہ رحمان ملک نے طالبان کی جانب سے حملوں کی دھمکی سے شیخ الاسلام کو مطلع کرکے لانگ مارچ ملتوی کرانے کی اپنی سی کوشش کی ہے ۔یہ بھی دلچسپ امر ہے کہ جب کسی سانحہ کی ذمہ داری قبول کرنی ہوتی ہے تو طالبان کی جانب سے اعلان میڈیا کا ایک بااثر گروپ کرتا ہے ۔ لیکن جب طالبان کی جانب سے دھمکی کی تشہیر ضرورت ہوتی ہے تو وزیرداخلہ صاحب پیش پیش ہوتے ہیں ۔ پنجاب حکومت نے اپنی جانب سے فول پروف سیکورٹی فراہم کرنے کی غیر اعلانیہ یقین دھانی کرائی ہے لیکن اس شرط پر کہ راولپنڈی کا فیض آباد پل کراس کرنے تک مظاہر ین مکمل پر امن رہیں گے ۔تجزیہ نگار یہ سمجھتے ہیں کہ لانگ مارچ اسلام آباد میں داخل ہونے کے بعد کچھ توڑپھوڑ کی جانب مائل ہوگا ۔ جس کا الزام شرپسندوں پر عائد کیا جائے گا ۔ مسلم لیگ ن بھی یہی چاہتی ہے کہ اس لانگ مارچ کا سارا بوجھ وفاقی حکومت پر پڑے ۔عوام یہ سوچ رہے ہیں کہ اس لانگ مارچ کی کامیابی یا ناکامی کی صورت میں اس کا کتنا فائدہ کتنا نقصان ہوگا؟۔ صدر پاکستان اور وفاقی وزراء سے مذاکرات میں کیا ڈاکٹر صاحب حکومت سے نگران سیٹ اپ میں عہدوں اور کردار کا مطالبہ کریں گے یا پھر یہ کہ حکومتی مشینری کا فلاں فلاں پرزہ بہت کرپٹ ہے اسے نکالیں اور فلاں کو لگالیں ۔ انقلاب کے حقیقی جیالے عشاق رسول ؐ تو ڈاکٹر طاہر القادری سے ایک شکوہ یہ بھی رکھتے ہیں کہ ایسے لانگ مارچ غزہ ، عراق، افغانستان، ڈرون ، برما ،سلالہ، ایبٹ آباد اور سب سے بڑھ کر جب نبی پاک کی شان میں گستاخٰ کا ارتکاب کیا گیا جیسے سانحات کے بعد کیوں نہیں اعلان کئے ۔ کیا انقلاب ایسے مذاکرات کے مرہون منت ہوتے ہیں جن میں بہت کچھ ملنے کی امید ہو اور خالی ہاتھ رہنے کا خدشہ بھی 
E-mail: This email address is being protected from spambots. You need JavaScript enabled to view it.