وحدت نیوز(ملتان) مجلس وحدت مسلمین ملتان کے سیکرٹری جنرل سید ندیم عباس کاظمی نے کہا ہے کہ وفاقی اور بلوچستان حکومت چہلم امام حسین علیہ السلام کے موقع پر زائرین کے لیے خصوصی انتظامات کرے، کوئٹہ میں زائرین کو درپیش مشکلات اور وفاقی حکومت کی جانب سے زائرین کو تنگ کیے جانے کا سلسلہ بند ہونا چاہیے۔ ان خیالات کااظہار اُنہوں نے ملتان میں زائرین ایسوسی ایشن کے وفد سے ملاقات کے دوران گفتگو کرتے ہوئے کیا۔ اس موقع پر شعبہ زائرین کے سیکرٹری جنرل سید دلاور عباس زیدی بھی موجود تھے۔زائرین ایسوسی ایشن کے وفد میں ملتان،بہاولپور،لودھراں،جلالپور اور خانیوال کے قافلہ سالار شامل تھے۔
سید ندیم عباس کاظمی نے وفاقی حکومت سے مطالبہ کیا کہ سیکیورٹی کے نام پر زائرین سے بھاری رقم بٹورنے کا سلسلہ بند نہ کیا گیا تو احتجاج کریں گے۔ ہر سال محرم الحرام اور صفر میں لاکھوں زائرین پاکستان سے کربلا معلی جاتے ہیں لیکن حکومت کی جانب سے کسی قسم کی سہولیات کا انتظام نہیں کیا جاتا، وفاقی حکومت سے مطالبہ کرتے ہیں نجف، بغداد، مشہد اور تہران کے لیے پی آئی اے کی فوری پروازیں شروع کی جائیں ۔ اُنہوں نے مزید کہا کہ تفتان بارڈر پر زائرین کے ساتھ ہتک آمیز سلوک کیا جاتا ہے سیکیورٹی ادارے اور حکومت ہوش کے ناخن لے ، ہم پاکستان کے حقیقی فرزند ہیں ۔ اُنہوں نے بلوچستان حکومت سے مطالبہ کیا کہ مجلس وحدت مسلمین پاکستان کے سربراہ مجاہد ملت علامہ راجہ ناصر عباس جعفری کے ساتھ کیے جانے والے وعدے پورے کیے جائیں اور زائرین کے مسائل کو فی الفور حل کیا جائے۔ واضح رہے کہ عاشور اور چہلم پردنیا بھر کی طرح لاکھوں پاکستانی زائرین کربلا میں امام حسین علیہ السلام کے روضے پر حاضری دیتے ہیں اور اپنی عقیدت کااظہار کرتے ہیں۔
وحدت نیوز(کوئٹہ ) مجلس وحدت مسلمین کے میڈیا سیل سے جاری شدہ بیان میں ڈویژنل سیکریٹری روابط اور کونسلر حلقہ بارہ کربلائی رجب علی نے معاشرے میں اتحاد اور رواداری کو ملکی ترقی کی بنیاد قرار دیتے ہوئے کہا ہے کہ اگر ہم اپنے پیارے وطن کو ترقی کرتا دیکھنا چاہتے ہیںتو معاشرے کے ہر فرد کو روا داری، برداشت اور اتحاد و اتفاق کا مظاہرہ کرنا ہوگا کیونکہ یہی وہ عناصر ہے جن کی وجہ سے معاشرے کے افراد ایک دوسرے کا ساتھ دیتے ہیں اور نفرتیں ختم ہوتی ہیں۔
انہوں نے کہا کہ موجودہ دور میں ہمارے خوشیوں اور غموں کے پیمانے اور معیارات بدل گئے ہیں اور لوگ یہ بھول بیٹھے ہیں کہ اصل کامیابی اور خوشحالی تو نفرتیں مٹانے سے آسکتی ہے۔انکا کہنا تھا کہ حادثات، سانحات ، مصائب و آفات کی کثرت اور اسکی اذیت سے بچنے اور خود کو بچانے کا سب سے آسان راستہ ہم نے ڈھونڈ لیا ہے اور وہ یہ کہ بڑے سے بڑے حادثے اور سانحے کے اثرات کو اپنے اندر اترنے نہ دے مگر یہ طریقہ ہمیں صرف اور صرف بے حسی کی طرف ڈھکیل رہا ہے ۔ انفرادی تقویت اور محض اپنی ذات کے بارے میں سوچنے کی وجہ سے ہم ایک دوسرے سے دور ہورہے ہیں جبکہ ہمیں معاشرے کے تمام افراد کو ساتھ ساتھ لئے چالنا چاہئے کیونکہ یہی وہ طریقہ سے جس سے ہم اپنے منزل تک پہنچ سکتے ہیں۔انہوں نے کہا کہ معاشرے کے تمام افراد کو اپنا نقطہ نظر تعمیری اور مثبت بنانا ہوگا۔ جب تمام افراد کے درمیان اتحاد اور اتفاق پیدا ہوگی تو سب ایک دوسرے کیلئے کام کرنا شروع کر دیں گے اور رشوت ستانی،بے ایمانی اور بدعنوانی کا خاتمہ ہوگا۔ بیان میں انہوں نے کہا کہ ہمیں مشکل حالات میں بھی مایوسی ، افسردگی ، حزن و ملال کا رویہ اپنانے کے بجائے مثبت اور تعمیری رویہ اپنانا چاہئے۔ بیان کے آخر میں کراچی میں ٹرینوں کے تصادم پر افسوس کا اظہار کیا گیا اور کہا گیا کہ وزارت ریلوے کو ریلوے کا نظام بہتر بنانے کی ضرورت ہیں۔
وحدت نیوز (گھڑی خیرو) مجلس وحدت مسلمین پاکستان سندھ کے سیکریٹری جنرل علامہ مقصود علی ڈومکی نے پیغام کربلا مہم کے سلسلے میں گڑہی خیرو مرکزی امام بارگاہ میں اجتماع سے خطاب کیا اور پریس کانفرنس کی۔ اس موقع پر انہوں نے کہا ہے کہ حکمرانوں کی کرپشن نے ملکی جڑوں کو کھوکھلا کرکے رکھ دیا ہے۔ کرپشن میں ملوث وزیراعظم ملک چلانے کا اہل نہیں اسے استعفا دینا چاہئے، ملک سے کرپشن اور دھشت گردی کا خاتمہ از بس ضروری ہے۔
انہوں نے کہا کہ نواز حکومت ، ملت جعفریہ کے خلاف دھشت گردی کا سلسلہ روکے، کراچی میں مجلس عزا پر حملہ دھشت گردی کی بدترین قسم ہے۔ فوجی عدالتوں کے باوجود ملک بھر میںدھشت گرد آزاد دندناتے پھر رہے ہیں ، آخر انہیں پھانسی کیوں نہیں دی جاتی۔جن لوگوں نے ملک میں دھشت گردی اور تکفیری سوچ کو فروغ دیا ان کے ساتھ حکمران اور ریاستی ادارے آج بھی انتہائی مہربان ہیں۔ انہوں نے مطالبہ کیا کہ حکومت زائرین کے ساتھ تعاون کرے، ان زائرین کی سیکورٹی کے لئے فول پروف انتظامات کئے جائیں۔ تفتان بارڈر پر زائرین کو کئی دن روکا جارہا ہے جبکہ وہاں سہولیات کا بھی فقدان ہے۔
انہوں نے کہا کہ بلوچستان اور سندہ حکومت صوبے میں موجود دھشت گردی کے مراکز اور ٹریننگ کیمپس کے خلاف آپریشن کلین اپ کا آغاز کریں۔وزیر اعلیٰ نواب ثناء اللہ زہری سانحہ چھلگری متاثرین کو انصاف کی فراہمی یقینی بنائیں۔ ایک سال ہوگیا مگر سانحہ میں ملوث مجرم بے نقاب نہ ہوئے یہ بات المیے سے کم نہیں۔
وحدت نیوز (گلگت) یوم حسین ؑ کے انعقاد پر پابندی بلاجواز اور ناجائز ہے حکومت سوچے سمجھے منصوبے کے تحت ملت تشیع کے جذبات کو ہوا دے کر خطے کے پرامن ماحول کو خراب کرنا چاہتی ہے۔یوم حسین ؑ کے انعقاد پر طلباء کے خلاف ایف آئی آر اور گرفتاریوں کی مذمت کرتے ہیں۔
مجلس وحدت مسلمین کے گلگت بلتستان کے رہنما ڈاکٹر علی گوہر نے کہا ہے کہ تعلیمی اداروں میں ہمیشہ سے یوم حسین ؑ کا انعقاد ہوتا رہا ہے جس کا مقصد نوجوان نسل کو اسلامی اقدار و تاریخ سے روشناس کرانا ہے۔تعلیمی اداروں میں یہ واحد پروگرام ہے جس میں تمام مکاتب فکر کے علماء و دانشوروں کو دعوت دی جاتی ہے جو نہ صرف باہمی اتحاد و بھائی چارے کی فضا ہموار کرنے میں معاون ثابت ہوتا ہے بلکہ ایسے اجتماعات کے ذریعے اسلام حقیقی کا صحیح معنوں میں پرچار ہوتا ہے۔مملکت خداداد پاکستان کے قیام کی بنیادی اساس بھی ایک اسلامی فلاحی ریاست کا قیام تھا جس میں تمام مذاہب کو اپنے عقیدے کے مطابق زندگی بسر کرنے کی ضمانت دی گئی تھی ،سرزمین گلگت بلتستان میں صوبائی حکومت کی جانب سے یوم حسین ؑ کے انعقاد پر پابندی عائد کرنے کا مطلب نظریہ پاکستان سے انحراف کے مترادف ہے۔
انہوں نے کہا کہ حکومت غیر قانونی ہتھکنڈوں کے ذریعے خطے کے امن کو تہ وبالا کرنے پر تلی ہوئی ہے اور اس حساس خطے کے امن کو خراب کرکے لیگی حکمران مودی سرکار کی آشیر باد لینا چاہتے ہیں۔صوبائی حکومت اپنی ناکامیوں اور نااہلی کو چھپانے کی غرض سے ایسے مسائل کھڑی کررہی ہے تاکہ عوام کی توجہ اصل مسائل سے ہٹ جائے ۔سی پیک،غیرقانونی ٹیکسز کا اطلاق،زمینوں پر ناجائز قبضہ اور دیگر مسائل سے عومی توجہ ہٹانے کی حکومتی کوشش ناکام بنادینگے ۔
انہوں نے کہا کہ مجلس وحدت مسلمین عوامی حقوق کی جدوجہد میں کسی جماعت سے پیچھے نہیں رہے گی جہاں کہیں پر بھی عوامی حقوق غصب ہونگے مجلس وحدت ہراول دستے کا کردار ادا کرے گی۔ انہوں نے تمام مکاتب فکر کے عوام سے گزارش کی کہ وہ یوم حسین کے پروگرام میں بھرپور شرکت کرکے حکومت کی لڑائو اور حکومت کرو کی پالیسی کو ہمیشہ ہمیشہ کیلئے دفن کریں ۔حکومت جان لے کہ ہم اپنے جائز حقوق سے ہرگز دستبردار ہونے والے نہیں ،ہمیں زیادہ مجبور کیا گیا تو سخت سے سخت احتجاج کیا جائیگا جسے کنٹرول کرنا حکومت کے بس میں نہیں ہوگا۔
وحدت نیوز(اسلام آباد) عزاداری سید الشہداءؑ پریزیدیوں کے حملے اور موجودہ صورتحال پر مجلس وحدت مسلمین پاکستان کے سربراہ علامہ راجہ ناصر عباس جعفری نے عزاداروں کے نام خصوصی پیغام میں کہا ہے کہ امام حسین علیہ السلام نے فرمایا کہ مجھ جیسا (یعنی ہر حسینی ) یزید جیسے کی بیعت (کی ذلت اور رسوائی کو قبول ) نہیں کر سکتا. شهید قائد علامہ عارف حسین الحسینی رہ کا ارشاد ہے کہ عزاداری سید الشہداء ہماری شہ رگ حیات ہے . میرا سلام ہو سید الشہداء کے عزداروں پر جو پاکستان میں تمام تر خطرات کے باوجود ہر آنے والے سال اور مہینوں میں امام مظلومؑ کی عزاداری کو پہلے سے بهی زیادہ پرشکوہ انداز میں بر پا کرتے ہیں جس کی مثال اس سال لوگوں کی مجالس اور ماتمی جلوسوں میں بهر پور شرکت ہے اور یہ حقیقت میں ان تکفیری اور یزیدی قوتوں کی شکست بهی ہے جو اپنی تمام تر سازشوں، قتل و غارت گری اور اپنے ملکی اور غیر ملکی آقاؤں کی سرپرستی کے باوجود مظلوم کربلا کی عزاداری کا راستہ نہیں روک سکے، سنی شیعہ مسلمانوں بلکہ غیر مسلموں کی روز بروز بڑهتی هوئی شرکت ،یہ سب اس بات پر گواہ ہیں اور ان شاءالله یہ مولا امام حسین علیہ السلام کے عاشقوں اور عزاداروں کا قافلہ تمام رکاوٹوں کو خاطر میں نہ لاتے بوئے آگے بڑهتا ہی رہے گا ،موجودہ حالات کو مد نظر رکهتے ہوئے جہاں عزاداری سید الشہداء کے لئے امام بارگاہ،خطیب و ذاکر اور نوحہ خواں کا اہتمام کیا جاتا ہے وہیں عزاداروں کی جان کی حفاظت کے لئے بندوبست کرنا بهی واجب ہے .میری تمام مومنین ،جوانوں اور سکاؤٹس سے گزارش ہے کہ اپنے اپنے علاقوں میں ہونے والی مجالس کی سیکورٹی میں شریک ہوں اور اس عمل کو ایک ٹاسک کے طور پر لیں کہ ہم نے مجلس عزا پر آئندہ ہونے والے حملوں کو ناکام بنانا ہے .ہمارا دشمن اور اسکے سرپرست انتہائی کمینے اور پست ہیں ،اب وہ خواتین کی مجالس عزا پر حملے کر رہے ہیں یا انہیں شناخت کر کے شهید کر رہے ہیں . ہمیں خواتین ( کنیزان ثانی زهرا سلام الله علیہا) کی مجالس کی سیکورٹی میں اب کسی قسم کی کوتاہی نہیں کرنی انکی جان کی حفاظت ہم پر واجب ہے .مجهے امید ہے کہ ہم سب مل کر دشمنوں کے منحوس عزائم کو خاک میں ملا دینگے ۔
وحدت نیوز (اسلام آباد) لانڈھی اسٹیشن کراچی کے قریب فرید اور زکریا ایکسپریس میں تصادم کے نتیجے میں دو درجن کے قریب مسافروں کی ہلاکت اورسو سے زائد مسافروں کے زخمی ہونے پر مجلس وحدت مسلمین پاکستان کے سربراہ علامہ راجہ ناصرعباس جعفری نے مرکزی سیکریٹریٹ سے جاری اپنے تعزیتی بیان میں کہا کہ ٹرین حادثے میں قیمتی انسانی جانوں کا ضیاع ناقابل تلافی نقصان ہے،سانحے کے ذمہ داروں کا تعین کرکے قرار واقعی سزادی جائے، صوبائی حکومت ہلاک شدگان کے ورثاءکی مکمل امداد اور زخمیوں کے بہترین علاج معالجے کیلئے فوری انتظامات کرے، سانحے پر وفاقی وزیر ریلوے خواجہ سعد رفیق کا بیان انتہائی افسوس ناک ہے، مہذب معاشروں میں وزراءادارتی کوتاہیوں اور نااہلیوں پر مستعفیٰ ہوجایا کرتے ہیں اور ہمارے ملک میں ڈھٹائی کے مظاہرے ملاحظہ کیئے جاتے ہیں ، انہوں نے ہلاک شدگان کے لئے مغفرت ،پسماندگان کے لئے صبر جمیل اور زخمیوں کی جلد مکمل صحت یابی کے لئے دعا کی ہے۔
