The Latest
وحدت نیوز(لاہور) صوبائی صدر مجلس وحدت مسلمین پنجاب علامہ علی اکبر کاظمی نے اپنے بیان میں کہا کہ سانحہ چلاس جیسے واقعات کو نہ روکا گیا تو ایسے حادثات تکرار ہوسکتے ہیں ۔ اگر حکومت مخلص ہے تو پاکستان سے دہشت گردوں کا صفایا کرے ۔ پاکستان کو دہشت گردوں کی آماجگاہ نہ بننے دے ۔ ہمارے اداروں میں اتنی ہمت ہے کہ وہ اس ناسور کو کنٹرول کرسکتے ہیں ۔
اس میں صرف ہمت اور حوصلہ چاہیئے ۔ صرف بیان بازی اور تسلیوں سے کام نہیں چلے گا ۔ پوری قوت کے ساتھ وطن عزیزکے دشمنوں سے نمٹنا ہو گا ۔ قوم اپنے اداروں سے ساتھ کھڑی ہے ۔ ذمہ داروں کو چاہیئے کہ وہ قوم کو اعتماد میں لیکر دہشت گردوں اور ان کے سہولت کاروں کےخلاف ٹارگٹڈ آپریشن کریں ۔
وحدت نیوز(کوئٹہ)مجلس وحدت مسلمین بلوچستان کے صوبائی صدر علامہ سید ظفر عباس شمسی نے کہا ہے کہ ایم ڈبلیو ایم بلوچستان کے اراکین اپنے اپنے علاقوں میں کام کر رہے ہیں۔ آئندہ انتخابات میں بھرپور حصہ لیں گے۔
صوبائی میڈیا کونسل مجلس وحدت مسلمین بلوچستان کے جاری کردہ بیان کے مطابق علامہ سید ظفر عباس شمسی نے کہا کہ مجلس وحدت المسلمین الیکشن میں بھر پور حصہ لے گی۔ مجلس وحدت مسلمین بلوچستان کے امید وار ایم ڈبلیو ایم کے ٹکٹ پر الیکشن لڑیں گے۔ مجلس وحدت مسلمین ایک سیاسی و جمہوری پارٹی بھی ہے۔ اس لیے جہاں دوسری پارٹیاں الیکشن میں حصہ لیں گی، وہاں مجلس وحدت مسلمین بلوچستان بھی حصہ لے گی۔ مجلس وحدت مسلمین بلوچستان کے اراکین اپنے اپنے علاقوں میں ورک کر رہے ہیں۔
انشاء اللہ الیکشن میں مجلس وحدت مسلمین بلوچستان کے اراکین کی کوششوں سے مجلس وحدت مسلمین بلوچستان کے امیدوار کامیاب ہوں گے اور مملکت خداداد پاکستان خصوصاً بلوچستان میں خدمت سر انجام دیں گے۔
وحدت نیوز(اٹک )مجلسِ وحدت مسلمین شعبہ خواتین ضلع اٹک کی جانب سے مرکزی امام بارگاہ حسینیہ کامل پور سیداں میں ایام فاطمیہ سلام اللہ علیہا کے سلسلے میں مجالس خمسہ کا اہتمام کیا گیا جس میں محترمہ فائزہ نقوی نے خطاب کیا۔
انہوں نے کہا کہ مالک کائنات نے تخلیق کائنات کے لیے جن ہستیوں کو منتخب کیا ان میں مرکزی حیثیت بی بی کونین کی ہے۔انہوں نے اپنی اٹھارہ سالہ زندگی میں خواتین کے لیے ایسا نمونہ چھوڑا کہ خاتون چاہے بیٹی ہو بیوی ہو یا ماں کس طرح اسے اپنی زندگی بسر کرنی چاہیے اور اپنے حجت وقت کے دفاع کے لیے کردار ادا کرنا چاہیے۔
ان مجالس سے محترمہ پھول نسیم صاحبہ اور محترمہ کنیز فاطمہ نے بھی خصوصی خطاب کیا جس میں انہوں نے ایام فاطمیہ سلام اللہ علیہا کو اہل سنت کی تاریخ کی روشنی میں ثابت کیا۔
وحدت نیوز(راولپنڈی)صوبائی صدر مجلس وحدت مسلمین پاکستان صوبہ پنجاب کی زیر صدارت ضلع راولپنڈی کے شعبہ فلاح وبہبود کی میٹنگ ضلعی آفس مجلس وحدت مسلمین ضلع راولپنڈی میں منعقد ہوئی ۔ ضلعی سیکریٹری فلاح وبہبود جناب محمد کاظم بلتی نے شعبہ فلاح وبہبود کی کارکردگی پر صوبائی صدر کو بریفنگ دی ۔
اس میٹنگ میں ضلعی صدر ضلع راولپنڈی جناب سید اعوان علی شاہ شیرازی ، نائب صدر جناب ناصر عباس ودیگران موجود تھے ۔ میٹنگ میں شعبہ فلاح وبہبود کی کارکردگی پر غور و فکر کیا گیا اور آئندہ کے لئے شعبے کے لئے مزید بہتری لانے کے لئے تجاویز دی گئیں۔
صوبائی صدر نے شعبہ فلاح وبہبود کی کارکردگی کو سراہا اور کہا کہ اس شعبے میں بہتری کی گنجائش موجود ہے ۔ اس شعبے کو مزید فعال کیا جائے اور ضلعی شعبہ فلاح وبہبود ضلع راولپنڈی کے سیکرٹری جناب محمد کاظم بلتی صاحب ، صوبائی سیکرٹری فلاح وبہبود جناب شیخ عمران علی صاحب سے بھی ہم آہنگ رہے ۔
وحدت نیوز(کوئٹہ) مجلس وحدت مسلمین پاکستان بلوچستان کے جاری کردہ بیان کے مطابق صوبائی ایگزیکٹیو کونسل کا اہم اجلاس صوبائی دفتر کوئٹہ میں منعقد ہوا۔ جس میں صوبائی صدر ایم ڈبلیو ایم علامہ سید ظفر عباس شمسی، صوبائی جنرل سیکریٹری علامہ سہیل اکبر شیرازی، صوبائی نائب صدر علامہ شیخ ولایت حسین جعفری، مجلس علمائے مکتب اہل بیت بلوچستان کے رہنماء علامہ موسیٰ حسینی، علامہ مبشر حسین، شعبہ عزاداری کے صوبائی صدر محمد رضا، سید وحید شاہ اور یوتھ ونگ کے ڈویژنل مسؤل محمد طفیل شریک ہوئے۔ اجلاس میں مرکزی سیکرٹری سیاسیات سید اسد عباس نقوی مرکزی، صدر عزاداری ونگ ملک اقرار حسین اور مرکزی سیکرٹری تنظیم سازی علامہ مقصود علی ڈومکی نے خصوصی طور پر شرکت کی۔ اجلاس میں گفتگو کرتے ہوئے ملک اقرار حسین علوی نے کہا کہ ایگزیکٹو کونسل مرکزی شوریٰ کے فیصلے کی روشنی میں قائم کی گئی ہے۔
جس کا ہدف مدر سیٹ اپ اور شعبہ جات کے درمیان ہم آہنگی کا فروغ ہے۔ اجلاس میں اتفاق رائے سے علامہ سہیل اکبر شیرازی کو ایگزیکٹو کونسل کا صوبائی کوآرڈینیٹر منتخب کیا گیا۔ اجلاس سے خطاب کرتے ہوئے سید اسد عباس نقوی نے کہا کہ ہم ہر مظلوم کے حامی اور ظالم کے دشمن ہیں۔ ہم فلسطینی مظلوموں کی حمایت کو اپنی شرعی اور اسلامی ذمہ داری سمجھتے ہیں۔ علامہ مقصود علی ڈومکی نے کہا کہ بلوچستان کے مومنین نے آزادی فلسطین و مسجد اقصیٰ کی راہ میں اپنے عظیم شہداء کی قربانیاں پیش کی ہیں۔ جنہیں یوم القدس کے دن مظلوم فلسطینیوں کی حمایت کے جرم میں دھشت گردی کا نشانہ بنایا گیا۔ کوئٹہ میں آزادی فلسطین مارچ تاریخی پروگرام ہوگا۔ اجلاس نے فیصلہ کیا کہ 24 دسمبر بروز اتوار کوئٹہ میں آزادی فلسطین مارچ ہوگا۔ جس میں مظلوم فلسطینیوں سے اظہار یکجہتی کیا جائے گا۔ اجلاس میں مدر سیٹ اپ اور شعبہ جات کے درمیان ہم آہنگی پر اطمینان کا اظہار کرتے ہوئے اسے مزید بہتر بنانے پر زور دیا گیا۔
وحدت نیوز(لاہور) صوبائی دارالحکومت لاہور میں علما و مشائخ کے ایک وفد سے گفتگو کرتے ہوئے صوبائی صدر مجلس وحدت مسلمین پنجاب علامہ سید علی اکبر کاظمی نے کہا ہے کہ فلسطین کے مظلومین کیخلاف برطانیہ بھی اسرائیل کی مدد کو آن پہنچا ہے، مسلمان حکمران لحاف میں سر دبائے مظلوم فلسطینیوں کے قتل عام کا تماشا دیکھ رہے ہیں۔ انہوں نے کہا کہ اسرائیل نے دوبارہ جنگ کا آغاز کرکے اقوام عالم پر واضح کر دیا ہے کہ وہ فلسطینیوں کی نسل کشی مکمل ہونے تک باز نہیں آئے گا۔
علامہ سید علی اکبر کاظمی کا مزید کہنا تھا کہ مسلمان ممالک کو یاد رکھنا چاہیے اسرائیل کینسر کی طرح پھیلنے کی کوشش کر رہا ہے اور وہ تمام ممالک اِس کی لپیٹ میں آ جائیں گے جو آج فلسطینیوں کی مدد سے اِس لئے گریزاں ہیں کہ امریکہ ناراض ہوجائے گا۔ انہوں نے کہا کہ اسرائیل کے ناپاک قدم نہ روکے گئے تک کوئی بھی اِس ناسور سے محفوظ نہیں رہے گا۔
وحدت نیوز(ملتان)مجلس وحدت مسلمین عزاداری ونگ جنوبی پنجاب کے صوبائی صدر و ممبر ڈویژنل امن کمیٹی انجینئر سخاوت علی سیال نے کہا ہے کہ پاکستان کی سلامتی کے دشمن اور ان کے کٹھ پتلی تکفیری دہشت گرد وطن عزیز میں شرپسندی کا کوئی موقع ہاتھ سے جانے نہیں دیتے، پاکستانی قوم نے دہشت گردی کے خاتمے کی بھاری قیمت چکائی ہے اب ہم کسی مزید آزمائش کے متحمل نہیں ہیں۔
انہوں نے کہا کہ ملک میں دہشت گردی کا خاتمہ تکفیری عناصر کی بیخ کنی سے مشروط ہے، دہشت گرد اور ان کے فکری، جانی و مالی سہولت کار ان کے پشت پناہ ملک کی سلامتی کے دشمن اور قوم کے غدار ہیں ان کے ساتھ کسی بھی قسم کی لچک مادر وطن کے ساتھ بدترین خیانت ہوگی، سیاسی قوتوں اور طاقتور اداروں کو دہشت گردوں کی سرکوبی کے لیے ایک پیج پر رہتے ہوئے نتیجہ خیز اقدامات کرنا ہوں گے، چلاس کے المناک سانحہ کے شہدا کی بلندی درجات، لواحقین کے صبر اور زخمیوں کی جلد صحتیابی کے لیے دعاگو ہوں۔
وحدت نیوز(ملتان)وحدت یوتھ کونسل ملتان ڈویژن کا دوسرا دستوری اجلاس آج جامعہ شہید مطہری ملتان میں منعقد ہوگا، اجلاس میں تنظیمی صورتحال، حلف برداری اور آزادی فلسطین مارچ خصوصی ایجنڈے کے طور پر شامل ہے، اجلاس کی صدارت ڈویژنل صدر دلشیر علی کریں گے جبکہ مرکزی جنرل سیکرٹری وحدت یوتھ سید سجاد نقوی خصوصی شرکت کریں گے۔ اجلاس میں مجلس علمائے مکتب اہلیبیت جنوبی پنجاب کے صدر و پرنسپل جامعہ شہید مطہری ملتان علامہ قاضی نادر حسین علوی، مجلس وحدت مسلمین عزاداری ونگ جنوبی پنجاب کے صوبائی نائب صدر مرزا وجاہت علی خصوصی گفتگو کریں گے۔
وحدت نیوز(گلگت)ایم ڈبلیو ایم گلگت بلتستان کے ترجمان غلام عباس نے کہا ہے کہ صوبائی وزیر داخلہ کی مایوس کن پریس کانفرنس شہداء کے لہو پر نمک پاشی ہے۔ ہر دہشتگردی کو انڈین ٹیگ لگا کر فائل بند کر کے دہشت گردوں کو تحفظ دینے کی حکومتی روایت ناقابل برداشت ہے۔
ایک بیان میں غلام عباس کا کہنا تھا کہ قاتلوں کی تلاش ریاست کی زمہ داری ہے۔ دیامر عوام کا ریسکیو اور خون کے عطیات دینا قابل تحسین ہے۔ دہشت گردی کیلئے دیامر کی سرزمین کا انتخاب کر کے دیامر کو بدنام کرنے کی سازش کی گئی ہے۔ تمام شہداء کی بلندی درجات اور زخمیوں کی صحت یابی کی دعا اور سوگوار خاندانوں سے اظہار تعزیت و تسلیت عرض کرتے ہیں۔
وحدت نیوز(کوہاٹ )چیئرمین مجلس وحدت مسلمین پاکستان علامہ راجہ ناصر عباس جعفری نے کوہاٹ میں آزادی فلسطین مارچ کے شرکاء سے خطاب کرتے ہوئے کہاکہ بانی پاکستان نے اسرائیل کو ناجائز ریاست کہا تھا ہم اس غاصب صہیونی ریاست کو کبھی تسلیم نہیں کریں گے، ہمارے ملک میں اسرائیل کو تسلیم کرنے کی بات کرنے والے بد بخت حکمران امریکہ کے نمکخوار ہیں لیکن پاکستان کی شجاع عوام ہر حال میں اپنے مظلوم فلسطینیوں بھائیوں کے ساتھ کھڑے ہیں، ظالموں کے خلاف صدائے احتجاج بلند کرنا خدا کا محبوب ترین فعل و عمل ہے۔
یہ بات واضح ہو چکی ہے کہ اسرائیل کا کوئی مستقبل نہیں ہے مستقبل فلسطینیوں کا ہے، ہر گزرتے دن کے ساتھ اسرائیل اپنے منطقی انجام کی طرف تیزی سے بڑھ رہا ہے، مقاومت اور مزاحمت کا بیانیہ جیت رہا ہے، اسرائیل اور اس کے سرپرست رائے عامہ کی جنگ ہار چکے ہیں۔ اسی طرح آنے والے الیکشنز میں ہم پاکستان میں بھی مودی اور امریکہ کے پٹھوؤں کو شکست دیں گے، ملک میں جن جماعتوں کو امریکی و اسرائیلی پشت پناہی حاصل ہے انہیں عوام کی بھرپور حمایت سے شکست دیں گے۔
