وحدت نیوز(اسلام آباد)مجلس وحدت مسلمین ضلع اسلام آباد کی جانب سے بعد از نماز جمعہ مرکزی امام بارگاہ اثناء عشری جی سکس- ٹو اسلام آباد کے سامنے احسن باکسر کی طرف سے امام مھدی عجل اللہ تعالیٰ فرجہ الشریف کی شان میں کی گئی گستاخی کے خلاف احتجاجی مظاہرہ کیا گیا، جس میں تمام شعبہ ہائے زندگی سے تعلق رکھنے والے افراد کی کثیر تعداد نے شرکت کی، مظاہرے سے مجلس وحدت مسلمین ضلع اسلام آباد  کے صدر اسد اللہ چیمہ اور امام جمعہ و جماعت علامہ اختر عباس نے خطاب کیا۔

مظاہرین سے خطاب کرتے ہوئے علامہ اختر عباس نے کہا کہ کسی بھی مذہب و مسلک کے مقدسات کی توہین کرنا جائز نہیں ہے اور اسلام بھی اس بات کی ہرگز اجازت نہیں دیتا، یہ ملک کی مجموعی ہم آہنگی اور پرامن فضاء کو نقصان پہنچانے کی مذموم کوشش ہے، یہ اسلامی تعلیمات کے سریحا خلاف ہے، جب ہم اسلامی مقدسات اور برگزیدہ ہستیوں کی اہانت برداشت نہیں کرتے، تو پھر خود کس طرح شعائر اللہ اور رسول اکرم صلی اللہ علیہ وآلہ وسلم کی اولاد کی توہین کرتے ہیں، امام مہدی علیہ السلام کا مقام ومرتبہ تمام اسلامی مسالک میں مقدس اور قابل احترام ہے،اس قبیح فعل کو کسی صورت برداشت نہیں کیا جائے گا۔

 ایم ڈبلیو ایم ضلع اسلام آباد کے صدر اسداللہ چیمہ نے اپنے خطاب میں کہا کہ توہین امام مھدی علیہ السلام دراصل توہین اسلام، توہین رسول خدا ہے۔ متفق علیہ احادیث کی رو سے رسول اللہ صلی اللہ علیہ وآلہ وسلم کے بارھویں جانشین، امام مھدی علیہ السلام کی گستاخی پر ریاستی اداروں کو سختی سے نوٹس لیتے ہوئے اس فتنہ پرور گستاخ کو جلد از جلد گرفتار کر کے قرار واقعی سزا دینی چاہیے، تاکہ دوبارہ کوئی اس طرح کی گستاخی کا مرتکب نہ ہو، کئی روز گزرنے کے باوجود انتظامیہ کی طرف سے ایف آئی آر درج ہونے کے باوجود اس گستاخ امام مھدی ع کی عدم گرفتاری تشویشناک ہے، لہذا ہم حکومت وقت سے مطالبہ کرتے ہیں کہ وہ اسے قانون کے کٹہرے میں لاکر سائبر کرائم اور توہین اہلبیت علیہم السلام کے قوانین کے مطابق سزا دے۔

وحدت نیوز(کراچی) دعا کمیٹی صوبائی سکریٹریٹ مجلس وحدت مسلمین سندھ کے زیر اہتمام ہفتہ وار مرکزی اجتماعی دعائے توسل و مجلس ترحیم شہدائے اساتذہ پارا چنار ، سانحہ مسجد امام علی رضا ، مسجد حیدری سندھ مدرستہ الاسلام محفل شاہ خراسان روڈ پر منعقد ہوئی جس میں تلاوت دعا مولانا محمد حسین ترابی نے کی تقریب میں سیاسی و مذہبی شخصیات سید موسیٰ عابدی ، خالدملک ، عظیم جاوا ، مولانا مختار علی ، ندیم حسین رضوی ، نقی لاہوتی ، صادق حسین زیدی ، ضامن عباس ، محمد رضا ، ظہیر حسین جارچوی ، ناصر آغا نے شرکت کی ۔

مجلس ترحیم سے علامہ سجاد شبیر رضوی ، ناصر آغا ، ظہیر حسین رضوی ، ناصر الحسینی ، مولانا مختار علی نے خطاب کرتے ہوئے شہداء کو خراج تحسین پیش کیا ،مقررین کا کہنا تھا کہ ملت جعفریہ نے ملکی سلامتی اور دفاع کیلئے 80 ہزار سے زائد جانوں نے قربانیاں دیں جس میں علماء ، وکلاء ، انجینئرز ،  ڈاکٹرز ، پروفیسرز، دانشور ، پاک فوج ، پولیس ، رینجرز کے جوان شامل ہیں ہم تمام شہداء کو خراج تحسین پیش کرتے ہیں ان کی قربانیوں کو یاد رکھنا زندہ قوموں کی پہچان اور فخر ہے۔

 علامہ سجاد شبیر رضوی نے کہا کہ شہداء کے لواحقین سراپا احتجاج ہیں آج بھی مختلف سانحات میں ملوث دہشتگردوں کی عدم گرفتاری حکومت و ریاستی اداروں پر سوالیہ نشان ہے۔ انہوں نے ریاستی اداروں سے مطالبہ کیا کہ تکفیری ٹولہ شوشل میڈیا پر اہلبیت اور امام زمانہ علیہ السلام کی شان میں گستاخیاں کر رہا ہے ان کو فی الفور گرفتار کر کے توہین اہلبیت کے جرم قرار واقعی سزا دی جائے،آخر میں شہدائے پاکستان و ملت جعفریہ اور مرحومین کے ایصال ثواب کیلئے فاتحہ خوانی کی گئی بیمار مریضوں کی  جلد شفایابی اور اسیران ملت جعفریہ کی رہائی کیلئے خصوصی دعا کی گئی۔

وحدت نیوز(کراچی)مجلس وحدت مسلمین پاکستان کراچی ڈویژن عزاداری کونسل کے وفد کی ڈپٹی کمشنر کورنگی ڈاکٹر سید محمد علی زیدی سے ملاقات ، محرم الحرام میں عزاداری سید الشہداء میں پیش آنے والی مشکلات کے حوالے سے بات چیت ، ڈپٹی کمشنر کورنگی نے مکمل یقین دہانی کروائی کے محرم الحرام سے پہلے انشاء اللہ ڈسٹرکٹ کورنگی کے تمام ادارے اپنا کام مکمل کر لینگے ۔

وفد کی سربراہی کراچی ڈویژن کے صدر علامہ صادق جعفری نے کی جب کے ان کے ہمراہ عزاداری کونسل کراچی ڈویژن کے سیکریٹری رضی حیدر رضوی ، سیکریٹری نشرواشاعت معمبر رضا، صدر ایم ڈبلیوایم ضلع ملیر سید احسن عباس رضوی، سیکریٹری امور عزاداری ضلع ملیر قیصر رضا جعفری، ڈپٹی پولیٹیکل سیکریٹری ضلع ملیر زوالفقار علی بھٹو ، جوائنٹ سیکریٹری ضلع ملیر  قیصر عباس زیدی، صدر ایم ڈبلیوایم ضلع کورنگی رضوان رضوی، پولیٹیکل سیکریٹری ضلع کورنگی یاسر عباس و دیگر تنظیمی ذمہ داران بھی موجود تھے۔

آخر میں علامہ صادق جعفری نے وطن عزیز کی سلامتی،استحکام، ترقی اور خوشحالی کیلئے خصوصی دعا کروائی۔

وحدت نیوز(کوئٹہ)مجلس وحدت مسلمین کے مرکزی رہنماء علامہ مقصود علی ڈومکی نے کہا ہے کہ فرزند رسول حضرت امام علی رضا علیہ السلام کی ذاتِ گرامی عالم انسانیت کے لئے رہبر و رہنماء اور اسوہ ہیں۔ آئمہ اہل بیت علیہم السلام سے محبت اور مودت امت مسلمہ کی مشترکہ میراث ہے۔ یہ بات انہوں نے خانہ فرھنگ اسلامی جمہوریہ ایران کوئٹہ میں حضرت امام علی رضا علیہ السلام کے یوم ولادت باسعادت اور عشرہ کرامت کی مناسبت سے منعقدہ محفل جشن سے خطاب کرتے ہوئے کی۔ اس موقع پر ایم ڈبلیو ایم کے مرکزی رہنماء علامہ سید ہاشم موسوی، تحریک منہاج القرآن کے صوبائی رہنماء علامہ سعید احمد قادری اور ڈائریکٹر جنرل خانہ فرھنگ کوئٹہ سید ابوالحسن میری نے بھی خطاب کیا۔ جبکہ محفل جشن میں اہل سنت کے ممتاز نعت خوان حضرات نے بارگاہ حضرت امام علی رضا علیہ السلام میں نذرانہ عقیدت پیش کیا اور مدرسہ خاتم النبیین صلی اللہ علیہ وآلہ وسلم کوئٹہ گروہ تواشیح خواہران نے بھی عشرہ کرامت کی مناسبت سے بارگاہ امامت میں نذرانہ عقیدت پیش کیا۔

اس موقع پر تقریب جشن سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ حضرت سیدہ فاطمہ معصومہ سلام اللہ علیہا کے یوم ولادت یکم ذی القعدہ کو یوم دختر یعنی بیٹیوں کے دن کے طور پر منایا جاتا ہے، جبکہ یکم تا گیارہ ذی القعدہ کو عشرہ کرامت کے طور پر مناتے ہیں۔ فرزند رسول حضرت امام علی رضا علیہ السلام کی ذاتِ گرامی عالم انسانیت کے لئے رہبر و رہنماء اور اسوہ ہیں۔ آئمہ اہل بیت علیہم السلام سے محبت اور مودت امت مسلمہ کی مشترکہ میراث ہے۔ ہر دور میں اہل سنت کے علماء اور عوام نے آئمہ اہل بیت علیہم السلام سے اپنے عشق و عقیدت کا اظہار کیا ہے۔ انہوں نے کہا کہ امام علی رضا علیہ السلام نے ارشاد فرمایا جس نے دور کا سفر طے کرکے میرے روضہ انور کی زیارت کی میں تین مقامات پر اس کی زیارت اور مدد کے لئے آؤں گا۔ ایک جب میدان حشر میں نامہ اعمال ہاتھوں میں دیا جائے گا۔ دوسرا جب انسان پل صراط پر ہوگا۔ اور تیسرا جب میزان میں اعمال تولے جائیں گے۔