وحدت نیوز(کراچی) مجلس وحدت مسلمین پاکستان صوبہ سندھ کی جانب سے کراچی گلستان سوسائٹی میں دو روزہ راہیان کربلا کنونشن کا انعقاد ہوا۔ کنونشن میں وحدت کانفرنس، انٹرا پارٹی الیکشن و دیگر پروگرام منعقد کئے گئے۔ انٹرا پارٹی الیکشن میں سندھ کے 27 اضلاع نے حق رائے دہی کا استعمال کرتے ہوئے علامہ باقر عباس زیدی کو مجلس وحدت مسلمین سندھ کا صدر منتخب کرلیا۔

رکن مرکزی تنظیم سازی کونسل آصف رضا ایڈوکیٹ کی زیر نگرانی ہونے والے الیکشن میں رائے شماری کیلئے علامہ مختار امامی، علامہ مقصود ڈومکی اور علامہ باقر زیدی کے نام پیش کئے گئے، جس میں کثرت رائے سے علامہ باقر عباس زیدی کو منتخب کرلیا گیا۔

چیئرمین شوریٰ عالی ایم ڈبلیوایم و بزرگ عالم دین علامہ شیخ حسن صلاح الدین نے نومنتخب صوبائی صدر کے نام کا اعلان کیا اور ان سے ان کے عہدے کا حلف بھی لیا۔دو روزہ کنونشن کے اختتام پر نمایاں کارکردگی پیش کرنے والے اضلاع کے ذمہ داران کو اعزازی شیلڈز پیش کی گئیں۔

دو روزہ تنظیمی کنونشن میں مرکزی رہنما آصف رضا ایڈووکیٹ، رکن مرکزی شوریٰ عالی علامہ شیخ حسن صلاح الدین، علامہ باقر عباس زیدی، سید علی حسین نقوی، علامہ صادق جعفری، علامہ مبشر حسن، چوہدری اظہر حسین، مولانا علی انور جعفری، ارشد اللہ مکتبی، فدا حسین، حیدر زیدی، عالم کربلائی، اسد عباس، ناصر الحسینی، آغا ندیم جعفری، علی احمر زیدی، میر تقی ظفر، زین رضا، فائق جاکھرانی سمیت سندھ بھر کے دیگر اضلاع کے ذمہ داران موجود تھے۔

وحدت نیوز(کوئٹہ)مدرسہ خاتم النبیین کوئٹہ کے زیر اہتمام رہبر کبیر بانی انقلاب اسلامی حضرت امام خمینی رحمۃ اللہ علیہ کی 23 ویں برسی کی مناسبت سے تعزیتی تقریب منعقد ہوئی۔ تقریب سے خطاب کرتے ہوئے مجلس وحدت مسلمین پاکستان کے مرکزی رہنما مقصود علی ڈومکی نے کہا کہ امام خمینی رحمۃ اللہ علیہ کی جدوجہد عصر حاضر کے تمام مسلمانوں کے لئے اور رہبروں کے لئے نمونہ عمل ہے۔ آپ نے عوام کی طاقت سے طویل جدوجہد کے نتیجے میں ایران میں ڈھائی ہزار سالہ شہنشاہیت کو نشان عبرت بنادیا۔

انہوں نے کہا کہ امام خمینی رحمتہ اللہ علیہ نے ظالم سامراجی قوت امریکہ کو شیطان بزرگ قرار دیا اور اس بڑے شیطان کے مکروہ چہرے کو بے نقاب کیا۔ آپ نے مظلوموں اور محروموں کی رہنمائی کرتے ہوئے انہیں مستکبرین کے خلاف قیام کا درس دیا۔ بحیثیت حکمران آپ نے محلات میں رہائش پذیر ہونے کی بجائے معمولی سادہ گھر میں رہائش اختیار کی۔ اپنے خاندان میں سے کسی کو اقتدار میں نہیں لائے بلکہ جب ان کے بیٹے کو وزارت عظمیٰ کی پیشکش کی گئی تو آپ نے اسے نصیحت کرتے ہوئے فرمایا کہ یہ انقلاب اسلامی اس لئے نہیں کہ میرا خاندان اقتدار میں آئے۔

تعزیتی تقریب سے خطاب کرتے ہوئے بلوچستان نیشنل پارٹی کے مرکزی رہنما ملک محمد ساسولی نے کہا کہ امام خمینی اتحاد بین المسلمین کے علمبردار تھے اور آپ نے امریکہ کو شیطان بزرگ قرار دیتے ہوئے اس کے انسان دشمن عزائم کو بے نقاب کیا۔ قائد انقلاب اسلامی کی سامراج دشمن جدوجہد آج بھی تمام علماء اور دینی قائدین کے لئے مشعل راہ ہے۔تعزیتی تقریب سے خطاب کرتے ہوئے پاکستان پیٹریاٹک موومنٹ کے چیئرمین معراج محمد خان کاکڑ نے کہا کہ امام خمینی رحمۃ اللہ علیہ نے عبادت الٰہی اور بندگی کے ذریعے قرب خدا کو حاصل کیا اور آپ خدا کے سوا کسی سے نہیں ڈرتے تھے یہی سبب ہے کہ انہوں نے دو سپر پاورز امریکہ اور سوویت یونین کی آنکھوں میں آنکھیں ڈال کر کر دین اسلام کے پیغام کو دنیا تک پہنچایا۔

کانفرنس سے خطاب کرتے ہوئے بلوچستان قبائل کے صدر حاجی ندا خان درانی نے کہا کہ شیعہ سنی اسلام کے دو بازو ہیں اور یہ آپس میں بھائی بھائی ہیں۔ امام خمینی نے شیعہ سنی وحدت کا جو پیغام دیا وہ امریکہ اسرائیل اور تمام اسلام دشمن قوتوں کی سازشوں کو خاک میں ملا رہا ہے۔تعزیتی تقریب سے خطاب کرتے ہوئے ممتاز سماجی رہنما راز خان لونی نے کہا کہ امام خمینی رحمۃ اللہ علیہ ایک عظیم انقلابی رہنما تھے جن کی انقلابی جدوجہد اور تعلیمات تمام مسلمانوں کے لئے مشعل راہ ہے۔تعزیتی تقریب میں امامیہ اسٹوڈنٹس آرگنائزیشن پاکستان کوئٹہ ڈویژن کے رہنما قاری سجاد حسین استاد محمد بخش قاری مولانا محمد رضا محمدی و دیگر نے خطاب کیا۔ اس موقع پر معزز مہمانوں کو رہبر کبیر حضرت امام خمینی رحمۃ اللہ علیہ کی تصاویر اور کتب کا تحفہ پیش کیا گیا۔

وحدت نیوز(پشاور)مجلس وحدت مسلمین خیبر پختونخوا کے صوبائی سیکرٹریٹ پشاور میں برسی امام خمینی (رہ) کے حوالے سے ایک پروگرام کا انعقاد کیا گیا، جس میں ایم ڈبلیو ایم کے صوبائی سیکرٹری جنرل علامہ سید وحید عباس کاظمی، علامہ احسان اللہ خطیب جامعہ شہید سید عارف الحسینی، علامہ سید زکی الحسن سمیت پشاور کے مختلف عمائدین اور نوجوانوں نے شرکت کی۔

 پروگرام سے مجلس وحدت مسلمین کے صوبائی سیکرٹری جنرل علامہ سید وحید عباس کاظمی نے خصوصی خطاب کیا اور امام خمینی (رہ) کی خدمات و شخصیت پر روشنی ڈالی، علامہ سید زکی الحسن نے اختتامی دعا و مختصر خطاب بھی کیا۔

وحدت نیوز(کوئٹہ) مجلس وحدت مسلمین کے رہنماء اور امام جمعہ کوئٹہ علامہ سید ہاشم موسوی نے یوم وفات امام خمینی کی مناسبت پر کہا ہے کہ امام خمینی دنیا کو دین، معنویت اور انسایت کو درست سمت پر لانے کیلئے انقلاب لے کر آئے۔ جب دنیا مادی، خواہشات نفسانی اور انا پرستی کی آگ میں جل رہی تھی، ہر طرف مادیت پرستی کا دور دورہ تھا اور انسان نے انسانیت سے ہٹ کر حیوانیت کا روپ دھار لیا تھا، ایسے حالات میں سرزمین قم سے ایک ایسی ہستی، اللہ، رسول اور آل رسول کا پیغام لے کر نکلی اور ایک ظالم آمر کا خاتمہ کرکے ایک نئے نظام کا سربراہ بنی۔ امام خمینی نے دنیا کو یہ بتایا کہ جس سمت کی طرف دنیا والے جا رہے ہیں، وہ انسانیت نہیں بلکہ بربادی، حیوانیت اور پستی ہے۔ انہوں نے دنیا کو بتایا کہ اگر دنیا و آخریت کی بھلائی، کامیابی اور خوبیاں چاہتے ہو تو شیطانی طاقتوں، حیوانیت اور خواہشات نفسانی کو چھوڑ کر اللہ و رسول (ص)، اہلبیت (ع) اور قرآن کی طرف آؤ، اس طرح سب فلاح پائیں گے۔

علامہ ہاشم موسوی نے کہا کہ امام خمینی کا یہ پیغام دنیا میں بہت سی مثبت تبدیلیاں لے کر آیا۔ انسانیت اس بات پر سوچنے پر مجبور ہوئی کہ جس راستہ پر وہ گامزن ہے، وہ راستہ صحیح نہیں بلکہ معنویت کا راستہ صحیح ہے۔ لہٰذا ایک بار پھر وہ ادیان جو تحریف ہوچکے تھے اور ان کے پیروکاروں نے انہیں چھوڑ دیا تھا، ان ادیان کے پیروکاروں کو بھی فرصت ملی کہ وہ اپنے دین کی طرف آئیں۔ امام خمینی نے بھی انہیں اپنے دین کی طرف راغب کیا اور مکتب اہلبیت (ع) جو اسلام کی صحیح تصویر ہے، اس کو دنیا کے سامنے اجاگر کیا۔ انہوں نے دنیا کو بتایا کہ وہ اصلی ہستی جو اس انسانیت کی بگڑی صورت کو ٹھیک کر دینگے، وہ حضرت مہدی (عج) ہیں۔ امام خمینی نے دنیا کو ان (عج) کی آمد کا ایک وسیلہ و راستہ دکھایا اور لوگوں کو اس طرف متوجہ کیا۔ علامہ سید ہاشم موسوی نے کہا کہ ہمیں چاہیئے کہ ہم امام خمینی کے راستہ پر چلتے ہوئے مصلح کل صاحب عصر و زمان (عج) کے راستہ کے راہی بنیں اور پوری انسانیت کی بھلائی کے بارے میں سوچیں۔