وحدت نیوز(اسلام آباد)چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے 18 ذی الحجہ عید غدیر عید اکبر کے پر مسرت موقع پر تمام عاشقانِ نبوت و امامت کی خدمت اقدس میں ہدیہ تبریک و تہنیت پیش کرتے ہوئے کہا ہے کہ غدیر خلقت کا ماحصل، تمام ادیان الٰہی کا نچوڑ اور مکتب وحی کا خلاصہ ھے، نظام ولایت امت کی نجات کا ذریعہ اور نظام ولایت فقیہ نظام ولایت علی کا ہی تسلسل ہے، غدیر خم میں جس ولایت کا اعلان ہوا اس ولایت کا مطلب ہے کہ دین و سیاست اور معاشرت جدا نہیں بلکہ ہمارے دینی، سیاسی، سماجی پیشوا و رہنما امام علی علیہ السلام ہیں، غدیر وہ پاکیزہ پانی ہے جس سے گلستان توحید کے تمام غنچے سیراب ہو کر شادمانی سے کھل اٹھتے ہیں، غدیر وہ مقدس، پاک و پاکیزہ نام ہے جو ہمارے عقیدے کا عنوان اور ہمارے دین کی بنیاد ہے۔

وحدت نیوز(لاہور) عید غدیر کے پر مسرت موقع پر مجلس وحدت مسلمین شعبہ خواتین کی مرکزی صدر سیدہ معصومہ نقوی نے  تمام عالم اسلام کی خدمت میں مبارکباد پیش کرتے ہوے کہا کہ روز عید غدیر روز تکمیل دین ہے یہ وہ عید ہے کہ جس دن پروردگار نے اپنے حبیب ختمی مرتبت رسول خدا صلی اللہ علیہ و آلہ وسلم کے ذریعے امیر المومنین حضرت علی علیہ السلام کو سلسلہ ہدایت باقی رکھنے کے لئے رسول خدا صل اللہ علیہ و آلہ وسلم کا جانشین منتخب کیا۔

انہوں نے کہا کہ غدیر اسلامی ممالک کے لئے بہترین نمونہ عمل ہے، غدیر کے دن پیغمبر اکرم صلی اللہ علیہ و آلہ وسلم نے اسلامی حکومت کی ذمہ داریوں کو بیان کیا ہے کیونکہ حکومت کا مطلب عدالت کا قائم کرنا ہے، اسی وجہ سے پروردگار نے رسول خدا صلی اللہ علیہ و آلہ وسلم کے بعد حضرت علی علیہ السلام کو عدالت کے اجرا کے لئے انتخاب کیا ہے۔

ان کا کہنا تھا عید غدیر کی اہمیت کے اظہار کے لیے روایات میں اس دن کے چھوٹے سے چھوٹے سے نیک عمل کے بدلے بے شمار اجر و ثواب حتی کہ  انبیاء و صدیقین کے ہمراہ ہونے جیسا عظیم اجر ذکر کیا گیا ہے جس سے اس بابرکت دن کی عظمت و فضیلت کا اظہار ہوتا ہے اس دن خدا کی حمد و شکر بجا لانا چاہیے کہ اس نے ہمیں کائنات کی سب سے عظیم نعمت یعنی ولایت  مولا علی ابن ابی طالب علیہ سلام سے متمسک کیا۔

انہوں نے مزید کہا کہ ہمیں چاہیے جہاں عید غدیر شان و شوکت سے منائی جائے وہیں اسکی تشہیر اور اسکے پیغام کو عام کرنے کی زمہ داری سے غفلت نہ برتیں اور اپنے اخلاق و کردار اور حقیقی معنوں میں پیروان ولایت امیرالمومنین علیہ سلام بن کر دنیا کو اس سلسلہ ھدایت کی طرف جذب کرنے والا کردار بھی پیش کریں۔

وحدت نیوز(سجاول) مجلس وحدت مسلمین ضلع سجاول یونٹ جھوک شریف کے زیر اہتمام ولایت مولا علی علیہ سلام کے پیروکاروں نے عید غدیر کا جشن عقیدت اور احترام سے منایا غدیر کے جشن سے مولانا گل حسن مشھدی نے خطاب کیا ، مجلس وحدت مسلمین یونٹ جھوک شریف کے صدر عبدالجبار قمبرانی ،ممتاز ملاح، مولانا فدا حسین اور دیگر نے کیک کاٹا اور نیاض تقسیم کی۔

وحدت نیوز(اسلام آباد) مجلس وحدت مسلمین پاکستان کے پارلیمانی لیڈر انجینئر حمید حسین نے قومی اسمبلی اجلاس سے خطاب کرتے ہوئے کہا کہ پارا چنار کے حالات اب اس قدر سنگین کر دیے گئے ہیں کہ کوئی گھر سے سودا سلف لینے بھی نکلے تو اس کی خیر و عافیت سے واپسی کا یقین نہیں ہوتا۔ یہاں کے عوام بجٹ کی بجائے جان و مال کا تحفظ چاہتے ہیں۔

گزشتہ پینتالیس سالوں سے جاری پراکسی وار میں ہمارے لوگ شہید ہو رہے ہیں۔ایک بار پھر طالبان کو پارا چنار میں لانچ کر دیا گیا ہے۔جہاں جہاں وسائل ہیں وہاں وہاں مسائل پیدا کیے جاتے ہیں۔جیسے ہی دفاعی بجٹ میں اضافہ ہوتا ہے کرم ایجنسی میں دہشتگردانہ کارروائیوں میں بھی غیر معمولی اضافہ ہو جاتا ہے۔آج تک سمجھ میں نہیں آ سکا کہ یہ بجٹ عوام کے دفاع کے لیے استعمال ہوتا ہے یا عوام کو نشانہ بنانے کے لیے۔

گزشتہ ہفتے لوئر کرم سے اپر کرم تک ایک تاریخی امن مارچ کیا جس میں شیعہ سنی بھائیوں نے والہانہ شرکت کی اور ثابت کیا کہ اس علاقے میں کوئی فرقہ واریت نہیں۔لیکن یہ بات کچھ طاقتوں کو ہضم نہیں ہو رہی۔ لڑاو اور تقسیم کرو کے فرنگی منصوبے پر عمل کرتے ہوئے کبھی ایک طرف کے بندے مروا دیے اور کبھی دوسری طرف کے تاکہ کشیدگی کو برقرار رکھا جا سکے۔اس سارے معاملے میں انتظامیہ تماشائی کا کردار ادا کر رہی ہے۔ملک میں امن کے قیام کو یقینی بنائیں معاشی استحکام خودبخود آجائے گا۔آئینی ترامیم کے ذریعے یہاں کے عوام کو دس سال کے لیے جو ریلیف دی گئی تھی اسے پانچ سال میں ختم کرنے کا کوئی بھی منصوبہ خطے کے باسیوں کے زخموں پر نمک پاشی کے مترادف ہے۔