وحدت نیوز(کوئٹہ)مجلس وحدت مسلمین کے رہنماء سابق صوبائی وزیر سید محمد رضا آغا نے کہا ہے کہ محرم الحرام میں سوشل میڈیا پر منافرت پھیلانے کا نوٹس اور ذمہ دار عناصر کے خلاف سخت کارروائی کی جائے۔ ایران اور عراق زیارات کے لئے جانے والے زائرین کو بغیر کسی رکاؤٹ کے آنے جانے کی اجازت دی جائے۔ یہ بات انہوں نے کوئٹہ پریس کلب میں پریس کانفرنس کرتے ہوئے کہی۔ اس موقع پر ارباب لیاقت، فرید احمد، شیخ ولایت حسین جعفری اور حاجی غلام حسین اخلاقی بھی موجود تھے۔ انہوں نے کہا کہ محرم الحرام کے بابرکت مہینے میں عزاداری کو مقدم رکھتے ہوئے کسی بھی مسلک کی دل آزاری اور مذہبی جذبات کو ٹھیس پہنچانے سے گریز کیا جائے۔

انہوں نے کہا کہ ملک میں مذہبی اور لسانی منافرت کی روک تھام کے لئے سائبر کرائم ایکٹ کے تحت کارروائی ہونی چاہئے۔ انہوں نے کہا کہ امن و امان کی بحالی قانون نافذ کرنے والے اداروں و حکومت کی ذمہ داری ہے، محرم الحرام میں قیام امن کے لئے موثر اقدامات کئے جائیں۔ انہوں نے کہا کہ محرم الحرام میں مجالس شروع ہوچکی ہیں، ایسے میں بجلی کی طویل لوڈ شیڈنگ کے ساتھ ساتھ پانی کی عدم فراہمی کا سلسلہ شروع کر دیا گیا ہے۔ جس کی بدولت ٹینکر مافیا کی چاندی ہوگئی ہے، جس سے لوگوں کی مشکلات بڑھ رہی ہیں۔ حکومت عوام کو بنیادی سہولیات کی فراہمی کو یقینی بنائے۔

وحدت نیوز(کوئٹہ)مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نے کہا ہے کہ مختلف اسکاؤٹس اور اداروں کے رضاکار محرم الحرام کے دوران پولیس اور انتظامیہ کے شانہ بشانہ کھڑے ہوتے ہیں۔ جذبہ خدمت سے سرشار نوجوانوں کی رضاکارانہ خدمات کے باعث نظم و ضبط میں بہتری آئی ہے۔ ان سب کی حوصلہ افزائی ضروری ہے۔ ان خیالات کا اظہار انہوں نے گزشتہ شب ہزارہ ٹاؤن کے دورے کے موقع پر مجالس عزا کے دوران نظم و ضبط کی بہتری اور سیکیورٹی پر مامور رضاکاروں اور سیکیورٹی اہلکاروں سے ملاقات کے موقع پر گفتگو کرتے ہوئے کیا۔ اس موقع پر انہوں نے مدرسہ علمیہ علی ابن ابی طالب علیہ السلام کے مدیر علامہ کاظم بہجتی اور سید الشہداء اسکاؤٹس کے صدر سید مہدی آغا و دیگر سے بھی ملاقاتیں کیں۔

علامہ علی حسنین نے کہا کہ ہزارہ ٹاؤن کے دورے کا مقصد ان مقدس راتوں میں عزاداروں کی خدمت اور حفاظت پر مصروف رضاکاروں اور سیکیورٹی اہلکاروں کی حوصلہ افزائی کرنا ہے۔ ان ایام عزاء میں نظم و ضبط کی ایک اہم وجہ یہی رضا کار ہیں جو شب و روز بے لوث خدمت میں مصروف ہیں۔ ان کے بغیر انتظامیہ کو بے شمار مشکلات پیش آ سکتی ہیں۔ انہوں نے کہا کہ سید الشہداء اسکاؤٹس، ابوتراب اسکاؤٹس، علمدار اسکاؤٹس، اخلاص اسکاؤٹس، الکوثر اسکاؤٹس، حسینی اسکاؤٹس، الحجت اسکاؤٹس، المصطفیٰ اسکاؤٹس اور حیدری اسکاؤٹس سمیت دیگر گروپس کے سینکڑوں جوان علمدار روڈ اور ہزارہ ٹاؤن میں محرم الحرام کے مقدس ایام کے دوران رضاکارانہ سرگرمیوں میں مصروف ہوتے ہیں۔ پرامن محرم الحرام کے انعقاد کا دار و مدار فقط پولیس اور سیکیورٹی اہلکاروں پر نہیں، بلکہ ان رضاکار جوانوں پر بھی ہے۔ اس موقع پر بلوچستان شیعہ کانفرنس کے سید صباحت آغا، ڈاکٹر علی مدد، بی این پی رہنماء مبارک علی ہزارہ اور مجلس وحدت مسلمین کے حاجی دولت حسین سمیت دیگر بھی انکے ہمراہ تھے۔

وحدت نیوز(اسلام آباد) چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے یوم عاشور کے موقع پر اپنے پیغام میں کہا ہے کہ عاشورا حریت و سرفرازی کی ایک لازوال مثال ہے، کربلا ایک کیفیت، جذبے، تحریک اور عزم کا نام ہے، ظلم و ناانصافی کے خلاف قیام عاشورائی سوچ کی اساس ہے، سید الشہداء حضرت امام حسین ع نے کربلا میں پوری انسانیت کیلئے جو اصول اور نقوش چھوڑے ہیں وہ ہم سب کے لیے مشعل راہ ہیں، چاہے حاکم وقت جتنا طاقتور اور سفاک ہو حق شناس اور حق پرست عدل وانصاف کی خاطر ڈٹ جاتے ہیں، ہم اپنے انفرادی اور اجتماعی مسائل کا حل امام حسین ع کے کردار میں تلاش کرتے ہوئے اور رہنمائی پر عمل پیرا ہو کر اپنی زندگی کو پر سکون بنا سکتے ہیں، واقعہ کربلا معرکہ حق و باطل کی پہچان کرواتا ہے، اسلام کی سر بُلندی کے لئے نواسہ رسول امام عالی مقام حسین ع ابن علی نے قربانی کی وہ عظیم داستان رقم کی جس کی مثال آج تک نہیں ملتی۔

انہوں نے کہا کہ کربلا کی فکر کے اثرات ہیں کہ آج غزہ کے مظلومین ظالم و جابر اسرائیل کے خلاف پوری قوت و استقامت کے ساتھ نبرد آزما ہیں، واقعہ کربلا میں اس قدر ہدایت، رہنمائی اور جاذبیت ہے کہ وہ ہر دور کے ہر انسان کو اپنی طرف متوجہ کرتا ہے۔اس واقعہ کے پس منظر میں نواسہ رسول اکرم حضرت امام حسین علیہ السلام کی جدوجہد آفاقی اصول اور پختہ نظریات شامل ہیں، محسن انسانیت، حضرت امام حسین ع نے بزور مسلط کی جانیوالی حکمرانی کو ماننے سے انکار کردیا، اسلامی اصولوں اور بنیادی انسانی حقوق اور شہری آزادیوں کی نفی پر مبنی جابرانہ نظام کو تسلیم نہ کیا، واقعہ کربلا میں اس قدر ہدایت، رہنمائی اور جاذبیت ہے کہ وہ ہر دور کے ہر انسان کو اپنی طرف متوجہ کرتا ہے۔

وحدت نیوز(اسلام آباد)مرکزی جنرل سیکرٹری مجلس وحدت مسلمین پاکستان سید ناصر عباس شیرازی کی دیگر مرکزی رہنماؤں ملک اقرار حسین علوی، سید زاہد کاظمی، ارشاد حسین بنگش اور سید نیاز بخاری کے ہمراہ اسلام آباد کے جلوس عزاء میں پریس کانفرنس۔پریس کانفرنس سے خطاب کرتے ہوئے سید ناصر عباس شیرازی نے کہا کہ آج نو محرم پوری دنیا میں لوگ امام حسین علیہ السلام کے غم میں غمزدہ ہیں، اپنے اپنے انداز میں لوگ غم مناتے ہیں، کچھ ایسی قوتیں ہیں جو اس موقع پر حالات خراب کرنے کی کوشش کرتی ہیں، جب بھی کوئی مخصوص دن آتے ہیں مسلمانوں کے تو اسٹیٹ کی جانب سے پریشر بڑھایا جاتا ہے، بھکھی شریف شیخوپورہ جلوس عزاء پر حملے کی شدید مذمت کرتے ہیں، انتظامیہ واقعے میں ملوث قاتلوں کو فی الفور گرفتار کرے، لوگوں کی مذہبی آزادی کو محدود کرنے کی کوشش کی جاتی ہے، عزاداری پر کسی قسم کی قدغن قبول نہیں کریں گے اور نہ کسی قوت کے عزاداری کے خلاف مذموم عزائم کو کامیاب ہونے دیں گے، یہاں کوئی فرقہ واریت نہیں ہے، شیعہ سنی ہم سب ایک ہیں۔

انہوں نے مزید کہا کہ پاکستان کے دشمن واضح ہیں، ملک میں انتشار پھیلانے والے نا شیعہ ہیں نا سنی وہ دشمن کے آلہ کار ہیں، محرم الحرام امن و سلامتی، باہمی بھائی چارے اور رواداری کا پیغام دیتا ہے، ایام حسینی کے پروگرامات کے لئے پورے ملک میں مشکلات ہیں لیکن سب سے زیادہ پنجاب میں مشکلات ہیں، بلا جواز پابندیاں بنیادی مذہبی اور آئینی حقوق کی سنگین خلاف ورزی ہے، بعض جگہوں پر انتظامیہ بہترین تعاون بھی کر رہی ہے، جلوس عاشورا کے لئے بہترین انتظامات پر اسلام آباد انتظامیہ اور سیکورٹی اداروں کا شکریہ ادا کرتے ہیں۔رہنما ایم ڈبلیو ایم علامہ سید زاہد کاظمی نے کہا کہ امام حسین ع کی شہادت کا مقصد انسانیت کی فلاح تھی، آج ساری دنیا حسین علیہ السلام کے ساتھ ہے، حکومت پنجاب ایک طرف سبیل اور لنگر کی بات کر رہی ہے تو دوسری طرف عزاداروں کے لئے مشکلات کھڑی کر رہی ہے، قول اور فعل میں تضاد نہیں ہونا چاہیئے۔