The Latest
وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ تکفیری سوچ کی حامل کالعدم دہشت گرد تنظیم وطن عزیز پاکستان میں امن و رواداری کے خلاف سرگرم عمل ہے۔ نیشنل ایکشن پلان کے تحت کالعدم تنظیم کی سرگرمیوں کو روکا جائے۔ ان خیالات کا اظہار انہوں نے دیگر رہنماؤں کے ہمراہ جیکب آباد میں وفد کی صورت میں ایس ایس پی سید سلیم شاہ سے ملاقات کے موقع پر گفتگو کرتے ہوئے کیا۔ وفد میں عزاداری کونسل کے چیئرمین سید غلام شبیر نقوی، ایم ڈبلیو ایم ضلع جیکب آباد کے صدر نذیر حسین جعفری، وحدت یوتھ کے صدر سید کامران علی شاہ، ایم ڈبلیو ایم ٹھل کے رہنماء مقدم غلام یاسین برڑو، تحصیل صدر غلام حیدر برڑو سید واجد علی شاہ و دیگر شامل تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ جیکب آباد ضلع میں مختلف مکاتب فکر کے درمیان باہمی احترام، ہم آہنگی اور رواداری کی فضا قائم ہے۔ محرم و صفر ہو یا ربیع الاول تمام مکاتب فکر کے لوگ مل کر رسول اللہ صلی اللہ علیہ وآلہ وسلم اور نواسہ رسول حضرت امام حسین علیہ السلام کی یاد مناتے ہیں۔ مگر کچھ شرپسند عناصر اور کالعدم دہشت گرد تنظیمیں فرقہ وارانہ منافرت اور نفرتوں کو ہوا دیتی ہیں۔ لہٰذا کالعدم تکفیری دہشت گرد گروہ کی شرانگیز سرگرمیوں پر کڑی نظر رکھنے کی ضرورت ہے۔ جنہوں نے 2015 میں شب عاشور کو عزاداری کے جلوس پر حملہ کرکے 29 معصوم انسانوں کو شہید کر دیا۔
انہوں نے کہا کہ تکفیری سوچ کی حامل کالعدم دہشت گرد تنظیم وطن عزیز پاکستان میں امن و رواداری کے خلاف سرگرم عمل ہے۔ نیشنل ایکشن پلان کے تحت کالعدم تنظیم کی سرگرمیوں کو روکا جائے۔ انہوں نے کہا کہ ضلع میں قیام امن کے لئے ہمارا انتظامیہ کے ساتھ مکمل تعاون ہوگا۔ اس موقع پر سید غلام شبیر نقوی اور نذیر حسین جعفری نے ضلع میں بعض مسائل کی نشاندہی کی۔ ملاقات میں مساجد امام بارگاہوں اور مدارس کی سیکیورٹی اور نماز عید کے اجتماعات کی سیکیورٹی پر بھی گفتگو ہوئی۔ اس موقع پر ایس ایس پی سید سلیم شاہ نے وفد کے تعاون کا شکریہ ادا کرتے ہوئے کہا کہ پولیس آپ کے تعاون کی قدر کرتی ہے اور ہمیں باہمی تعاون سے ضلع میں امن و امان قائم رکھنا ہے۔
وحدت نیوز(اسلام آباد) سربراہ مجلس وحدت مسلمین پاکستان علامہ راجہ ناصرعباس جعفری نے بحیثیت سینیٹر ایوان بالا میں حلف اٹھا لیا۔علامہ راجہ ناصرعباس سمیت 43 نومنتخب سینیٹرز نے حلف اٹھایا ، پریزائیڈنگ افسر اسحاق ڈار نے نو منتخب سینیٹرزسے حلف لے لیا۔
تفصیلات کے مطابق سینیٹ کا اجلاس سیکرٹری سینیٹ قاسم صمد خان کی زیر صدارت ہوا، سیکرٹری سینیٹ قاسم صمد خان نے نومنتخب اراکین کو ایوان میں خوش آمدید کہا۔
جس کے بعد سیکرٹری سینیٹ نےایوان کی کارروائی اسحاق ڈار کے حوالے کر دی اور سینیٹر اسحاق ڈار نے پریزائیڈنگ افسرکی نشست سنبھال لی۔
حلف اٹھانے والوں میں چیئرمین ایم ڈبلیوایم سینیٹرعلامہ راجہ ناصرعباس جعفری سمیت سینیٹرانوشہ رحمان ، سینیٹر انوار الحق کاکڑ ، سینیٹرمحسن نقوی ، سینیٹر عبدالقدوس بزنجو ، سینیٹر عبد الشکور ، دوستین خان ڈومکی ، سینیٹر یوسف رضاگیلانی ، سینیٹر احد چیمہ سمیت دیگر شامل تھے۔
حلف اٹھانے کے بعد نومنتخب سینیٹرز نے رول آف ممبرز پر دستخط کا آغازکیا، نومنتخب سینیٹرز حروف تہجی کی ترتیب سے رول آف ممبرز پر دستخط کیئے۔
واضح رہے کہ علامہ راجہ ناصرعباس جعفری کے سینیٹر منتخب ہونے پر ملک وبیرون ملک سے مختلف شخصیات کی جانب سے مبارکباد کا سلسلہ جاری ہے جبکہ مختلف سیاسی ومذہبی شخصیات نے علامہ راجہ ناصرعباس جعفری سے ان کی رہائش گاہ پر ملاقاتیں بھی کی ہیں ۔
وحدت نیوز(گلگت)گلگت بلتستان اسمبلی میں قائد حزب اختلاف محمد کاظم میثم نے صوبائی حکومت اور سکیورٹی اداروں کو سکیورٹی سے متعلق خط لکھ دیا۔ خط میں بشام میں چائنیز پر دہشتگردی کے حملے کے بعد گلگت بلتستان کی سکیورٹی پر تحفظات اور خدشات کا اظہار کیا ہے۔ خط میں سکیورٹی خدشات، تحفظات سے آگاہی اور راہ حل بھی تجویز کی گئی ہے۔
خطے کی سکیورٹی کو یقینی بنانے کے لیے وفاق سے تعاون طلب کرنے کے علاوہ جامع پلان بھی تجویز کی گئی۔ سی پیک، دیامر ڈیم پر کام کرنے والے چائنیز انجینئررز اور کالونی، اہم سرکاری تنصیبات و مقامات، حساس مقامات، عوامی اجتماعات، مذہبی اور سیاسی شخصیات کی سکیورٹی یقینی بنانے کا مطالبہ بھی کیا گیا ہے۔
خط میں سکیورٹی انتظامات کو بہتر بنانے کے لیے جدید ٹیکنالوجی سے استفادہ کرنے کی تجویز دی گئی ہے۔ واضح رہے کہ اپوزیشن لیڈر نے سانحہ ہڈور سے قبل بھی سکیورٹی اداروں کو سکیورٹی خدشات کا اظہار کیا تھا جس کو حکومت نے سنجیدہ نہیں لیا تھا۔ اس سے قبل اپوزیشن لیڈر نے جی بی میں دہشتگرد جماعتوں کی موجودگی کے شواہد بھی فراہم کیے تھے جس کے قلع قمع کے کیے کوئی اقدام نہیں اٹھایا گیا۔ کے کے ایچ پر اب تک ہونے والے درجنوں سانحات کے مجرموں کو تاحال سزا نہ ہونے سے عوام میں بھی تشویش پائی جاتی ہے۔
کوئٹہ، رہنما ایم ڈبلیوایم علامہ مقصود ڈومکی کی جماعت اسلامی کے رہنماء مولانا عبدالحق ہاشمی سے ملاقات
وحدت نیوز(کوئٹہ) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کوئٹہ میں ملی یکجہتی کونسل بلوچستان کے صوبائی صدر اور امیر جماعت اسلامی بلوچستان مولانا عبدالحق ہاشمی سے ملاقات کی اور ان سے بلوچستان کی سیاسی صورتحال، ملی یکجہتی کونسل بلوچستان میں مختلف دینی جماعتوں کے کردار اور مظلوم فلسطینی عوام کی حمایت میں مشترکہ لائحہ عمل کے موضوعات پر تبادلہ خیال کیا۔ انہوں نے مولانا عبدالحق ہاشمی کو ان کی جماعت کی جانب سے بلوچستان میں صوبائی اسمبلی کی دو نشستوں پر کامیابی پر مبارکباد پیش کی۔
اس موقع پر گفتگو کرتے ہوئے علامہ مقصود علی ڈومکی نے کہا کہ مظلوم فلسطینی مسلمانوں کی حمایت اور اسرائیلی مظالم کی مخالفت ہر با ضمیر انسان پر فرض ہے۔ اسرائیل نے فلسطینی عوام کا قتل عام کرکے ظلم و بربریت کی نئی تاریخ رقم کی ہے۔ انہوں نے کہا کہ دمشق سفارت خانے میں ایرانی جنرل شہید سردار زاہدی کا اسرائیل کے ہاتھوں قتل شرمناک حرکت ہے۔ سفارت خانے پر حملہ کرکے اسرائیل نے بین الاقوامی قوانین کی خلاف ورزی کی ہے۔ اس موقع پر گفتگو کرتے ہوئے مولانا عبدالحق ہاشمی نے کہا کہ مسلم حکمرانوں کے مجرمانہ کردار کے سبب فلسطینیوں کا قتل عام جاری ہے۔ پاکستان کے عوام اپنے مظلوم فلسطینی بھائیوں کے ساتھ ہیں۔ اس موقع پر جمعیت علمائے اسلام نظریاتی اور جمعیت علمائے اسلام پاکستان (شیرانی گروپ) کے ملی یکجہتی کونسل بلوچستان میں کردار کے حوالے سے مشاورت ہوئی۔
وحدت نیوز(قم)مجلس وحدت مسلمین قم کے زیر اہتمام “یوم القدس ایک تحریک ایک جائزہ” کے عنوان سے رکھی گئی۔ نشست سے متعدد شخصیات نے خطاب کیا۔ نشست سے گفتگو کرتے ہوئے مجلس وحدت مسلمین امور خارجہ کے سیکرٹری علامہ ڈاکٹر سید شفقت حسین شیرازی نے کہا کہ کیمپ ڈیوڈ معاہدے کے بعد مسئلہ فلسطین ختم ہو چکا تھا لیکن انقلاب اسلامی کے بعد امام خمینی کے یوم قدس کے اعلان نے مسئلہ فلسطین کو ایک نئی طاقت زندگی بخشی، شہید فتحی شقاقی کی جہاد اسلامی، حماس اور حزب اللہ جیسی یہ ساری مقاومتی تنظیمیں یوم القدس کی پیداوار ہیں۔
ان کا کہنا تھا کہ عرب ریاستوں کے اسرائیل کے ہاتھوں بد ترین شکست کے بعد کہا جاتا تھا کہ اسرائیل ایک ناقابل شکست ریاست ہے لیکن حزب اللہ نے اس کے اس غرور کو خاک میں ملا دیا ہے اور اب طوفان الاقصیٰ کے بعد اسرائیل ایک بند گلی میں پہنچ گیا ہے، اس وقت اسرائیل اپنے وجود و بقاء کی جنگ لڑ رہا ہے، اس بات کا اعتراف خود اسرائیلی عہدیدار بھی اپنے بیانات میں کر چکے ہیں، آج ہمیں چاہیے کہ ہم اپنی استطاعت کے مطابق چاہیے قلم کے ذریعے، چاہے زبان کے ذریعے یا چاہے سوشل میڈیا کے ذریعے مظلوم فلسطینوں کی آواز بنیں، یہ ہمارا ایمانی و اخلاقی فریضہ ہے۔
وحدت نیوز(کوئٹہ)مجلس وحدت مسلمین کے مرکزی سیکرٹری تنظیم سازی علامہ مقصود علی ڈومکی نے کہا ہے کہ کوئٹہ میں یوم القدس کے شہداء کے ان ورثاء کو سلام جنہوں نے دشمن کے بدترین پروپیگنڈا کے باوجود اپنے شہداء اور زخمیوں کی فداکاری پر فخر کیا۔ آج بھی دانا دشمن تحریک آزادی فلسطین کے خلاف صف آراء ہیں۔ ان خیالات کا اظہار انہوں نے کوئٹہ میں شہدائے یوم القدس کی 14ویں برسی کے موقع پر امامیہ اسٹوڈنٹس آرگنائزیشن کوئٹہ ڈویژن اور وارثان شہداء کی جانب سے منعقدہ یوم شہداء کی تقریب سے خطاب کرتے ہوئے کیا۔ امام بارگاہ نچاری علمدار روڈ میں منعقد ہونے والی تقریب سے ایم ڈبلیو ایم کے مرکزی رہنماء علامہ مقصود علی ڈومکی، صوبائی صدر علامہ سید ظفر عباس شمسی، امام جمعہ کوئٹہ علامہ غلام حسنین وجدانی، آئی ایس او کے ڈویژنل صدر محمد ظاہر ہزارہ و دیگر نے خطاب کیا۔
اس موقع پر علامہ مقصود علی ڈومکی نے کہا کہ شہدائے یوم القدس تحریک آزادی فلسطین کے شہید ہیں۔ جنہوں نے مسجد اقصٰی کی آزادی کی راہ میں اپنے پاکیزہ لہو کا نذرانہ پیش کیا۔ شہادت انبیاء کرام علیہم السلام اور آئمہ ھدٰی کی تمنا ہے اور یہ پاکیزہ انسانوں کے مقدر میں لکھی جاتی ہے۔ مجاہدین اگر کینسر کی بیماری یا روڈ ایکسیڈنٹ میں مر جائیں تو دکھ ہوتا، شہادت وہ خدائی انعام ہے جو خدا کے صالح بندوں اور مجاہدوں کے مقدر میں لکھا جاتا ہے۔ انہوں نے کہا کہ یوم القدس کے شہداء کے ان ورثاء کو سلام جنہوں نے دشمن کے بدترین پروپیگنڈا کے باوجود اپنے شہداء اور زخمیوں کی فداکاری پر فخر کیا۔ آج بھی دانا دشمن تحریک آزادی فلسطین کے خلاف صف آراء ہیں۔ مگر مکار دشمن کی میڈیا وار کو خداوند متعال نے ناکام بنا دیا۔ اسرائیل تیزی سے زوال کے راستے پر چل رہا ہے۔ ہم اللہ تعالیٰ کی نصرت سے حماس اور غزہ کی فتح مبین کا مشاہدہ کریں گے۔ اس موقع پر علامہ سید ظفر عباس شمسی نے کہا کہ فلسطین کی آزادی کے لئے غزہ کے مظلوم فلسطینیوں کے جہاد صبر و استقامت کو ہمیشہ سنہری حروف میں لکھا جائے گا۔ تقریب کے اختتام پر علامہ غلام حسنین وجدانی، علامہ شیخ ولایت حسین جعفری، وارثان شہداء اور تنظیمی کارکنوں کے شہدائے یوم القدس کے مقدس مزار پر حاضری دی اور شہداء راہ حق کو سلام عقیدت پیش کیا۔
وحدت نیوز(ڈیرہ غازی خان) مجلس وحدت مسلمین عزاداری ونگ ڈیرہ غازی خان کے زیراہتمام ڈسٹرکٹ بار ڈیرہ غازی خان میں فلسطینی مسلمانوں سے اظہار یکجہتی کے لیے احتجاجی مظاہرہ کیا گیا، وکلا نے فلسطین کے حق میں اور اسرائیل کے خلاف شدید نعرے بازی کی۔ احتجاجی مظاہرے کی قیادت شکیل الحسنین بھٹی ایڈووکیٹ اور رحمت علی کھوسہ ایڈووکیٹ نے کی۔ مظاہرے میں عظمت اسلام ایڈووکیٹ، سید ندیم عباس نقوی ایڈووکیٹ، محمد علی پتافی ایڈووکیٹ، خالد اقبال بھٹی ایڈووکیٹ، اے ڈی ایڈووکیٹ، خلیل غوری ایڈووکیٹ، محمد علی چنن ایڈووکیٹ، جاوید لنڈ ایڈووکیٹ، مسرت علی دستی ایڈووکیٹ، بہرام بزدارایڈووکیٹ، علمدار کھوسہ ایڈووکیٹ اور دیگر رہنما بھی موجود تھے۔ مظاہرین سے خطاب کرتے ہوئے عزاداری ونگ کے ضلعی رہنما شکیل الحسنین بھٹی نے کہا کہ غزہ کے مظلوموں پر ہونے والے افسوسناک مظالم انسانی حقوق کے اداروں کے پر منہ پر طمانچہ ہیں، افسوس کہ آج مسلم اُمہ بھی خاموش تماشائی بنی ہوئی ہے، غزہ کے مظلوم بچوں کی آہیں اور سسکیاں بھی انہیں جگانے میں ناکام نظر آتی ہیں۔
وحدت نیوز(ملتان)مجلس وحدت مسلمین کے سربراہ علامہ راجہ ناصر عباس جعفری کی اپیل پر عالمی یوم القدس کے موقع پر مجلس وحدت مسلمین عزاداری ونگ کے وکلاء کا ڈسٹرکٹ بار ایسوسی ایشن ملتان کے تعاون سے مظلوم فلسطینی مسلمانوں کی حمایت میں اور غاصب صیہونی ریاست اسرائیل کے خلاف احتجاجی مظاہرہ کیا گیا۔ مظاہرے کی قیادت مجلس وحدت مسلین عزاداری ونگ کے صوبائی جنرل سیکرٹری عون رضا انجم نے کی۔ جبکہ مظاہرے میں ڈسٹرکٹ بار ایسوسی ایشن کے جنرل سیکرٹری سید عارف شاہ، سابق نائب صدر اقبال مہدی زیدی، خادم بخاری، حسنین بخاری، اشتیاق شاہ، اصغر خاں نہڑ، سجاد چوہان، راحیل رائے سمیت دیگر رہنما موجود تھے۔ وکلا کی فلسطین کے حق میں اور اسرائیل کے خلاف شدید نعرے بازی،
رہنمائوں نے خطاب میں کہا کہ فلسطین پر ہونے والی اسرائیلی جارحیت کی مذمت کرتے ہیں، اسرائیل ایک غاصب صہیونی ریاست ہے جسے کسی صورت تسلیم نہیں کریں گے، اقوام متحدہ اور عالمی ادارے اسرائیل کے سامنے بے بس ہیں، ماہ رمضان کے باوجود غزہ پر اسرائیلی جارحیت فرعونیت ہے، احتجاجی مظاہرے کے اختتام پر پاکستان، عالم اسلام اور فلسطینیوں کیلیے خصوصی دعائیں کی گئیں۔
مشہد مقدس، ایم ڈبلیو ایم کے وفد کی پاکستانی و فلسطینی پرچم کے ہمراہ عالمی یوم القدس کی ریلی میں شرکت
وحدت نیوز(مشھد) مجلس وحدت مسلمین شعبہ مشہد مقدس کے وفد نے ہر سال کی طرح اس سال بھی عالمی یوم القدس کے موقع پر مشہد مقدس میں نکالی جانے والی عظیم الشان ریلی میں شرکت کی۔ عالمی یوم القدس ریلی میں دفتر مجلس وحدت مسلمین پاکستان شعبہ مشہد مقدس، موسسہ شھید عارف الحسینی کے اعضا و اراکین کی حجة الاسلام عقیل حسین خان مسئول شعبہ مشھد مقدس کے ہمراہ شرکت۔ ریلی میں شرکت کرنے والے پاکستانی علما و طلاب نے بینر اور پاکستانی پرچم کے ساتھ مجلس وحدت مسلمین پاکستان کے پرچم اٹھا رکھے تھے، شرکا ریلی مردہ باد اسرائیل اور مردہ باد امریکا کے نعرے لگا رہے تھے۔ یہ ریلی خیابان امام رضا فلکہ پانزدہ خرداد سے شروع ہو کر حرم امام رضا علیہ السلام پر اختتام پذیر ہوئی، ریلی میں مختلف شعبہ ھائے زندگی سے تعلق رکھنے والے لاکھوں افرادنے شرکت کی۔
وحدت نیوز(کویت) مجلس وحدت مسلمین کویت کی طرف سے مقامی ہوٹل میں قائد وحدت علامہ راجہ ناصر عباس جعفری حفظہ اللہ کے سینیٹر منتخب ہونے اور وائس چیئرمین مجلس وحدت مسلمین پاکستان علامہ احمد اقبال رضوی کی کویت آمد کی خوشی میں استقبالیہ تقریب کا اہتمام کیا گیا جس میں مجلس وحدت مسلمین کویت کے ممبران کے علاوہ متعدد سیاسی سماجی شخصیات بالخصوص میڈیا نمائندگان نے شرکت کی ۔امریکہ سے تشریف لائے مہمان عالم دین علامہ ظہیر الحسن نقوی اور قم سے تشریف لائے علامہ علی رضا جان کاظمی نے خصوصی شرکت کی ۔
علامہ ظہیر الحسن نقوی نے اپنے خطاب میں مجلس وحدت مسلمین کی سیاسی جدوجہد اور سیاسی کامیابیوں پر قائد وحدت کی خدمات اور سیاسی بصیرت کو خراج تحسین پیش کیا ، صدارتی خطاب میں علامہ احمد اقبال رضوی نے مجلس وحدت کے سیاسی سفر اور موجود اور آئندہ حکمت عملی پر روشنی ڈالی اور مومنین کے تعاون اور پاکستان کے عوام کی جدوجہد اور عوامی بیداری کو خوش آئند قرار دیتے ہوئے پر عزم قیادت پر اعتماد کا اظہار قرار دیا ، مجلس وحدت مسلمین کویت کے چیف آرگنائزر اور مومنین کویت کے بانی سید شہباز شیرازی نے کہا مجلس وحدت مسلمین ایک عوامی پلیٹ فارم ہے جو بلا تفریق مسلک و مذھب عوامی خدمت پر یقین رکھتی ہے اور اسکے دروازے تمام محبان ملت کیلئے کھلے ہیں۔
مومنین کویت مسجد علی ابن ابی طالب علیہ السلام کے بانی ذوالفقار مطہری نے علامہ راجہ ناصرعباس کی قیادت پر بھرپور اعتماد کا اظہار کرتے ہوئے آپکی مخلص قیادت کے ہاتھ مضبوط کرنے کے بھرپور عزم کا اظہار کیا۔
پیپلزپارٹی گلف کے رہنما ء چوہدی ضیاء الرحمن گریوال نے بھی مجلس وحدت کی قیادت کو اس اہم کامیابی پر مبارکباد دی اور اس کامیابی کو شہداء کے خون کا ثمرہ قرار دیا ۔
تقریب کے اختتام پر مجلس وحدت مسلمین کویت کے صدر حاجی سیف علی نے تمام مہمانان گرامی کا شکریہ اداکیا، علامہ علی رضا جان کاظمی نے پاکستان اور تمام مومنین کویت کیلئے دعا کروائی ، تقریب کے اختتام پر علامہ راجہ ناصر عباس جعفری کے سینیٹر بننے کی خوشی میں کیک کاٹا گیا اور شرکاء کی تواضع کی گئی۔
