The Latest
وحدت نیوز(کراچی) مجلس وحدت مسلمین پاکستان کراچی ڈویڑن ضلع وسطی کی جانب سے یوسی ۶۲ پر بلدیاتی انتخابات کیلئے تیاریاں زور و شور سے جاری ہیں۔ اس سلسلے میں مختلف شخصیات، تنظیموں، علاقائی کمیٹیوں اور مساجد کے ٹرسٹیز سے ملاقاتوں اور گھر گھر رابطہ کا سلسلہ جاری ہے۔ ایم ڈبلیو ایم یوسی ۶۲ کیلئے چیئرمین کے امیدوار اور وائس چیئرمین کیلئے امیدوار علامہ مبشر حسن نے زین رضوی، عسکری رضوی اور ثمر زیدی سمیت ایک وفد کے ہمراہ سادات محلہ کمیٹی سے ملاقات کی اور ان سے مجلس وحدت مسلمین کے امیدواروں کی حمایت کی درخواست کی۔ اس موقع پر اور علامہ مبشر حسن نے کہا کہ مجلس وحدت مسلمین کے کراچی میں شیعہ سنی وحدت کیلئے جو قدم اٹھایا ہے وہ اس وقت تک دیرپا نہیں رہ سکتا کہ جب تک عوام اپنا حق رائے دہی نیک اور صالح افراد کیلئے استعمال کریں، انہوں نے کہا کہ ہم نے ہمیشہ ہر ظالم ے خلاف اعلان جنگ کیا ہے، ہمارا منشور ہی ہر ظلم کے خلاف قیام کرنا اور عوامی مسائل کے حل کیلئے آخری لمحے تک کوشش کرنا ہے، انشاء اللہ عوام کی حمایت سے ہمارے امیدوار بلدیاتی انتخابات کے میدان میں فتح سے ہمکنار ہونگے۔ بعدازاں سادات محلہ کمیٹی نے مجلس وحدت مسلمین کے امیدواروں کی حمایت کا اظہار کرتے ہوئے ناصر ملت علامہ راجہ ناصر عباس جعفری کی اتحاد و وحدت اور پاکستان میں فرقہ وارانہ ہم آہنگی کیلئے کی جانے والی کوششوں کو سراہا اور ان کی ہر ممکن حمایت جاری رکھنے کا اعلان بھی کیا۔
وحدت نیوز (اسلام آباد) پاکستان تحریک انصاف کےمرکزی رہنماوں شاہ محمود قریشی اور جہانگیر ترین نے مجلس وحدت مسلمین کے سربراہ علامہ راجہ ناصر عباس جعفری اور مرکزی سیکرٹری امور سیاسیات سید ناصر عباس شیرازی سے ٹیلیفون پر رابطہ کیا ہے اور ہری پور میں کے پی کے پولیس کے رویے پر معذرت کی ہے۔ تحریک انصاف کے دونوں رہنماوں نے واقعہ کی تحقیقات اور ذمہ داروں کے خلاف نوٹس لینے کی یقین دہانی کرائی ہے۔ شاہ محمود قریشی کا کہنا تھا کہ تحریک انصاف کی اعلٰی قیادت اور کارکنان علامہ راجہ ناصر عباس کی عزت اور ان کی قومی امور میں کاوشوں کو قدر کی نگاہ سے دیکھتے ہیں، ناصر عباس شیرازی کا کہنا تھا کہ مجلس وحدت مسلمین ایک پرامن اور محبت وطن سیاسی مذہبی جماعت ہے، اس کے قائدین کے لئے ملک میں کوئی نوگو ایریا نہیں ہے، کے پی کے حکومت غیر ذمہ دار پولیس اہلکاروں کیخلاف کارروائی کرے۔ اس پر شاہ محمود قریشی اور جہانگیر ترین نے یقین دہانی کرائی کہ اس معاملے کا نوٹس لیا جائیگا اور ذمہ داروں کے خلاف کارروائی عمل میں لائی جائیگی۔
وحدت نیوز (قم) چہلم سیدالشہداؑ کے موقع پر زائرین کربلا سے سرکاری اہلکاروں کا رشوت وصول کرنا انتہائی شرمناک فعل ہے۔ ان خیالات کا اظہار گذشتہ روز ایم ڈبلیو ایم قم کے اراکین کابینہ نے ایک ہنگامی اجلاس میں کیا ہے۔ تفصیلات کے مطابق گذشتہ روز پاکستان سے قم پہنچنے والے زائرین نے ایم ڈبلیو ایم کے سیکرٹری جنرل گلزار احمد جعفری اور دیگر مسئولین سے ملاقاتوں کے دوران بتایا ہے کہ پاکستان سے ایران آنے والے زائرین کو ستانا اور لوٹ مار کرنا سرکاری کارندوں کا معمول بن چکا ہے، کانوائے کو رشوت بٹورنے کے لئے ایک ہتھکنڈے کے طور پر استعمال کیا جا رہا ہے۔ ٹرانسپورٹر حضرات سواریوں سے چندہ اکٹھا کرکے سرکاری چوکیوں پر رشوت جمع کراتے ہیں۔ قدم قدم پر زائرین کو رشوت لینے کے لئے ہراساں کیا جاتا ہے۔ کہیں پر کوئی پرسانِ حال نہیں ہے۔
زائرین نے افسوس کرتے ہوئے کہا کہ اب تو پاکستان آرمی کے جوان بھی پولیس کی طرح رشوت کی دوڑ میں شامل ہوگئے ہیں۔ اس صورتحال پر ایم ڈبلیو ایم قم نے فوری طور پر ایک ہنگامی اجلاس بلایا، جس میں یہ طے کیا گیا ہے کہ صدر پاکستان، چیف آف آرمی سٹاف اور وزیراعظم سمیت تمام اعلٰی حکام کو فوری طور پر صورتحال کی سنگینی سے آگاہ کیا جائے اور حکام سے مطالبہ کیا جائے کہ فوری طور پر زائرین کو پریشان کرنے والے اور رشوت خور اہلکاروں کے خلاف کارروائی کی جائے۔ ایم ڈبلیو ایم قم کی ایکشن کمیٹی نے زائرین کے بیانات کو قلمبند اور دیگر شواہد کو جمع کرکے بین الاقوامی اداروں اور انسانی حقوق کی تنظیموں کی طرف رجوع کرنے کے پروگرام پر عملدارآمد شروع کر دیا ہے۔
وحدت نیوز(سکردو) مجلس وحدت مسلمین پاکستان گلگت بلتستان کےرکن اسمبلی کاچو امتیاز حیدرخان نے اپنے ایک بیان میں کہا ہے کہ گلگت بلتستان میں دہشتگرد عناصر کو کھلی چھٹی ملی ہوئی ہے اور حکمران جماعت سیاسی انتقام میں مصروف ہے۔ گزشتہ رات چلاس تھانے پر دہشتگردوں کا منظم حملہ، داریل سے ایس سی او کے انجینئرز کا اغوا حالیہ حکومت کی کارکردگی پر سوالیہ نشان اور کسی طوفان کا پیش خیمہ ہے۔ گلگت بلتستان میں بڑے پیمانے پر دہشتگردی کے واقعات رونما ہو سکتے ہیں اس کے لیے عوام بلخصوص حساس اور ریاستی اداروں کو ہشیار رہنے کی ضرورت ہے۔ گزشتہ رات پولیس کی بروقت کارروائی لائق تحسین ہے اور امید کرتے ہیں کہ پولیس اسی طرح چوکنا رہے گی۔ موجودہ حکومت سے دہشتگردوں کے خلاف آپریشن کرنے اور دہشتگردی سے خطے کو پاک کرنے کا مطالبہ کرنا عبث ہے کیونکہ اس حکومت کے نزدیک دہشتگردی کی تعریف ہی دوسری ہے۔ ان کے نزدیک مخالف سیاسی جماعت اور مخالف نظریے کے حامل لوگ اسی تعریف پر پورا اترتے ہیں جبکہ وہ خود دہشتگردوں کے سامنے جاکر ہاتھ جوڑ رہے ہوتے ہیں اور ان سے امن کی بھیک مانگتے ہیں۔
کاچوامتیاز نے کہا کہ وزیراعلٰی گلگت بلتستان یا تو دیدہ و دانستہ دہشتگرد عناصر کو کھلی چھٹی دے رکھی ہے یا وہ اس غلط فہمی کا شکار ہے کہ امن بھیک مانگنے سے نصیب ہوتا ہے۔ امن کے لیے قربانی درکار ہوتی ہے اور دہشتگردی کو طاقت کے ذریعے ہی ختم کیا جا سکتا ہے۔ دہشتگردی کے حوالے سے وزیراعلٰی گلگت بلتستان کا لہجہ مختلف ضلعوں میں مختلف ہو جاتا ہے۔ موجودہ صوبائی حکومت دہشتگردوں کے خلاف سخت اقدامات اٹھانے کی پوزیشن میں نہیں ہے۔ ہم پاکستان آرمی، فورس کمانڈر، آئی جی پی، سکیورٹی فورسز اور حساس اداروں سے مطالبہ کرتے ہیں کہ حکومتی تیور کو دیکھے بنا دہشتگردوں کے خلاف حکمت عملی تیار کرکے کارروائی شروع کرے۔ بلخصوص شاہراہ قراقرم اور حساس مقامات کی سکیورٹی میں اضافہ کرے۔ اگر صوبائی حکومت کی طرف دیکھتے رہے تو ممکن ہے معاملہ ہاتھ سے نکل جائے اور پچھتاوے سے سوا کچھ بھی ہاتھ نہ آئے۔
وحدت نیوز (کراچی) مجلس وحدت مسلمین پاکستان کے مرکزی سیکر ٹری اطلاعات سید محمد مہدی عابدی نے خیبر پختونخواہ حکومت کی جانب سے ایم ڈبلیو ایم کے مرکزی سیکرٹری جنرل علامہ ناصر عباس جعفری کو ہری پور میں جلوس عزاء میں جانے سے روکنے کی پر زور مذمت کرتے ہوئے کہنا تھا کہ خیبر پختونخواہ حکومت کالعدم جماعتوں کے ہاتھوں ہماری نسل کشی روکنے میں مکمل ناکام ہو گئی وزیر اعلی خیبر پختونخواہ سمیت اسمبلی میں موجود بعض وزراء ملت تشیع کیخلاف سازشوں میں آگے نظر آتی ہے۔وحدت ہاؤس کراچی سے جاری اپنے بیان میں ان کا کہنا تھا کہ خیبر پختونخواہ حکومت محرم الحرام میں شیعہ نسل کشی روکنے میں یکسر ناکام نظر آتی ہے 1ماہ میں ملت جعفریہ سے تعلق رکھنے والے اہم افراد کو ٹارگٹ کلنگ کا نشانہ بنایا کیا جو ملی نقصان ہے صوبہ میں موجود کالعدم جماعتوں اور جرائم پیشہ افراد کے خلاف تا حال کوئی ایکشن نہیں لیا گیاجس سے صوبہ کی عوام بھی حکومت سے بدزن ہے انہوں نے کہا کہ الحمد اللہ ایم ڈبلیو ایم کی تنظیمی و سیاسی سر گرمیاں روز روشن کی طرح اہلیان پاکستان کے سامنے عیاں ہیں ملی وحدت مظلوموں کے شانہ بہ شانہ کھڑے ہیں اور ہر ملک و اسلام دشمن عناصر کے خلاف سدا ئے احٹجاج بلند کرنے سمیت ملکی عوام کی خدمت ہمارا اولین فریضہ ہے ۔علامہ راجہ ناصر عباس جعفری ملت تشیع پاکستان کے لیڈر اور اتحاد امت کے داعی شخصیت ہیں،تحریک انصاف کے قول و فعل میں تضاد ہی اس کے لئے تنہائی کا سبب بنے گا،دہشت گردوں کو کے پی کے کھلی آزادی اور امن پسندوں کے گرد گھیرا تنگ کیا جا رہا ہے،کے پی کے حکومت کے خلاف ملت جعفریہ ہر فورم پر آواز اٹھائے گی ،تحریک انصاف کی اس دوہرے معیار کیخلاف احتجاج کریں گے۔
وحدت نیوز (لاہور) بلدیاتی انتخابات میں کالعدم جماعتوں کے ساتھ اتحاد نے سیاسی و لبرل جماعتوں کے پول کھول دیے،بدقسمتی سے ہمارے سیاستدان اقتدار کے حصول کے لئے ملکی و قومی مفادات کو داوُ پر لگانے سے بھی نہیں کتراتے،دہشت گردی کے خلاف جنگ میں مصلحت پسندی کاشکار حکمران اور سیاسی اشرافیہ ہی سب سے بڑی رکاوٹ ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخا لق اسدی نے صوبائی سیکرٹریٹ میں کارکنان کے اجلاس سے خطاب میں کیا ۔
انہوں نے کہا کہ اسلام آباد میں عالمی دہشت گرد اور صیہونی آلہ کار گروہ ،،داعش،، کے ہمدردوں کیخلاف حکمرانوں کی خاموشی دہشت گردی کے خلاف جنگ اور نیشنل ایکشن پلان کو ناکام بنانے کی سازش ہے،دارالخلافہ میں موجود مٹھی بھر انتہا پسندوں پر قابو نہ پا سکنے والی حکومت سے ملک بھر میں دہشت گردوں کے خلاف کاروائی کی امید رکھنے والے احمقوں کی جنت میں رہتے ہیں،بلوچستان،سندھ اور خیبر پختونخواہ میں ہماری نسل کشی جاری ہے،دوسری طرف پنجاب میں ہمیں دیوار سے لگانے کا عمل جاری ہے،ملت تشیع کا جرم یہ ہے کہ اس نے ہمیشہ اسوہ حسینی پر عمل کرتے ہوئے ہمیشہ امن ،محبت اور بھائی چارے کا پیغام عام کیا،انتہا پسندوں اور دہشت گردوں کیخلاف علم بغاوت بلند کیا،ملکی سلامتی و استحکام کے لئے ہزاروں شہداء کی قربانیاں دیں،معاشرے میں عدم تشدد اور وحدت و اخوت کے لئے کلیدی کردار ادا کیا،وطن دشمنوں کے ناپاک عزائم کو کامیاب ہونے کا موقع نہیں دیا،اور اگر عاقبت نااندیش حکمرانوں کی نظر میں یہ جرم ہے تو ہم یہ جرم کرتے رہیں گے،ہم شہادتوں اور دہشت گردوں اور ان کے سیاسی سرپرستوں کے اوچھے ہتھکنڈوں سے مرعوب ہونے والے نہیں،انشااللہ ہم وطن عزیز کی سلامتی و بقا کے لئے اپنے خون کی آخر قطرے تک جدو جہد جاری رکھیں گے،اور دہشت گرد اور ان کے آقاوُں کے ناپاک اداروں کو خاک میں ملا کر دم لیں گے۔
وحدت نیوز (کربلا) وحدت اسکائوٹس کا پندرہ رکنی وفدزائرین امام حسین ؑکی خدمت کیلئے کربلا معلیٰ پہنچ گیا ہے،وفدکی سربراہی مرکزی سیکریٹری وحدت اسکائوٹس برادرتنصیر حیدرشہیدی کررہے ہیں،واضح رہے کہ اس برس پہلی مرتبہ وحدت اسکائوٹس کا گروپ مقامی اسکائوٹس رضا کاروں کے تعاون سےنجف تا کربلا پاپیادہ زائرین کو میڈیکل فرسٹ ایڈ، سبیل اور دیگر امورمیں خدمات فراہم کریں گے۔
وحدت نیوز (ہری پور) مجلس وحدت مسلمین کے سربراہ علامہ ناصر عباس جعفری کو خیبرپختونخوا پولیس کی جانب سے ہری پور داخل ہونے سے روک دیا گیا ہے، پولیس کا موقف ہے کہ ہوم ڈیپارٹمنٹ سے ایک خصوصی لیٹر جاری کیا گیا ہے جس میں سربراہ مجلس وحدت مسلمین کے خیبرپختونخوا میں داخلے پر پابندی عائد کی گئی ہے، اس لئے علامہ ناصر عباس ہری پور داخل نہیں ہو سکتے۔ علامہ ناصر عباس جعفری نے پولیس سے استفسار کیا کہ ہوم ڈیپارٹمنٹ کی جانب سے جاری کیا گیا لیٹر انہیں دکھایا جائے جس پر مقامی پولیس کا کہنا تھا کہ ان کے پاس لیٹر تو نہیں ہے، البتہ انہیں یہی آڈر ملا ہے کہ آپ صوبے خیبرپختونخواہ میں داخل نہیں ہو سکتے۔ دوسری جانب مجلس وحدت مسلمین کے مرکزی ترجمان نے خیبرپختونخواہ حکومت کی جانب سے علامہ راجہ ناصر عباس جعفری کو ہری پور جانے سے روکنے کی شدید مذمت کی ہے۔ اپنے ایک بیان میں ترجمان ایم ڈبلیو ایم نے کہا ہے کہ خیبرپختونخواہ حکومت کالعدم جماعتوں کے ہاتھوں ہماری نسل کشی روکنے میں مکمل ناکام اور ملت تشیع کیخلاف سازشوں میں آگے نظر آتی ہے، علامہ راجہ ناصر عباس جعفری ملت تشیع پاکستان کے لیڈر اور اتحاد امت کے داعی ہیں، تحریک انصاف کے قول و فعل میں تضاد ہی اس کے لئے تنہائی کا باعث بنے گا، ترجمان کا مزید کہنا تھا کہ دہشت گردوں کو کے پی کے میں کھلی آزادی اور امن پسندوں کے گرد گھیرا تنگ کیا جا رہا ہے، کے پی کے حکومت کے خلاف ملت جعفریہ ہر فورم پر آواز اٹھائے گی۔ یاد رہے کہ علامہ ناصر عباس جعفری نے ہری پور میں ایک مجلس عزا سے خطاب کرنا تھا۔
وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے پاکستان پیپلز پارٹی پارلیمنٹرین کے مرکزی رہنما ، سینئرسیاستدان مخدوم امین فہیم کے انتقال پر دلی رنج وغم وافسوس کا اظہار کیا ہے ، مرکزی سیکریٹریٹ سے جاری تعزیتی پیغام میں ان کاکہنا تھا کہ مخدوم امین فہیم ذیرک ومدبر،شیریں سخن، سیاست تھے، آمرانہ نظام حکومت کےخلاف آہنی دیوارتسلیم کیئے جاتے تھے،ضیائی دورآمریت میں جمہوریت کی بحالی کے لئے سعوبتیں برداشت کیں ، ان کے انتقال سے پوری پاکستان کی سیاسی برداری ایک عظیم سیاسی رہنما سے محروم ہوگئی ہے جس کا خلہ مدتوں پورا نہیں ہوسکے گا۔خدا مرحوم کے درجات کو بلنداور پسماندگان کو صبرجمیل عنایت فرمائے۔
وحدت نیوز(کراچی) مجلس وحدت مسلمین کے مرکزی سیکریٹری امور تبلیغات علامہ اعجاز بہشتی نے یونین کمیٹی 11جعفرطیاروارڈنمبر3ملیرکے نامزد بلدیاتی امیدواروں کی کارنرمیٹنگ سے خطاب کرتے ہوئے کہا کہ سیاسی فرعونوں سے نجات حاصل کرنے کیلئے حسینی جذبے سے سرشارعوام کا5دسمبرکو میدان میں آنا ضروری ہے، ا س موقع پر ایم ڈبلیوایم ضلع ملیر کے سیکریٹری جنرل احسن عباس رضوی، پاکستان عوامی تحریک کے رہنما خان محمد بلوچ ، نامزد امیدوار برائے چیئرمین جعفرالحسن، وائس چیئرمین عارف رضا، جنرل کونسلر وارڈنمبر3ممتاز مہدی رضوی نے بھی خطاب کیا۔علامہ اعجازبہشتی نے کہا کہ پروردگارعالم نے قرآن کریم میں مظلوموں کو حق حکومت دینے کا وعدہ کیا ہے ، خدا کے وعدے ہمیشہ سچے ہوتے ہیں ،ایم ڈبلیوایم کا انتخابات میں حصہ لینا کو ئی جذباتی اورغیر منطقی فعل نہیں ، عدل وانصاف کے قیام کیلئے مخلصین کاسیاسی طاقت حاصل کرناشرعی وعقلی فریضہ ہے،عوام پر حق حکمرانی جب تک فاسقین اور فاجرین کو حاصل رہے گا، عوام اپنے جائز حقوق کیلئے اسی طرح سرگرداں رہیں گے، مکتب اسلام میں سیکیولرازم ، کمیونزم کی کوئی گنجائش نہیں، ہمیں خدا نے وہ طاقت عطاکی ہے کہ وہ دنیا کے محروموں اور مظلوموں کو راہ نجات دکھا سکتے ہیں ، سابقہ الیکشن اور موجودہ بلدیاتی الیکشن میں حصہ لینے کا مقصد پسے ہو ئے طبقے کا با اختیار بنانے میں مدددینا ہے انشاء اللہ ایم ڈبلیوایم کے نامزد امیدوار کامیاب ہونے کے بعد تعلیمات علوی کی روشنی میں عادلانہ نظام سیاست کی بنیاد ڈالیں گے انہوں نے بلدیاتی انتخابات میں کالعدم گروہ سے اتحاد کرنے والی سیاسی جماعتوں کی پالیسیز کی شدید مذمت کی اور کہا کہ یہ نیشنل ایکشن پلان کی خلاف ورزی ہے ،الیکشن کمیشن اور حکمرانوں کو اس کا نوٹس لینا چاہیئے ،کالعدم گروہ کے ساتھ قومی جماعتوں کے پرچم لہرائے جا رہے ہیں جو اس بات کا ثبوت ہے کہ ان جماعتوں کو صرف اقتدار سے پیار ہے،یہ کرسی کے پجاری ملک کی اینٹ سے اینٹ بجانے والے گروہ کو اپنا کاندھا پیش کر کے ملکی آئین کا مذاق اڑا رہے ہیں،انہوں نے مزید کہا کہ ہم جمہوریت اور ملک کے آئین پر یقین رکھتے ہیں اور نام نہاد جمہوری جماعتوں اور حکمرانوں کی طرف سے غیر جمہوری رویہ اور آئین پاکستان کو تسلیم نا کرنے والے دہشت گردوں کے سرپرستوں کے خلاف خاموشی لمحہ فکریہ ہے،آج پاکستان میں ایک مخصوص سوچ اور نظریہ کو مسلط کرنے کی کوشش ہو رہی ہے،ہم اس انتہا پسندانہ سوچ کو مسلط نہیں ہونے دینگے،آئین پاکستان میں تمام مکاتب فکر کو یکساں آزادی حاصل ہے،عالمی دہشت گرد داعش کے پیروکار وں کے نظریہ اور سوچ کو دنیا اسلام کے ہر مہذب مسلمانوں نے نفی کی ہے۔
