The Latest
گیٹ وے ہونے کے ناطے گلگت بلتستان کے عوام اکنامک کوریڈور کے فوائد سے استفادہ کرنے کا اولین حق رکھتے ہیں،ایم ڈبلیوایم
وحدت نیوز (گلگت) مجلس وحدت مسلمین گلگت بلتستان کے نمائندہ وفد نے شیخ نیئر عباس مصطفوی سیکرٹری جنرل ایم ڈبلیو ایم گلگت بلتستان کی قیادت میں گورنر گلگت بلتستان میر غضنفر علی سے ملاقات کیا اور بحیثیت گورنر گلگت بلتستان منصب سنبھالنے پر میر غضنفر علی مبارکباد پیش کیا۔وفد نے گورنر گلگت بلتستان سے گلگت بلتستان کی تعمیر وترقی اور امن و امان کے قیام میں تعاون کرنے کی یقین دہانی کرائی،سیکرٹری جنرل مجلس وحدت مسلمین شیخ نیئر عباس مصطفوی نے اس موقع پر پاک چائنا اکنامک کوریڈور کی اہمیت اور گلگت بلتستان کے تحفظات سے گورنر کو آگاہ کیا۔
انہوں نے کہا کہ اقتصادی راہداری میں گلگت بلتستان کے حقوق کو نظر انداز کیا گیا تو علاقے میں کشیدگی اور تناؤ بڑھنے کا اندیشہ ہے اور اس منصوبے کی تمام جزئیات سے اراکین اسمبلی اور عوام کو لاعلم رکھنا تشویشناک صورت حال ہے ۔انہوں نے کہا کہ ہماری جماعت جی بی کے عوام کے حقوق سے کسی صورت دستبردار نہیں ہوگی۔اس منصوبے کے گیٹ وے ہونے کے ناطے گلگت بلتستان کے عوام اکنامک کوریڈور کے فوائد سے استفادہ کرنے کا اولین حق رکھتے ہیں۔
وفد نے گلگت سکردو روڈ کی تعمیر کے حوالے سے غیر ضروری تاخیر پر گورنر سے سخت احتجاج کرتے ہوئے مطالبہ کیا کہ اس اہم منصوبے پر فوری عمل درآمد کیا جائے۔ایفاد پراجیکٹ کے حوالے سے وفد نے گورنر گلگت بلتستان کو اپنے تحفظات سے آگاہ کیا اور کہا کہ ایفاد پراجیکٹ میں ضلع گلگت ،ہنزہ نگر سمیت کئی اضلاع کو محروم رکھنا بدنیتی پر مبنی ہے ،ایفاد پراجیکٹ کا دائرہ کار گلگت بلتستان کے تمام اضلاع تک پھیلایا جائے تاکہ اس سے پورے جی کے عوام مستفید ہوں۔وفد نے ملازمتوں میں میرٹ کو یقینی بنانے کے حوالے سے مطالبہ کیا کہ تمام محکموں کے ملازمتوں کوNTS کے ذریعے پُر کیا جائے تاکہ کسی غریب کا استحصال نہ ہو۔وفد نے قراقرم یونیورسٹی میں پیش آنے والے ناخوشگوار واقعے پر افسوس کا اظہار کیا اور یوم حسین ؑ کے پرامن انعقاد کو یقینی بنانے کیلئے تمام ضروری اقدامات اٹھائیں جائیں۔
گورنر گلگت بلتستان نے وفد کو یقین دلایا کہ تمام جائز مطالبات پر تحفظات کو دور کرنے کیلئے ضروری اقدامات اٹھائے جائینگے اور علاقے سے دہشت گردی ،فرقہ واریت کے خاتمے اور گلگت بلتستان کی ترقی و خوشحالی کیلئے تمام جماعتوں کو اعتماد میں لیکر درست سمت میں اہم فیصلے کئے جائینگے۔
وحدت نیوز (مظفرآباد) تعلیمی پیکچ بہترین ، عملددرآمد شفاف طریقے سے ہونا چاہیے ، کسی برادری ،پارٹی یا مخصوص طبقے کو فائدہ پہنچانے کے بجائے میرٹ کی بالا دستی کو ملحوظ خاطر رکھنا چاہیے، ان خیالات کا اظہار مجلس وحدت مسلمین پاکستان آزاد کشمیر کے سیکرٹری تعلیم مولانا سید طالب حسین ہمدانی نے آزاد کشمیر کے تعلیمی پیکچ پر اپنے ردعمل کا اظہار کرتے ہوئے کیا، انہوں نے کہا کہ اگر تو تعلیمی پیکچ تعلیمی انقلاب کے لیے ہے، سکولوں کی حالت زار بہتر بنانے کے لیے ہے، تعلیم کو عام کرنے کے لیے ہے، غریب کی فلاح کے لیے ہے، میرٹ کی بالا دستی کے لیے ہے ۔ تو مجلس وحدت مسلمین اسے سراہتی ہے، لیکن اگر یہ الیکشن کمپین ہے، جیالا نوازی کا ایک پروگرام ہے، سیاست برائے سیاست ہے، میرٹ کے بجائے وزراء کا کوٹہ ہے، تو اسے کسی طور پر بھی قبول نہیں کیا جائے گا۔ مولانا طالب ہمدانی نے کہا کہ ہم امید کرتے ہیں کہ حکومت کی نیت اچھی ہو گی ، تعلیمی اصلاحات کے لیے اس نے اس پیکچ کا اعلان کیا ہو گا، اور آزاد کشمیر میں تعلیمی معیار کو بہتر بنانے کی خاطر اسے شفاف طریقے سے نافذ کرے گی۔
وحدت نیوز (گلگت) مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی کے زیر صدارت صوبائی پولیٹیکل کونسل کا اجلاس وحدت ہاؤس گلگت میں منعقد ہوا جس میں بلتستان ڈویژن سے علامہ احمد نوری کی قیادت تمام حلقوں کے نمائندوں نے شرکت کی۔ اراکین اسمبلی حاجی رضوان علی،کاچو امتیاز حسین ،بی بی سلیمہ اورایم ڈبلیو ایم شعبہ خواتین کی کوارڈینیٹر سائرہ ابراہیم نے بھی اجلاس میں شرکت کی۔ اجلاس کے اختتام پر اعلامیہ جاری کیا گیا۔
گلگت بلتستان کی آئینی حیثیت کے تعین میں مزید تاخیر برداشت نہیں کی جائیگی،پاک چائنااکنامک کوریڈور کی تمام تفصیلات منظر عام پر لائی جائیں اور گلگت بلتستان کے حقوق پر کسی کو شب خون مارنے کی اجازت نہیں دی جائیگی۔تمام محکموں میں گریڈ 14 تک NTS اوراپر سکیل کے ملازمتیں پبلک سروس کمیشن کے ذریعے پر کی جائیں اور میرٹ کی پائمالی ناقابل برداشت ہوگی۔گلگت بلتستان کے عوام بد ترین لوڈ شیڈنگ کے اذیت میں مبتلا ہیں خاص کر سکردو پر اندھیروں کا راج ہے۔ گلگت سکردو روڈ کی تعمیر میں تاخیرسے بلتستان کے عوام سخت تکالیف میں مبتلا ہیں ،حکومت کھوکھلے نعروں کی بجائے عملی طور پر اقدامات کرے ۔ اعلامیئے میں کہا گیا کہ چور دروازوں سے بھرتیوں کا سابقہ حکومت کے فارمولے پر عمل کیا جارہا ہے جو کہ علاقے کے پڑھے لکھے بیروز گاروں سے زیادتی ہے۔دیامر سے مغوی انجینئرز کی بازیابی میں پاک آرمی کا کردار لائق تحسین ہے لیکن ان اغوا کاروں اور دیگر دہشت گردوں کے خلاف آپریشن ناگزیر ہے ۔علاقے کو پرامن بنانے کیلئے بے رحم آپریشن کا فوری آغاز کیا جائے۔جامعہ قراقرم میں یوم حسین کے انعقاد پر پابندی محسن انسانیت کی شان میں گستاخی تصور کی جائیگی۔ اجلاس میں شہید ضیاء الدین کے قاتلوں کی رہائی پر تحفظات کا اظہار کیا گیا اور مطالبہ کیا کہ شہید ضیاء الدین رضوی کیس کو ری اوپن کرکے مجرموں اور سہولت کاروں کو کیفر کردار تک پہنچایا جائے۔
وحدت نیوز (گلگت ) مغوی انجینئرز کی بازیابی میں پاک آرمی خصوصاً فورس کمانڈر عاصم حسین کا کردار قابل تعریف ہے۔سابق سپیکر ملک مسکین نے مغوی انجینئرز کی بازیابی میں کلیدی کردار ادا کیا ہے۔دیامر کے امن پسند رہنماؤں نے دہشت گردوں سے لاتعلقی کا اظہار کرکے دہشت گردوں اور ان کے پشت پناہوں کو پیغام دیا ہے کہ گلگت بلتستان دہشت گردوں کی آماجگاہ نہیں بننے دیا جائیگا۔حکومتی اہداف محض مغویوں کی بازیابی تک محدود نہیں ہونا چاہئے بلکہ واقعے میں ملوث تمام کرداروں کے خلاف فیصلہ کن آپریشن کرکے انہیں کیفر کردار تک پہنچایا جائے۔
مجلس وحدت مسلمین گلگت بلتستان کے ڈپٹی سیکرٹری جنرل عارف حسین قنبری نے کہا کہ گلگت بلتستان کو دہشتگردوں سے پاک کرنے کیلئے ضروری ہے کہ ٹارگٹڈ آپریشن کا آغاز کیا جائے اور علاقے کو دہشت گردوں کی آماجگاہ بننے نہ دیا جائے۔انہوں نے مغویوں کی بازیابی میں پاک آرمی ،حساس اداروں اور علاقے کے امن پسند رہنماؤں کی مخلصانہ کوششوں کو خراج تحسین پیش کیا جن کی مسلسل کوششوں سے دو قیمتی انسانوں کی جانیں بچ گئیں اور اگر علاقے کے عوام کا تعاون یونہی سیکورٹی اداروں سے جاری رہا تو دہشت گرد خود اپنی موت آپ مرجائینگے۔
انہوں نے کہا کہ دیامر کے عوام نے دہشت گردوں کو ایک طرح سے پیغام دیا ہے کہ علاقے میں ان کیلئے کوئی جگہ نہیں ،اب یہ حکومت کا کام ہے کہ وہ ان چند دہشت گردوں کو جنہوں نے علاقے کا امن تباہ کیا ہوا ہے سے کس طرح پیش آتی ہے۔دہشت گردوں کا کو ئی مذہب نہیں ہوتا ہے اور وہ صرف بیرونی ایجنڈے پر فساد پھیلانے میں مصروف ہیں لہٰذا ضرورت اس امر کی ہے کہ بلا تفریق ان شیطانی قوتوں کے خلاف متحد ہوکرپوری طاقت سے حملہ کیا جائے علاقے کا مستقبل دہشت گردوں کے رحم و کرم پر نہ رہے۔حکومت مصلحت پسندی کا شکار نہ ہوجائے ورنہ حکومتی اہلکار سب سے پہلے دہشت گردوں کے نشانے پر ہونگے۔
انہوں نے ضلع غذر اور ضلع دیامر میں پولیس چوکیوں کو نشانہ بنانے والے دہشت گردوں اور ان کے سہولت کاروں کیخلاف بھرپور ایکشن نہ لینے کو حکومت کی نااہلی اور مصلحت پسندی سے تعبیر کرتے ہوئے کہا کہ اگر حکومت کا یہی رویہ جاری رہا تو اکنامک کوریڈور سمیت علاقے کے امن کو سنگین خطرات لاحق ہوجائینگے۔
وحدت نیوز(جیکب آباد) چہلم میں سیکورٹی انتظامات کا جائزہ لینے اور دیگر مسائل اور مطالبات کے سلسلے میں ڈپٹی کمشنر اور ایس ایس پی جیکب آباد نے مجلس وحدت مسلمین پاکستان کے مرکزی رہنما شہداء کمیٹی کے چیئرمین علامہ مقصود علی ڈومکی اور وارثان شہداء کمیٹی کے اراکین سے تفصیلی میٹنگ کی۔
اس موقع پر گفتگو کرتے ہوئے علامہ مقصود علی ڈومکی نے کہا کہ کالعدم جماعت کے مراکز اورمدرسے دھشت گردی کی نرسری کا کام کرتے ہیں جہاں ہر سال سینکڑوں دھشت گرد تیار کئے جاتے ہیں۔ ان مراکز اور ٹریننگ کیمپس کا خاتمہ کیئے بغیر امن کا قیام ممکن نہیں۔ نیشنل ایکشن پلان پر عمل در آمد کے لئے تکفیری سوچ کا خاتمہ کیا جائے۔ دھشت گردی کے خلاف پاک فوج، رینجرز اور پولیس کو بھرپور کارروائی کرنی چاہئے۔ اربعین کے موقع پر سیکورٹی کے فول پروف انتظامات ضروری ہیں، مگر اس میں عام شہری کو مشکل میں نہ ڈالا جائے۔ اس ملک کے اداروں میں دھشت گردوں کے خلاف لڑنے کی مکمل صلاحیت موجود ہے، لہذا ریاست ہر سطح پر دھشت گردوں کے خلاف اعلان جنگ کرے۔ ملک کے بہادر عوام اپنی بہادر افواج کے شانہ بشانہ دھشت گردوں سے لڑنا چاہتے ہیں۔ جبکہ نیشنل ایکشن پلان سے متعلق نواز حکومت کا رویہ غیرسنجیدہ ہے، نواز گورنمنٹ کا رویہ دھشت گردی کے خاتمہ میں رکاوٹ ہے۔
شھداء کمیٹی کے اراکین نے اس موقع پر اپنے مطالبات کو دہراتے ہوئے دھشت گردی کے خلاف آپریشن نہ ہونے کی صورت میں ۲۹ دسمبر کو لانگ مارچ کرنے کے عزم کا اعادہ کیا،اس موقع پر جیکب آباد میں شہدائے شب عاشور کے نام سے چوک کے قیام کا فیصلہ بھی کیا گیا۔
وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں ڈویژنل سیکریٹری جنرل عباس علی موسوی نے کہاہے کہ زائرین کی خدمت میں جس طرح انتظامیہ ، کسٹم اور ایف آئی اے ڈیپارٹمنٹ نے تفتان بارڈر پر شب و روز زائرین کو چہلم سید الشہداء پر پہنچنے کے لیے کام کیے ان کا تہہ دل سے مشکور ہیں۔ حالانکہ آفس ٹائمنگ کا ایک وقت مقرر ہوتاہے لیکن جس طرح انہوں نے آفس ٹائمنگ سے ہٹ کر اپنے قلیل اسٹاف کے ساتھ زائرین کی خدمت دن رات محنت کی ہے وہ قابل تحسین ہے۔ جس کے لیے جتنا کہا جائے کم ہے ۔
انہوں نے مزید کہا کہ ہم ان کے اس اقدام پرفکر کرتے ہیں ۔ کہ جس نظم وضبط کے ساتھ انہوں نے مسافروں کا خیال رکھا اور کسی قسم کی تکلیف نہ ہونے دیا۔ وطن عزیز میں ایسے اداروں کی جہاں لوگ تنقید بھی کرتے ہیں لیکن جہاں اچھے کارکردگی دکھاتے ہیں تو ذکر کم ہی ہوتا ہے لیکن ہم ان کا شکریہ ادا کرتے ہیں کہ وقت کو ضائع کئے بغیر جس طرح انہوں نے دن رات تھکاوٹ کو بھول کر اپنے ڈیوتیز انجام دیے قابل رشک اور ستائش ہے ۔ جنہوں نے مسائل کو نظر انداز کرکے اپنے شہریوں کی خدمت میں کوئی کسر نہیں چھوڑیں۔
وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے اربعین امام حسین ؑپرکربلاروانگی سے قبل مرکزی کابینہ کے اجلاس سے خطاب کرتے ہوئے کہا کہ ملک دشمن قوتیں قومی استحکام کو مجروح کرنے میں دن رات کوشاں ہیں ،برسراقتدار قومی وصوبائی جماعتوں نے کالعدم جماعتوں سے اتحاد کرکے نیشنل ایکشن پلان کا جنازہ نکال دیا، قومی سلامتی کی راہ میں سب سے بڑی رکاوٹ خود پارلیمانی جماعتیں ہیں ، داعش کا فتنہ پاکستان کی سرحدوں سے اسلام آباد تک پہنچ چکا ہے، آپریشن ضرب عضب اب تک اپنےمکمل اہدافات حاصل نہیں کرسکا،کراچی میں فوجی جوانوں پر حملہ قابل مزمت ہے، شہید جوانوں کے اہل خانہ کے غم میں برابر کے شریک ہیں ،انہوں نے کہا کہ بعض نادیدہ قوتیں اقتدار کی عوامی سطح تک منتقلی اور شفاف الیکشن کے انعقاد سے خوفزدگی کا شکار ہیں ، یہ قوتیں دہشت گرد کاروائیوں کے ذریعے انتخابی عمل کو سبوتاژکرنے کے درپہ ہیں ، ملک بھر میں عسکری قوتوں کے ہاتھوں ہزارو ں دہشت گرد گرفتار ہوئے بتایا جائے کہ کتنے لوگوں کو کیفر کردار تک پہنچایا گیا،سانحہ آرمی پبلک اسکول کے مجرموں کی طرح سانحہ شکارپور، سانحہ جیکب آباد، سانحہ چھلگری کے متاثرین بھی قاتلوں کی سزائے موت کے منتظر ہیں ، ریاستی ادارے دہشت گردوں میں تفریق ختم کریں ۔
انہوں نے مشرق وسطیٰ کی تبدیل ہوتی سیاسی صورتحال پر روشنی ڈالتے ہوئے کہا کہ ترکی کو عالم اسلام کا قبلہ اور اردگان کو امیرالمومنین بنانے والے ہوش میں آجائیں ، ترکی اسرائیلی ایماءپر داعش کی سرپرستی میں مصروف عمل ہے، جس کا ہدف عراق ،شام ،لبنان، ایران، فلسطین کو کمزور کرکے اسرائیلی مفادات کا تحفظ کرنا ہے،عرب ذرائع ابلاغ کے مطابق ترک وزیراعظم رجب طیب اردگان کا بیٹا داعش کے زریعے عراق سے تیل کی اسمگلنگ کرکے امریکہ و فراہم کررہا ہے، انہوں نے حکومت پاکستان اور افواج پاکستان سے مطالبہ کیا کہ وہ ترک حکومت کی جانب سے داعش کی بے جا حمایت وسرپرستی پر احتجاج کریں ، داعش ایک ایسا فتنہ ہے جو دوسروں کوبعد میں پہلے خود کو جنم دینے والوں کو ڈستا ہے۔
وحدت نیوز (چنیوٹ) استحکام پاکستان کے دشمنوں کے خلا ف کاروائیاں قابل تحسین ہے پاک فوج ضرب عضب کا دائرہ وسیع کرکے ان تمام عناصر کا خاتمہ کرے جو بیرونی اشاروں پر پاکستان میں بدامنی کے مرتکب ہورہے ہیں ان خیالات کااظہار مجلس وحدت مسلمین پاکستان کے مرکزی سیکرٹری سیاسیات علامہ سید ناصر عباس شیرازی نے مجلس وحد ت مسلمین اور ہم خیالی گروپ کے الیکشن کے امیدواروں کے اعزاز میں دیئے گئے ظہرانے سے خطاب کرتے ہوئے کیا انہوں نے مزید کہا کہ وطن عزیز کی بدقسمتی یہ ہے کہ ہمیں حکمرانوں کی شکل میں ہمیشہ وہ افراد ملے جو وطن عزیز کو دیمک کی طرح چاٹتے رہے غریب عوام کا طبقہ ہمیشہ مظلومیت کے ساتھ پستا چلا گیا معاشی مسائل فوری انصاف کی فراہمی اور جان و مال کا تحفظ ناپید ہے ملکی خوشحالی کیلئے یہ ضروری ہے کہ بلدیاتی الیکشن میں عوامی نمائندے بے لوث ہوکر اپنی جیبوں کو بھرنے کی بجائے عوام کے مسائل کے حل کی طرف توجہ دیں اگر حقیقی جمہوریت یہاں پر پنپ جائے تو پاکستان خوشحالی کا گہوارہ بن جائے۔
انہوں نے مزید کہا کہ ہمیں اپنی خارجہ پالیسی پر نظر ثانی کرکے حالیہ مشرق وسطیٰ کے حالات کے بارے میں ایک ٹھوس حکومت عملی کے ساتھ مظلومین کی حمایت میں پالیسی مرتب کرنی چاہیے ایک سوال کے جواب میں انہوں نے کہا کہ ہم مذہبی منافرت کو پھیلا کر مذہبی سیاست کے قائل نہیں ہیں او ر ہم نہ اسکو برداشت کرتے ہیں انہوں نے کہا کہ ہم مملکت خداداد کی جغرافیائی حدود کے اندر خدمت انسانیت نمائندگان اس نظریے کے تحت اپنے تن من کے ساتھ مصروف ہوں گے آخر میں انہوں نے فلسطین کے نہتے مظلوم عوام پر اسرائیلی مظالم پر امت مسلمہ کی خاموشی پر تنقید کرتے ہوئے کہا کہ پیرس حملوں پر اظہار افسوس کیا ۔
وحدت نیوز (سجاول) بٹھورو میں مجلس عزا سے خطاب کرتے ہوئے ایم ڈبلیو ایم سجاول کے سیکریٹری تبلیغات مولانا زاھد حسین زاھدی نے کہا کہ جب تک ہم سیاسی شعور نہیں اپنائیگے اور اپنے ارد گرد کے ماحول اور اس کی اصلاح کے لئے کوئی اقدام نہیں کرتے تب تک عزاداروں پر مولا حسین ع کی قربانیوں کا مقصد قرضدار رہیگا
انھوں نے کہا کہ ھمارے پاس عزاداری جیسی نعمت ھونے باوجود ھم مغلوب اور بےبس دکھائی دیتے ہیں،اس کا سبب ہم میں سیاسی شعور اور بصیرت کا نہ ھونا ہے.
وحدت نیوز (مظفرآباد) شہادت امام حسین ؑ میں ایسی حرارت جو کبھی دلوں کو ٹھنڈا نہیں ہونے دے گی، کربلا ایسا معجزہ حسینی کہ تا قیام قیامت اپنا درس دیتا رہے گا، انتظامیہ آزاد کشمیر بھر میں چہلم جلوسوں کے فول پروف سیکورٹی کا اہتمام کرے ، چہلم سید الشہداء ؑ شایان شان طریقے سے منایا جائے، عزادار رسولؐ گرامی قدر کو ان کے بیٹے کا پرسہ دیں گے، ان خیالات کا اظہار ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے سلطان پور پٹھاناں میں مجلس عزا سے خطاب کے بعد معززین علاقہ سے ملاقات کے دوران کیا ، انہوں نے کہا کہ جب تک کائنات باقی ہے ذکر حسین جاری رہے گا، شہادت امام حسین ؑ مومنوں کے دلوں میں ایسی حرارت جو کبھی ٹھنڈا نہیں ہونے دے گی۔ کربلا ایسا معجزہِ حسین ؑ کہ تاقیام قیامت اپنا درس جاری رکھے گا۔ مظلوموں محروموں و محکوموں کو درس حریت دیتا رہے گا، کربلا میں چہلم امام حسین ؑ کے موقع پر دو کروڑ سے زائد افراد کا جمع ہونا اس بات کی واضح دلیل ہے کہ باطل جتنی کوششیں کر سکتا ہے کر لے ، جتنے حربے استعمال کر سکتا ہے کر لے ، لیکن رسول ؑ کے بیٹے کے ذکر کو کبھی نہیں دبا سکے گا۔ وہ کہ جس نے اسلام کی بقاء کے لیئے اپنی جان کا نذرانہ پیش کر دیا ، وہ کہ جس نے نیزے کی نوک پر بھی قرآن پڑھ کر لشکر یزید کو بتا دیا کہ تم زندہ رہ کر بھی مردہ باد ہو ہم سرکٹا کر بھی زندہ باد ہیں ، یزید کو داخل دشنام کا دیا، نام یزید گالی بن کر رہ گیا، نام حسین ؑ تا ابد زندہ باد ہو گیا۔ علامہ تصور جوادی نے کہا کہ اس سال بھی چہلم سید الشہدا ؑ بھرپور انداز میں منایا جائے گا، ملک بھر کی طر ریاست میں بھی چہلم کے جلوسوں کا انعقاد کیا جائے گا، جہاں عزادارن امام مظلوم ؑ رسول ؐ کو پرسہ پیش کریں گے، انتظامیہ فول پروف سیکورٹی انتظامات کرے ۔
