The Latest
وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی اور ضلعی سیکرٹری جنرل سید ندیم عباس کاظمی نے اپنے مشترکہ بیان میں کوئٹہ سول اسپتال میں فائرنگ اور بم دھماکوں کے نتیجے میں بے گناہ قیمتی جانوں کے ضیاع پر گہرے رنج و غم کا اظہار کر تے ہوئے تین روزہ سوگ کا اعلان کیا ہے۔انہوں نے کہا کہ اس دلسوز واقعہ کی جتنی بھی مذمت کی جائے کم ہے۔بلوچستان میں تکفیری گروہوں کی سرگرمیاں شدت پکڑتی جا رہی ہیں۔اس واقعہ کے ذمہ دار وہی عناصر ہیں جو شیعہ قتل عام میں بھی ملوث رہے ہیں۔ کالعدم جماعتوں کی بیہمانہ کاروائیوں پر حکومتی غفلت ایسے سانحات کا باعث بنی ہوئی ہے۔ ریاستی ادارے عوام کی جان و مال کے تحفظ میں مکمل طور پر ناکام ہو چکے ہیں۔دہشت گردوں کے خلاف کاروائی کے زبانی دعوے کبھی نتیجہ خیز ثابت نہیں ہو سکتے ۔حکومت کو اب عملی اور فیصلہ کن کاروائی کا آغاز کرنا ہو گا۔اس واقعہ کے مرتکب عناصر کسی رعایت کے مستحق نہیں ۔ وکلا، صحافی، انجینئرز، ڈاکٹر اور دیگر شعبوں کے ماہرین ملک و قوم کا اثاثہ ہیں۔ ا س اثاثے کو اس طرح دہشت گردی کی بھینٹ نہ چڑھنے دیا جائے۔
انہوں نے کہا کہ بلوچستان کی ترقی و استحکام کو سازشوں کی نذر کرنے کی کوشش کی جا رہی ہے۔ ملک دشمن طاقتیں اس صوبے میں احساس محرومی اور پسماندگی کا رونا رو کر وطن عزیز کے خلاف نفرت پیدا کرنے کی کوشش کرتے رہیں اور اب ان کی نظر میں گوادر پورٹ اور پاک چین اقتصادی راہدری کھٹک رہی ہے۔ صوبے میں موجود کالعدم مذہبی جماعتیں اور تکفیری گروہوں ملک دشمن قوتوں کے ایجنڈے کی تکمیل میں مصروف ہیں۔جب تک ان کی بیخ کنی نہیں ہوتی تب تک صوبے میں امن و امان کا قیام ممکن نہیں۔انہوں نے کہا کہ اس طرح کے واقعات ملکی سالمیت اور بقا کے لیے شدید ترین خطرہ ہیں۔ریاست اور اس کے شہریوں کی حفاظت کا واحد حل دہشت گردوں کی کمین گاہوں کا تدارک ہے۔
وحدت نیوز(کوئٹہ ) گزشتہ دنوں بلوچستان بار ایسوسیشن کے سابق صدر ایڈوکیٹ بلال انور کاسی پر حملے کے بعد انہیں سول ہسپتال منتقل کر دیا گیااور اس کے بعد سول ہسپتال کو دہشتگردوں نے کاروائی کا نشانہ بنایا۔ سول ہسپتال میں خود کش حملے سے 60 سے زیادہ افراد اپنی جان کی بازی ہار گئے اور معتدد افراد دہشتگردانہ کاروائی کے شکار ہوکر زخمی ہوئے۔ اس افسوسناک واقع میں مختلف میڈیا گروپس سے تعلق رکھنے والے صحافی حضرات بھی متاثر ہوئے اور انکے نمائندے اپنے فرائض سرانجام دیتے ہوئے جہان فانی سے رخصت ہوگئے اور بعض افراد زخمی ہوئے اس واقعے میں وکلاء کے صدر باز محمد کاکڑ، اے این پی کے رہنماء کے بھائی عسکر خان اچکزئی، جہانزیب جمالدینی کے فرزند سنگت جمالدینی ، داود خان کاسی، عدنان خان کاسی، بشیر زہری اور غلام حیدر میرزئی سمیت دیگر اہم شخصیات شہید ہوئے۔
مجلس وحدت مسلمین کوئٹہ ڈویژن کے سیکریٹریٹ سے جاری شدہ بیان میں رکن بلوچستان اسمبلی آغا محمد رضانے ان حملوں کی شدید مذمت کرتے ہوئے کہا کہ دہشتگرد ہماری بنیادوں کو کمزور کرنے میں مصروف ہیں۔ کوئٹہ میں یہ دہشتگردی کا پہلا واقعہ نہیں ہے اس سے پہلے بھی ایسے واقعات ہوئے ہیں مگر افسوس کی بات ہے کہ دہشتگرد ابھی تک گرفتار نہیں ہوئے انکے خلاف کاروائی نہیں ہوئی اور وہ مسلسل پاکستانی شہریوں کو نشانہ بنانے اور مزید منصوبہ بندی میں مصروف ہیں۔ ایم ڈبلیو ایم کے مرکزی رہنماء اورممبر صوبائی اسمبلی آغا رضا نے اس واقعہ پر افسوس کا اظہار کرتے ہوئے کہا کہ ہمارے ملک کے گلیوں کو دہشتگردوں نے خون سے رنگین کر دیا ، دہشتگردوں نے نہ بچوں کو بخشا اور نہ عورتیں ان کے شر سے محفوظ رہی۔ دہشتگردوں نے ملک کے مختلف کونوں میں پاکستانیوں پر ظلم کیا ، انکے ساتھ نرمی کی کوئی گنجائش نہیں ہونی چاہئے۔
انکا کہنا تھا کہ جو افراد کھلے عام دوسروں کو مارنے کی باتیں کرتے ہیں اور اپنے ہم خیالوں کو اس کام پر ابھارتے اور اکساتے ہیں ان کے خلاف انتظامیہ کوئی اقدام کیوں نہیں اٹھاتی۔ایک کے بعد ایک دہشتگردی کے واقعات رونماء ہو رہے ہیں اور انتظامیہ ہاتھ پر ہاتھ دھرے بیٹھے نظر آرہے ہیں۔انہوں نے کہا کہ خطے میں امن کے بغیر کوئی ترقیاتی کام ممکن نہیں، جو پروفیشنلز ملک کیلئے کام کرتے ہیں انہیں نشانہ بنایا جاتا ہے اور ایسے ہی واقعات میں ملک کو ہزاروں ایسے افراد سے محروم کیا گیا ہے جو ملک کی ترقی میں اپنا کردار ادا کر رہے ہیں اور ملک کو خوشحال بنانے کی کوششوں میں مصروف تھے۔ آج پھر وہی بات آتی ہے کہ اگر دہشتگردوں کے خلاف کاروائی نہیں کی گئی ، قاتلوں اور انکے الہ کاروں کو گرفتار نہیں کیا گیا تو آئندہ پھر قوم کو نقصان کا سامنا کرنا ہوگا۔بیان کے آخر میں شہداء کے بلند درجان کی دعا کی گئی اور تمام متاثرین کو صبر سے کام لینے کی تلقین کی گئی۔
وحدت نیوز(کوئٹہ ) گزشتہ شب کوئٹہ کے ایک اہم سڑک اسپینی روڈ پرسبی سے کوئٹہ آنے والے زائرین کے قافلوں کو دہشتگردانہ حملے کا نشانہ بنانے کی کوشش کی گئی تھی اور اسپینی روڈ پر دھماکہ کیا گیا تھا۔ دہشتگرد اپنے اصل مقصد میں تو کامیاب نہ ہو سکے مگر اس واقعے میں پاکستانی سیکورٹی فورسز کے جوانوں کو زخمی کیا گیا اور بعض اطلاعات کے مطابق، دھماکے کے نتیجے میں 5 اہلکاروں سمیت ایک راہ گیر زخمی ہوگئے۔ مجلس وحدت مسلمین کے رہنما اور کونسلر کربلائی رجب علی نے اس واقع پر شدید غصے کا اظہار کرتے ہوئے اس دھماکے کی مذمت کی اور کہا کہ دہشتگردی کے واقعات میں کمی ضرور آئی ہے مگر ہمیں دہشتگردوں کو مکمل طور پر ختم کرنا ہے۔ پچھلے دو دہائی سے مختلف واقعات کی صورت میں ہمیں نشانہ بنانے کی کوشش کی جا رہی ہے۔ آج تو دہشتگرد ناکام ہو گئے ہیں مگر اس بات کی کیا ضمانت ہے کہ آئندہ بھی وہ موڑ کر دوبارہ حملہ نہیں کریں گے اور ہمیں مزید نقصان پہنچانے سے گریز کریں گے۔
انہوں نے مزید وضاحت کرتے ہوئے کہا کہ گزشتہ سالوں شہر کے حالات اگر خراب تھے تو بعض تکفیری عناصر کی وجہ سے تھے، جنکی تعداد تو مٹھی بھر ہے مگر اس کے باوجود بعض حمایتوں کی وجہ سے وہ وطن عزیز اور پاکستانیوں کو نقصان پہنچانے میں کامیاب رہے ہیں ۔ دہشتگرد مسلسل ہمیں نشانہ بنانے کی کوششوں میں مصروف ہیں، انکی باقاعدہ شاخین تشکیل دے دی گئی ہیں اور دوسری جانب حکومت لا علمی کا مظاہرہ کر رہی ہے۔حکومت کو چاہئے کہ تکفیری سوچ کے فروغ کو روکھے اور ان افراد کو سلاکوں کے پیچھے ڈال دے جو کھلے عام بازاروں اور اپنے جلسوں میں تکفیری تقریریں کرتے ہیں اور دوسروں کو بھی تکفیری سوچ اپنانے پر مجبور کرتے ہیں۔
انہوں نے کہا کہ اگر حکومت صحیح تحقیقات کروائے تو معلوم ہوگا کہ شہر میں ہونے والے مختلف واقعات ، دھماکوں اور ٹارگیٹ کلنگ کی جڑیں انہی تکفیریوں سے نکلیں ہیں۔بیان میں مزید کہا گیا کہ مجلس وحدت مسلمین اول روز سے ہی ہر طرح کی دہشتگردی اور تکفیریت کے خلاف آواز بلند کرتی آئی ہے۔ ہمارے مرکزی قائدین ہمیشہ تکفیریت اور ظلم و بربریت کے خلاف رہے ہیں، ظلم پر حکومت وقت کی خاموشی کے خلاف آواز بلند کی، وہ ثابت قدم رہے اور اب تک حق کے لئے اپنی جدوجہد جاری رکھے ہوئے ہیں تاکہ وفاقی حکومت تکفیری سوچ کے خاتمے کے لئے سنجیدہ ہو اور ملک سے تکفیریت اور دہشتگردی کا خاتمہ ہو۔
وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں ایم ڈبلیو ایم کوئٹہ کے رہنما جعفر علی جعفری نے کہا گیا ہے کہ بعض شر پسند عناصر شہر میں وارداتوں سے فرقہ واریت کو فروغ دے رہے ہیں اور دوسری طرف ان کے ہم خیال مختلف ذرائع ابلاغ کے توسط سے تقسیم بندی میں مصروف ہیں ۔ بد امنی کو ایک بار پھر پروان چھڑانے کی کوشش کی جارہی ہے دہشتگردوں اور دہشتگردانہ سوچ رکھنے والے کبھی بھی اپنے عزائم میں کامیاب نہیں ہو سکتے۔ بیان میں کہا گیا کہ دن دہاڑے بازاروں میں ٹارگیٹ کلنگ سے قتل ہونا لمحہ فکریہ ہے سینکڑوں اہلکاروں کی موجودگی میں دہشتگرد اپنے وارداتوں اور فرار ہونے میں کامیاب ہو رہے ہیں اور انہیں پکڑنے میں دشواریوں کا سامنا ہورہا ہے، شہری اپنے جان و مال کو محفوظ نہیں سمجھتے ایسے حالات میں گھر سے باہر نکلنا بھی مشکل ہو گیا ہے۔
انہوں نے کہا کہ ہر روز دہشتگردی، چوری اور اس طرح کے دیگر معاملات کی خبریں ملتی ہیں جہاں ملک کی ترقی کی باتیں ہونی چاہئے وہی ہمیں قتل و غارت گری کی خبریں ملتی ہے۔ بہت افسوس کی بات ہے کہ آج کے جدید دور میں جگہ جگہ کیمروں کے موجودگی اور جدید آلات کے باوجود یہ کہا جاتا ہے کہ واردات کے بعد نامعلوم افراد فرار ہونے میں کامیاب ہوگئے۔ انکا کہنا تھا کہ صوبے میں امن حکومت کی اولین ترجیحات میں سے ایک ہونی چاہئے ۔ ہم ہر قسم کی دہشتگردی اور انتہا پسندی کو صوبے میں امن و امان اور بھائی چارگی کے لئے زہر قاتل قرار دیتے ہوئے مطالبہ کرتے ہیں اور حکومت اس طرح کے واقعات کی روک تھام کیلئے اپنی ذمہ داریاں پوری کرے تاکہ حکومتی اداروں سمیت مزید بے گناہ اور نہتے عوام کا قتل عام نہ ہو،بیان کے آخر میں سریاب روڈ میں تکفیری دہشتگردوں کی فائرنگ سے شہید ہونے والے غلام نبی اور محمد نبی کی شہادت پر افسوس کا اظہار کیا گیا اور پسماندگان سے دلی تعزیت کا اظہار کیا گیا۔
وحدت نیوز(بھکر) مجلس وحدت مسلمین ضلع بھکر کے سیکرٹری جنرل سفیر حسین شہانی ایڈووکیٹ نے اپنے بیان میں کہا ہے کہ ملکی سلامتی عوام کی جان و مال کے تحفظ کے لئے ضرب عضب پر مکمل طور پر عملدرآمد بہت ضروری ہے ۔ اگر بڑے ریاستی ادارے دہشت گردوں کے خلاف زبر دست کاروائیاں جاری رکھتے تو آج کوئٹہ میں اتنے معصوم لوگوں کی جانوں کا ضیاع نہ ہوتا۔ اتنے بچے یتیم نہ ہوتے اور نہ گھر اجڑتے ۔ کیا پاکستان کے بڑے دفاعی ادارے ذمہ داریاں قبول کرنے والے عناصر کی پناہ گاہوں تک نہیں پہنچ سکتے اور ان کو کیفر کردار تک کیوں نہیں پہنچاتے؟ یہ ایک اپنی جگہ سوالیہ نشان ہے ۔ جس کا جواب قوم کا ہر امن پسند شہری حکمرانوں سے مانگ رہاہے۔
انہوں نے کہا ہے کہ سانحہ کوئٹہ میں شہید ہونے والے افراد کے لواحقین کے غم میں مجلس وحدت مسلمین پاکستان برابر کی شریک ہے اور شہداء کے درجات کی بلندی کے لئے دعا گو ہے اور وطن عزیز کی سلامتی کے لئے اور دہشت گردوں کی درندہ صفت کاروائیوں کے خلاف ہر فورم پرآواز بلند کرتی رہے گی۔ حکومت وقت صفاک درندہ صفت دہشت گردوں کے خلاف زبردست کاروائی کرے تاکہ غریب عوام کے جانوں مال کا تحفظ ممکن ہو سکے۔ مٹھی بھر دہشت گردوں کے سامنے ملک کے بڑے سیکورٹی ادارے بے بس نظر آتے ہیں ۔ ہزاروں قیمتی جانوں کے قاتل سفاک کاروائیوں کے بعد کھلے دل سے دہشت گردانہ اقدام ، خودکش حملے اور ٹارگٹ کلنگ کو قبول کر لیتے ہیں مگر سیکورٹی اداروں کے سربراہوں کے کانوں پر جوں تک نہیں رینگتی ۔ سیکورٹی اداروں کی یہ بھی ذمہ داری ہے کہ دہشت گردوں اور امن پسند شہریوں کے درمیان فرق کو سمجھیں ۔ ظالم اور مظلوم کو ایک لاٹھی سے مت ہانکیں مظلوم کو مظلوم اور ظالم کو ظالم کی نظر سے دیکھیں اور امن پسند شہریوں کے خلاف ظالمانہ کاروائیاں بند کریں۔
وحدت نیوز(مظفرآباد) سانحہ سول اسپتال کوئٹہ کے خلاف مجلس وحدت مسلمین آزاد کشمیر کے زیر اہتمام احتجاجی مظاہرے مشعل بردار اجتماع , نیز شہداء کی یاد میں شمعیں بھی روشن کی گئیں ، تعزیتی تقریب سے خطاب کرتے ہوئے ریاستی سیکریٹری جنرل علامہ سید تصور حسین نقوی الجوادی, سید محسن رضاسبزواری , خواجہ شوکت گنائی ایڈووکیٹ , سید علی رضا سبزواری , سید قمر عباس نقوی , سید رضی عباس ,سید سرمد نقوی و دیگر نے خطاب کیا، , وکلاء و میڈیا نمائندگان کی شرکت , مجلس کے رہنماؤں و شرکائے احتجاج نے ہاتھوں میں ہاتھ ڈال کر اظہار یکجہتی کیا۔
وحدت نیوز(کراچی) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کے حکم پر کوئٹہ سول اسپتال میں فائرنگ اور بم دھماکوں کے نتیجے میں شہید ہونے والے افراد کی یاد میں اور پسماندگان سے اظہار ہمدردی کیلئے ملک بھر کی طرح کراچی میں بھی نمائش چورنگی پر چراغاں کیا گیا۔ اس موقع پر مرکزی رہنما علامہ سید احمد اقبال رضوی، علامہ سید باقر عباس زیدی اور علامہ مبشر حسن نے خطاب کیا، جبکہ علامہ علی انور جعفری، علامہ نشان حیدر، علامہ صادق جعفری، تقی ظفر، میثم عابدی، انجینئر رضا امام نقوی سمیت عہدیداران و کارکنان اور عوام بڑی تعداد میں شریک تھی۔ چراغاں کے موقع پر خطاب کرتے ہوئے رہنماو ¿ں نے کہا کہ ملک بھر میں جاری دہشتگردی کے بحران کے خاتمے کیلئے اچھے اور برے کی تمیز کئے بغیر تمام دہشتگرد عناصر،انکے سہولت کاروں، ہمدردوں اور خفیہ اور اعلانیہ ٹھکانوں کو بے رحمانہ آپریشن کرکے ختم کیا جائے، اس حوالے سے سربراہ پاک فوج کی جانب سے ملک بھر میں دہشتگرد عناصر کے خلاف کومبنگ آپریشن شروع کرنے کے حکم پر عمل درآمد ملکی بقاءو سالمیت کیلئے لازمی ہے، محب وطن ملت تشیع دہشتگردی کے خاتمے کیلئے پاک فوج کے ساتھ شانہ بشانہ کھڑی ہے۔ رہنماو ں کا کہنا تھا کہ سانحہ کوئٹہ آپریشن ضرب عضب اور نیشنل ایکشن پلان کو یکسر ناکام بنانے کی کوششوں کا حصہ ہے، اس سانحے کے ذمہ دار وہی دہشتگرد عناصر ہیں، جو شیعہ قتل عام میں بھی ملوث رہے ہیں۔ رہنماو ں نے مزید کہا کہ جب تک ملک دشمن قوتوں کے ایجنڈے کی تکمیل میں مصروف کالعدم دہشتگرد مذہبی تنظیموں اور تکفیری گروہوں کی بیخ کنی نہیں کی جائے گی، تب تک بلوچستان سمیت ملک بھر میں امن و امان کا قیام ممکن نہیں اور سانحہ کوئٹہ جیسے دہشتگردانہ واقعات ملکی سالمیت اور بقا کیلئے شدید ترین خطرہ ثابت ہونگے۔ شرکاء نے شہدا کی بلندی درجات اور پسماندگان کیلئے صبر جمیل کی دعا کی۔
وحدت نیوز(لاہور) مجلس وحدت مسلمین لاہور کے سیکرٹری جنرل علامہ حسن ہمدانی نے پریس کلب پر شہدائے کوئٹہ کی یاد میں منعقدہ شب شہداء و احتجاجی مظاہرے سے خطاب کرتے ہوئے کہا کہ افغان جہاد کے نام پر دہشتگردی کو ملک میں ایمپورٹ کیا گیا، آج اسی پالیسیوں کے سبب نہتے پاکستانیوں کا قتل عام جاری ہے، جب تک تکفیری عناصر کو ملکی پالیسی ساز اداروں سے نکال باہر نہیں کیا جاتا، ہزار آپریشن بھی اس ناسور کو ختم نہیں کرسکتے، دہشتگردوں کے ہمدرد تکفیری سوچ کے حامل لوگ ہر شعبے میں فعال ہیں، ہمیں مادر وطن کی بقا کیلئے اپنے سابقہ پالیسیوں پر نظرثانی کی ضرورت ہے، پاکستان میں یہی تکفیری گروہ، را، موساد اور سی آئی اے کے آلہ کار ہیں، جو پاکستان کی سالمیت کیخلاف سازشوں میں شامل ہیں۔ پریس کلب کے سامنے مجلس وحدت مسلمین کے زیراہتمام شہدائے کوئٹہ کو خراج عقیدت کیلئے شمعیں روشن کی گئیں، سول سوسائٹی اور شہریوں کی بڑی تعداد نے شرکت کی۔ مجلس وحدت مسلمین کے رہنماوں علامہ مبارک موسوی، سید حسین زیدی، سید حسنین زیدی، سید زین زیدی، افسر حسین خاں، علامہ ناصر مہدی، سول سوسائٹی کے رہنما عبداللہ ملک، انجمن شہریان لاہور کے چئیرمین شفیق رضا قادری سمیت دیگر بھی شریک تھے۔
علامہ حسن ہمدانی نے کہا کہ ہم اسی تکفیری سوچ اور انتہا پسندی کیخلاف گذشتہ 3 ماہ سے سڑکوں پر ہیں، ہماری جدوجہد کسی ایک فرقے یا مسلک کیلئے نہیں بلکہ پاکستان میں بسنے والے ہر مظلوم پاکستانی کیلئے ہے اور ان شاءاللہ ہم دہشتگردوں کے سہولت کاروں کو بے نقاب کرنے تک میداں میں موجود رہیں گے۔ انہوں نے کہا کہ 2 ستمبر کو سربراہ مجلس وحدت مسلمین علامہ راجہ ناصر کی قیادت میں مظلومین پاکستان کا وزیراعلٰی ہاوس کے سامنے دھرنا ہوگا اور پنجاب حکومت میں شامل تکفیری عناصر کی انتقامی کارروائیوں کیخلاف موثر کارروائی تک یہ دھرنا جاری رہیگا۔ انہوں نے کہا کہ حکمران زعم حکمرانی میں یہ بھول چکے ہیں کہ ان کا مقابلہ ایک ایسی قوم سے ہے جو شہادتوں کے حوالے سے اپنی تاریخ رکھتی ہے۔ انہوں نے کہا کہ ملت جعفریہ نے پاکستان کی بقا کیلئے ہمیشہ قربانیاں دی ہیں۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے فلسطین نیوز کے نمائندے کے ساتھ بات چیت کرتے ہوئے کہا ہے کہ عرب دنیا کے اسرائیل کے ساتھ بڑھتے ہوئے تعلقات جہاں فلسطین کاز کے لئے خطرہ ہیں وہاں پوری مسلم امہ کی پیٹھ پر خنجر گھونپنے کے مترادف ہے۔ان خیالات کا اظہار انہوں نے حالیہ دنوں ذرائع ابلاغ پر مسلسل شائع ہونے والی ان خبروں پر تبصرہ کرتے ہوئے کیا جن میں عرب دنیا کے اسرائیل کے ساتھ دوستانہ تعلقات بنائے جانے کی کوششوں کا ذکر کیا گیا تھا تاہم گذشتہ ماہ مسلم دنیا کے سب سے بڑے ملک سعودی عرب کی جانب سے ایک اعلی سطحی وفد کی جانب سے اسرائیل کادورہ اور موساد سمیت دیگر اداروں کے عہدیداروں سے ہونے والی ملاقاتوں کی خبریں بھی شائع ہوئی تھیں۔
علامہ ناصر عباس جعفری نے ان تمام خبروں پر تبصرہ کرتے ہوئے کہا کہ سعودی عرب اسرائیل کے ساتھ تعلقات بنا کر جلد سے جلد اسرائیل کو تسلیم کرنے کی کوششوں میں مصروف عمل ہے اور اس گھناؤنی اور سیاہ سازش میں براہ راست امریکہ ملوث ہے ، ان کاکہنا تھاکہ افسوس کی بات ہے کہ مسلم دنیا امریکی غلامی میں اس قدر آگے جا چکی ہے کہ سرزمین بیت المقدس پر بہنے والا مظلوم فلسطینیوں کا لہو بھی ان کے سامنے بے معنی ہو چکا ہے۔
مجلس وحدت مسلمین پاکستان کے سربراہ کاکہنا تھا کہ کشمیر میں ایک طرف اسرائیلی طرز پر ہندوستانی حکومت نے مظالم کا سلسلہ روا کھا ہوا ہے تو دوسری جانب امریکہ کی کھلم کھلم سرپرستی بھی حاصل ہے جیسا کہ خود امریکہ نے کشمیر میں ہونے والے بھارتی مظالم اور ریاستی دہشت گردی کو بھارت کا اندرونی معاملہ قرار دے کر نہ صرف بھارت کی حمایت کی بلکہ ہزاروں مظلوم کشمیریوں کی جد وجہد آزادی کو بھی زک پہنچانے کے ساتھ ساتھ پاکستان کو بھی واضح پیغام دیا ہے۔
علامہ ناصر عباس جعفری نے بین الاقوامی ذرائع ابلاغ اور پاکستانی ذرائع ابلاغ میں شائع ہونے والی خبروں کہ جس میں پاکستان اور اسرائیل کی مشترکہ فوجی مشقوں کے بارے میں انکشاف کیا گیا ہے کے بارے میں گفتگو کرتے ہوئے کہاکہ حکومت پاکستان بے بس ہو چکی ہے اور امریکی دباؤ میں آ کر اب ایک ایسی فوجی مشقوں میں پاک فضائیہ کو جھونک رہی ہے کہ جہاں ظالم اور سفاک اسرائیلی افواج بھی مشقوں میں حصہ لے رہی ہیں انہوں نے حکومت سمیت اعلیٰ ریاستی اداروں اور فوجی اداروں سے مطالبہ کیاکہ پاکستان فضائیہ اور افواج پاکستان کے وقار کو مجروح کرنے کی امریکی سازش کو بے نقاب کیا جائے اور افواج پاکستان ایسی کسی بھی مشقوں میں حصہ نہ لیں جہاں غاصب صیہونی افواج بھی حصہ لے رہی ہوں، انہوں نے کہا کہ اس طرح کا کوئی بھی اقدام واضح طور پر بابائے قوم قائد اعظم محمد علی جناح ؒ اور نظریہ پاکستان سے انحراف کے مترادف سمجھا جائے گا ۔انہوں نے مزید کہا کہ افواج پاکستان اور وزارت دفاع کو پاکستانی قوم کی امنگوں کی ترجمانی کرنی چاہئیے اور پاکستانی قوم کے جذبات و احساسات کو مجروح کرنے والے کسی بھی فعل سے اجتناب کیا جائے۔
واضح رہے کہ آئندہ ماہ امریکہ میں فوجی مشقوں کا آغاز ہو رہاہے جہاں عرب امارات سمیت ترکی اور اردن کی افواج شریک ہو ں گی جبکہ پاکستان فضائیہ بھی ان جنگی مشقوں میں شرکت کے لئے جائے گی اور اس موقع پر غاصب صیہونی ریاست اسرائیل کی فضائیہ بھی حصہ لے رہی ہے اور اس بات پر پاکستان بھر میں پوری قوم میں بے چینی کی لہر پائی جاتی ہے تاہم کئی دن گزر جانے کے باوجود وزارت دفاع سمیت افواج پاکستان کی جانب سے اس معاملے کی تردید یا تصدیق سے متعلق کوئی بیان سامنے نہیں آیا ہے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری نے کوئٹہ سول اسپتال میں فائرنگ اور بم دھماکوں کے نتیجے میں بے گناہ قیمتی جانوں کے ضیاع پر گہرے رنج و غم کا اظہار کر تے ہوئے تین روزہ سوگ کا اعلان کیا ہے۔انہوں نے کہا کہ اس دلسوز واقعہ کی جتنی بھی مذمت کی جائے کم ہے۔بلوچستان میں تکفیری گروہوں کی سرگرمیاں شدت پکڑتی جا رہی ہیں۔اس واقعہ کے ذمہ دار وہی عناصر ہیں جو شیعہ قتل عام میں بھی ملوث رہے ہیں۔ کالعدم جماعتوں کی بیہمانہ کاروائیوں پر حکومتی غفلت ایسے سانحات کا باعث بنی ہوئی ہے۔ ریاستی ادارے عوام کی جان و مال کے تحفظ میں مکمل طور پر ناکام ہو چکے ہیں۔دہشت گردوں کے خلاف کاروائی کے زبانی دعوے کبھی نتیجہ خیز ثابت نہیں ہو سکتے ۔حکومت کو اب عملی اور فیصلہ کن کاروائی کا آغاز کرنا ہو گا۔اس واقعہ کے مرتکب عناصر کسی رعایت کے مستحق نہیں ۔ وکلا، صحافی، انجینئرز، ڈاکٹر اور دیگر شعبوں کے ماہرین ملک و قوم کا اثاثہ ہیں۔ اس اثاثے کو اس طرح دہشت گردی کی بھینٹ نہ چڑھنے دیا جائے۔انہوں نے کہا کہ بلوچستان کی ترقی و استحکام کو سازشوں کی نذر کرنے کی کوشش کی جا رہی ہے۔ ملک دشمن طاقتیں اس صوبے میں احساس محرومی اور پسماندگی کا رونا رو کر وطن عزیز کے خلاف نفرت پیدا کرنے کی کوشش کرتے رہیں اور اب ان کی نظر میں گوادر پورٹ اور پاک چین اقتصادی راہدری کھٹک رہی ہے۔صوبے میں موجود کالعدم مذہبی جماعتیں اور تکفیری گروہوں ملک دشمن قوتوں کے ایجنڈے کی تکمیل میں مصروف ہیں۔جب تک ان کی بیخ کنی نہیں ہوتی تب تک صوبے میں امن و امان کا قیام ممکن نہیں۔انہوں نے کہا کہ اس طرح کے واقعات ملکی سالمیت اور بقا کے لیے شدید ترین خطرہ ہیں۔ریاست اور اس کے شہریوں کی حفاظت کا واحد حل دہشت گردوں کی کمین گاہوں کا تدارک ہے۔وحدت مسلمین کے سربراہ نے تمام ضلعی و صوبائی دفاتر کو ہدایت کی ہے کہ مختلف علاقوں میں سانحہ کوئٹہ کے شہد اء کی یاد میں چراغاں کیا جائے ۔علامہ ناصر عباس نے شہدا کی بلندی درجات اور پسماندگان کے لیے صبر جمیل کی دعا کی ہے۔
