عالم اسلام کے عظیم رہنماء اور اسلامی جمہوریہ ایران کے سپریم لیڈر نے کہا ہے کہ امریکہ اور اسرائیل کی سرکردگی میں اسلام دشمن مورچہ ماضی کی نسبت کہیں زیادہ کمزور ہو چکا ہے۔فارس نیوز ایجنسی کے مطابق قائد انقلاب اسلامی ایران آیت اللہ العظمی سید علی خامنہ ای نے کہا ہے کہ ایران کبھی بھی بیرونی دباو کے تحت اپنے موقف میں تبدیلی نہیں لائے گا۔ یہ بات انہوں نے منگل کی شام تہران میں اعلی سطحی حکومتی عہدیداروں سے اپنی ملاقات کے دوران خطاب میں کہی۔ آیت اللہ العظمی سید علی خامنہ ای نے کہا کہ امریکہ اور اسرائیل کی سرکردگی میں بعض استکباری قوتیں ایران کے اسلامی نظام کی مخالف ہیں لیکن وہ ایسا ظاہر کرتی ہیں کہ انکا اصل مسئلہ ایران کا ایٹمی پروگرام اور انسانی حقوق کی صورتحال ہے، یہ ممالک اپنی سیاسی، اقتصادی اور میڈیا توانائیوں کی بدولت وسیع پیمانے پر منفی پروپیگنڈہ کرنے میں مصروف ہیں اور ایسا تاثر دینے کی کوشش کر رہے ہیں کہ گویا ساری عالمی برادری انہیں چند ممالک تک محدود ہے۔رہبر معظم کا کہنا تھا کہ انکا اصل مسئلہ یہ ہے کہ ملت ایران نے اسلامی انقلاب کے ذریعے اپنے ملک کو انکے استعماری تسلط سے نجات دلائی ہے اور عالم اسلام میں بیداری اور انقلاب کی روح پھونک دی ہے، اسی وجہ سے استکباری قوتیں چاہتی ہیں کہ ایران پر کاری ضرب لگا کر اسے دوسروں کیلئے عبرت کا نشان بنا دیں۔
آیت اللہ العظمی سید علی خامنہ ای نے کہا کہ مشرق وسطیٰ میں انقلابات کے بعد اسرائیل کو درپیش خطرات میں اضافہ، لبنان کی 33 روزہ جنگ اور غزہ کی 22 روزہ جنگ میں اسرائیل کی شکست، عراق میں امریکہ کی ناکامی، افغانستان میں امریکہ کی بڑھتی ہوئی اور ختم نہ ہونے والی مشکلات اور مشرق وسطی میں امریکی خارجہ سیاست کا بری طرح ناکام ہو جانا اس کمزوری کے بعض واضح نمونے ہیں۔ قائد انقلاب اسلامی ایران نے انتباہ کرتے ہوئے کہا کہ ایران کے خلاف اقتصادی پابندیوں کا مغربی ہتھکنڈہ غیرموثر اور ناکارہ ہو چکا ہے، اسلامی جمہوریہ ایران انشااللہ بہت جلد موجودہ اقتصادی مشکلات اور دباو سے باہر نکلنے میں کامیاب ہو جائے گا اور لمبی مدت کیلئے ہمارے خلاف اقتصادی پابندیاں خود مغربی ممالک کے نقصان میں ہیں۔ آیت اللہ العظمی سید علی خامنہ ای نے کہا کہ ملت ایران آج ترقی کی منازل انتہائی تیزی سے طے کر رہی ہے، جیسا کہ ایک وقت وہ تھا جب پورے ملک میں صرف تین سنٹری فیوج کام کر رہے تھے اور مغربی ممالک کا اصرار تھا کہ انہیں بھی بند کر دیا جائے لیکن آج خدا کی نصرت اور مدد سے ملک بھر میں گیارہ ہزار سے زائد سنٹری فیوجز دن رات کام کر رہے ہیں۔ انہوں نے کہا کہ امریکہ اور مغربی ممالک اس وقت انتہائی شدید مالی مشکلات کا شکار ہیں جن میں یورپی یونین اور یورو کے خطے میں شدید مالی بحران، بعض یورپی ممالک میں معاشی عدم استحکام اور اسکے نتیجے میں حکومت کی سرنگونی، امریکہ میں بجٹ کا شدید خسارہ اور 99 فیصد تحریک کا معرض وجود میں آنا شامل ہیں۔

مجلس وحدت مسلمین کے مرکزی سیکرٹری جنرل علامہ ناصر عباس جعفری کے اعزاز میں معروف ذاکر اہلبیت ریاض حسین شاہ آف رتوال کی جانب سے افطار ڈنر کا اہتمام کیا گیا۔ علامہ ناصر عباس جعفری اور ان کے قافلے کا شیخوپورہ انٹر چینج پر سیکرٹری جنرل ضلع شیخوپورہ علامہ حسن ہمدانی اور دیگر مومنین نے استقبال کیا اور وہاں سے جنڈیالہ شیر خان روانہ ہوئے۔افطار ڈنر سے خطاب کرتے ہوئے علامہ ناصر عباس جعفری نے کہا کہ یکم جولائی کو قرآن سنت کانفرنس میں شیعہ قوم کی بیداری، یکجہتی، عزم و جرات دیکھ کر شرکا اور مختلف ممالک میں ٹیلی ویژن کے سامنے بیٹھے مومنین کی آنکھیں خوشی سے پرنم تھیں۔ انہوں نے کہا کہ دشمن کی پچاس سالہ سرمایہ کاری اس غیور ملت نے خاک میں ملا دی۔ انہوں نے مزید کہا کہ شیعہ قوم کی وحدت اور بیداری کیلئے ہم اپنے خون کا آخری قطرہ تک بہانے سے دریغ نہیں کریں گے۔افطار ڈنر سے میزبان ذاکر اہلبیت ریاض حسین شاہ آف رتوال نے خطاب کرتے ہوئے کہا کہ ذاکرین عظام پہلے بھی علما حقہ کے حامی تھے اور آج بھی ہیں۔ علامہ ناصر عباس جعفری نے جو وحدت اور تشیع پاکستان کی سربلندی کے لئے کام کئے ہیں، انہیں تاریخ میں سنہری حروف میں لکھا جائے گا۔ افطار ڈنر سے معروف شیعہ رہنما و چیئرمین عزاداری سیل پنجاب الحاج حیدر علی مرزا نے بھی خطاب کیا۔ انہوں نے کہا کہ شیعہ قوم اب ملک بھر میں علامہ ناصر عباس جعفری اور مجلس وحدت مسلمین کے پلیٹ فارم پر متحد ہوچکے ہیں، اب اس قوم کو کوئی بھی سازشی طاقت تقسیم کرنے کی جرات نہیں کر سکے گی۔افطار ڈنر میں مرکزی ڈپٹی جنرل سیکرٹری علامہ امین شہیدی، مرکزی سیکرٹری تربیت علامہ ابوذر مہدوی، سیکرٹری جنرل پنجاب علامہ عبدالخالق اسدی، مولانا باقر شیرازی، ڈپٹی سیکرٹری جنرل وسطی پنجاب اسد عباس نقوی، ناصر عباس شیرازی، استاد ذوالفقار علی اسدی، جھنگ کے خضر خان اور حاجی امیر عباس مرزا نے بھی خصوصی شرکت کی۔