وحدت نیوز(میانوالی) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی دو روزہ دورے پر میانوالی پہنچ گئے، جہاں اُنہوں نے میانوالی شہر میں ایتام پروجیکٹ کی رقوم مستحقین میں تقسیم کیں۔ اس موقع پر صوبائی کوارڈینیٹر المجلس ڈیزاسٹر منیجمنٹ سیل جنوبی پنجاب سید زعیم حیدر زیدی اور ضلعی سیکرٹری جنرل میانوالی سید عابد حسین عابدی بھی موجود تھے۔ علامہ اقتدار حسین نقوی نے اس موقع پر ایتام پروجیکٹ میں شامل افراد میں ماہانہ وظائف کے ساتھ ساتھ دودھ بھی تقسیم کیا۔

علامہ اقتدار نقوی کا کہنا تھا کہ کرونا وائرس کے باعث ملک کی ستر فیصد آبادی جو غربت، ناداری اور سفید پوشی کی زندگی بسر کر رہی ہے، وہ متاثر ہوئی ہے، اس وقت ملک میں ایمرجنسی کی صورتحال ہے، مخیر حضرات اس موقع پر آگے بڑھیں اور مستحق و نادار افراد کی معاونت کریں، الحمداللہ دیگر اداروں کے ساتھ ساتھ المجلس ڈیزاسٹر مجنیمنٹ سیل کے پانچ ہزار سے زائد والنٹیئر ملک بھر میں عوامی خدمت میں مصروف ہیں اور اب تک ملک بھر میں ستر ہزار کے قریب افراد میں راشن اور کھانا تقسیم ہوچکا ہے، مجلس وحدت مسلمین کے سربراہ علامہ راجہ ناصر عباس جعفری نے تمام تنظیمی سرگرمیوں کو معطل کرتے ہوئے ہدایت کی ہے کہ مشکل کی اس گھڑی میں بڑھ چڑھ کر اپنا کردار ادا کریں۔

وحدت نیوز(ملتان) مجلس وحدت مسلمین کے ذیلی ادارے المجلس ڈیزاسٹر منیجمنٹ سیل کے پلیٹ فارم سے ملک کے دیگر علاقوں کی طرح جنوبی پنجاب کے مختلف اضلاع میں ہزاروں افراد میں راشن بیگ، ماسک گلوز تقسیم کیے گئے اس کے علاوہ مختلف مساجد اور امام بارگاہوں میں جراثیم کش اسپرے بھی کیا گیا۔ ان خیالات کا اظہار مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے ملتان سے جاری بیان میں کیا۔

ملتان سے جاری بیان میں علامہ اقتدار نقوی کا مزید کہنا تھا کہ جنوبی پنجاب کے تمام اضلاع میں المجلس ڈیزاسٹر منیجمنٹ سیل کے پلیٹ فارم سے لاک ڈائون سے متاثرہ غریب، نادار، مستحق اور سفید پوش خاندانوں کی مدد کا سلسلہ جاری ہے۔ علامہ اقتدار نقوی نے کہا کہ ملک بھر میں پانچ ہزار سے زائد والنٹیئر مشکل کی اس گھڑی میں قوم کی مدد کررہے ہیں۔ اُنہوں نے کہا کہ ایک محتاط اندازے کے مطابق اس وقت تک ساٹھ ہزار سے زیادہ خاندانوں میں راشن تقسیم کیا جا چکا ہے، اُنہوں نے مزید کہا کہ انشاء اللہ ماہ رمضان میں بھی یہ سلسلہ جاری رہے گا۔ 

وحدت نیوز(ملتان) قرنطینہ سنٹر ملتان میں المجلس ڈیزاسٹر منیجمنٹ سیل کے زیراہتمام لگائے گئے کیمپ میں چیف وہپ قومی اسمبلی ملک عامر ڈوگر اور ڈپٹی کمشنر ملتان عامر خٹک نے دورہ کیا اور مجلس وحدت مسلمین جنوبی پنجاب کے سیکریٹری جنرل علامہ سید اقتدار حسین نقوی سمیت دیگررہنماؤں سے ملاقات کی ۔

 چیف وہپ قومی اسمبلی ملک عامر ڈوگر اور ڈپٹی کمشنر ملتان عامر خٹک نےایم ڈبلیوایم کے رہنماؤں کو یقین دہانی کرائی کے کل جن زائرین کے ٹیسٹ نیگیٹیو آئے ہیں انشاءاللہ انہیں اپنے اضلاع میں بھیج دیا جائے گا ،انہوں نے شکریہ ادا کیا کہ المجلس ڈیزاسٹر منیجمنٹ سیل نے پہلے دن سے لے کر آج تک یہاں زائرین کے لیے کیمپ لگائے رکھا اور انہیں ضروریات زندگی کی چیزیں مہیا کی ہم ان کی پوری ٹیم کے مشکور ہیں۔

وحدت نیوز(ملتان) الحمداللہ قرنطینہ ملتان کے باہر المجلس ڈیزاسٹر منیجمنٹ سیل کے زیراہتمام کیمپ کے دسویں روز بھی زائرین اور طلاب کی ضروریات زندگی کو پورا کرنے کی کوشش کی گئی۔ ہم اپنے مجاہد علماء کو سلام پیش کرتے ہیں جو اس مشن میں پیش پیش ہیں۔ علامہ اقتدار نقوی۔ علامہ قاضی نادر علوی۔ سلیم عباس صدیقی۔ مہر سخاوت علی۔ ثقلین نقوی۔ تیمور بھائی اور ان کی ٹیم پیش پیش رہی۔

 آج 4 شعبان المعظم کو ولادت باسعادت حضرت ابوالفضل العباس علمدار کے موقع پر زائرین کے لیے جشن اور سید ناصر عباس زیدی کی جانب سے نیاز کا اہتمام کیا گیا،انشاءلله خدمت کا یہ سفر جاری رہے گا۔

 اس کے ساتھ ساتھ المجلس ڈیزاسٹر منیجمنٹ سیل ایسے افراد تک پہنچ رہی ہے جو خط غربت سے نیچے ہیں اور ان کی عزت نفس کو مجروح کیے بغیر خدمت کر رہی ہے۔ اب تک جن لوگوں نےالمجلس ڈیزاسٹر منیجمنٹ سیل کے ساتھ تعاون کیا ان کے مشکور ہیں اور اس کام میں مزید تعاون درکار ہے۔ اس وقت زائرین کو ماسک، ہینڈ سینی ٹائزر کی اشد ضرورت ہے تمام مومنین سے تعاون کی اپیل ہے۔

وحدت نیوز(ملتان) مجلس وحدت مسلمین ضلع ملتان کی طرف سے ایم ڈبلیو ایم کے ذیلی ادارے المجلس ڈیزاسٹر منیجمنٹ سیل کے پلیٹ فارم سے ایک سو افراد کے لیے راشن بیگ کی تیاری کے بعد غرباء میں تقسیم کا سلسلہ شروع کر دیا گیا ہے، اس موقع پر ضلعی سیکرٹری جنرل مرزا وجاہت علی اور سیکرٹری سیاسیات حسنین کربلائی بھی موجود تھے۔ ''وحدت نیوز'' سے گفتگو کرتے ہوئے مرزا وجاہت علی کا کہنا تھا کہ ملک کے دیگر شہروں کی طرح ضلع ملتان میں المجلس ڈیزاسٹر منیجمنٹ سیل کے پلیٹ فارم سے مستحق، غریب اور نادار افراد میں راشن کی تقسیم کا سلسلہ شروع کر دیا ہے، پہلے مرحلے میں ایک سو افراد کے لیے راشن بیگ تیار کیے گئے ہیں، جبکہ دوسرے مرحلے پانچ سو افراد کے لیے راشن بیگز تیار کیے جائیں گے۔

ضلعی سیکرٹری سیاسیات حسنین کربلائی نے کہا کہ جس طرح ہم کرونا وائرس سے بچاو کے لیے مسلسل مہم چلا رہے ہیں، ان شاء اللہ ہم کوشش کریں گے کہ المجلس کے پلیٹ فارم سے اُن افراد تک امداد پہنچائیں، جو اس لاک ڈاون سے براہ راست متاثر ہوئے ہیں۔ دوسری جانب ایم ڈبلیو ایم جنوبی پنجاب کے سیکرٹری جنرل علامہ اقتدار حسین نقوی نے کہا کہ ملتان، ڈیرہ غازیخان اور علی پور کے ذمہ داران احسن طریقے سے اپنے فرائض انجام دے رہے ہیں، باقی اضلاع بھی جلد المجلس ڈیزاسٹر منیجمنٹ سیل کے پلیٹ فارم اپنی فعالیت شروع کریں گے۔

وحدت نیوز(کراچی) مجلس وحدت مسلمین پاکستان سندھ کے سیکرٹری جنرل علامہ باقر عباس زیدی نے کہا ہے کہ کورونا وائرس جیسی وبا پر قابو پانے کے لیے اگر بروقت اقدامات نہ کیے گئے تو یہ ناقابل تلافی نقصان کا سبب بن سکتا ہے۔ فکورونا وائرس سے بچاؤ کیلئے فتویٰ مراجع و فقہاکے مطابق نمازجمعہ و جماعت و دیگر اجتماعات کوروک دیا جائے۔ اس مرض کے ممکنہ پھیلاؤ کی روک تھام صرف حکومتی ذمہ داری نہیں بلکہ ہر شہری پر یہ فرض عائد ہوتا ہے کہ وہ اپنی استطاعت و اہلیت کے مطابق اپنے حصے کی ذمہ داری ادا کرے۔ ماضی میں بھی ہر مشکل گھڑی میں حکومت کے شانہ بشانہ خدمات سرانجام دیںہیں۔

علامہ باقرزیدی نے مزید کہاکہ ایم ڈبلیوایم کے سینکڑوں کارکنوں نے ملک بھر کی طرح کراچی و سندھ بھر میں اپنی رضاکارانہ سرگرمیوں کا آغاز کر دیا ہے ۔جس میں کورونا وائرس سے بچاو کیلئے آگاہی مہم اور بلا رنگ و نسل شہر کی عوام میں راشن کی تقسیم کا عمل جاری ہے اس حوالے سے شہر قائد میں موجود ضلعی دفاتر سے راشن کی تقسیم ودیگر رضاکارانہ کاموں کا سلسلہ جاری ہے۔مجلس وحدت مسلمین کے ذیلی ادارے المجلس ڈیزاسٹر منیجمنٹ سیل (اے ڈی ایم سی) کا قیام نہ صرف بروقت فیصلہ ہے بلکہ قومی مشکلات میں ایک مذہبی و سیاسی جماعت کے احساس ذمہ داری پر بھی دلالت کرتا ہے۔

انہوں نے سکھر قرنطینہ سے کراچی ودیگر شہروںمیں گھروں کو لوٹنے والے زائرین اور بہترین نتظامات کرنے پر ایم ڈبلیو ایم کے رضاکاران کو مباکباد پیش کرتے ہوئے کہا کہ تمام مسافروں نے طویل زحمت کا سامنا کیا اور مشکل وقت گزارا ہے قرنطینہ کے عمل سے گزرنے والے زائرین بائیس گڑورپاکستانیوں کی جان کے تحفظ کے ضامن بنے ہیں ۔

انہوں نے کہا کہ ملک و قوم کو کورونا کی آفت سے نجات دلانے کی کوششوں میں ہمارا کردارانشا اللہ مثالی ہو گا۔اس سلسلے میں اپنے اہداف کا تعین اور مستقبل کا لائحہ عمل طے کیا جا چکا ہے اورکورونا وائرس کا مقابلہ کرنے کے لیے ہم میدان عمل میں موجود ہیں۔

وحدت نیوز(گلگت) امسال گلگت بلتستان میں معمول سے زیادہ برف باری کی وجہ سے بالائی علاقے انتہائی خطرناک قدرتی آفات کی زد میں ہیں۔حکومت حفظ ماتقدم کے تحت قیمتی انسانی جانوں اور مالی نقصانات سے بچانے کیلئے فوری اقدامات کرے اور آفات کی زد میں رہائش پذیر خاندانوں کو دوسری جگہ منتقل کرکے عوام کے جان ومال کو محفوظ بنائے۔

مجلس وحدت مسلمین گلگت بلتستان کے ترجمان محمد الیاس صدیقی نے نلتر پائین اور کارگاہ کے عمائدین سے گفتگو کرتے ہوئے کہا کہ عوام کو ریلیف پہنچانا حکومت کی ذمہ داری ہے اور برفانی تودوں کی وجہ سے سڑکیں بلاک  ہونے سے قبل بالائی علاقوں میں اشیائے ضروریہ کو سٹاک کرے خاص طور پر گندم/ آٹے کی فراہمی کو یقینی بنائے۔انہوں نے کہا کہ نلتر پائین میں برفانی تودہ گرنے سے مہدی آباد کی پوری آبادی کو خطرات لاحق ہوگئے ہیں حکومت فوری اقدامات کرے اور علاقے میں خوراک اور ادویات بروقت فراہم کرنے کے اقدامات کرے۔انہوں نے ڈیزاسٹر منیجمنٹ اور ایڈ منسٹریشن سے مطالبہ کیا کہ علاقے بھر کا سروے کرکے عوام کو درپیش خطرات سے آگاہ کرے اور اشیائے ضروریہ کو ان علاقوں میں پیشگی ذخیرہ کرے نیز ادویات کی فراہمی اور ڈاکٹروں کی ٹیم کو تیار رکھے تاکہ بوقت ضرورت ایمرجنسی سے نمٹا جاسکے۔انہوں نے کہا کہ انتہائی خطرناک علاقوں سے عوام محفوظ مقامات پر منتقل کیا جائے تاکہ انسانی جانوں کا ضیاع کم سے کم ہو۔

وحدت نیوز(آزاد جموں کشمیر) مجلس وحدت مسلمین آزاد جموں و کشمیر شعبہ وحدت اسکاؤٹس کے زیر اہتمام اسکاؤٹنگ کیمپ کا انعقاد ، کیمپ میں ضلع نیلم ، ضلع مظفرآباد اور ضلع ہٹیاں بالا سمیت آزادکشمیر بھر سے اسکاؤٹس نے شرکت بھرپور شرکت کی، کیمپ میں حادثات، آفات سماوی و ارضی اور ہنگامی حالات میں امداد و بچاؤ کے لیئے تربیت دی گئی، مجلس وحدت مسلمین شعبہ وحدت اسکاؤٹس کے اسکاؤٹنگ کیمپ میں میڈیکل ایڈ، فیزیکل فٹنس، ڈیزاسٹر منیجمنٹ، ریسکیوٹرینگ سمیت مختلف حفاظتی و سیکورٹی امور پر ٹرینگ و تربیت دی گئی۔ٹرینگ کا انعقاد وحدت چیف سکاؤٹ مجلس وحدت مسلمین آزاد جموں و کشمیر سیدعنصرنقوی اور انکی کابینہ نے کیا۔وحدت اسکاؤٹنگ کیمپ میں مختلف علمائے کرام نیعصر حاضر میں نوجوانوں کے کردار پر لیکچر دیئے،علامہ ممتاز علی حسینی نے تربیتی لیکچر دیتے ہوئے کہا کہ شعبہ اسکاؤٹس کا مقصد ہی نوجوانوں کو متحرک و مددگار بنانا ہے، نوجوان کسی بھی معاشرے میں ریڑھ کی ہڈی کی حیثیت رکھتے ہیں، آج تک جتنے بھی انقلاب آئے تاریخ گواہ کہ نوجوانوں کا اُن میں اہم کردار تھا، انقلاب اسلامی کے لیئے بھی نوجوانوں کو میدان عمل میں اترنا ہو گا، کسی بھی قوم کا اگر جوان متحرک ہو وہ قوم کسی وقت بھی کچھ بھی کر سکتی ہے، موجودہ دور انتہائی پُرآشوب و کٹھن ہے، آج کے دور میں جہاں نفسا نفسی کا عالم ہے، اس دور میں دوسروں کی اشک شوئی کرنے کے حوالے سے سوچنا ہی عبادت ہے۔عصر حاضر کا جوان کچھ بھی کرنے کی صلاحیت رکھتا ہے، فقط ضرورت اس امر کی ہے کہ نوجوانوں کی توانائیوں کو صیح سمت میں استعمال کیا جائے۔

وحدت نیوز (اسلام آباد) خیرالعمل فائونڈیشن مجلس وحدت مسلمین پاکستان کا شعبہ فلاح و بہبود ہے جس کا بنیادی مقصد معاشرے کے محروم مستعضف اور پابرہنہ افراد کی بلاتفریق رنگ و نسل و مذہب خدمت کرنا اور معاشرے میں ثقافت، ایثار، بھائی چارے، محبت رواداری اور دوسروں کی مدد جیسی اعلٰی اقدار کو پروان چڑھا کر انسانیت کو بندگی کے بلند ترین مرتبے پر فائز کرنا ہے۔
رپورٹ: شوکت بھٹی

انسانیت کی خدمت شیوہ انبیاء ہے، وہ لوگ جو انسانیت کے دکھ درد کو محسوس کرتے ہوئے یہ کار انبیا سرانجام دیتے ہیں انہیں نہ صرف اس دنیا میں سرفرازی و سربلندی ملتی ہے، بلکہ وہ آخرت میں بھی سرخرو ہوتے ہیں۔ مجلس وحدت مسلمین پاکستان کے شعبہ فلاح و بہبود نے مستعضعیفین جہان بالخصوص پاکستان کے پسے ہوئے پا برہنہ لوگوں کی قدرتی و انسانی سانحات کے نتیجے میں پیدا ہونیوالی دگرگوں صورتحال پر توجہ مبذول کرتے ہوئے انتہائی قلیل وسائل کے ساتھ فقط اللہ کی نصرت پر قوی ایمان رکھتے ہوئے تین برس قبل انسانیت کی خدمت کے سفر کا آغاز کیا تھا، آغاز سفر پر 2010ء میں شہید قائد علامہ عارف حسین حسینی کی برسی کے موقع پر وطن عزیز میں مون سون بارشوں اور سیلابی صورتحال کے متاثرین کی بحالی کے لئے فلڈ ریلیف فنڈ قائم کیا گیا اور متاثرین کے ابتدائی ریلیف اور ریسکیو سے شروع ہونیوالا یہ سفر آبادکاری اور تعمیرنو مرحلے تک پہنچ چکا ہے، ان تمام مراحل کو عبور کرنے میں ایم ڈبلیو ایم کے مسئولین نے ایک ہدف کو سامنے رکھتے ہوئے دن رات انتہائی جانفشانی سے کام کیا، وقت گزرنے کے ساتھ ساتھ جب اہداف میں وسعت آنے لگی تو ماضی کے تجربات و مشاہدات کی روشنی میں انفرادی طور پر کام کرنے کی بجائے ادارے کی شکل میں منظم ہونے کا فیصلہ کیا گیا اور یوں خیر العمل فائونڈیشن کے نام سے ایک مستقل ادارہ معرض وجود میں آیا۔

آج الحمدللہ مجلس وحدت مسلمین پاکستان مسلسل کامیابیوں و کامرانیوں کی منازل طے کر رہی ہے، ان لازوال کامیابیوں میں جہاں تائید الٰہی، نصرت امام زماں اور تاثیر خون شہداء کا اثر ہے وہاں قدرتی سانحات و مشکلات میں گھرے ہوئے افراد کی خدمت میں خیرالعمل فائونڈیشن کے بےلوث اور فعال کردار کا بھی عمل دخل ہے۔ سرزمین پاکستان بالخصوص سندھ اور پنجاب میں مظلومین و شہداء کے ساتھ تجدید عہد کیلئے منعقد کئے جانیوالے عظیم الشان جلسوں میں عوام کی بھرپور شرکت کی وجہ ایم ڈبلیو ایم کے شعبہ فلاح و بہبود کی بےلوث خدمات بھی ہیں۔ مجلس وحدت مسلمین پاکستان اپنی تاسیس سے ہی معاشرے میں وطن، اسلام اور انسانیت دوست قوتوں کو اکٹھا کرنے کے لئے اسلام ناب محمدی (ص) کا پرچم بلند کئے عملی جدوجہد کر رہی ہے تاکہ رنگ، نسل، ذات اور مذہب کی بنیاد پر بائے جانے والے نفرتوں کو بیج اکھاڑ کر اسلامی تعلیمات کی روشنی میں معاشرے کی اخلاقی، معاشی، سماجی اور سیاسی قدروں کو پروان چڑھایا جا سکے۔

خیرالعمل فائونڈیشن مجلس وحدت مسلمین پاکستان شعبہ فلاح و بہبود ہے جس کا بنیادی مقصد معاشرے کے محروم مستعضف اور پابرہنہ افراد کی بلاتفریق رنگ و نسل و مذہب خدمت کرنا اور معاشرے میں ثقافت، ایثار، بھائی چارے، محبت رواداری اور دوسروں کی مدد جیسی اعلیٰ اقدار کو پروان چڑھا کر انسانیت کو بندگی کے بلند ترین مرتبے پر فائز کرنا ہے۔ اللہ تعالی نے اپنی مقدس کتاب قرآن کریم میں ارشاد فرمایا کہ نیکیوں کی طرف سبقت کرو"، مجلس وحدت مسلمین پاکستان کے شعبہ فلاح و بہبود نے اسی آیہ مبارکہ کو اپنا نعرہ بنا رکھا ہے اور اسی مشن کے تحت آگے بڑھ رہی ہے۔ انسانیت کی خدمات کے تسلسل اور اپنے اعلیٰ و ارفع اہداف کو سامنے رکھتے ہوئے خیر العمل فائونڈیشن نے ابتدائی طور پر تین اہم شعبوں ڈیزاسٹر منیجمنٹ پروگرام، سسٹین ایبل ڈویلپمنٹ پروگرام اور ہیومن رائٹس پروٹیکشن پروگرام پر کام کا آغاز کیا ہے جن کے تحت مختلف علاقوں میں کام جاری ہے۔

1۔ڈیزاسٹر منیجمنٹ پروگرام (Desaster managment program)
مجلس وحدت مسلمین پاکستان کے شعبہ فلاح و بہبود خیر العمل فائونڈیشن کی جانب سے شروع کیے گئے اس فلاحی پروگرام کا بنیادی مقصد یہ ہے کہ کسی بھی قدرتی یا انسانی سانحہ مثلاً زلزلہ، سیلاب، آتشزدگی یا بم دھماکے کی صورت میں بروقت اقدامات اٹھا کر نقصان کی شدت میں کمی لائی جا سکے، ریلیف و ریسکیو سرگرمیوں کو منظم انداز میں آگے بڑھانے کیلئے سکائوٹس اداروں، رضاکاروں اور دیگر فلاحی تنظیموں کے ساتھ ہم آہنگی کے لئے نیشنل والنٹیئر پرگرام کا اجراء کیا جائے اور ملک بھر میں رضاکارانہ خدمات سرانجام دینے والے دیگر فلاحی اداروں کے ساتھ ورکنگ ریلیشنز پیدا کئے جائیں، متاثرین کی بحالی، آبادکاری اور تعمیرنو کے مراحل خوش اسلوبی کے ساتھ طے کئے جائیں اور متاثرین کی بلاتفریق رنگ و نسل منصفانہ اور شفاف بنیادوں پر امداد کرنا اور ان کے معمولات زندگی واپس لوٹانے کے لئے مستقل بنیادوں پر منصوبہ بندی کی جائے۔ خیر العمل فائونڈیشن کے اس پروگرام کے تحت مرکزی ڈیزاسٹر منیجمنٹ سیل کسی بھی ہنگامی صورتحال میں مرکزی و علاقائی سطح پر ڈیزاسٹر منیجمنٹ سیل قائم کیا جاتا ہے، جس کے تحت فوری امکانات و وسائل سے استفادہ کرتے ہوئے ہر سطح پر ایسی ٹیمیں تشکیل دی جاتی ہیں جو پہلے سے ہی اس صورتحال سے نبرد آزما ہونے کے لئے آمادہ و تیار ہوں اور خلوص نیت کے ساتھ فلاحی خدمات سرانجام دیں۔

2۔ مستقل و دیرپا نتائج کے منصوبے(Sustainable develop program)
خیر العمل فائونڈیشن کے اس منصوبے کے تحت معاشرے میں مختلف پہلووں سے بنیادی ضروریات زبدگی کی فراہمی کی رفتار کا جائزہ لیا جاتا ہے اور اس ضمن میں حائل رکاوٹوں کو دور کرنے کے طریقوں پر غور و خوض کیا جاتا ہے جس کے نتیجے میں افرادی، مالی، فکری اور دیگر توانائیوں سے استفادہ کیا جاتا ہے اور انسانی زندگی کی بنیادی ضروریات کو پورا کرنے کے لئے بالواسطہ یا بلاواسطہ اقدامات بھی اٹھائے جاتے ہیں، اس پروگرام کو چند حصوں میں تقسیم کیا گیا ہے۔

شعبہ رابط و کوآرڈینیشن: اس شعبہ کے تحت ملک بھر میں کام کرنے والے رفاہی و فلاحی اداروں، تنظیموں کے ساتھ روابط رکھے جاتے ہیں، فلاحی سرگرمیوں کو ایک دوسرے کے ساتھ ہم آہنگ کرنے کی کوششیں کی جاتی ہیں اور ان کے ساتھ حتی الامکان کوآرڈینیشن، تعاون، تجربات کے تبادلہ کے ساتھ ساتھ ورکنگ ریلیشز قائم کئے جاتے ہیں۔
 
شعبہ سروے اینڈ ریسرچ: اس شعبے کے تحت ملک بھر میں محرومین اور امداد کے مستحقین کو درپیش مسائل و مشکلات کا تفصیلی جائزہ لے کر ان کے حل کے لئے سروے رپورٹس مرتب کی جاتی ہیں اور ان رپورٹس پر عمل درآمد کے حوالے سے تجاویز و سفارشات مرتب کی جاتی ہیں۔

 چھوٹے منصوبوں کی تیاری اور ان پر عمل درآمد: یہ شعبہ سروے اینڈ ریسرچ ڈیپارٹمنٹ کی سفارشات کی روشنی میں چھوٹے منصوبوں کی فزیبلٹی تیار کرتا ہے، ان چھوٹے منصوبوں میں پولٹری فارم، ہینڈ پمپس، واٹر ٹربائنز، فلٹر پلانٹس، بیج و کھاد کی فراہمی، کاروبار و کسانوں کے لئے چھوٹے قرضے، طلبہ طالبات کو یونیفارم و سٹیشنری کی فراہمی، نادار بچیوں کو جہیز کی فراہمی اور مستحق مریضوں کے علاج کے منصوبے شامل ہیں، یہ منصوبے تیار کر کے ڈونرز تک پہنچائے جاتے ہیں اور ان کی منظوری کے بعد ان پر عمل درآمد کیا جاتا ہے۔

تعلیم سپورٹ پروگرام: اس شعبے کی ذمہ داریاں یہ ہیں کہ ایسے علاقے جن میں بنیادی و معیاری دینی و دنیاوی تعلیم کی فراہمی ایک اہم مسئلہ ہو وہاں تعلیمی مسائل حل کرنے کیلئے مقامی سطح پر تجربہ و صلاحیت رکھنے والے افراد کو سہولیات فراہم کرے تاکہ علاقہ کے تعلیمی مسائل حل کئے جا سکیں۔

شعبہ صحت عامہ: اس شعبہ کی ذمہ داریوں میں عوام الناس کو صحت کی بنیادی سہولیات کی فراہمی کے لئے بنیادی مراکز صحت کی طرز پر ڈسپنسریوں، صحت کے تمام بنیادی لوازمات کے ساتھ ضلعی و تحصیل سطح پر ہسپتالوں کا قیام شامل ہے، البتہ ان منصوبوں پر عمل درآمد کیلئے علاقہ میں صحت کی سہولیات کی صورتحال اور اس سروس کی فراہمی کیلئے موزوں اور متعلقہ تجربہ رکھنے والے افراد کی موجودگی پروجیکٹ کی اپروول میں اہم کردار ادا کرے گی۔
 
شعبہ کفالت ایتام: خیر العمل فائونڈیشن کے تمام شعبوں میں کفالت ایتام کا شعبہ انتہائی خاص اہمیت کا حامل ہے، اس شعبے کے تحت یتیموں کی بہترین انداز میں کفالت کی جائے گی اس ضمن میں یہ شعبہ ایک جامع منصوبہ بندی کر کے آبرومندانہ طریقے سے یتیموں کی کفالت کرے گا اور انہیں معاشرے کا باعزت شہری بنانے کے لئے موثر کردار ادا کرے گا، یہ شعبہ اس اہم ذمہ داری سے عہدہ برآء ہونے کے کے لیے اپنے تمام ممکنہ وسائل بروئے کار لانے کے ساتھ ساتھ مخیر شخصیات کو اس کار خیر کی ترغیب دینے کیلئے بھی موثر اور جامع پروگرام تشکیل دے گا تاکہ زیادہ سے زیادہ لوگ اپنے ارد گرد بسنے والے ایتام کی کفالت کو اپنے ذمہ لے کر قرب خدا حاصل کر سکیں۔
 
3۔ انسانی حقوق کی پاسداری (Human rights protection program)
خیرالعمل فائونڈیشن کے اس پروگرام کے اہداف میں بنیادی انسانی حقوق کی پاسداری کے لئے موثر آواز بلند کرنا، معاشرے کے پسے ہوئے محروم طبقے کی داد رسی اور ان کے حقوق کا دفاع سرفہرست ہے، اس ضمن میں بنیادی انسانی حقوق آگاہی پروگرام کے تحت عوام الناس کو بنیادی انسانی حقوق کا ادراک کرانے کیلئے لٹریچر آگاہی مہم چلائی جائے گی جس سے وہ اپنے حقوق کا احساس کرتے ہوئے مسائل کے حل اور مشکلات سے نجات حاصل کرنے کیلئے جدوجہد کریں گے، اس کام کے لئے وکلاء و سوشل ایکٹیوسٹ کا باقاعدہ ایک فورم تشکیل دیا جائے گا۔ (جاری ہے)