The Latest
0
وحدت نیوز (کوئٹہ) کوئٹہ میں شیعہ ہزارہ کمیونٹی کو ایک مرتبہ پھر دہشت گردی کا نشانہ بنایا گیا ہے۔ دہشت گردی کے اس سانحہ میں کل چھ افراد شہید ہوئے ہیں، جن میں دو خواتین بھی شامل ہیں۔ کچلاک کے علاقے جلوگیر میں پیٹرول پمپ پر چمن سے آنے والی بدقسمت گاڑی پٹرول بھرانے کیلئے رکی تو تکفیری دہشتگردوں نے نہتے مسافروں پر اندھا دھند فائرنگ کر دی۔ جس سے گاڑی میں سوار تمام افراد شدید زخمی ہوگئے، جبکہ طبی امداد میں تاخیر کے سبب تمام افراد ہسپتال پہنچتے پہنچتے راستے میں ہی دم توڑ گئے۔ قانون نافذ کرنے والے اداروں نے جائے وقوعہ پہ پہنچ کے معمول کی تفتیش کا آغاز کر دیا ہے۔دیگر ذرائع کے مطابق کوئٹہ کے علاقے کچلاک میں نامعلوم مسلح افراد کی فائرنگ سے ہزارہ برادری سے تعلق رکھنے والے 3 افراد سمیت 4 جاں بحق اور دو خواتین زخمی ہوگئیں۔ پولیس عہدیدار ظہور خان کا کہنا تھا کہ جاں بحق افراد پاک افغان سرحد کے علاقے چمن سے کوئٹہ آرہے تھے کہ انہیں نشانہ بنایا گیا۔ ان کا کہنا تھا کہ گاڑی میں سوار دو خواتین زخمی ہوگئیں، جنھیں سول ہسپتال کوئٹہ منتقل کر دیا گیا ہے۔ پولیس عہدیدار نے کہا کہ حادثہ ٹارگٹ کلنگ کا واقعہ لگتا ہے۔ انہوں نے مزید کہا کہ واقعے کے بعد ملزمان موٹر سائیکل پر سوار ہو کر جائے وقوعہ سے فرار ہوگئے۔ پولیس اور قانون نافذ کرنے والے اداروں کے اہلکاروں نے جائے وقوعہ پہنچ کر واقعے کی تفتیش کا آغاز کر دیا جبکہ واقعے کے فوری بعد کچلاک میں کئی گھنٹوں تک ٹریفک کا نظام درہم برہم ہوگیا۔ وزیراعلٰی بلوچستان نواب ثناء اللہ زہری نے واقعے کی شدید مذمت کرتے ہوئے پولیس سے واقعے میں ملوث ملزمان کو فوری گرفتار کرنے کی ہدایت کر دی ہے۔ وزیراعلٰی بلوچستان کی جانب سے جاری بیان میں کہا گیا ہے کہ دہشت گرد کسی صورت بچ نہیں پائیں گے۔ یاد رہے کہ رواں سال 4 جون کو کوئٹہ کے علاقے سپینی روڑ پر نامعلوم مسلح افراد کی فائرنگ سے ہزارہ برادری سے تعلق رکھنے والی ایک خاتون اور مرد جاں بحق ہوگئے تھے جبکہ 19 جولائی کو بلوچستان کے علاقے مستونگ میں فائرنگ سے 4 افراد کو جاں بحق کیا گیا تھا۔ پولیس ذرائع کا کہنا تھا کہ نامعلوم مسلح حملہ آور نے ایک گاڑی پر فائرنگ کر دی، جس کے نتیجے میں خاتون سمیت گاڑی میں سوار 4 افراد جاں بحق ہوئے۔ خیال رہے کہ صوبہ بلوچستان میں مختلف کالعدم تنظیمیں سکیورٹی فورسز اور پولیس اہلکاروں پر حملوں میں ملوث رہی ہیں، جبکہ گذشتہ ایک دہائی سے صوبے میں فرقہ وارانہ قتل و غارت میں اضافہ ہوا ہے۔ صوبے میں گذشتہ 15 برسوں کے دوران اقلیتی برادری کو نشانہ بنائے جانے کے ایک ہزار 400 سے زائد واقعات پیش آچکے ہیں۔
وحدت نیوز (لاہور) مجلس وحدت مسلمین کے مرکزی سیکرٹری امور سیاسیات سید اسدعباس شاہ کی درخواست پر جمیعت علمائے پاکستان نیازی نے ضمنی انتخاب حلقہ این اے 120 کیلئے پاکستان تحریک انصاف کی امیدوار ڈاکٹر یاسمین راشد کی حمایت کا اعلان کردیا۔ مشترکہ اجلاس میں اسد عباس شاہ، اعجاز چوہدری، پیر عثمان نوری اور ڈاکٹر امجد چشتی اور دیگر رہنماو¿ں نے شرکت کی۔ اجلاس سے خطاب کرتے ہوئے سید اسد عباس نے کہا کہ مجلس وحدت مسلمین کرپشن سے پاک پاکستان چاہتی ہے، نواز شریف اور ان کی جماعت کی کرپشن سب پر واضح ہوچکی ہے، اس حلقہ کے انتخاب کو اہمیت اس وجہ سے بھی حاصل ہوگئی ہے کہ یہاں نواز شریف کی جماعت کی شکست پورے پاکستان میں ان کی جماعت کی شکست ثابت ہوگی۔
وحدت نیوز( کوئٹہ) مجلس وحدت مسلمین کوئٹہ ڈویژن کے زیر اہتمام عید غدیر کے موقع پر اجتماعی شادیوں کی تقریب کا انعقاد کیا گیا، جس میں ایم ڈبلیو ایم کے مرکزی ڈپٹی سیکرٹری جنرل علامہ سید احمد اقبال رضوی نے خصوصی شرکت کی۔ تقریب میں اپنی نئی زندگی کا آغاز کرنے والے جوڑوں میں گھریلو سامان سمیت تحائف بھی تقسیم کئے گئے۔ اجتماعی شادیوں کی اس تقریب میںتمام مکاتب فکر اور عیسائی برادری سے تعلق رکھنے والے جوڑے بھی شامل تھے،پر وقار اور بلا رنگ و نسل و مذہب تقریب کے اہتمام پر عوام کی جانب سے مجلس وحدت مسلمین کو بھرپور انداز میں خراج تحسین پیش کیا گیا۔ تقریب میں مجلس وحدت مسلمین پاکستان کے مرکزی رہنماءعلامہ سید ہاشم موسوی ، صوبہ بلوچستان کے سیکرٹری جنرل علامہ برکت مطہری، ایم ڈبلیو ایم کے رکن بلوچستان اسمبلی سید محمد رضا رضوی اور ڈویژنل کابینہ سمیت دیگر نے شرکت کی۔ تقریب سے خصوصی خطاب کرتے ہوئے مجلس وحدت مسلمین پاکستان کے مرکزی ڈپٹی سیکرٹری جنرل علامہ سید احمد اقبال رضوری نے کہا کہ مادر وطن میں بسنے والے تمام مکاتب و مذاہب کے افراد ہمارے بھائی ہیں،اہل وطن میں مذہب مکتب اور قومیت کے نام پر تقسیم پیدا کرنے والے دشمن کے آلہ کار ہیں۔ہم اسی تفریق کیخلاف جدوجہد میں مصروف ہیں اور اسکا عملی نمونہ آج کی یہ پروقار تقریب ہے۔ان کا مزید کہنا تھا کہ دشمن ہمیں تقسیم کرکے ملکی سلامتی پر وار کرنے کے درپے ہیں،ہم سلام پیش کرتے ہیں ہمارے رکن بلوچستان اسمبلی آغا رضا کو جنہوں نے حقیقی عوامی نمائندہ ہونے کا ثبوت دیا۔بلوچستان کے غیور عوام ملک دشمنوں کیخلاف متحد ہو کر قومی سلامتی میں اپنا کردار ادا کریں۔
وحدت نیوز (ٹیکسلا) برما میں مسلمانوں کی نسل کشی پر مسلمان حکمرانوں کی خاموشی ظالم کے ظلم پر رضا مندی کی علامت ہے۔ مقررین کا مجلس وحدت مسلمین، آئی ایس او، آئی او اور تحریک منہاج القران کی مشترکہ احتجاجی ریلی سے خطاب۔ مقررین کا مزید کہنا تھا کہ امت مسلمہ کو برما میں مسلمانووں کے اوپر ہونے والے مظالم پر خاموش رہنے کی بجایے سخت موقف اپنانا ہو گا ۔مقررین کا مزید کہنا تھا کہ مالدیپ جیسے چھوٹے ملک کی عظمت کو سلام پیش کرتے ہیں جس کی اپنی فوج بھی نہیں لیکن اپنے سفارتی اور تجارتی تعلقات برما سے ختم کر دیے۔پاکستان کو بھی فی الفور برما پر واضح کرنا ہوگا کہ مسلم کشی بند کرو نہیں تو اپنا سفارتی عملہ واپس بلوالے۔ مقررین کا کہنا تھا کہ نام نہاد 41ملکی اتحاد کو صرف سعودی مفادات عزیز ہیں ۔ اس اتحاد کو برما میں مسلمانوں کی نسل کشی، کشمیر و فلسطین میں آیے روز مسلمانوں کا قتل عام، افغانستان، یمن، عراق، شام ، نایجیریا میں مظالم نظر نہیں آتے۔ اسلام کے نام نہاد ٹھیکداروں کو اگر دوسرے ملکوں میں مداخلت سے کچھ فرصت مل جائے تو برما میں نسل کشی پر بھی توجہ دے۔ احتجاجی ریلی بابو ہوٹل سے نکل کر ختم نبوت چوک پر اختتام پذیر ہوئی۔ ریلی سے مجلس وحدت کے تحصیل سیکرٹری جنرل سید وقار حیدر بخاری، منھاج القران کے سیف اللہ،سنی تحریک کے پروفیسر شیراز، القائم ٹرسٹ کے سربراہ علامہ سید مہدی شیرازی، سنی تحریک کے طاہر اعجاز قادری،سنی اتحاد کے محمد زبیر، عوامی تحریک کے سیدگفتار حسین شاہ، مسیحی برادری کے پاسٹل سیسل نےخطاب کیا۔
وحدت نیوز (علی پور) مجلس وحدت مسلمین ضلع علی پور کی شوری کا اجلاس مرکزی امام بارگاہ مہاجرین میں منعقد ہوا، اجلاس میں خصوصی طور پر مجلس وحدت مسلمین جنوبی پنجاب کے ڈپٹی سیکرٹری جنرل سلیم عباس صدیقی نے شرکت کی، اجلاس میں ضلع بھر کے یونٹس کے اراکین اور سیکرٹری جنرل نے شرکت کی، اجلاس سے خطاب کرتے ہوئے ایم ڈبلیو ایم جنوبی پنجاب کے ڈپٹی سیکرٹری جنرل سلیم عباس صدیقی کا کہنا تھا کہ امت مسلمہ کے حکمران برماکے مسلمانوں پر ہونے والے بہیمانہ تشدد و قتل و غارت پر آنکھیں کر کے بیٹھے ہیں اور انتہاہی بے حسی کا مظاہرہ کر رہے ہیں۔ اُنہوں نے کہا کہ نام نہاد 39 ممالک کا اسلامی اتحاد کیوں خاموش ہے، کیا برما میں مرنے والے مسلمان نہیں ہیں، اُنہوں نے کہا کہ عرب ممالک کی جانب سے برما کے واقعات پر خاموشی دراصل ظلم کی حمایت ہے، مسلم حکمران برما کے مسلمانوں کے حق میں آواز نہ اٹھا کر یہودو نصاری سے اظہار یکجہتی کر رہے ہیں۔ انہوں نے کہا کہ انکی مجرمانہ خاموشی قابل مذمت ہے۔ اجلاس کے آخر میں رائے شماری کے ذریعے قمر عباس کو مجلس وحدت مسلمین علی پور کا ضلعی سیکرٹری جنرل منتخب کیا گیا، نومنتخب سیکرٹری جنرل سے صوبائی ڈپٹی سیکرٹری جنرل سلیم عباس صدیقی نے حلف لیا۔
وحدت نیوز (ملتان) مجلس وحدت مسلمین نے محرم الحرام سے قبل انتظامی افسران، علمائے کرام اور تاجران سے ملاقاتوں کا آغاز کردیا، گزشتہ روز مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے محرم الحرام کے انتظامات کے حوالے سے وفد کے ہمراہ منیجنگ ڈائریکٹر واسا رائو قاسم سے ملاقات کی، وفد میں صوبائی سیکرٹری سیاسیات مہر سخاوت علی سیال اور سید امیر حیدر گیلانی شامل تھے، علامہ اقتدار نقوی نے ملاقات کے دوران کہا کہ محکمہ ایم ڈی اے )واسا(کی جانب سے ملتان کے جلوسوں کے روٹس پر کھدائی کسی بھی بڑے سانحے کا پیش خیمہ ثابت ہو سکتی ہے، محرم الحرام سے قبل ملتان شہر کی تمام شاہرائوں کی مرمت کو یقینی بنایا جائے، انہوں نے مزید کہا کہ ایم ڈی اے کی جانب سے جلوسوں کے روٹس کی مرمت کے ساتھ ساتھ ناجائز تجاوزات اور صفائی مہم شروع کی جائے۔ اس موقع پر ایم ڈی واسا نے ایم ڈبلیو ایم کے وفد کو یقین دہانی کرائی کہ انشااللہ محرم الحرام سے قبل جلوس عزا کے روٹس پر کھدائی، تجاوزات اور مرمت کا کام مکمل کر لیا جائے جائے گا۔بعدازاں محرم کمیٹی کے اجلاس سے خطاب کرتے ہوئے علامہ اقتدار نقوی کا کہنا تھا کہ آج بانی پاکستان قائد اعظم محمد علی جناح کی برسی ہے ، قائداعظم محمد علی جناح نے جس پاکستان کی بنیاد رکھی تھی آج ہم اس پاکستان سے بہت زیادہ دور ہیں، قائداعظم ایسا پاکستان چاہتے تھے کہ جہاں بلا رنگ و نسل تمام افراد اپنی زندگی بسر کرسکیں قائداعظم اپنے ان اوصاف کی بنا پرعزم و استقلال اور واضح نصب العین اوردانشمندی کے اعلی درجوں پر فائز تھے۔ انہی اوصا ف کی بنا پر قائد اعظم کٹھن حالات کا سامنا کرتے ہوئے برصغیر کے مسلمانوں کیلئے آزاد مملکت کے قیام میں کامیاب وکامران ہوئے، قائداعظم کے 69ویں یوم وفات کے موقع پر بابائے قوم کو خراج عقیدت پیش کرتے ہوئے ہمیں ان اصولوں پرکاربند رہنے کے عزم کا اعادہ کرنا ہوگا جن اصولوں پرہمارے عظیم قائد تمام زندگی کاربند رہے۔
وحدت نیوز (ملتان) مجلس وحدت مسلمین ضلع ملتان کی شوری کا اجلاس جامع مسجد الحسین نیوملتان میں منعقد ہوا ، اجلاس کی صدارت صوبائی سیکرٹری جنرل علامہ سید اقتدار حسین نقوی نے کی،جبکہ اجلاس میں ڈپٹی سیکرٹری جنرل محمد عباس صدیقی ، سابق مرکزی رہنما یافث نوید ہاشمی،علامہ قاضی نادر حسین علوی، مہر سخاوت علی ،سید وسیم عباس زیدی نے خصوصی شرکت کی، اجلاس میں ملتان،شجاعباد اور جلالپور پیروالا کے یونٹس اراکین اور رہنمائوں نے شرکت کی، اجلاس سے خطاب کرتے ہوئے علامہ اقتدار حسین نقوی کا کہنا تھا کہ ایم ڈبلیو ایم محرم الحرام سے قبل تمام مسالک کے مذہبی رہنمائوں،علمائے کرام سے ملاقاتوں کا سلسلہ شروع کیا جائے گا، ہم محرم الحرام سے قبل ملتان میں امن اور آشتی کو فضا میں ہموار کریں گے، اُنہوں نے مزید کہا کہ صوبائی اور ضلعی حکومت محرم الحرام کے مسائل اور مشکلات کی طرف توجہ دے، ہم دوسرے مرحلے میں بیوروکریٹس اور انتظامی نمائندوں سے ملاقات کریں گے اور گزشتہ سال محرم کے مسائل کی نشاندہی کریں گے۔ اجلاس کے آخر میں متفقہ طور پر تین ماہ کے لیے ضلع ملتان کے لیے چودہ رکنی آرگنائزنگ کمیٹی کا اعلان کیا گیا، سید دلاور عباس زیدی کو آرگنائزنگ کمیٹی کا کوارڈینیٹر مقرر کیا گیا۔ چودہ رکنی آرگنائزنگ کمیٹی میں مولانا اعجاز حسین بہشتی،محمد اصغر سومرو،ریاض حسین شاہ،زاہد عباس ثوری، زاہد حسین قریشی، محمد علی کاظمی، تابش رضا نقوی،زوار ممتاز جعفری، ملک اطہر حیات، طالب حسین، الطاف حسین اور ثقلین حیدر شامل ہیں۔
وحدت نیوز (لاہور) مجلس وحدت مسلمین ضلع لاہور کا حلقہ این اے 120 میں انتخابی مہم کے لئے جنرل کونسل کا ہنگامی اجلاس،اجلاس کی صدارت مرکزی سیکرٹری سیاسیات سید اسد عباس نقوی نے کی،اجلاس میں حلقہ 120 میں پاکستان تحریک انصاف کی امیدوار ڈاکٹر یاسمین راشد کی حمایت میں ڈور ٹو ڈور انتخابی مہم چلانے کا اعلان،اجلاس سے خطاب کرتے ہوئے مرکزی سیکرٹری سیاسیات سید اسد عباس نقوی نے کہا کہ کرپٹ مافیا اور مورثی سیاست کیخلاف تاریخی انتخابی مہم چلائیں گے،ن لیگ نے ہمیشہ ملت جعفریہ کو دیوار سے لگانے کی کوشش کی، نیشنل ایکشن پلان کے نام پر پنجاب بھر میں ملت تشیع کو ہراساں کرنے کا سلسلہ جاری ہے،ہمارے درجنوں علماء،اور پڑھے لکھے نوجوان اب بھی پنجاب میں غائب ہیں،ہمارے علماء اور نوجوانوں کی گمشدگی میں پنجاب حکومت برابر کے شریک ہیں،ایم ڈبلیوایم کے کارکنان خلوص نیت سے ڈاکٹر یاسمین راشد کے انتخابی مہم میں بھر پور حصہ لیں،انشااللہ این اے 120 سے کرپٹ مافیا اور مورثی سیاست کو شکست دینگے،این اے 120 سے تعلق رکھنے والے عمائدین نے مجلس وحدت مسلمین کے اعلان کے بعد اس امر کی یقین دہانی کی ہے کہ وہ پاکستان تحریک انصاف کی امیدوار کی کامیابی کے لئے کلیدی کردار ادا کرینگے،مجلس وحدت مسلمین اسلام پورہ یونٹ آج اسلام پورہ میں انتخابی دفترکا بھی افتتاح کریگی،حلقہ بھر میں کارنر میٹنگز اور ڈور ٹو ڈور رابطہ مہم کے لئے مردوں کیساتھ ساتھ مجلس وحدت مسلمین شعبہ خواتین بھی بھرپور کردار ادا کریگی۔
وحدت نیوز (اسلام آباد) خیرالعمل ویلفیئر اینڈ ڈویلپمنٹ ٹرسٹ کے چیئرمین علامہ سید باقر زیدی نے کہا ہے کہ خیرالعمل ویلفیئراینڈ ڈویلپمنٹ ٹرسٹ کا ہدف دکھی انسانیت کی خدمت ہے، دکھی انسانیت کی خدمت کر کے دلی سکون ملتا ہے۔ خیرالعمل ویلفیئر اینڈ ڈویلپمنٹ ٹرسٹ دکھی انسانیت کی خدمت کا جذبہ لیکر میدان عمل میں ہے۔ خیرالعمل ویلفیئر اینڈ ڈویلپمنٹ ٹرسٹ نے کسی موقع پر بھی معاشرے کے مستحقین ،یتیموں، بے سہارا افراد کو تنہا نہیں چھوڑا خصوصا عید کے تہواروں پر انکو اپنے ساتھ عید کی خوشیوں میں شا مل کیا اور اسکے لیئے خیرالعمل ویلفیئر اینڈ ڈویلپمنٹ ٹرسٹ روز اول سے کوشاں رہا ہے ۔ اس عید قربان پر بھی ہر سال کی طرح خیرالعمل ویلفیئر اینڈ ڈویلپمنٹ ٹرسٹ کی طرف سے معاشرے کے مستحقین ،یتیموں اور بے سہا را اور بالخصوص شہداء کی فیملیز کو جو قربانی کی استطاعت نہ رکھنے کی وجہ سے قربانی نہیں کر سکتے ان کو اپنے ساتھ عید کی خوشیوں میں شامل کرنے کے لیئے ملک بھر میں اجتماعی قربانی کا ا ہتمام کیا ۔خیرالعمل ویلفیئر اینڈ ڈویلپمنٹ ٹرسٹ کی طرف سے ملک بھر میں مختلف علاقوں میں مستحقین،یتیموں ،بے سہارا ،شہداء کی فیملیز اور بالخصوص کراچی میں بارش سے متاثرین کو عید کے موقع پر اپنے ساتھ عید کی خوشیوں میں شامل کرنے کے لیئے خیرالعمل ویلفیئر اینڈ ڈویلپمنٹ ٹرسٹ کی طرف سے کراچی کے علاقوں نارتھ کراچی،نیو کراچی،سرجانی،خداکی بستی،وزیر بروہی گوٹھ ،فقیرہ گوٹھ، جمالی گوٹھ ،خادم سولنگی گوٹھ ، احسن آباد ،ایوب گوٹھ اور عبدالرحیم گوٹھ ۔ سندھ کے اضلاع میر پور خاص،ٹھٹھہ،گھوٹکی،نواب شاہ،شکار پور کے مختلف علاقوں۔جنوبی پنجاب میں ضلع بھکر ، ملتان ،علی پور ۔ خیبر پختونخواہ کے ضلع کوہاٹ ،ہنگو ۔ضلع اسلام آباد اورلاہور میں اجتماعی قربانی کا اہتمام کیا گیا اور ہزاروں افراد میں عید قربان کا گوشت تقسیم کیا گیا۔ خیرالعمل ویلفیئر اینڈ ڈویلپمنٹ ٹرسٹ کے چیئر مین سید باقر زیدی نے عید قربان کے موقع پر اس کار خیر میں ساتھ دینے والے تمام مخیر حضرات کا خیرالعمل ویلفیئر اینڈ ڈویلپمنٹ ٹرسٹ کی طرف سے شکریہ اداکیا اور دعا کی کہ اللہ تعالی انکے مال رزق میں اضافہ کرے۔ آمین
وحدت نیوز(مظفرآباد) ملت جعفریہ کا نمائندہ اجلاس، علامہ سید تصور نقوی اور ان کی اہلیہ پر قاتلانہ حملہ کرنے والوں کی عدم گرفتاری پر ایک بار پھر اظہار تشویش، انتظامیہ و حکومت پر عدم اطمینان کا اظہار کرتے ہوئے شدید تنقید، مجرمان کو جلد از جلد سلاخوں کے پیچھے چاہتے ہیں ورنہ آئندہ اجلاس میں احتجاج سمیت ہر آپشن پر غور کرتے ہوئے لائحہ عمل کا اعلان کریں گے، اعلامیہ۔ تفصیلات کے مطابق ملت جعفریہ کی جانب سے علامہ تصور نقوی کے کیس کے حوالے بنائی گئی نمائندہ کمیٹی کا اجلاس، اجلاس علامہ مفتی سید کفایت حسین نقوی کی رہائش گاہ پر ہوا۔ اجلاس کی صدارت چیئرمین کمیٹی و جعفریہ سپریم کونسل سید شبیر حسین بخاری نے کی، جبکہ سینئر ممبر اسلامی نظریاتی کونسل آزاد کشمیر علامہ مفتی سید کفایت حسین نقوی، کوآرڈینیٹر کمیٹی و ڈپٹی سیکرٹری جنرل مجلس وحدت مسلمین آزاد کشمیر مولانا سید طالب حسین ہمدانی، وائس چیئرمین جعفریہ سپریم کونسل آزاد کشمیر علامہ سید فرید عباس نقوی، صدر حسینی فاؤنڈیشن سید عار ف حسین بخاری، کوآرڈینیٹر انسداد دہشت گردی پبلک ایکشن کمیٹی سید شجاعت علی کاظمی، جنرل سیکرٹری انسداد دہشت گردی ایکشن کمیٹی سید تصور عباس موسوی، سیکرٹری جنرل مجلس وحدت مسلمین ضلع مظفرآباد سید غفران علی کاظمی، علامہ تصور نقوی کے ورثاء و کمیٹی کے دیگر اراکین نے اجلاس میں شرکت کی۔ اعلامیے کے مطابق علامہ سید تصور نقوی اور ان کی اہلیہ پر قاتلانہ حملہ کرنے والے مجرمان کی عدم گرفتاری پر ایک بار پھر شدید تشویش کا اظہار کیا گیا۔ انتظامیہ و حکومت پر عدم اعتماد کرتے ہوئے اس کیس کے حوالے سے کارکردگی کو شدید تنقید کا نشانہ بنایا گیا۔ اعلامیہ میں مطالبہ کیا گیا کہ مجرمان کو جلد از کٹہرے میں لایا جائے۔ اگر ایسا نہ کیا گیا تو آئندہ اجلاس میں احتجاج سمیت ہر آپشن پر غور کرتے ہوئے سخت لائحہ عمل دیا جائے گا۔مشرکہ اعلامیہ میں کہا گیا کہ آزاد کشمیر ایک پرامن خطہ ہے اس کے امن کو تہہ و بالا کرنے والوں کو کسی صورت کامیاب نہیں ہونے دیں گے، ملت جعفریہ ریاستی امن کے لیے ہر قسم کی قربانی کے لیے تیار ہے مگر ملت کے اتنے اہم آدمی کو ٹارگٹ کرنے کی کوشش کی گئی اور کئی ماہ گرز جانے کے باوجود مجرمان کا بے نقاب نہ ہونا اداروں کے لیے سوالیہ نشان ہے۔ ان کی کارکردگی سے ہم کسی طور پر بھی مطمئن نہیں۔ ہمارے مجرمان کو سلاخوں کے پیچھے نہ لایا گیا تو جلد سخت ردعمل دیں گے۔
