The Latest
وحدت نیوز (گلگت) آیت اللہ باقر النمر کی شہادت آل سعود کے تابوت میں آخری کیل ثابت ہوگی ان کی شہادت سے سعودی عرب کی انقلابی تحریک مزید شدت پکڑے گی اور وہ دن اب دور نہیں کہ سعودی عوام کو عالمی استکبار کے غلاموں سے نجات مل جائیگی۔
مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی نے کہا کہ ایک ایسے موقع پر جبکہ پوری دنیا دہشت گردوں کے خلاف ایک صف میں کھڑی ہوچکی ہے آل سعود نے اپنے آقاؤں کی ایماء پر آیت اللہ باقر النمر کو شہید کرکے دہشت گرد گروہوں کے ساتھ ہمدردی کا ثبوت دیا ہے۔دنیا آل سعود کے اصلی چہرے کو پہچاننے کی کوشش کرے اور آل سعود مقدس مقامات پر حاکم ہونے سے مقدس نہیں ہونگے آل سعود نے یمن میں ایک شخصی حکومت کے دفاع کیلئے ہزاروں معصوم بچوں کو خاک و خون میں غلطاں کیا ہے اور آج بھی کرائے کے فوجیوں سے یمن کی سرزمین کو بیگناہ عوام کے خون سے رنگین کئے ہوئے ہے۔اس سال حج کے موسم میں ہزاروں حجاج کرام کی شہادتوں کی ذمہ دار سعودی حکومت ہے جن کی دانستہ غفلتوں سے حجاج کرام سسکتے ہوئے شہید ہوگئے۔آج آیت اللہ باقر النمر کو پھانسی چڑھاکر سعودی حکمرانوں نے اپنی تباہی کو قریب تر کردیا ہے مسلمانان عالم شیخ نمر کی شہادت پر خاموش نہیں رہیں گے اور خود سعودی عرب کی انقلابی تحریک شہید بزرگوار کے خون سے مزید طاقت پکڑ لے گی۔انہوں نے کہا کہ آیت اللہ باقر النمر کی شہادت نے دنیا بھر کی سب سے بڑی دہشت گرد حکومت کے چہرے سے نقاب الٹ دیا ہے ۔آل سعود جو شام و عراق میں دہشت گرد گروہوں کی مکمل پشت پناہی کررہی ہے جس کا خمیازہ عنقریب انہیں بھگتنا پڑے گا۔ انہوں نے کہا کہ آیت اللہ باقر النمر کی اس المناک شہادت پرکل پورے گلگت بلتستان میں احتجاج کیاجائیگا۔
وحدت نیوز(گلگت) سعودی عرب کو آیت اللہ باقر النمر کی پھانسی کی بھاری قیمت چکانا پڑے گی۔شیخ باقر النمر کو پھانسی دیکر آل سعود ایک ایسے دلدل میں پھنس چکے ہیں جس سے چھٹکارا ممکن نہ ہوگا اور اس نفس ذکیہ کے قتل سے آل سعود کے اقتدار کا سورج غروب ہوگا ۔
مجلس وحدت مسلمین ضلع گلگت کے زیر اہتمام سعودی حکومت کے خلاف امامیہ مسجد سے شہید ضمیر عباس چوک تک احتجاجی ریلی نکالی گئی ۔ریلی کے شرکاء نے امریکہ،آل سعود اور صیہونی ریاست کے خلاف اپنے غم و غصے کا اظہار کیا ،شرکاء کے ہاتھوں میں شہید باقر النمر کی تصاویر اٹھا رکھے تھے۔شہید ضمیر عباس چوک پر ریلی کے شرکاء سے مجلس وحدت مسلمین اور امامیہ کونسل کے رہنماؤں نے خطاب کیا۔اپنے خطاب میں ان رہنماؤں نے سعودی حکومت کی جانب سے شیخ باقر النمر کی پھانسی کو مشرق وسطیٰ اور دیگر ممالک میں سنی شیعہ وحدت کو پارہ پارہ کرنے کی سازش قرار دیا ۔ایک ایسے وقت میں جبکہ پوری دنیا دہشت گردی کے عذاب میں مبتلا ہے آل سعود نے اپنے صیہونی آقاؤں کے اشاروں پر آیت اللہ باقر النمر کا خون کیا ہے جس کا مقصد امت مسلمہ کے مابین نفرت کا بیج بونا ہے۔انہوں نے کہا کہ آل سعود نے بے جرم و خطا باقر النمر کو پھانسی دیکر عالم اسلام کو غمزدہ کردیا ہے اور آل سعود کا یہ اقدام ناقابل معافی جرم ہے جس کی سزا بھگتنے کیلئے آل سعود تیار رہے۔مجلس وحدت مسلمین گلگت بلتستان کے سیکرٹری سیاسیات غلام عباس نے اپنے خطاب میں کہا کہ آل سعود کا جھوٹا پروپیگنڈہ اب ان کے کسی کام نہیں آئے گا اور شہید باقر النمر کا مقدس خون سعودی شہنشاہیت کے خاتمہ کا سبب بنے گا۔انہوں نے کہا کہ غاصب سعودی حکومت صیہونی اشاروں پر خطے میں اس کے مفادات کا تحفظ کررہی ہے ،باقر النمر کی پھانسی کا فائدہ صیہونی حکومت کو ہوگا۔امامیہ کونسل کے رہنما میجر ریٹائرڈ حسین شاہ نے شرکاء ریلی سے خطاب کرتے ہوئے سعودی عرب کی اس ظلم و بربریت کو ریاستی سطح پر جارحیت کے مترادف قرار دیتے ہوئے آل سعود کی سخت الفاظ میں مذمت کی۔ انہوں نے کہا کہ آل سعود کا سعودی عرب پر غاصبانہ قبضہ ہے جو اپنے سیاسی مخالفین کو کچلنے کیلئے اسلام کا نام استعمال کررہے ہیں اوردنیا کے بھولے بھالے مسلمان ان کے جھوٹ پروپیگنڈے کا شکار ہیں۔مجلس وحدت مسلمین کے رہنما علی حیدر نے اپنے خطاب میں کہا کہ پاکستانی حکمران آل سعود کی نمک حلالی کرکے بخشو بننے کی بجائے مملکت کے عزت و وقار کو برقرار رکھے۔ امامیہ کونسل کے رہنما سید یعسوب الدین نے اپنے خطاب میں کہا کہ شیخ باقر النمر نے شہادت کو لبیک کہتے ہوئے اپنی سچائی اور حق کے راستے پر ہونے ثبوت دیا ہے جبکہ غاصب ایک مقدس عالم و مرد شجاع کو پھانسی دیکر آل سعود نے اپنے ظلم و بربریت پر مہر ثبت کی ہے۔انہوں نے کہا کہ شیخ باقر النمر کا خون ناحق آل سعود کی کی بربادی کا پیش خیمہ ثابت ہوگا۔احتجاجی ریلی سے سنی اتحاد کونسل کے رہنما منظور قادری نے بھی خطاب کیا۔
وحدت نیوز (پشاور) مجلس وحدت مسلمین خیبر پختونخوا کے سیکرٹری جنرل علامہ سبطین حسینی نے کہا ہے کہ امریکہ اور اسرائیل کی خوشنودی کے لئے بے گناہ انسانوں کے خون کی ہولی کھیلنا آل سعود کی نابودی کا سبب ہو گا۔ بنیادی حقوق، انسانی حقوق، سماجی حقوق، مذہبی حقوق، معاشی حقوق، جمہوری حقوق کی جدوجہد کے لئے شیخ اور ان کے ساتھیوں کا خون رائیگاں نہیں جائے گا۔ یہ خون آل سعود کی نابودی اور سعودی عوام کی حریت کا آزادی کا سبب ہوگا، سعودی عرب کے غیور عوام شیخ نمر کے چاہنے والے ان کے محب شیخ نمر کے مشن کو جو انبیا کا مشن تھا، اوسیا کا مشن تھا، آزاد انسانوں کا مشن تھا کو پایہ تکمیل تک پہنچائیں گے آل سعود کو بے گناہ انسانوں کے خون کی بھاری قیمت چکانی پڑے گی۔ آج دنیا کا ہر حر انسان بنا رنگ و نسل و تفریق مذہب کی زبان پر آل سعود کے لئے نفرین ہے۔ انشاء اللہ وہ دن دور نہیں جب سعودی عرب کے مظلوم عوام سکھ کا سانس لیں گے اور آل سعود کے مظالم کا خاتمہ ہوگا اور ان کے تخت و تاج اچھالے جائیں گے۔
جاری مذمتی بیان میں سیکرٹری جنرل ایم ڈبلیو ایم خیبر پی کے نے کہا کہ آج دنیا میں اور سعودی عرب کے عوام میں بیداری کی لہر آچکی ہے، وہ آل سعود کے نظریاتی کج روی اور مظالم سے تنگ آچکے ہیں۔ وہ اس شہنشاہیت کا خاتمہ چاہتے ہیں جس کا سرپرست امریکہ ہے۔ امریکہ کی خوشنودی اور آل یہود کی سرپرستی میں بے گناہ یمنیوں، بحرینیوں اور سعودیوں پر آل سعود کے یہ مظالم جلد ہی ان کی نابودی کا سبب بنیں گے۔ انشاء اللہ شہدا کے خون کی برکت سے مشن شہداء فکر شہداء پایہ تکمیل تک پہنچایا جائے گا۔ اب سعودی عرب کے گلی محلے میں شیخ نمر پیدا ہوں گے اور وہ حریت کے اس کاروان کو منزل مقصود تک پہنچائیں گے۔ دنیا بھر میں رہنے والے آزاد انسانوں کی ہمدردیاں شیخ نمر اور ان شہید رفقائے کار کے ساتھ ہیں۔ ستم ظریفی یہ کہ آج انسانی حقوق کی علمبردار تنظمیں اور یورپی ممالک نہتے عوام پر سعودی حکومت کے ڈھائے گئے مظالم پر خاموش ہیں۔ آل یہود کی سرپرستی، آل سعود کی ڈوبتی کشتی کو نہیں بچا سکتی۔
علامہ سبطین حسینی کا کہنا تھا کہ پاکستانی عوام بھی آل یہود کی طرح آل سعود کو نفرت کی نگاہوں سے دیکھتے ہیں۔ اور حکمرانوں پر واضح کرنا چاہتے ہیں کہ ہمیں آل سعود کی غلامی کسی طرح بھی قبول نہیں، پاکستان اسلام کے نام پر بنا ہے، اور یہ اسلامی قلعہ ہے، آل سعود کا قلعہ نہیں اور ان کی عیاشیوں کا قلعہ نہیں۔ انشاء اللہ بے گناہوں کا لہو رنگ ضرور لائے گا۔ ہر عصر میں ہر دہر میں ایک نمرود و فرعون ضرور دیکھا ہے لیکن آج ان کی نمرودیت اور فرعونیت کا نام و نشان نہیں۔ اگر زندہ ہیں تو ابراہیمی فکر زندہ ہے، عصر حاضر نے بھی صدام، قذافی اور باقی نمرود دیکھے۔ لیکن آج اگر حکومت ہے تو شہداء کی ہے۔ ظالموں کا نام و نشان نہیں۔ ان پر لعن و طعن کے علاوہ کوئی شے وجود نہیں رکھتی۔ جبکہ یہ شہداء ہیں جن کے مزارات مرجع خلائق ہیں ان کے افکار سورج کی طرح انسانوں کے لئے ہدایت کے چراغ ہیں۔
عظیم الشان عظمت شہداءکانفرنس بیاد شہدائے سانحہ جیکب آبادکا انعقاد,علامہ راجہ ناصرعباس جعفری کا خطاب
وحدت نیوز (جیکب آباد) سانحہ شب عاشور جیکب آباد کے شہداء کی یاد میں مقتل شہداء کے مقام پر عظمت شہداء کانفرنس کا اہتمام کیا گیا، عظمت شہداء کانفرنس سے مجلس وحدت مسلمین کے سیکرٹری جنرل علامہ راجہ ناصر عباس جعفری، شہداء کمیٹی کے چیئرمین علامہ مقصود علی ڈومکی، ایم ڈبلیو ایم سندھ کے سربراہ علامہ مختار احمد امامی، جئے سندھ محاذ کے چیئرمین ریاض علی چانڈیو، عبداللہ مطہری، مولانا سیف علی حیدری، وسیم لطیف مہر و دیگر نے خطاب کیا، جبکہ معروف منقبت خواں و انقلابی شاعر سید علی دیپ نے بارگاہ امامت میں نظرانہ عقیدت پیش کیا۔ اس موقع پر کانفرنس سے خطاب کرتے ہوئے علامہ راجہ ناصر عباس جعفری نے کہا کہ آپریشن ضرب عضب کو وفاقی اور صوبائی حکومتیں سنجیدہ نہیں لے رہیں، بلکہ حکمرانوں کا رویہ اور بد نیتی آپریشن ضرب عضب کو ناکام بنا سکتی ہیں۔ ملک کے مختلف علاقوں پنجاب اور اسلام آباد میں داعشی دہشت گردوں کی موجودگی حکومت کے مجرمانہ کردار کی دلیل ہے، ہم جدوجہد کے ہر مرحلے پر شہداء کمیٹی اور وارثان شہداء کے ساتھ ہیں۔ان کا کہنا تھا کہ اگر سندھ حکومت نے وعدہ خلافی کی تو وزیر اعلیٰ کی بر طرفی کا مطالبہ کریں گے۔
اس موقع پر خطاب کرتے ہوئے علامہ مقصود علی ڈومکی نے کہا کہ سندھ حکومت دہشت گردوں کے خلاف آپریشن کے متعلق اپنا وعدہ وفا کرے، آج بھی سندھ کے مختلف اضلاع میں کالعدم دہشت گرد جماعت کے جھنڈے اور نفرت انگیز لیٹریچر نیشنل ایکشن پلان کی کھلم کھلا خلاف ورزی ہے۔ سندھ حکومت کو یہ بات ذہن نشین رکھنی چاہیے کہ لانگ مارچ کینسل نہیں ملتوی ہوا، سندھ حکومت معاہدے پر جلد عمل در آمد کرے۔
وحدت نیوز (مانٹرنگ ڈیسک) پاکستانی ٹی وی چینلز کے بارے میں اکثر کہا جاتا ہے کہ جانبدارانہ رپورٹنگ کرتے ہیں، لیکن بعض چینلز ایسے بھی ہیں جو حق کا دامن نہیں چھوڑتے، چینل 24 نیوز ایسا ہی چینل ہے جس نے سعودی عرب کی حالیہ بربریت سے پاکستان میں پہلی بار پردہ چاک کیا اور سعودی حکومت کی جانب سے 47 افراد کے سر قلم کرنے کی خبر سب سے پہلے بریک کی۔ چینل 24 نیوز کو سعودی بربریت بے نقاب کرنے پر یہ سزا دی گئی ہے کہ متعدد علاقوں میں اس چینل کی نشریات کو بند کر دیا گیا ہے۔ چینل 24 نیوز کی نشریات بند ہونے سے شہریوں نے تشویش کا اظہار کیا ہے اور نشریات کی بندش کو آزادی اظہار پر حملہ قرار دیا ہے۔ شہری حلقوں اور سول سوسائٹی نے حکومت سے مطالبہ کیا ہے کہ چینل 24 نیوز کی نشریات فوری طور پر بحال کی جائیں اور بلاوجہ نشریات روکنے پر کیبل آپریٹرز کیخلاف کارروائی کی جائے۔ شہریوں نے کہا کہ فحش اور بے ہودہ پروگرامز چلانے کی تو اجازت ہے اور اگر کوئی ٹی وی چینل سچ دکھا دے تو اس کی نشریات روک کر اسے پریشان کیا جاتا ہے۔ عوامی حکومت نے نشریات کی بندش کی پرزور انداز میں مذمت کی ہے۔
وحدت نیوز (مانٹرنگ ڈیسک) حزب اللہ لبنان کے سربراہ سید حسن نصراللہ نے آیت اللہ شیخ نمرباقرالنمر کی سزائے موت کو انتہائی ہولناک اور عظم سانحہ قرار دیا ہے۔ بیروت میں مجاہد عالم دین شیخ محمد خاتون کی یاد میں تعزیتی جلسے سے خطاب کرتے ہوئے سید حسن نصراللہ نے کہا کہ آیت اللہ شیخ نمر باقر النمر جیسے جلیل القدر عالم دین کو سزائے موت دے کر شہید کئے جانے کو کسی صورت نظر انداز نہیں کیا جاسکتا۔ انہوں نے کہا کہ ہمارا واسطہ ایک ایسی حکومت سے ہے جو خطے میں قتل و غارتگری میں ملوث ہے۔ انہوں نے خبردار کیا کہ آل سعود حکومت عقلانیت سے عاری اور شیعہ سنی فتنہ پیدا کرنے کی کوشش کر رہی ہے۔ سید حسن نصراللہ نے کہا کہ سعودی حکومت افغانستان سے لے کر نائیجیریا اور لبنان سے لے کر دنیا کے دیگر علاقوں تک یہی فتنہ پھیلانے میں مصروف ہے۔
انہوں نے خبردار کیا کہ شیعہ اور سنی فتنے میں پڑنا، آیت اللہ نمر کے قاتلوں کی خدمت کے مترداف ہوگا۔ سید حسن نصراللہ نے کہا اس حوالے سے اہلسنت علمائے کرام کا کردار قابل تحسین ہے اور وہ آل سعود کی اس سازش کو ناکام بنا دیں گے۔ انہوں نے کہا کہ اہلسنت علماء نے آیت اللہ نمر کے بارے میں اپنا موقف کھل کر واضح کر دیا تھا، لیکن آل سعود حکومت نے پھر بھی انہیں شہید کر دیا۔ حزب اللہ کے سربراہ نے استفسار کیا کہ کیا اب بھی وقت نہیں آیا ہے کہ برطانیہ کے لئے آل سعود کی نوکری اور مسئلہ فلسطین کو سبوتاژ کرنے کے لئے اس حکومت کے اقدمات کو برملا کیا جائے؟ انہوں نے کہا کہ آل سعود کے ساتھ کسی بھی قسم کی نرمی اور رسمی بیانات دینے کا وقت گزر چکا ہے۔ سید حسن نصراللہ نے واضح کیا کہ دنیا کی کوئی بھی طاقت حزب اللہ کے راستے میں رکاوٹ بن سکتی ہے اور نہ ہی اس کی سربلندی پر کوئی ضرب لگا سکتی ہے۔
وحدت نیوز (مانٹرنگ ڈیسک) رہبر انقلاب اسلامی آیت اللہ العظمٰی سید علی خامنہ ای نے سعودی عرب کے مظلوم و مومن عالم دین کو شہید کرنے پر اس ملک کی حکومت کے ہولناک جرم کی شدید مذمت کی ہے۔ رہبر انقلاب اسلامی نے اتوار کی صبح تہران میں اپنے فقہ کے درس خارج میں معروف عالم دین شیخ باقر النمر کو شہید کئے جانے سے متعلق سعودی حکومت کے جرم اور یمن و بحرین میں بھی اسی طرح کے جرائم کے ارتکاب کے سلسلے میں عالمی برادری کے احساس ذمہ داری کی ضرورت پر تاکید کی۔ انہوں نے کہا کہ یقیناً اس مظلوم شہید کا، ناحق بہایا جانے والا خون، جلد اپنا رنگ لائے گا اور سعودی حکمرانوں کو الٰہی انتقام سے دوچار کر دے گا۔ رہبر انقلاب اسلامی نے کہا کہ اس مظلوم عالم نے نہ تو عوام کو ہتھیاروں کے ساتھ تحریک چلانے کی ترغیب دلائی اور نہ ہی کسی خفیہ سازش کا اقدام کیا بلکہ اس عالم دین نے صرف سعودی حکومت کو تنقید کا نشانہ بنایا اور دینی غیرت کی بنیاد پر امر بالمعروف اور نہی عن المنکر کا مظاہرہ کیا۔ آیت اللہ العظمٰی سید علی خامنہ ای نے شیخ باقر النمر کی شہادت اور ان کا خون ناحق بہائے جانے کو سعودی حکومت کی ایک بڑی سیاسی غلطی قرار دیا اور کہا کہ خداوند متعال، بے گناہوں کے خون کو کبھی معاف نہیں کرے گا اور سعودی حکمرانوں کو، خون ناحق بہانے کا جلد ہی خمیازہ بھگتنا پڑے گا۔
رہبر انقلاب اسلامی نے جمہوریت و آزادی اور انسانی حقوق کا دم بھرنے والوں کی خاموشی اور حکومت پر تنقید اور اس کے خلاف احتجاج کرنے کی وجہ سے بے گناہوں کا خون بہانے والی سعودی حکومت کی حمایت کئے جانے پر، شدید تنقید کرتے ہوئے کہا کہ عالم اسلام اور پوری دنیا کو چاہیے کہ معروف سعودی عالم دین شیخ باقر النمر کی دردناک شہادت کے بارے میں اپنی ذمہ داری کو سمجھے اور اس کا مظاہرہ کرے۔
آیت اللہ العظمٰی سید علی خامنہ ای نے سعودی فوجیوں کے ہاتھوں بحرینی عوام کی ایذا رسانی اور ان کے رہائشی مکانات و مساجد کی مسماری و تباہی اور اسی طرح یمنی عوام پر گذشتہ دس مہینوں سے جاری بمباری کو سعودی جارحیت کے دیگر نمونوں سے تعبیر کیا اور کہا کہ صداقت کے ساتھ انسانیت و انسانی حقوق کی حمایت کرنے اور انصاف پسندی کا مظاہرہ کرنے والوں کو چاہیئے کہ ان تمام واقعات اور جرائم کا جائزہ لیں اور اس سلسلے میں ہرگز خاموش نہ بیٹھیں۔ رہبر انقلاب اسلامی نے کہا کہ یقیناً خدا کا لطف و کرم اور اس کی رحمت، شہید باقر النمر کے شامل حال ہوگی اور بلاشبہ ان ظالموں کو انتقام الہی کا سامنا کرنا پڑے گا کہ جنھوں نے اس مظلوم عالم دین کی شہادت میں اپنا کردار ادا کیا اور یہ الہی انتقام ہی، وہ چیز ہے جو تسلّی کا سرچشمہ ہے۔
وحدت نیوز(مانٹرنگ ڈیسک)جہان تشیع کے مرجع تقلید آیت اللہ العظمیٰ سید علی سیستانی نے دیگر مراجع تقلید کی طرح سعودی حکومت کی جانب سے شیخ باقر النمر کو شہید کئے جانے کی شدید مذمت کرتے ہوئے کہا ہے کہ سعودی عرب میں ظلم و جور کی بنا پر مومنین من جملہ شیخ نمر کو شہید کیا جانا انتہائی افسوس ناک اور قابل مذمت ہے۔
آیت اللہ سیستانی نے اپنے بیان میں کہا : انتہائی افسوس کے ساتھ ایسے مومن بھائیوں کی شہادتوں کی خبر سنی گئی جن کا پاک خون ظلم اور دشمنی کی وجہ سے بہایا گیا کہ جن میں عالم دین شیخ نمر بھی شامل تھے۔
ان کے بیان میں مزید آیا ہے: ہم اس اقدام کی مذمت کرتے ہیں اور آپ سب کو مخصوصا ان کے اہل خانہ کو تعزیت پیش کرتے ہیں اور خداوند عالم سے دعا کرتے ہیں کہ ان شہیدوں کو اپنی رحمت کے سائے میں جگہ عنایت کرے اور انہیں اولیائے الہی، پیغمبر اکرم (ص) اور ان کے اہل بیت کے ساتھ محشور کرے اور ان کے پسماندگان کو صبر اور اجر عطا کرے کہ خداوند عظیم کے سوا کوئی قدرت و طاقت نہیں ہے۔
واضح رہے کہ آیت اللہ سیستانی نے شیخ نمر کی شہادت سے پہلے سعودی حکام کو ایک خط لکھ کر ان کی سزائے موت کے حکم کو منسوخ کرنے کا مطالبہ کیا تھا۔
وحدت نیوز (اسلام آباد) سعودی عرب میں ممتاز شیعہ عالم دین شیخ باقر النمر کو سزائے موت دینے کے خلاف مجلس وحدت مسلمین کے زیراہتمام اسلام آباد پریس کلب تا چائنا چوک ایک احتجاجی ریلی نکالی گئی، جس کی قیادت مجلس وحدت مسلمین پاکستان کے مرکزی ڈپٹی سیکرٹری جنرل علامہ امین شہیدی نے کی۔ ریلی سے خطاب کرتے ہوئے علامہ امین شہیدی نے کہا کہ سعودیہ کا ظالمانہ نظام عالمی امن کے لئے شدید خطرہ ہے۔ شہنشاہوں کے لبادے میں چھپے سعودی عرب کے ریاستی دہشت گردوں نے ظلم و استبداد کے خلاف بولنے اور عوام کے حقوق کے لئے آواز بلند کرنے کے جرم میں ایک ایسے عالم دین کو موت کی نیند سلا دیا جو بلاتخصیص مذہب و مسلک تمام حلقوں میں نمایاں مقام رکھتا تھا۔ بادشاہت کے غیر اسلامی نظام کے خلاف آواز بلند کرنا شہید نمر کا وہ جرم بنا جس پر انہیں موت کی ظالمانہ سزا سنائی گئی۔ دہشت گردی کے خلاف فوجی اتحاد کا راگ الاپنے والا ملک سعودی عرب دنیا کی بدنام ترین دہشت گرد تنظیموں کی تشکیل و معاونت میں براہ راست ملوث رہا ہے۔ عراق، شام سمیت دنیا کے دیگر مسلم ممالک میں امریکی عزائم کی تکمیل کے لئے سعودی حکومت کا یہود و نصاریٰ سے گٹھ جوڑ اب کوئی ڈھکی چھپی بات نہیں رہی۔ علامہ امین شہیدی کا کہنا تھا کہ سعودی حکومت ہر اس آواز کو جبر کے ذریعے دباتی آئی ہے، جو اس کے شاہانہ مفادات سے متصادم ہے۔ انہوں نے کہا کہ سعودی وزارت خارجہ کی طرف سے شیخ نمر کو القاعدہ سے منسوب کرنا انتہائی شرمناک اور ڈھٹائی کی انتہا ہے۔ دہشت گردی کے خلاف سعودی عرب جو فوجی اتحاد بنانے جا رہا ہے، وہ امت مسلمہ کے خلاف اغیار کی سازشوں کا حصہ ہے، جس سے متعدد اسلامی ممالک نے لاتعلقی کا اعلان کر دیا ہے۔ اس سلسلے میں پاکستان کی حکومت کو ہوشمندی کا دامن ہاتھ سے نہیں چھوڑنا چاہیئے۔ سعودی عرب کے اس اتحاد سے دور رہنا ہی ہمارے مفاد میں ہے۔ ملت تشیع کسی بھی صورت میں اس الائنس کا حصہ بننے کی سخت مخالف کرتی ہے۔
وحدت نیوز (راولپنڈی) ممتاز شیعہ عالم دین علامہ شیخ باقر النمر کی سعودی حکومت کے ہاتھوں المناک شہادت پرمجلس وحدت مسلمین راولپنڈی کے زیر اہتمام سعودی حکومت کے خلاف لیاقت باغ راولپنڈی کے قریب احتجاجی مظاہرہ کیا گیا۔ جس میں ایم ڈبلیو ایم، آئی ایس او، انجمن جانثاران اہلبیت سمیت متعدد تنظیموں کے ہزاروں افراد نے شرکت کی۔ مظاہرین سے خطاب کرتے ہوئے مجلس وحدت مسلمین راولپنڈی کے سرپرست علامہ علی اکبر کاظمی نے کہا کہ شیخ نمر کو سزائے موت دینا سعودی حکومت کا ایک وحشیانہ اقدام ہے ۔سعودی کے مطلق العنان بادشاہ عدل انصاف کے تقاضوں کو ہمیشہ پیروں تلے روندتے آئے ہیں۔ سعودی عرب میں غیر اسلامی شاہانہ نظام حکومت کے پر تنقید کرنے اور اصلاحات کے مطالبے پر آل سعود نے علامہ نمر کا ظالمانہ قتل کیا۔سرزمین حجاز پر سینتالیس افراد کو ایک دن ریاستی دہشت گردی کر کے موت کے گھاٹ اتار دینے پر انسانی حقوق کی عالمی تنظیموں کی خاموشی سوالیہ نشان ہے۔
انہوں نے کہا صیہونی طاقتوں کی ایما پر حق پرستوں کی آواز کو عالمی سازش کے تحت دبایا جا رہا ہے۔سعودی حکومت کے دن گنے جا چکے ہیں۔ظلم کی حکومت اب مزید نہیں چلے گی۔ شہید نمر کا بے گناہ خون رائیگاں نہیں جائے گا۔ سعودی عرب امت مسلمہ کا سب سے بڑا دہشت گرد ہے۔ دنیا بھر میں ہونے والی دہشت گردی میں سعودی حکومت کے براہ راست ملوث ہونے کے واضح ثبوت میڈیا نے بارہا پیش کیے ہے۔ شیعہ عالم دین باقر النمر کا قتل سعودی کی کھلی دہشت گردی ہے جس کے خلاف ہر باشعور کو آواز بلند کرنا ہو گی۔احتجاجی جلوس سے انجمن جانثاران اہلبیت ؑ کے سیکرٹری جنرل فدا عباس زیدی، آئی ایس اوکے وفا عباس،وحدت سکاوٹس کے حسیب حیدر نقوی،آئی ڈی سی کی گل زہرااور دیگر شخصیات نے بھی خطاب کیا۔
