وحدت نیوز(شکارپور)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے برسی شہداء سانحہ شب عاشور جیکب آباد کے سلسلے میں ضلع شکار پور کا دورہ کیا۔ اس موقع پر ضلعی صدر اصغر علی سیٹھار عبدالعلی کھوہارو نظام الدین انقلابی علامہ سیف علی ڈومکی و دیگر ان کے ساتھ تھے۔اس موقع پر گفتگو کرتے ہوئے علامہ مقصود علی ڈومکی نے کہا کہ شہدائے جیکب آباد کی آٹھویں برسی 23 اکتوبر بروز سوموار مقتل شہداء جیکب آباد پر منائی جائے گی۔ جس میں مجلس وحدت مسلمین یوتھ ونگ کے مرکزی صدر علامہ تصور مہدی سیکرٹری تعلیم برادر عارف علی الجانی علامہ سید ظفر عباس شمسی معروف نوحہ خوان سید رضا عباس شاہ و دیگر خطاب کریں گے۔

 برسی شہداء منانے کا مقصد معاشرے میں ان کی قربانی اور ان کے اھداف افکار اور تعلیمات کو ژندہ رکھنا ہے۔موجودہ صورت حال پر گفتگو کرتے ہوئے علامہ مقصود علی ڈومکی نے کہا کہ غزہ میں معصوم شہریوں پر بمباری کرکے اسرائیل نے اپنی ظلم و بربریت پر مبنی تاریخ میں ایک سیاہ باب کا اضافہ کیا ہے۔ معصوم اور بے گناہ انسانوں کا خون نا حق اسرائیل کے زوال اور خاتمے  کا سبب بنے گا۔انہوں نے کہا کہ مسلم حکمران اپنے عوام کی ترجمانی کرنے کی بجائے امریکی غلامی کر رہے ہیں۔ غزہ کے مظلوم مسلمانوں کے قتل عام مسلم حکمران اور نام نہاد اسلامی فوج خاموش تماشائی نظر آتے ہیں۔ قبلہ اول مسجد اقصیٰ بیت المقدس اور فلسطین سے غداری کرنے والوں کو امت مسلمہ کبھی معاف نہیں کرے گی۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصرعباس جعفری نے تری مینگل سکول پارا چنارمیں چند ماہ قبل تکفیری دہشت گردوں کے حملے میں شہید ہونے والے اساتذہ کے قاتلوں کی عدم گرفتاری کے خلاف ٹوئٹرپرجاری اپنے مذمتی بیان میں کہا کہ تری مینگل سکول پارا چنار میں اساتذہ کے بہیمانہ قتل میں ملوث دہشت گردوں کی تاحال عدم گرفتاری قانون نافذ کرنے والے اداروں کی نااہلی کا ثبوت ہے۔

ورثا کو انصاف کی فراہمی اور مجرمان کو کیفر کردار تک پہنچانا ریاست کی ذمہ داری اور لواحقین کا آئینی حق ہے۔ذمہ داران کی گرفتاری اور قرار واقعی سزا کے مطالبے کے  لیے لگائے جانے والے احتجاجی کیمپ کی مجلس وحدت مسلمین بھرپور حمایت کرتی ہے۔ہم کل بھی پسماندگان کے ساتھ کھڑے ہیں آج بھی کھڑے ہیں اور آئندہ بھی پوری قوت کے ساتھ کھڑے رہیں گے۔

وحدت نیوز(آرٹیکل)خوف آتا ہے    اگرچہ یہ سطور دوران پرواز لکھ رہا ہوں مگر وہ بات مجھے بھول ہی نہیں رہی ۔ میرا عرب دوست مجھ سے پوچھتا ہے کہ دنیا بھر کے مسلمانوں کو کیا ہو گیا ہے، ظلم و جبر پر ان کی مسلسل خاموشی سمجھ سے باہر ہے اور پھر خاص طور پر تمہارا ملک کیوں چپ ہے، کیا تم لوگ بھول گئے ہو کہ قائد اعظم محمد علی جناح نے اسرائیل سے متعلق کیا کہا تھا، پہلے تو تمہارا ملک بولتا تھا، اسرائیلی تمہارے ملک سے ہمیشہ خوفزدہ رہتے تھے، اس مرتبہ تمہارا ملک بھی خاموش ہےبلکہ میں نے سنا ہے کہ تمہارے ملک میں ایک جماعت نے فلسطینیوں کے حق میں مظاہرے کرنے چاہے تو اسے روک دیا گیا،ایک عورت نے اسرائیل مردہ باد کہا تو اسے گرفتار کرلیا گیا،اب اسرائیل تمہارے ملک سے خوفزدہ نہیں ،اب اسے صرف حماس اور حزب اللہ جیسے مزاحمتی گروپوں سے خوف آتا ہے، اسرائیل عرب ممالک سے بالکل بھی پریشان نہیں البتہ اسے ایران اور روس کی چالوں سے خوف آتا ہے، خوف سے یاد آیا کہ تمہارے ملک کے وہ لوگ کیوں چپ ہیں جو سارا سال مذہب کے نام پر دولت بٹورتے ہیں، تمہارے ایک بڑے سیاسی مذہبی رہنما نے تو حد ہی کرڈالی ،اس نے تو ظالم کی حمایت کی ہے، کیا ایسوں کو خدا کا خوف نہیں ،اس طرح کے لوگ رسول اللہ صلی اللہ علیہ وآلہ وسلم کو کونسا چہرہ دکھائیں گے؟میں اس کے تمام سوالات توجہ سے سنتا رہا، میرے پاس کیا جواب ہوسکتا تھا،

میں تو خود مسلمانوں کے طرزِ عمل پر دکھی ہوں اور سوچتا ہوں کہ یہ امت نبی کریم صلی للہ علیہ وآلہ وسلم کو کیا چہرہ دکھائے گی؟ روز حشر یہ مسلمان کیا جواب دیں گے؟ دل میں تلاطم تھا، ہونٹوں پہ خاموشی اور نمناک آنکھوں میں حیرت کے سوا کچھ بھی نہ تھا، میں اسی خاموشی کے دوران گہری سوچوں میں اتر گیا بس سوچتا رہا، یہ منظر دیکھ کر عرب دوست بولا کہ بولتے کیوں نہیں ہو؟ تازہ سوال نے مجھے ہمت دی، میں نے اپنے دوست سے عرض کیا کہ تم بھی تو مسلمان ہو، کیا تمہارے ملک نے کوئی کردار ادا کیا ہے، میں تو برطانیہ میں ایک پردیسی کے طور پر چند روز کا مسافر ہوں، مسافر کو تو روزے میں بھی چھوٹ ہوتی ہے مگر میں تمہارے سارے سوالوں کے جواب دوں گا۔ خلافت عثمانیہ کے خاتمے کے بعد رہے سہے مسلمان بھی غلامی میں چلے گئے تھے بلکہ پچھلی صدی میں ایک وقت ایسا بھی تھا جب کوئی مسلمان ملک آزاد نہیں تھا اس کے بعد جب مسلمان ملکوں کو نام نہاد آزادیاں ملیں تو پرانے آقاؤں نے کہیں بادشاہتیں بنوا کر تو کہیں افواج کے راستے اپنی خواہشات کو دوام بخشا، انہوں نے ایسا اہتمام کیا کہ حکم عدولی نہ ہو۔

 اب حالت یہ ہے کہ مسلمان ملکوں میں سے پانچ چھ امیر ملک ہیں باقی پچاس تو حالات سے لڑ رہے ہیں اس میں کوئی شک نہیں کہ مسلمان ممالک قدرتی وسائل سے مالا مال ہیں لیکن اس حقیقت کو کیسے نظر انداز کیا جائے کہ ان وسائل سے یا تو کوئی اور مستفید ہورہا ہے یاپھر حکمران لوٹ مارکر رہے ہیں، مجھے تو تم عربوں پہ زیادہ غصہ ہے کہ تمہارے حکمران دولت مند ہونے کے باوجود اپنے فلسطینی بھائیوں کی مدد نہیں کر رہے، اسرائیل کے ارد گرد کتنے بڑے بڑے اسلامی ممالک ہیں، کیا ان پر جہاد فرض نہیں ،کیا تم لوگ فلسطینیوں کی عملی اور مالی مدد نہیں کرسکتے، کیا تم لوگ چھوٹے سے اسرائیل کو نتھ نہیں ڈال سکتے؟ سچ یہ ہے کہ مسلمان قرآن سے دور ہوچکے ہیں، ان کے سینوں میں اہلِ بیت سے وہ محبت نہیں جس کا حکم رسول پاک ﷺنے دیا تھا، مسلمان اسرائیلی مظالم کے خلاف مظاہرے کرتے ہیں، قراردادیں منظور کرتے ہیں اور صرف کہنے کی حد تک کہتے ہیں کہ ہم فلسطین کے ساتھ ہیں، مسلمان ملکوں میں عوام بےچارے دعائیں کرتے ہیں مگر عملی طور پر کچھ بھی نہیں کرتے، اس مرحلے پر مجھے اکثر نوابزادہ نصر اللہ خان یاد آجاتے ہیں کہ’’ کب کوئی بلا صرف دعاؤں سے ٹلی ہے‘‘ میں تو اکثر سوچتا رہتا ہوں کہ یہ امت روز محشر اپنے رسول اور خدا کو کیسے چہرہ دکھائے گی، کیا دنیا میں سب کچھ مال ہی ہے، کسی مسلمان ملک کو یہ فکر ہے کہ فلسطین کی مدد کرنے سے اس کا بزنس تباہ ہو جائے گاتو کسی کو فکر لاحق ہے کہ فلسطین کی مدد کرنے سے فلاں فلاں عالمی طاقتیں ناراض ہو جائیں گی، کسی کو یہ فکر نہیں کہ کہیں خدا ناراض نہ ہوجائے،سچی بات تو یہ ہے کہ مسلمان حکمرانوں میں خوف خدا نہیں رہا،وہ اس جہان میں استعماری طاقتوں کے دم چھلے بنے ہوئے ہیں،انہیں اگلے جہان کی فکر ہی نہیں،جب خدا سے زیادہ طاقتور کوئی نہیں تو پھر مسلمان حکمران کسی اور سے کیوں ڈرتے ہیں،یاد رہے کہ بزدلی مومن کی شان نہیں،جب مسلمانوں کو ایک جسم کی مانند قرار دیا گیا ہے تو پھر یہ سب مسلمان ایسا محسوس کیوں نہیں کرتے،جب سارے مغربی خونخوار اسرائیل کے ساتھ کھڑے ہوگئے ہیں تو پھر مسلمان حکمرانوں کو عقل کیوں نہیں آرہی، کیا بزنس اتنا ہی ضروری ہے،کیا مفادات کا کھیل اتنا ہی اہم ہے کہ اپنے چہروں پر دنیا کی کالک مل لی جائے،دنیا کی محبت میں گرفتار مسلمان ملکوں کے غلام حکمرانوں سے ایک ہی سوال ہے کہ کیا تمہیں خدا سے خوف نہیں آتا؟ اسلم گورداسپوری کا شعر سوئے ہوئے ضمیروں کو طمانچے مار رہا ہے کہ

زندگی اتنی غنیمت تو نہیں جس کیلئے
عہد کم ظرف کی ہر بات گوارہ کرلیں

وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے بدین میں نفرتوں کے سوداگر فرقہ پرست ملا آغا جان سرھندی کی جانب سے اہل تشیع کے خلاف گستاخانہ تقریر کی شدید الفاظ میں مذمت کرتے ہوئے کہا ہے کہ ماہ ربیع الاول اور ہفتہ وحدت اتحاد بین المسلمین کے موقع پر فرقہ پرست ملا آغا جان سرھندی نے شیعہ مسلمانوں کے خلاف شرانگیز گفتگو کرتے ہوئے انہیں قتل کی دھمکیاں دی ہیں۔ لہٰذا اسے قانون کے مطابق سزا دی جائے۔ اپنے بیان میں ایم ڈبلیو ایم کے رہنماء نے مطالبہ کیا کہ بدین شہر کے مرکزی چوک پر ہونے والی شرانگیز تقریر کے خلاف فی الفور ایف آئی آر درج کی جائے اور شرپسند ملا کو جلد گرفتار کیا جائے۔

جلسہ کے مقرر ملا آغا جان سرھندی کے علاوہ جلسے کے بانی منتظمین کے خلاف بھی قانونی کارروائی کی جائے۔ انہوں نے کہا کہ ملا آغا جان سرھندی نے بدین ضلع کے پرامن ماحول کو خراب کرنے کی کوشش کی ہے۔ اس شرپسند ملا پر آئندہ ملک بھر میں تقریر پر پابندی لگائی جائے۔ ایسے اشتعال انگیز مقرر پر مستقل پابندی ضروری ہے، جو گستاخانہ گفتگو کرکے قتل و غارت کی سرعام دھمکیاں دیتے ہیں۔ انہوں نے کہا کہ گذشتہ کئی روز سے بدین کے مومنین سراپا احتجاج ہیں۔ ہم ان کے پرامن احتجاج کی حمایت کرتے ہوئے بدین انتظامیہ اور سندھ حکومت سے مطالبہ کرتے ہیں کہ وہ اس فتنہ پرست ملا کے خلاف فی الفور مقدمہ درج کرے، ورنہ اہل تشیع کی تشویش میں اضافہ ہوگا۔