وحدت نیوز(اسلام آباد) مجلس وحدت مسلمین پاکستان کے سربراہ قائد وحدت سینیٹر علامہ راجہ ناصر عباس جعفری نے پاکستان تحریک انصاف کے زیر اہتمام اسلام آباد میں منعقدہ جلسہ عام کےشرکاء سے خطاب کرتے ہوئے کہا کہ  مادر وطن لالچیوں ، بزدلوں اور لٹیروں کی قید میں ہے۔مادر وطن کو ہوا و حوس کے بچاریوں نے اپنے اقتدار کی زنجیروں میں جکڑرکھا ہے۔ خائن ، اقتدار پرست ٹولا اپنے مفادات کےتحفظ کیلئے ملک کو تباہی کے دہانے پر لے گیا۔آج پاکستان وینٹی لیٹر پر ہے ، یاد رکھیں عمران خان جیل میں نہیں اس وقت پاکستان جیل میں ہے۔یہ عمران خان پر نہیں بلکہ پاکستان پر ایف آئی آریں ہیں۔ عمران خان کے خلاف ہر قدم پاکستان کے خلاف قدم ہے۔

انہوں نے مزید کہا کہ دوستو یہ کٹھن سفر ہے، یہ انبیاء کا راستہ ہے، عمران خان پاکستان میں رول آف لاء کا نفاذ چاہتا ہے ، قانون کی حکمرانی کے بغیر عدل وانصاف نہیں ہوسکتا ، 75 سالہ سب سےبڑی تباہی آئین و قانون کو پاؤں سے روندنا ہے ،ہمیں اس وطن کو ان ظالموں سے آزاد کروانا ہے ، اگر خان جیل میں قرآن پڑھتا ہے توتم بھی ترجمے کے ساتھ قرآن پڑھو، اسٹریجیٹس کی کتابیں پڑھو،عمران خان قید میں سیرت النبیؐ کا مطالعہ کرتا ہے آپ بھی کرو ۔یہ جدوجہد بہت طویل ہے آپ نے مایوس نہیں ہونا، میدان میں ڈٹے رہنا ہے، دنیا کی کوئی طاقت آپ کے جذبوں اور حوصلوں کو شکست نہیں دے سکتی۔ آج آپ سب کے سامنے عہد کرتا ہوں خون کے آخری قطرے تک خان کیساتھ کھڑا رہوں گا، ہم جواں مرد ہیں بزدل اور لٹیروں کو کبھی قبول نہیں کریں گے۔

وحدت نیوز(جیکب آباد) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے ایک وفد کے ہمراہ ڈپٹی کمشنر جیکب آباد ظہور علی مری سے ملاقات کی۔ اس موقع پر ممتاز شیعہ رہنما سید احسان علی شاہ بخاری سید لال شاہ بخاری راجہ سید ریاض علی شاہ حسین بخش عابدی و دیگر ان کے ہمراہ تھے۔ اس موقع پر علامہ مقصود علی ڈومکی نے ایام عزاء محرم اور صفر کے دوران عزاداروں سے بہتر تعاون کرنے پر ضلعی انتظامیہ کا شکریہ ادا کیا۔ ملاقات میں چیئرمین میونسپل کمیٹی جیکب آباد میر غلام عباس خان جکھرانی بھی موجود تھے۔

اس موقع پر گفتگو کرتے ہوئے علامہ مقصود علی ڈومکی نے کہا کہ سانحہ یزد ایک دردناک حادثہ تھا سانحے کے شہداء اور زخمیوں کی واپسی اور زخمیوں کے علاج کے حوالے سے سندھ حکومت نے بر وقت انتظامات کئے۔اس موقع پر علامہ مقصود علی ڈومکی نے ضلع جیکب آباد میں بدامنی کے واقعات کی نشاندہی کرتے ہوئےامن و امان کی صورتحال بہتر کرنے کی تاکید کی۔ اس موقع پر ڈپٹی کمشنر ظہور علی مری نے ایام عزاء میں شیعہ رہنماوٕں کا شکریہ ادا کیا۔ انہوں نےامید ظاہر کی کہ نئے تعینات ہونے والے ایس ایس پی ضلع جیکب آباد میں امن و امان کی صورتحال کو بہتر کریں گے۔

وحدت نیوز(بخشاپور) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے بخشاپور، میں کجل خان ڈومکی اور بانی جلوس عزاء سید سبحان شاہ  کے ورثاء سے تعزیت کی۔ اس موقع پر چیئرمین عظیم اللہ خان ڈومکی ڈاکٹر مجیب الرحمٰن ڈومکی نے علامہ مقصود علی ڈومکی سے ملاقات کی اور انہیں زیارت کربلا معلیٰ عراق کی مبارکباد پیش کی۔ بخشاپور، میں مرحوم استاد علی مردان ڈومکی کے ایصال ثواب کے لیے منعقدہ مجلس عزاء سے خطاب کرتے ہوئے علامہ مقصود علی ڈومکی نے کہا ہے کہ حضرت سید الانبیاء محمد مصطفی صلی اللہ علیہ والہ وسلم کی ذات گرامی عالم انسانیت کے لیے رہبر اور رہنما ہے۔ امت مسلمہ کو چاہیے کہ وہ اپنے اختلافات بھلا کر سید الانبیاء کی ذات گرامی پر متحد اور متفق ہو جائے۔ پیغمبر اسلام کے بعد قرآن و اھل بیت امت مسلمہ کے درمیان نکتہ اتحاد ہیں۔

 انہوں نے کہا کہ اسلام دشمن سامراجی قوتیں ہمیشہ مسلمانوں کے درمیان تفرقہ اور انتشار چاہتی ہیں جبکہ مسلمان آپس میں متحد ہو کر اسلام دشمن قوتوں کو شکست دے سکتے ہیں۔ پیغمبر اکرم صلی اللہ علیہ والہ وسلم نے امت مسلمہ کے درمیان دو گراں قدر چیزیں چھوڑیں ایک قران کریم اور دوسرے اہل بیت ۔  قران اور اہل بیت امت مسلمہ کے درمیان اتحاد اور وحدت کا باعث ہیں۔ انہوں نے کہا کہ اج فلسطین کے مظلوم مسلمانوں کو ہماری مدد کی ضرورت ہے امریکہ اور اسرائیل کے غلام عرب حکمران فلسطین اور فلسطینی عوام سے خیانت کر رہے ہیں جبکہ مظلوم فلسطینی مسلمان بار بار امت مسلمہ کو مدد کے لیے پکار رہے ہیں۔

 انہوں نے کہا کہ 12 سے 17 ربیع الاول پوری دنیا کے مسلمان ہفتہ وحدت مناتے ہیں جس کا مقصد مسلمانوں کے درمیان اتحاد بین المسلمین کا فروغ ہے۔ مجلس وحدت مسلمین پاکستان اتحاد بین المسلمین کی علمبردار جماعت ہے جو پاکستان میں اتحاد امت کے لیے سرگرم عمل ہے۔

وحدت نیوز(اسلام آباد) کرم یکجہتی کمیٹی کے زیر اہتمام علامتی دھرنا 18ویں روز بھی جاری رہا۔جس میں ضلع کرم سے تعلق رکھنے والے افراد کی کثیر تعداد میں شرکت۔ اس موقع امن کے عنوان سے رونما ہونے والے دردناک واقعات کی آرٹس اور تصویروں کی مدد سے منظر کشی بھی کی گئی۔دھرنے کے شرکاء سے ضلع کرم کے عمائدین اور جرگہ ممبران نے خطاب کیا۔

 انجمن حسینیہ کرم کے سربراہ جلال بنگش نے کہا کہ مجھے کسی نے یہ اختیار نہیں دیا کہ میں اپنے نوجوانوں کو قتل کروا دوں میں کسی بھی قوم کے افراد کو قتل کرنے کے حق میں نہیں آج ہم شیعہ اور سنی کی بجائے ایک مسلمان اور ایک کرم باشندے کے ناطے سے ملکر مسائل حل کریں، کسی صورت آپس میں لڑنے سے مسائل حل نہیں ہوتے بلکہ مسائل مزید بگڑ جائیں گے۔میں اعلان کرتا ہوں جہاں جہاں اہلسنت برادران کا حق ہو میں دینے کو تیار ہوں جہاں ہمارا حق ہو اہلسنت مشران بڑا دل کر کے اہل تشیع کو واپس کردیں تاکہ یہ قتل عام بند ہو۔

اس موقع پر اہلسنت کے امن پسند رہنما عبدالخالق پٹھان نے کہا کہ اب ایک دوسرے کو پکارنے کی بجائے امن کے لیے مل بیٹھ کر مسائل حل کریں ہم ایک کرم کے رہنے والے ہیں لڑنے سے ہمارے کرم کا امن خراب ہوتا ہے، جوان جہاں سے قتل ہو وہ کرم کا جوان ہے، اب بہت ہوگیا۔ہم جوانوں کا خون گرتے ہوئے دیکھ دیکھ کر تھک گئے ہیں مزید خون نہ بہایا جائے۔

مجلس وحدت مسلمین کے رہنما علامہ اقبال بہشتی نے کہا کہ کئی روز سے جاری دھرنے کے شرکاء امن و امان کا مطالبہ کر رہے ہیں اور ریاست کی جانب سے سنجیدگی کا مظاہرہ نہ کرنا افسوس ناک ہے کیا کرم کی عوام کو امن کے ساتھ زندگی گزارنے کا کوئی حق نہیں ہے۔یکجہتی کمیٹی کے ترجمان شبر ساجدی نے ضلع کرم کے دلخراش سانحات پر روشنی ڈالی۔انہوں نے کہا کہ پاراچنار میں 1962 سے شروع ہونے والی خونریز لڑائیوں میں ہزاروں لوگوں کی شہادتیں ہوئی ہیں، یہ سب سانحات حکمرانوں کی نااہلی اور نامناسب روئے کی وجہ سے رونما ہوئے۔

اس موقع پر تحریک حسینی کے صدر نے احتجاجی جلسے سے خطاب کرتے کہا کہ پاراچنار میں شیعہ سنی لڑائی کے پیچھے زمینی تنازعات کا اصل مسئلہ ہے۔ کیا حکومت کا ہمارے زمینی تنازعات کو حل نہ کرنے میں کوئی مفاد ہے۔آج تک ہونے والے ہزاروں معصوم شہریوں کا قتل حکومت کے سر پر ہے، احتجاجی جلسے سے کرم امن جرگے کے ممبر حسین علی حسینی نے کہا کہ کے پی کے اور جی یو سی سے ملاقاتیں ہوئی ہیں انشاءاللہ بہت جلد امن کی طرف جانے میں کوئی دیر نہیں ہوگی۔اس موقع پر مولانا سید عرب حسین میاں نے کہا کہ ضلع کرم کے رہائشی تمام باشندوں کو امن چاہیئے، لہذا امن میں حائل تمام رکاوٹوں کو دور کیا جائے۔

 اس موقع علامہ سید سبطین حسینی نے بھی خطاب کیا انہوں امن کے لئے ہر روز آواز بلند کرنے پر زور دیتے ہوئے کہا کہ جب تک ہمارے مطالبات منظور نہیں کیئے جاتے ہم اپنی پرامن مزاحمت اور احتجاج جاری رکھیں گے۔دھرنے کے دیگر مقررین میں محمد حسین طوری۔کاظم حسین۔پروفیسر شبیر حسین اور مرزا حسین شامل تھے جنہوں نے کہا کہ ہمارے 18ویں روز سے جاری دھرنے میں ہم نے ایک ہی مطالبہ کیا ہے کہ ہمیں امن چاہیئے۔لہذا زمینوں کے تنازعات کو فی الفور حل کیا جائے جنکی وجہ سے امن کے قیام میں رکاوٹیں ہیں۔