وحدت نیوز(جیکب آباد)مجلس وحدت مسلمین کے مرکزی رہنماء علامہ مقصود علی ڈومکی نے کہا ہے کہ کالعدم دہشتگرد تنظیموں کی شرانگیز سرگرمیوں پر نظر رکھنے کی ضرورت ہے۔ یوم علی علیہ السلام پر سکیورٹی کے فول پروف انتظامات کیے جائیں۔ ان خیالات کا اظہار انہوں نے یوم شہادت امام علی علیہ السلام کے جلوس عزاء و عزاداری کے اجتماعات کے سلسلے میں ڈپٹی کمشنر جیکب آباد محمد یوسف شیخ کی زیر صدارت کانفرنس ہال میں منعقد ہونے والے اہم اجلاس کے دوران کیا۔

 اجلاس میں ایس ایس پی سمیر نور چنہ، بانیان عزاداری، مختلف مکاتب فکر کے علماء کرام اور مختلف محکموں کے افسران شریک ہوئے۔ اجلاس سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ ماہ مبارک رمضان کا احترام ہر مسلمان پر واجب ہے، لہٰذا احترام رمضان آرڈیننس پر عملدرآمد کو یقینی بنایا جائے۔

ماہ رمضان نزول قرآن کریم کا مہینہ ہے۔ اس مبارک مہینے میں ہمیں قرآن کریم کی تلاوت اور قرآن فہمی پر توجہ دینی چاہئے۔ انہوں نے کہا کہ حضرت امیر المومنین علی ابن ابی طالب علیہ السلام کی حیات طیبہ کا ہر پہلو ہمارے لئے مشعل راہ ہے۔ بحیثیت حکمران آپ کا طرزِ حکمرانی ہر دور کے حکمرانوں کے لئے نمونہ عمل ہے۔ آپ علیہ السلام عدالت انسانی کی آواز ہیں۔ شہرہ آفاق مسیحی مصنف کی کتاب صوت العدالہ الانسانیہ The voice of human justice عدل علوی کی ایک مثال ہے۔

 علامہ مقصود ڈومکی نے کہا کہ ملک میں دہشتگرد ایک مرتبہ پھر ایکٹو ہو چکے ہیں۔ کالعدم دہشتگرد تنظیموں کی شرانگیز سرگرمیوں پر نظر رکھنے کی ضرورت ہے۔ لہٰذا یوم علی علیہ السلام پر سکیورٹی کے فول پروف انتظامات کیے جائیں۔ خواتین کی مجالس عزاء میں خواتین پولیس اہلکاروں اور رضاکاروں کو متعین کیا جائے۔

وحدت نیوز(ہری پور)قبلہ اول بیت المقدس عالم اسلام کی شہ رگ حیات ہے، اس پر امت مسلمہ کا کلی طور پر اتفاق ہے، اس پر اسرائیل کے ساتھ کوئی سمجھوتہ نہیں ہو سکتا۔ ان خیالات کا اظہار مجلس وحدت مسلمین خیبر پختونخوا کے صوبائی صدر علامہ جہانزیب علی جعفری نے رہنماوں کے ہمراہ ہریپور پریس کلب میں پریس کانفرنس کرتے ہوئے کیا، اس موقع پر صوبائی چیئرمین عزاداری کونسل نیئر عباس جعفری، صوبائی ڈپٹی جنرل سیکرٹری طاہر نیئر. صوبائی نائب صدر علامہ نظر علی، مجلس وحدت مسلمین ضلع آبیٹ آباد کے صدر سید شجر علی کاظمی، ضلع ہریپور کے کوآرڈینیٹر محمد اسحاق حیدری اور شیعہ ڈسٹرکٹ خطیب علامہ حبیب رضا امینی بھی موجود تھے۔ علامہ جہانزیب علی جعفری نے کہا کہ ماہِ مقدس میں فلسطینی عوام پر اسرائیل کے ظلم و ستم کی شدید الفاظ میں مذمت کرتے ہیں، اسرائیل نے نہتے فلسطینیوں پر بربریت کی مثال قائم کر دی ہے، ہم اس مشکل وقت میں مظلوم فلسطینی بھائیوں کے ساتھ کھڑے ہیں اور فلسطینی عوام کی ریاست کے قیام تک ان کی تحریک آزادی اور جدوجہد کی بھرپور حمایت جاری رکھیں گے۔

ان کا مزید کہنا تھا کہ مجلس وحدت مسلمین کے چئیرمین علامہ راجہ ناصر عباس جعفری کے حکم پر رمضان المبارک کے آخری جمعہ کو یوم القدس کے طور پر منائیں گے۔اس سلسلے میں ماہِ رمضان کے آخری جمعہ کو عالمی سطح پر بھی یوم القدس کے طور پر منایا جارہا ہے، جس کا حکم رہبر کبیر حضرت امام خمینی رضوان اللہ نے دیا تھا، مجلس وحدت مسلمین پاکستان بھی 23 رمضان 14 اپریل کو اس موقع پر پورے ملک میں مظلوم فلسطینی عوام اور دیگر مظلومین کی حمایت میں مظاہرے اور ریلیاں نکالی جائیں گی، جن میں اسرائیل کی کھلی جارحیت کی مذمت اور مسئلہ فلسطین کو اجاگر کیا جائے گا۔ انہوں نے کہا کہ اسرائیل کے ساتھ ہر قسم کی تجارت کی مذمت کرتے ہیں کیونکہ یہ خبریں عالمی اور قومی سطح پر گردش کر رہی ہیں کہ پاکستانی مصنوعات اسرائیل کے بازاروں میں فروخت ہو رہی ہیں، اس کی کسی طرح بھی اجازت نہیں دی جائے گی اور اس طرح کی تجارت بانی پاکستان قائد اعظم محمد علی جناح اور نظریہ پاکستان کی صریحاً خلاف ورزی ہے کیونکہ اسرائیل ایک غاصب اور ناجائز حکومت ہے۔

انہوں نے کہا کہ 21 رمضان چونکہ قریب ہے، اور آپ سب جانتے ہیں کہ 21 رمضان کو امام برحق حضرت علی ابن ابو طالب علیہ السلام کی شہادت کا دن ہے، یہ دن بھی پاکستان کی طرح پوری دنیا میں عقیدت و احترام کے ساتھ منایا جاتا ہے، ماتمی جلوس اور مجالس عزاء منعقد کی جاتی ہیں، انہوں نے کہا کہ ہم حکومت سے مطالبہ کرتے ہیں کہ ان مجالس اور جلوسوں کی فول پروف سیکیورٹی یقینی بنائی جائے اور تمام مکاتب فکر سے اپیل ہے، ان مجالس اور جلوسوں کے دوران ملک دشمن عناصر پر کڑی نگاہ رکھیں اور بلا جواز ایام علی علیہ السلام کے پروگراموں میں رکاوٹیں ڈالنے سے اجتناب کریں۔

وحدت نیوز(کراچی)مجلس وحدت مسلمین پاکستان کراچی ڈویژن کے تحت القدس کانفرنس و افطار ڈنر کا اہتمام آئیکون لان صفورہ چورنگی پر کیا گیا جس میں سربراہ ایم ڈبلیو ایم علامہ راجہ ناصر عباس جعفری سمیت پاکستان تحریک انصاف علی زیدی، علامہ شہنشاہ حسین نقوی، علامہ ناظر عباس تقوی نے القدس کانفرنس سے خطاب کرتے ہوئے کہا کہ امت مسلمہ فلسطین کے وارث ہیں، فلسطینیوں کو کبھی تنہا نہیں چھوڑیں گے، مسلم دنیا کے خیانت کار حکمرانوں کا فلسطین سے کوئی تعلق نہیں۔

اس موقع پر ایم کیو ایم کے رکن سندھ اسمبلی عباس جعفری، مرکزی تنظیم عزاداری کے رہنما سید شاہ عالم زیدی، جعفریہ الائنس کے رہنما شبر رضا، مولانا مرزا یوسف حسین، علامہ نثار قلندری، مولانا رضا حیدر، علامہ باقر حسین زیدی، شمس الحسن شمسی، مولانا جعفر علوی، مولانا امین  انصاری، مفتی داؤد، یعقوب شہباز، علی حسین نقوی سمیت دیگر مہمان گرامی بھی موجود تھے۔ القدس کانفرنس سے خطاب کرتے ہوئے مقرین کا کہنا تھا کہ 23 رمضان المبارک کو دنیا بھر کی طرح پاکستان بھر میں عالمی یوم القدس منایا جائے گا، فلسطین کسی مکتب یا مسلک نہیں امت مسلمہ اور انسانیت کا مشترکہ مسئلہ ہے۔

مقررین کا کہنا تھا کہ حزب اللہ اور حماس کے جوابی حملوں نے خوف کی علامت سمجھے جانے والے غاصب اسرائیل کو بیک فٹ پر کھڑا کردیا ہے، وہ دن دور نہیں کہ جب اسرائیل صفحہ ہستی سے مٹ جائے گا، فلسطین اور کشمیر کے مسئلے آج عالم اسلام کی پشت میں استبداد کا خنجر ہے، جس کا حل عالم اسلام کے اتحاد اور اسرائیل کو کرارا جواب دینے میں مضمر ہے، پاکستان اور پاکستان کے قائدین بشمول قائد اعظم، علامہ اقبال، لیاقت علی خان اور اس کے بعد کے حکمران ایوب خان، ذوالفقار علی بھٹو اور دیگر نے فلسطین کے معاملے پر ہمیشہ اسرائیل کی مخالفت جاری رکھی لیکن اب بتدریج ایسے عناصر سر اٹھا رہے جو پاکستان میں اسرائیل کی حمایت کے لئے کوششیں کی جارہی ہیں، کبھی سرکاری ٹی وی چینل کا وفد اسرائیل کا دورہ کرتا ہے، کبھی کراچی کے اسکول میں اسرائیل کا جھنڈا لہرایا جاتا ہے اور ایک شخص خود کو یہودی پاکستانی کہہ کر اسرائیل پاکستان کے درمیان تجارت کا شوشہ چھوڑتا ہے جن کو مسترد کرنا اور ان سازشوں کو خاک میں ملانا پوری پاکستانی قوم کی اولین ذمہ داری ہے اور آئین سے وفاداری کا تقاضہ بھی یہی ہے۔ آخر میں صدر کراچی ڈویژن علامہ صادق جعفری نے القدس کانفرنس و افطار ڈنر میں شریک معزز مہمان کا شکریہ ادا کیا۔