The Latest
وحدت نیوز(جام پور) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع راجن پور کے شہر جام پور میں مولانا مظہر حسین کی رہائشگاہ پر علماء کرام سے ملاقات کی اور ان سے تبلیغی خدمات اور قومی مسائل کے حوالے سے گفتگو کی۔ اس موقع پر علماء کرام اور مبلغین سے خطاب کرتے ہوئے علامہ مقصود علی ڈومکی نے کہا کہ قرآن کریم کی رو سے تبلیغ دین وہی کر سکتے ہیں جو خدا سے ڈرتے ہیں اور خدا کے سوا کسی سے نہیں ڈرتے۔ جو لوگ خدا سے نہیں ڈرتے، وہ دین خدا کی تبلیغ نہیں کر سکتے اور جو خدا کے سوا دوسرے لوگوں سے ڈرتے ہیں وہ بھی تبلیغ دین کا حق ادا نہیں کر سکتے۔
خوف خدا و خشیت الٰہی کی عملی تصویر انبیاء کرام اور آئمہ اہل بیت علیہم السلام کی حیات طیبہ ہے۔ خشیت الٰہی کا ہی ثمر ہے کہ انہوں نے ہر فرعون اور یزید کے مقابل بے خوف ہوکر کلمہ حق بلند کیا۔ انہوں نے کہا کہ قصہ گوئی تبلیغ دین کا اہم عنصر ہے۔ قرآن کریم کے قصے احسن القصص ہیں اور ان قصوں کا بیان انسان اور معاشرے کی تربیت اور اصلاح کا سبب ہے۔ مبلغین اور معلمین کو چاہئے کہ وہ بچوں کو انبیاء کرام اہل بیت علیہم السلام اور شہداء و صلحاء کے قصوں سے آشنا کریں۔ انہوں نے کہا کہ تعلیم میں تشدد کا عنصر شرمناک ہے۔ طالب علم پر تشدد کرنا یا بچوں کی توہین اور تذلیل کرنا کسی طور پر بھی والدین یا اساتذہ کو زیب نہیں دیتا۔ مساجد اور اسکولوں میں طلباء پر تشدد کو جرم قرار دے کر اس کا مکمل سدباب کیا جائے۔
وحدت نیوز(مشہد مقدس) مجلس وحدت مسلمین پاکستان کے چیئرمین علامہ راجہ ناصر عباس جعفری کا دورہ مشہد مقدس، امام رضا علیہ السلام کے مرقد مطہر پر حاضری، پاکستانی زائرین کے وفود کی قائد وحدت سے ملاقات،بعد ازاں چیئرمین ایم ڈبلیو ایم کی دفتر مجلس وحدت مسلمین مشہد مقدس میں ذمہ داران سے ملاقات۔
ملاقات میں ایم ڈبلیو ایم مشہد مقدس کے مسئول حجتہ الاسلام و المسلمین آقائی عقیل حسین خان ، حجتہ الاسلام ازاد حسین، حجۃ الاسلام عارف حسین تھہیم،حجۃ الاسلام الفت حسین جویا، حجۃ الاسلام مظاہر حسین منتظری، محمد رضا زاھدی، سید شاہد شیرازی، نیر عباس، سید علی کاظمی اور دیگر موجود تھے۔ علامہ راجہ ناصر عباس جعفری نے موجودہ ملکی صورتحال سمیت تربیتی امور پر گفتگو فرمائی۔
وحدت نیوز(سبی) ایم ڈبلیوایم بلوچستان کے صوبائی رہنماوں نے سبی کے مختلف علاقوں کا دورہ کیا اور تنظیمی اراکین سے ملاقاتیں کیں۔ مجلس وحدت مسلمین بلوچستان کے بیان کے مطابق ایم ڈبلیو ایم کے صوبائی صدر علامہ سید ظفر عباس شمسی اور نائب صدر سہیل اکبر شیرازی نے بلوچستان کے ضلع سبی کا تنظیمی دورہ کیا۔
اپنے دورے کے دوران علامہ سید ظفر عباس شمسی، علامہ سہیل اکبر شیرازی اور مجلس علماء شیعہ بلوچستان کے نائب صدر علامہ زوالفقار علی سعیدی نے جیلانی ہاؤس سبی میں اہل سنت کی معتبر شخصیت سید مزمل شاہ جیلانی کے بڑے صاحبزادے کی وفات پر فاتحہ خوانی بھی کی۔
سبی کے تنظیمی دورے کے دوران ایم ڈبلیو ایم بلوچستان کے صوبائی رہنما بابو بشیر احمد کربلائی پوپلزئی، ضلعی صدر میر عبدالغفار ڈومکی، ذاکر حسین بلوچ اور دیگر پارٹی اراکین بھی انکے ہمراہ تھے۔
وحدت نیوز(سکردو) ایم ڈبلیوایم گلشن خمینی یونٹ سکردو کی جانب سے بلتستان کے سیلاب متاثرین کی مدد۔امدادی سامان مجلس وحدت مسلمین گلشن خمینی ژتھنگ یونٹ کے آرگنائزر محمدعلی حیدری نے صوبائی سیکرٹریٹ ایم ڈبلیو ایم بلتستان میں جمع کروایا۔
سامان میں گرم کپڑے،کوٹ،بنیان،جوتے ،چادر اور بچوں کے گرم ملبوسات شامل ہے امدادی سامان کی فراہمی پر صوبائی مسئولین نے یونٹ آرگنائزر کا شکریہ ادا کیا۔
وحدت نیوز(جھل مگسی)مجلس علمائے شیعہ پاکستان ضلع جھل مگسی کا اہم اجلاس مدرسہ شہید عارف حسین الحسینی گنداواہ میں منعقد ہوا۔اجلاس کی صدارت مجلس علمائے شیعہ بلوچستان کے صوبائی نائب صدر علامہ ذوالفقارعلی سعیدی نے کی ۔
اجلاس میں ضلع جھل مگسی کے علمائے کرام کے علاوہ مجلس وحدت مسلمین بلوچستان کے صوبائی نائب صدر علامہ سہیل اکبر شیرازی نے بھی شرکت کی ۔اس موقع پر اکثریت رائے سے مولانا علی نواز عرفانی کو مجلس علمائے شیعہ پاکستان ضلع جھل مگسی کا صدر منتخب کیا گیا۔
وحدت نیوز(روندو) مجلس وحدت مسلمین گلگت بلتستان کے جنرل سیکرٹری حجت الاسلام ڈاکٹر مشتاق حکیمی کی طرف سے طورمک یوچنگ کے عوام کو پینے کے صاف پانی فراہم کرنے کیلے واٹر پائپ لائن منصوبہ کا اعلان کیا تھا جس پر عمل در آمد شروع ہوگیا ہے اور علاقے کے لوگوں نے منصوبے پرکام کا آغاز کردیا ہے۔
علاقے کے لوگوں کا کہنا ہے کہ ایم ڈبلیو ایم نے پہلے بھی طورمک کے بعض گاوں میں واٹر سپلائی سکیم رکھا تھا اور ہمیشہ عوامی مسائل حل کرنے میں کوشاں ہے اور موجودہ واٹرسپلائی اسکیم بھی اسی سلسلے کی ایک کڑی ہے انہوں نے ایم ڈبلیو ایم کے صوبائی صدر آغا سید علی رضوی اور جنرل سیکرٹری ڈاکٹر مشتاق حکیمی سمیت ایم ڈبلیو ایم کا شکریہ ادا کرتے ہوئے کہا ہے کہ ایم ڈبلیو ایم نے یوچنگ والوں کا دیرینہ مطالبہ حل کردیا جس پر ہم انکے مشکور ہیں۔
اس موقع پر صوبائی جنرل سیکرٹری شیخ مشتاق حکیمی نے کہا کہ عوامی خدمت ہمارا منشور ہے اور ہم اپنے منشور پر عمل پیرا ہیں۔ گلگت بلتستان میں جہاں بھی عوام مسائل سے دوچار ہو وہاں مجلس وحدت المسلمین ان کے حل کے لیے اپنی تمام تر توانائیاں صرف کرے گی اور عوام کی دادرسی کےلئے ہمیشہ صف اول میں رہیں گے اور طورمک کے دیگر محلوں میں بھی پینے کے صاف پانی کی فراہمی کے لیے کوشش کریں گے جوکہ طورمک کا دیرنہ مطالبہ ہے۔اس دیرینہ مطالبے اور ضرورت کے پیش نظر یہ سکیم رکھی گئی ہے اور امید ہے کہ اس سکیم سے عوام کی مشکلات قدرے کم ہونگی۔
ڈاکٹر حکیمی کا کہنا ہے کہ اس پہلے بھی ہم روندو سمیت دیگر علاقوں میں صاف پانی کی فراہمی کے لئے پائپ فراہم کرتے آرہے ہیں انشاء اللہ مستقبل میں بھی عوام کی خدمت کو عبادت سمجھ کر تے رہیں گے۔یاد رہے ڈاکٹر مشتاق حکیمی نے روندو کے مختلف علاقوں میں اب تک ایک لاکھ اسی ہزار فٹ سے زائد پائپ بچھایا ہے۔
وحدت نیوز(سکردو)ہفتہ وار تربیتی نشست کا انعقاد مجلس وحدت مسلمین گلگت بلتستان کے صوبائی سیکریٹریٹ سکردو میں کیا گیا ، کلام اللہ مجید کی تلاوت اور دعائے توسل کی قرائت کے بعد حجت الاسلام شیخ احمد نوری صاحب نے حالات حاضرہ پر گفتگو کی اور عالمی اور علاقائی حالات پر تبادلہ خیال کیا۔
مشتاق حسین حکیمی نے نہج البلاغہ سے اقتباس کے عنوان سے خطبہ نمبر دس کو دشمن شناسی کے عنوان سے ترجمہ کیا۔
حجت الاسلام شیخ اشرف شگری صاحب نے درس اخلاق دیتے ہوئے عزت کے اسباب کے موضوع پر گفتگو کرتے ہوئے درج ذیل اسباب بیان کیا:
1۔ اطاعت الہی
انا العزیز فمن اراد عز الدارین فلیطع العزیز
سب سے عزت دار میں(خدا) ہوں جو دونوں میں جہاں میں عزت پانا چاہے وہ عزیز خدا کی اطاعت کرے۔
2. تقوائے الہی
من اراد ان یکون اعزز الناس فلیتق اللہ
جو شخص لوگوں سب سے زیادت معزز ہونا چاہتا ہے وہ تقوائے الہی اختیار کرے
3. غیر اللہ سے رابطہ قطع کرنا
مناجات شعبانیہ کا اغاز اسی انقطاع کے عنوان سے ہوتا ہے
الھی ھب لی کمال الانقطاع
خدا کو قادر اور عزیز مطلق سمجھ کر اسی سے وابستہ رہے اور مخلوق سے رابطہ ختم کرے
من اطاع اللہ یطاع جس نے اللہ کی اطاعت کی اس کی اطاعت کی جائے گی۔
من اتق اللہ یتقی جو اللہ سے ڈرے لوگ اس سے ڈریں گے ۔
اس کے بعد سٹڈی سرکل کے حوالے سے کاچو زاھد علیخان نے گفتگو کرتے ہوئے کہا کہ مجلس وحدت مسلمین پاکستان کی اصل رسالت اسلامی تعلیمات کا احیاء ہے اسی تناظر میں مرکز نے شہید صدر کی کتاب آزمائش کا انتخاب کیا ہے۔
سٹڈی سرکل کی وضاحت دیتے ہوئے آپ نے مصنف اور کتاب کے بارے میں کچھ وضاحت اور تعارف کیا۔
صوبائی صدر آغا علی رضوی صاحب نے گفتگو کرتے ہوئے کہا کہ ہم قائد وحدت علامہ راجہ ناصر عباس جعفری کی بصیرت کو سلام پیش کرتے ہیں جنہوں نے پاکستان پر آنے والے آزمائش میں جرات اور بہادری سے موقف پیش کیا اور مخالفتوں کی پرواہ تک نہیں کی۔
آپ نے تنظیمی امور کو منظم کرکے حل کرنے پر زور دیا تاکہ قوم آزمائشوں سے نکل کر آسائشوں میں داخل ہوسکے۔
آخر میں ضلع کھرمنگ سے تشریف لائے ہوئے تنظیمی دوستوں سے مختصر نشست ضلع کھرمنگ کے حوالے سے ہوئی۔
وحدت نیوز(احادیث) قالَ عليه السلام: اذا فَشَتْ ارْبَعَةٌ ظَهَرَتْ ارْبَعَةٌ: اذا فَشاالزِّناكَثُرَتِ الزَّلازِلُ وَ اذاامْسِكَتِ الزَّكاةُ هَلَكَتِ الْماشِيَةُ وَ اذاجارَ الْحُكّامُ فِى الْقَضاءِ امْسِكَ الْمَطَرُ مِنَ السَّماءِ وَ اذا ظَفَرَتِ الذِّمَةُ نُصِرُ الْمُشْرِكُونَ عَلَى الْمُسْلِمينَ.
ترجمہ: جس معاشرے میں چار چیزیں عام اور اعلانیہ ہوجائیں چار مصیبتیں اور بلائیں اس معاشرے کو گھیر لیتی ہیں:
زنا عام ہوجائے، زلزلہ اور ناگہانی موت فراوان ہوگی۔
زکواة اور خمس دینے سے امتناع کیاجائے، اہلی حیوانات تلف ہونگے۔
حکام اور قضات ستم اور بے انصافی کی راہ اپنائیں، خدا کی رحمت کی بارشیں برسنا بند ہونگی۔
اور ذمی کفار کو تقویت ملے تو مشرکین مسلمانوں پر غلبہ پائیں گے۔
مرکزی کردار سازی کونسل مجلس وحدت مسلمین پاکستان
وحدت نیوز(اسلام آباد) مجلس وحدت مسلمین پاکستان کےچیئرمین علامہ راجہ ناصرعباس جعفری نے موجودہ ملکی سیاسی صورت حال کے تناظر میں سماجی رابطے کی ویب سائٹ ٹوئٹر پرجاری اپنے پیغام میں کہا کہ بھکاریوں اور دلالوں نے چیف آف آرمی سٹاف کی میرٹ پر تعیناتی کو مذاق بنایا ہوا ہے،یہ امر قابل مذمت ہے امپورٹڈ حکومت اس ایشو کو لے کر فوری اور صاف شفاف الیکشن کو طول دے گی یہ ناممکن ہے ایسا سوچنے والے احمقوں کی جنت میں رہتے ہیں۔
انہوں نے کہا کہ ملکی سلامتی و استحکام کا تقاضہ ہے کہ فوری صاف شفاف انتخابات کا اعلان ہو،چند مفاد پرستوں نے اپنے مفادات کے خاطر قومی سلامتی و استحکام کو داؤ پر لگایا ہوا ہے جسے پاکستانی غیور عوام کسی صورت برداشت نہیں کریں گے۔
وحدت نیوز (راجن پور) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے پنجاب کے ضلع راجن پور میں جامع مسجد امام زمانہ علیہ السلام سیلاتانی مارکیٹ تحصیل روجھان مزاری میں علماء کرام اور مومنین سے ملاقات کی۔ اس موقع پر مولانا محمد ابراھیم خطیب جامع مسجد امام زمانہ علیہ السلام، مولانا شکیل احمد، مولانا گلشیر احمد مزاری، مولاناعبد الستار ،مولانا بریرابوذر مہدی و دیگر علماء کرام اور مومنین موجود تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ جنوبی پنجاب کی پسماندگی حکومت کی بے توجہی کو ظاہر کرتی ہے سیلاب سے ہونے والی تباہی کے باوجود حکومتی کارکردگی افسوسناک ہے اگر عوام کی فلاح و بہبود ترجیح نا ہو تو پھر حکومت کا جواز نہیں رہتا۔انہوں نے کہا کہ مجلس وحدت مسلمین پاکستان قوم کی نمائندہ جماعت کی حیثیت سے قومی معاملات میں موثر کردار ادا کر رہی ہے۔
انہوں نے کہا کہ علماء کرام اور دینی مبلغین پر تبلیغ دین کی اہم ترین ذمہ داری عائد ہوتی ہے ہمیں چاہئے کہ اپنے کردار سے لوگوں کو دین کی دعوت دیں۔اس موقع پر علامہ مقصود علی ڈومکی نے علماء کرام کو اپنی تالیف کردہ کتاب حدیث غدیر اھل سنت کی معتبر کتب احادیث کی روشنی میں و دیگر کتب کا ہدیہ پیش کیا۔
