وحدت نیوز(جھل مگسی)مجلس وحدت مسلمین بلوچستان کی عزاداری کونسل محرم الحرام کی آمد سے قبل  سےہی فعال ہے عزاداری وجلوس عزاء کے مسائل کے حل کے لیے کوشاں ہے اور مسلسل تمام علاقوں کے امام بارگاہوں کے ذمہ داران سے رابطہ میں ہے الحمدللہ عزاداری کونسل کی مسلسل کوششوں سے ضلع جھل مگسی کے ہیڈکوارٹر گنداواہ میں امام بارگاہ سجادیہ میں ہونی والی مجلس میں انتظامیہ کی جانب سے ہرسال کی طرح اس سال بھی روکاوٹیں پیدا کی جارہی تھی اجازت مل گئی مجلس اپنے مقررہ وقت پر منعقد ہوئی۔

 گنداواہ کے تمام مومنین نے امام بارگاہ سجادیہ گنداواہ میں مجلس کے احسن طریقے سے منعقد ہونے پر عزاداری کونسل بلوچستان کے تمام اکابرین مجلس وحدت مسلمین کے مرکزی سیکرٹری تنظیم علامہ مقصود علی ڈومکی، امام جمعہ کوئٹہ علامہ سید محمد ہاشم موسوی ،مجلس وحدت مسلمین بلوچستان کے صوبائی صدر علامہ سید ظفر عباس شمسی، صوبائی نائب سہیل اکبر شیرازی ،شیعہ کانفرنس کے صدر جناب جواد رفعی ،صوبائی عزاداری کونسل کے چیئرمین شمن علی حیدری اور ضلع جھل مگسی کے اکابرین سید عبدالغنی شاہ حسینی صاحب، مولانا امجد علی محسنی صاحب، مولانا سعید احمد سعیدی صاحب،مولانا ندیم احمد جوادی صاحب، سید اطہر شاہ حسینی صاحب، محمد سچل صاحب کے تہہ دل سے شکریہ ادا کرتےہوئے کہا کہ مولا کی بارگاہ میں دعاگو ہیں کہ مندرجہ بالا احباب اور بہت سے احباب جو کہ سید الشہداءؑ  کی عزاداری کے لئےکوششں کررہے ہیں انکو جزائے خیر اور طولِ عمر عطا فرمائے۔ آمین

وحدت نیوز(جیکب آباد) مجلس وحدت مسلمین پاکستان کے مرکزی رہنما اور مرکزی سربراہ عزاداری کونسل علامہ مقصود علی ڈومکی نے جیکب آباد کلب میں پریس کانفرنس سے خطاب کرتے ہوئے کہا ہے کہ نواسہ رسول حضرت امام حسین عالی مقام علیہ السلام کی عزاداری مجالس اور ذکر عظیم عبادت ہے۔ لہذا اس عبادت کے خلاف درج ہونے والے مقدمات غیر آئینی اور غیر قانونی ہیں ایف آئی آر ہمیشہ جرم پر ہوتی ہے جبکہ عزاداری اور ذکر حسین علیہ السلام جرم نہیں بلکہ عبادت ہے۔ عبادت کو جرم کا درجہ دیکر ایف آئی آر کرنے والے مجرم ہیں۔ پاکستان کا آئین اور حقوق انسانی کا عالمی منشور ہمیں مذہبی آزادی کی ضمانت دیتا ہے۔ لہذا عزاداری کے خلاف کالے قانون اور بے جا پابندیاں ملت جعفریہ کسی صورت میں ماننے کے لئے تیار نہیں ہے۔ پنجاب حکومت عزاداری میں رکاوٹیں کھڑی کرنے کی بجائے ایام عزا میں عزاداروں سے مکمل تعاون کرے۔

انہوں نے کہا کہ نئی سبیل نئی مجلس پر پابندی بلاجواز ہے پانی پلانا عظیم عبادت ہے اور اس پر اعتراض کرنے والے گھٹیا ذہنیت کا مظاہرہ کر رہے ہیں کون سا قانون ہے جو لوگوں کو پانی پلانے سے روکتا ہے پیاسے انسانوں کو پانی پلانے والے عظیم عبادت انجام دے رہے ہیں لہذا ہم سب کو ان کی حوصلہ افزائی کرنی چاہیے۔

انہوں نے کہا کہ پاکستان میں دہشت گردی کے خدشات موجود ہیں لہٰذا حکومت کو چاہئے کہ وہ عوام کے لئے ایام عزا میں فول پروف سیکورٹی کا اہتمام کرے ایک ایسے وقت میں جب حکومت اور مقتدر حلقے کے دہشت گردوں سے مذاکرات ہو رہے ہیں اور اسی ہزار80 ہزار شہداء کے مقدس خون پر سودے بازی ہو رہی ہے ایسے میں سیکورٹی خدشات بڑھ گئے ہیں حکومت کو چاہیے کہ وہ اس صورتحال میں وارثان شہداء کو اعتماد میں لے۔

انہوں نے کہا کہ ملک بھر میں لیڈیز کے اجتماعات ہو رہے ہیں جبکہ حکومت اور محکمہ پولیس کے پاس مطلوبہ تعداد میں لیڈیز پولیس موجود نہیں ہے لہذا ہم مطالبہ کرتے ہیں کہ ملک بھر میں عوام کے تحفظ کے لئے لیڈیز پولیس کی بھرتی کا عمل شروع کیا جائے۔انہوں نے کہا کہ ایام عزا میں بجلی کی لوڈ شیڈنگ انتہائی افسوس ناک ہے خصوصا رات کے اوقات میں بجلی کی لوڈشیڈنگ خطرناک ہے۔ جہاں جہاں مجالس اور عزاداری کے پروگرامز ہیں وہ لوڈشیڈنگ سے متاثر ہو رہے ہیں۔ رات کی لوڈشیڈنگ بہت بڑا سیکورٹی رسک ہے۔ ملک بھر میں ہونے والی بارشوں کے باعث عزاداری جلوسوں کے روٹس پر پانی کھڑا ہے لہذا نکاسی آب کا مسئلہ حل کرتے ہوئے جلوسوں کے روٹس کو کلئیر کیا جائے۔

وحدت نیوز(سکردو) ممبر گلگت بلتستان کونسل و صوبائی رہنما مجلس وحدت مسلمین علامہ شیخ احمد علی نوری نے کہا کہ گلگت میں علم کشائی کے لئے جانے والے مومنین پر تکفیری عناصر اور کچھ شدت پسند ٹولے کی جانب سے کی جانے والے واقعہ کی پرزور مذمت کرتے ہیں۔

تکفیری عناصر ماہِ عزا کے دوران مذموم کوششوں سے امن کی فضاء کو خراب کرنا چاہتے ہیں۔ریاستی ادارے واقعہ میں ملوث عناصر کو کیفرکردار تک پہنچائیں۔جی بی کے شیعہ سنی مل کر ان سازشی عناصر کے ناپاک عزائم کو ناکام بنائیں گے۔

وحدت نیوز(کوئٹہ)مجلس وحدت مسلمین کوئٹہ سٹی کے رہنماء ارباب لیاقت علی ہزارہ نے محرم الحرام کے حوالے سے اپنے بیان میں کہا ہے کہ کربلاء انسانیت کیلئے ایک عظیم درسگاہ ہے۔ سیدالشہداء امام حسین علیہ السلام نے اپنی عظیم قربانی سے عالم اسلام کیلئے حق و باطل کے راستوں کو رہتی دنیا تک علیحدہ کر دیا۔ انہوں نے کہا کہ امام حسینؑ نے یزید کے خلاف قیام کرکے ہر دور کے ظالم کو مسترد کرنے کا پیغام دیا ہے۔ واقعہ کربلاء کے بعد امام حسین علیہ السلام کے پیغام کو گھر گھر پہنچا کر اسیران کربلاء نے امام حسینؑ کے مقصد کو جاری رکھا۔

 ارباب لیاقت علی ہزارہ نے کہا کہ امام حسین علیہ السلام نے سرزمین کربلاء میں اپنے اور اپنے پیاروں کے خون سے اپنے نانا حضرت محمد (صلی اللہ علیہ و آل وسلم) کے دین کی حفاظت کی۔ یزید دین اسلام کا چہرہ مسخ کرکے مسلمانوں کی نسلوں کو تباہ کرنا چاہتا تھا۔ ایم ڈبلیو ایم کوئٹہ کے رہنماء نے مزید کہا کہ امام حسین علیہ السلام کو فقط ایک مسلک یا مذہب تک محدود رکھنا زیادتی ہے۔ امامؑ کی قربانی فقط دین اسلام کے پیروکاروں کیلئے نہیں بلکہ پوری انسانیت کیلئے ہے۔