وحدت نیوز(لیہ)سانحہ کوچہ رسالدار پشاور کیخلاف مجلس وحدت مسلمین، شیعہ علماء کونسل اور امامیہ اسٹوڈنٹس آرگنائزیشن کی جانب سے لیہ میں احتجاجی ریلی نکالی گئی، جس میں بڑی تعداد میں عوام نے شرکت کی۔ ریلی ٹی ڈی اے چوک سے شروع ہوکر پریس کلب کے سامنے پہنچی، جہاں مقررین نے خطابات کئے، اس موقع پر ریلی کے شرکاء نے بینرز اٹھا رکھے تھے، جن پر سانحہ پشاور کیخلاف احتجاجی نعرے درج تھے۔ ریلی کی قیادت شیعہ علماء کونسل جنوبی پنجاب کے رہنماء سید نیئر عباس کاظمی اور مجلس وحدت مسلمین ضلع لیہ کے سیکرٹری جنرل مولانا ساجد اسدی نے کی۔ اس موقع پر مقررین کا کہنا تھا کہ حکمران شہریوں کو تحفظ فراہم کرنے میں یکسر ناکام نظر آتے ہیں، اس واقعے کے اصل حقائق عوام کے سامنے لائے جائیں، قاتلوں اور ان کے سرپرستوں و سہولت کاروں کو کیفر کردار تک پہنچایا جائے، ملک بھر میں امن و امان کی بگڑتی ہوئی صورتحال انتہائی پریشان کن و نقصان دہ ہے، جس کا سدباب انتہائی ضروری ہے۔ ریلی میں پاکستان عوامی تحریک کے رہنماء سید انعام اللہ گیلانی بھی شریک ہوئے۔

وحدت نیوز(ملتان) مجلس وحدت مسلمین کے زیراہتمام سانحہ پشاور کیخلاف ملک بھر میں یوم احتجاج منایا گیا، دارلحکومت اسلام آباد سمیت چاروں صوبوں میں احتجاجی مظاہرے اور ریلیاں نکالی گئیں، جنوبی پنجاب کے مختلف شہروں بشمول ملتان، مظفرگڑھ، علی پور، لیہ، بھکر، رحیم یار خان، بہاولپور، شجاعباد، جلالپور میں احتجاجی مظاہرے اور ریلیاں نکالی گئیں، ملتان میں مجلس وحدت مسلمین اور امامیہ اسٹوڈنٹس آرگنائزیشن کے زیراہتمام دربار حضرت شاہ شمس تبریز سے چوک گھنٹہ گھر تک احتجاجی ریلی نکالی گئی، ریلی کی قیادت صوبائی سیکرٹری جنرل علامہ اقتدار حسین نقوی، علامہ غلام مصطفی انصاری، علامہ نادر علوی، علامہ وسیم معصومی، علامہ سلطان نقوی، علامہ ناصر سبطین ہاشمی، آئی ایس او کے ڈویژنل جنرل سیکرٹری ابوذر ہادی نے کی۔ ریلی میں خواتین مرد اور بچوں کی بڑی تعداد نے شرکت کی، ریلی علی چوک، دولت گیٹ، حسین آگاہی بازار اور لوہاری گیٹ سے ہوتی ہوئی چوک گھنٹہ گھر پر پہنچی تو ریلی جلسے کی شکل اختیار کر گئی، ریلی سے علامہ اقتدار نقوی، علامہ قاضی نادر علوی، علامہ سلطان نقوی، علامہ وسیم معصومی، علامہ ناصر سبطین ہاشمی، ملی یکجہتی کونسل جنوبی پنجاب کے صدر میاں آصف محمود اخوانی، سلیم عباس صدیقی، حسنین انصاری اور دیگر نے خطاب کیا۔

 ریلی سے خطاب کرتے ہوئے علامہ اقتدار حسین نقوی نے کہا کہ سانحہ پشاور، شیعہ نسل کشی کا تسلسل ہے، جو گذشتہ چالیس برسوں کے دوران ریاستی اداروں کی انوالومنٹ اور چند عرب ممالک کی مدد سے ہوتی رہی ہے۔ انہوں نے کہا کہ ہمیں بتایا گیا تھا کہ دہشت گردی کے حوالہ سے ریاست کی پالیسیاں تبدیل ہوچکی ہیں، لیکن عملا ایسا نہیں ہے۔ تمام خودکش حملہ آور پیدا کرنے والے افراد، گروپس اور جماعتیں اب بھی فعال ہیں اور سیاسی میدان میں موجود ہیں۔ المیہ یہ ہے کہ حکومت اور اسٹیبلشمنٹ سے وابستہ افراد اب بھی یہی کہتے نظر آتے ہیں کہ ہم ان دہشت گرد قاتلوں کو مین سٹریم لائن میں لاکر پولیس، ایف سی اور دیگر حکومتی اداروں میں بھرتی کرنا چاہتے ہیں، تاکہ ان کو روزگار ملے اور یہ لوگ دہشت گردی ترک کر دیں۔ لیکن حقیقت یہی ہے کہ جو لوگ پاکستان و اسلام دشمن قوتوں کے ہاتھوں کھلونا بن کر اپنے مسلمان بھائیوں کے خون سے ہولی کھیلنے کے عمل کو عادت بنا لیں، وہ کبھی بھی پیار کی زبان نہیں سمجھ سکتے۔

علامہ نادر علوی نے کہا کہ ٹی ٹی پی، داعش، سپاہ صحابہ، لشکر جھنگوی یہ سب ایک ہی ماں کی جنی ہوئی تنظیمیں ہیں، جو نہ ملک کی وفادار ہے اور نہ اسلام کی، لیکن ہماری ریاست ہر بار اس ماں پر ہاتھ ڈالنے کی بجائے اس خودکش حملہ آور کا ماتم کرتی ہے، جو واصلِ جہنم ہو جاتا ہے۔ میں سمجھتا ہوں کہ ہماری ریاست کو ان لوگوں کو کنٹرول کرنے کی ضرورت ہے، جو مذہب کے شیلٹر میں تکفیری نعرے لگاتے ہیں اور دوسرے مسالک کے افراد کے خلاف آج بھی فتوی دیتے ہیں کہ وہ خارج از اسلام اور واجب القتل ہیں۔ ایسے لوگ خواہ مدرسہ میں ہوں یا مذہب کے نام پر بننے والی جماعتوں کا حصہ ہوں، وہ اس طرح کے تمام واقعات کے ذمہ دار ہیں۔

 علامہ غلام مصطفی انصاری نے کہا کہ اگر حکومت، اسٹیبلشمنٹ، بیوروکریسی، سیاستدان، مفتی اور ملا میں سے کوئی بھی اس ظلم و بربریت پر خاموش ہے تو وہ اس جرم میں برابر کا شریک اور قاتلوں کا ساتھی ہے۔ ان قاتلوں کو سیاسی، مذہبی اور اخلاقی طور پر سپورٹ کرنے والا اسلام اور وطن کا دشمن و غدار ہے۔ پوری قوم صدر، وزیراعظم اور آرمی چیف سے سوال پوچھتی ہے کہ آپ لوگ کب تک ہمارے بہتے ہوئے خون کو دیکھ کر صرف مذمتی بیانات پر اکتفا اور اگلے سانحہ کا انتظار کریں گے۔؟ اس موقع پر مولانا جعفر قریشی، مولانا ہادی حسین، مولانا امیر حسین ساقی، مولانا جعفر انصاری، سلیم عباس صدیقی، اقبال مہدی زیدی، انجینیئر سخاوت علی، مخدوم عون شمسی، مخدوم عباس رضا شمسی، مخدوم حسن مشہدی، مخدوم ظفر شمسی، خاور شفقت بھٹہ، عمران بخاری، حسنین بخاری، اخلاق حیدر صدیقی، ملک شجرعباس، آصف نواز، شاہ زیب، مبشر نقوی، ناصر کربلائی، قمر نقوی، ظفر زیدی، اظہر حسین، مداح حسین، وسیم زیدی، مرزا وجاہت، زوار لنگاہ اور دیگر شریک تھے۔

وحدت نیوز(مظفرگڑھ)مجلس وحدت مسلمین ضلع مظفرگڑھ کے زیراہتمام قائد وحدت علامہ راجہ ناصر عباس جعفری کے حکم پر ملک بھر کی طرح مظفرگڑھ میں یوم احتجاج منایا گیا، امام بارگاہ قصر زین العابدین ٹبہ کریم آباد سے مظفرگڑھ بائی پاس تک احتجاجی ماتمی ریلی نکالی گئی، ریلی کی قیادت امام بارگاہ زین العابدین کے متولی وسیم عباس شاہ نے کی، ریلی میں ضلعی سیکرٹری جنرل مجلس وحدت مسلمین مظفرگڑھ سید شفقت علی کاظمی، صدر علما مشائخ امن کمیٹی سیدغلام علی بخاری، سید عمران حیدر (ایڈووکیٹ) سید عامر عباس کاظمی، سید صفدر حسین نقوی سید حسن کاظمی نے شرکت کی۔ ریلی سے خطاب کرتے ہوئے رہنمائوں نے کہا کہ سانحہ پشاور پر ہر آنکھ اشکبار ہے، مسلسل شہادتوں میں اضافہ ہورہا ہے، زخمیوں کی ایک بڑی تعداد ابھی بھی زیرعلاج ہے، حکمرانوں کو چاہیے کہ وہ اپنے اقتدار کی بجائے ملک اور قوم کے بارے میں سوچیں، آج دشمن دوبارہ ہمارے گھروں میں آگھسا ہے۔

وحدت نیوز(لاہور) 7 مارچ برسی سفیر انقلاب ڈاکٹر محمد علی نقوی شہید کے موقع پر دختر شہید ، مرکزی رہنما مجلس وحدت مسلمین شعبہ خواتین و رکن پنجاب اسمبلی محترمہ سیدہ زہرا نقوی نے اپنے پیغام میں کہا کہ شہداء کے ذکر کو زندہ رکھنا ان کے عظیم مقصد کو زندہ رکھنا ہے شہید ڈاکٹر محمد علی نقوی ہر وقت مصروف عمل اور متحرک رہنے والی شخصیت کے مالک تھے دین و ملت کا درد آپ کو چین نہیں لینے دیتا تھا یہی وجہ ہے کہ آپ نے قوم کے جوانوں کو بیدار کیا ان میں تحرک کی روح پھونکی انہیں درد دین سے آشنا کیا۔

 انہوں نے کہا میرے بابا شہید نقوی نہ صرف میرے بلکہ ملت کے ہر نظریاتی فرد کے آئیڈیل ہیں ان کا اوڑھنا بچھونا، سونا جاگنا، چلنا پھرنا سب کچھ اسلام ناب محمدی کی تبلیغ، ترویج اور عملی نفاذ کیلئے تھا۔ وہ بت شکن زمان حضرت امام خمینی کے سچے اور عملی فدائی تھےانہوں نے کہا خدمت خلق سے سرشار معمولات، تعلیمی ترقی و پیشرفت کیلئے اسکول سسٹم کا نیٹ ورک، تنظیمی و تربیتی نشستوں کا احیاء، نوجوانوں کی مختلف میدانوں میں مکمل مدد و تعاون، ذاتی و نجی معاملات میں لوگوں کی درست رہنمائی، دختران ملت کی فعالیت و قومی اجتماعی امور میں ان کی شرکت، ملت کے دفاع و بقا کیلئے خدمات، الغرض ہر حوالے سے ان کی خدمات قابل تقلید نمونہ کی حیثیت رکھتی ہیں۔ ان کا مذید کہنا تھا ڈاکٹر محمد علی نقوی شہید زندگی میں ایک ایسے محور کی حیثیت رکھتے تھے، جس کے گرد ملک بھر کے تنظیمی، انقلابی، بیدار نوجوان کھنچے چلے آتے تھے آج بھی جوان ان کے افکار و کردار کو زندہ رکھے ہوئے ہیں۔