وحدت نیوز(ماتلی) مجلس وحدت مسلمین پاکستان کے مرکزی ترجمان مقصود علی ڈومکی نے ایم ڈبلیو ایم صوبہ سندہ کے ڈپٹی سیکریٹری جنرل بہادر ساتھی برادر یعقوب حسینی کے مزار پر حاضری دی اور فاتحہ پڑھی۔ اس موقع پر مجلس وحدت مسلمین ضلع ٹنڈو محمد خان کے سیکریٹری جنرل محب علی بھٹو اور ضلع ماتلی کے سیکریٹری جنرل میر طارق رند ان کے ہمراہ تھے۔

مرحوم یعقوب حسینی کے اھل خانہ اور بھائی فرحان حیدر سے تعزیت کرتے ہوئے مقصود علی ڈومکی نے کہا کہ یعقوب حسینی مجلس وحدت مسلمین کے بہادر کارکن تھے جو جہد مسلسل پر یقین رکھتے تھے وہ بے خوف ہوکر تکفیری دھشت گردوں کے مقابل ملت کے عزت و وقار کے لئے آئے اور وڈیروں کے مقابل مجلس وحدت کی سیاسی قوت کو ثابت کیا۔ ان کی وفات سے مجلس وحدت مسلمین کی قیادت اور کارکنوں کو صدمہ ہوا۔ اللہ تعالی انہیں اپنے انبیاء کی شفاعت نصیب کرے اور اھل بیت رسول اللہ کے ساتھ محشور فرمائے۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے امامت کے ساتویں آفتاب حضرت امام موسیٰ کاظم علیہ السلام کی شہادت کے موقع پر اپنے پیغام میں کہا ہے کہ امام برحق صبر و رضا کی اعلٰی ترین معراج پر تھے۔ان کی زندگی کے تمام پہلو اپنے جد امجد رسول خدا ﷺ کے اسوہ حسنہ کا عملی اظہار ثابت ہوئے۔ اس دور کی استکباری طاقتیں ظلم و جبر کے تمام حربوں کو آزمانے کے باوجود بھی امام برحق کو اپنے اجداد کی اعلی تعلیمات اور عالی اقدار کی حفاظت سے دستبردار نہ کرے سکیں۔موسی کاظم علیہ السلام کا طویل ترین قید اور حکومت کے ظالمانہ ہتھکنڈوں سے خائف نہ ہونا ہمارے لیے باعظمت زندگی بسر کرنے کا بہترین درس ہے۔ دین کی حفاظت کے لیے جرات و استقامت کو طرزِ زندگی بناکر امت مسلمہ اپنا کھویا ہوا وقار بحال کر سکتی ہے۔

انہوں نے کہا شہادت کی آرزو حقیقی مومن کی پہچان ہے۔جن شخصیات نے اس حقیقت کا درک کر لیا وہ دنیا و اخرت میں سرخرو ہیں۔تاریخ شاید ہے کہ موت کے خوف اور دنیاوی لالچ نے لوگوں کو اللہ تعالیٰ کے منتخب کردہ اماموں سے دور کر دیا اور امام کو تنہائی کی اذیت سہنا پڑی۔انہوں نے کہا دور عصر میں ہمیں سختی کے ساتھ آئمہ اطہار علیہم السلام کے طرزِ زندگی کو اپنانے کی ضرورت ہے بصورت دیگر ذلت و رسوائی کے چنگل سے آزادی ممکن نہ ہو گی۔انہوں نے امام موسی کاظم علیہ السلام کے یوم شہادت کے موقع پر امام زمانہ علیہ السلام کے حضور اور مومنین کی خدمت میں تعزیت پیش کی ہے۔

وحدت نیوز(کوئٹہ) وفاقی وزیر برائے مذہبی امور و بین المذاہب ہم آہنگی پیر نورالحق قادری کی جانب سے کوئٹہ کے سرینا ہوٹل میں "بین المذاہب ہم آہنگی کانفرنس 2022کا انعقاد ہوا۔ جس کا عنوان "احترام انسانیت اور بین المذاہب ہم آہنگی" تھا۔

 تقریب میں شہر کے تمام مذاہب کے نمائندوں کو شرکت کی دعوت دی گئی۔ وفاقی وزیر برائے مذہبی امور و بین المذاہب ہم آہنگی پیر نورالحق قادری، امام جمعہ کوئٹہ علامہ سید ہاشم موسوی، علامہ محمد موسیٰ حسینی، جماعت الصالحین پاکستان کے امیر صاحبزادہ پیر خالد سلطان القادری اور مختلف مکاتب فکر و مذاہب سے تعلق رکھنے والے افراد نے تقریب میں شرکت کی۔

 کانفرنس سے دین اسلام کے مختلف مسالک سے تعلق رکھنے والے علماء کرام، سکھ برادری، عیسائی اور دیگر مذاہب کے رہنماؤں نے بھی شرکاء سے خطاب کیا اور مذہبی رواداری کی اہمیت پر روشنی ڈالی۔ مقررین نے خطاب کرتے ہوئے تمام مذاہب کے درمیان امن و محبت اور بھائی چارگی کے فروغ پر زور دیا۔

وحدت نیوز(اسلام آباد)مجلس وحدت مسلمین پاکستان کے اعلی سطح وفد نے اسلامی نظریاتی کونسل کے چیئرمین قبلہ ایاز سے ان کے دفتر میں ملاقات کی اور انہیں یکساں نصاب تعلیم کے متنازع نکات سے پیدا ہونے والی بے چینی سے آگاہ کیا۔

نصاب کمیٹی کے کنوینر مقصود علی ڈومکی نے کہا پاکستان ہم سب کا مشترکہ وطن ہے۔اتحاد و وحدت اور اسلامی اخوت کی فضا کے لیے مذہبی ہم آہنگی اور بنیادی عقائد کا باہمی احترام انتہائی ضروری ہے۔مسلکی متنازع نصاب تعلیم سے قومی وحدت کو شدید نقصان پہنچنے کا خدشہ ہے۔وطن عزیز میں بسنے والے سات کروڑ شیعہ مسلمانوں کا یہ آئینی حق ہے کہ وہ اپنے مکتبہ فکر کے مطابق تعلیم حاصل کریں۔وزارت تعلیم نے نصاب مرتب کرتے وقت اس حقیقت کو نظرانداز کیا ہےاور یک طرفہ نصاب ترتیب دیا ہے جو کئی حوالوں سے نقائص پر مبنی ہے۔قومی اسمبلی کی ایک قرارداد کے ذریعے صدیوں سے رائج درود شریف بدلنے کی کوشش کی گئی ہے۔

علامہ مقصود ڈومکی نے کہا کہ حکومت اور ریاستی اداروں کی طرف سےنان ایشوز کو ہوا دے کر قومی وحدت کو پارہ پارہ کرنے کے ایسے اقدامات انتہائی افسوس ناک ہیں۔وطن عزیز میں گزشتہ کئی دہائیوں سے دہشت گردی اور مذہبی منافرت کی آگ بھڑکی ہوئی ہے۔شدت پسندانہ اقدامات کے ذریعے اس پر پٹرول چھڑکنا کسی بھی طور دانشمندی نہیں۔ہم سب کو اس سازش کا درک کرنا ہو گا کہ متنازع امور کو چھیڑ کر ایک بار پھر وحدت اسلامی پر وار کرنے کی کوشش کی گئی ہے۔

مرکزی سیکرٹری سیاسیات سید اسدعباس نقوی نے کہا کہ نصاب تعلیم مرتب کرتے ہوئے اہل تشیع کے عقائد اور دینی تعلیمات کو مدنظر رکھنا انتہائی ضروری ہے۔ اہل سنت و اہل تشیع وحدت و اخوت کے رشتوں میں بندھے ہوئے ہیں۔ ہم ایسا نصاب تعلیم چاہتے ہیں جو پاکستان کے تمام مکاتب فکر کے لئے یکساں طور پر قابل قبول ہو۔ ہمارے درمیان پچاسی فیصد مشترکات ہیں لہذا نصاب تعلیم میں مشترکات کو اہمیت دی جائے۔ اہلیبیت اطہار ع پوری امت مسلمہ کی عقیدت اور مودت کا مرکز ہیں۔ نصاب تعلیم مرتب کرتے ہوئے کوئی ایک باب بھی اہلیبیت ع کے نام سے منسوب نہیں کیا گیا جو کہ افسوسناک ہے۔

اس موقع پر نصاب کمیٹی کے رکن سید ابن حسن شاہ نے مرتبہ نصاب کے متنازعہ نکات تفصیلی بریفنگ دی۔ اسلامی نظریاتی کونسل کے چیئرمین ڈاکٹر قبلہ ایاز نے مجلس وحدت مسلمین پاکستان کے وفد کا خیرمقدم کرتے ہوئے کہا کہ اگرچہ مجھے نصاب تعلیم کے حوالے سے آپ کے خدشات سے آگاہ کیا گیا تھا لیکن جس مدلل انداز میں آپ نے متنازع نکات اور اپنے خدشات کا اظہار کیا گیا ہے وہ انتہائی قابل غور ہے۔ پاکستان میں بسنے والے مختلف اسلامی مکاتب فکر کے درمیان وحدت اور اتحاد کا فروغ اور دین اسلام کی تعلیمات کی روشنی میں امور مملکت کو دیکھنا اسلامی نظریاتی کونسل کا بنیادی ہدف ہے۔ گو کہ نصاب تعلیم وزارت تعلیم کا مسئلہ ہے لیکن ان کے دینی اور مذہبی نقطہ نگاہ کے حوالے سے اسلامی نظریاتی کونسل بھی اپنا آئینی کردار ادا کرے گی۔

انہوں نے وفد کو یقین دلایا کہ اسلامی نظریاتی کونسل کے ڈائریکٹر ریسرچ آپ کے خدشات اور نصاب تعلیم کے امور کا جائزہ لیں گے۔وفد میں نصاب کمیٹی کے رکن سید ابن حسن شاہ اور مسئول دفتر امور خارجہ مولانا ضیغم عباس بھی شامل تھے۔ جبکہ اجلاس میں چیئرمین اسلامی نظریاتی کونسل جناب ڈاکٹر قبلہ ایاز صاحب کے ہمرا ہ سیکرٹری اسلامی نظریاتی کونسل جناب ڈاکٹر اکرام اللہ ،ڈی جی ریسرچ اسلامی نظریاتی کونسل جناب ڈاکٹر انعام اللہ اور اسلامی نظریاتی کونسل کے ریسرچ ونگ کے دیگر اراکین بھی شریک تھے۔