The Latest
وحدت نیوز(کراچی) مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی نے کراچی کے مقامی ہسپتال میں سانحہ مستونگ کے زخمیوں کی عیادت کی۔ اس موقع پر ان کے ہمراہ علامہ عباس وزیری، وحدت یوتھ کے صوبائی سیکرٹری مہدی عباس، ایم ڈبلیو ایم کراچی کے رہنما اصغر عباس زیدی، احسن عباس رضوی، آصف صفوی سمیت دیگر رہنما بھی موجود تھے۔ علامہ امین شہیدی نے زخمیوں سے گفتگو کرتے ہوئے کہا کہ آپ کی قربانیوں نے حکومت وقت کو طالبان سے مذاکرات کے بجائے آپریشن کرنے پر مجبور کر دیا ہے، یہ آپ لوگوں کی ہی استقامت کا نتیجہ ہے کہ قوم آج طالبان کی دہشت گردی کے خلاف ایک سمت میں سوچ رہی ہے۔
ایم ڈبلیو ایم کے مرکزی ڈپٹی سیکرٹری جنرل کا کہنا تھا کہ طالبان دہشت گردوں کے خلاف جنگ میں حکومت کی حمایت کا اعلان کریں گے، کیونکہ ملک بچانے کے لئے طالبان کے خلاف آپریشن ناگزیر ہوچکا ہے۔ علامہ امین شہیدی کا کہنا تھا کہ جو سیاسی و مذہبی جماعتیں اب بھی 55 ہزار پاکستانیوں کی شہادتوں کے باوجود طالبان کے ساتھ مذاکرات کی حامی ہیں وہ وطن دوست نہیں ہیں، کیونکہ پاکستان کی عوام کی اکثریت طالبان دہشت گردوں کے خلاف آپریشن کا مطالبہ کر رہی ہے، امید ہے کہ نواز حکومت 55 ہزار پاکستانیوں کے قاتلوں کے خلاف بھرپور آپریشن کرکے شہداء کے لواحقین کا ساتھ دیں گے۔
وحدت نیوز(کراچی) مجلس وحدت مسلمین پاکستان کراچی ڈویژن کے رہنما علامہ علی انور جعفری نے کہا ہے کہ کراچی میں شیعہ نسل کشی کے بعد اب پولیس اور امن و امان کی بحالی کے اداروں کی جانب سے آپریشن کے نام پر شیعہ نوجوانوں کو حراست میں لئے جانے کو کسی صورت برداشت نہیں کیا جائے گا۔ کالعدم دہشتگرد تنظیموں کے خلاف کارروائی کی بجائے، بے گناہ شیعہ نوجوانوں کی گرفتاریوں، چادر اور چار دیواری کے تقدس کی پامالی کے خلاف شیعہ برادری سراپا احتجاج بن جائے گی، ہنگو میں ہونے والے بم دھماکے کی شدید مذمت کرتے ہیں اور حکومت سے مطالبہ کرتے ہیں کہ اس سانحہ میں شہید ہونے والے بچوں کے اہل خانہ کو فوری معاوضہ دیا جائے اور دہشتگردوں کو فوری طور پر گرفتار کیا جائے۔ ان خیالات کا اظہار انہوں نے شہر کے مختلف علاقوں سے پولیس اور سی آئی ڈی کے ہاتھوں گرفتار ہونے والے اسیر شیعہ نوجوانوں کے اہل خانہ سے ملاقات میں کیا۔ اس موقع پر علامہ مبشر حسن، علی حسین نقوی، سلمان حسینی، ناصر حسینی، احسن رضوی اور دیگر بھی موجود تھے۔
علامہ علی انور جعفری نے کہا کہ کراچی میں گذشتہ کئی روز سے شیعہ علماء کرام اور نوجوانوں کو شہید کرنے کا سلسلہ جاری ہے اور پولیس، سی آئی ڈی اور دیگر امن و امان کی بحالی کے اداروں کی جانب سے کسی بھی واقعہ کے ملزم کو تاحال گرفتار نہیں کیا گیا ہے، تاہم اب پولیس اور بالخصوص سی آئی ڈی پولیس نے اپنے افسران بالا اور حکمرانوں کو خوش کرنے کے لئے بے گناہ شیعہ نوجوانوں کو ہی گرفتار کرنے کا سلسلہ شروع کر دیا ہے اور انہیں کالعدم تنظیموں کے کارکنان کا نام دے کر ان کے خلاف جھوٹے مقدمات بنائے جا رہے ہیں۔ انہوں نے کہا کہ گذشتہ کئی روز سے شہر میں شیعہ آبادیوں پر پولیس اور سی آئی ڈی کے اہلکاروں کی جانب سے چڑھائی کا سلسلہ جاری ہے اور اس دوران چادر اور چار دیواری کے تقدس کو بھی پامال کیا جارہا ہے اور گھروں میں گھس کر لوٹ مار کی جا رہی ہے۔ خواتین کے خلاف بدتمیزی کی جا رہی ہے اور نوجوانوں کو گرفتار کیا جا رہا ہے۔ انہوں نے کہا کہ ایک جانب کراچی سمیت ملک بھر میں شیعہ نسل کشی کی جاری ہے تو دوسری جانب شیعہ نوجوانوں پر جھوٹے مقدمات بنا کر یہ اہلکار اپنے آقاؤں کو خوش کرنے میں مصروف ہیں۔
انہوں نے کہا کہ اس تمام صورت حال پر شیعہ قوم میں شدید غم و غصہ پایا جارہا ہے اور اگر یہ سلسلہ فوری طور پر بند نہ کیا گیا اور گرفتار بے گناہ شیعہ نوجوانوں کو فوری طور پر رہا کرکے ان کے خلاف قائم جھوٹے مقدمات ختم نہ کئے گئے تو پھر کراچی سے خیبر تک احتجاجی تحریک کا آغاز کیا جائے گا اور حکومت اور ان کی امن و امان کے قیام کی دعویدار ایجنسیوں کے حقائق پوری دنیا کے سامنے بے نقاب کئے جائیں گے۔ اس موقع پر انہوں نے ہنگو میں ہونے والے دھماکے اور اس کے نتیجہ میں 6 معصوم بچوں کی ہلاکت پر اپنے گہرے رنج و غم کا اظہار کیا۔ انہوں نے کہا کہ حکومتی دعوؤں کے باوجود امریکہ اور ان کے اتحادی یہود و اسرائیل کے ایجنٹوں نے اس ملک میں دہشتگردی کا جو بازار گرم کر رکھا ہے، اس کی ذمہ دار وفاقی اور صوبائی حکومتیں ہیں۔ انہوں نے کہا کہ حکومت کی ذمہ داری ہے کہ وہ عوام کو تحفظ فراہم کرے لیکن افسوس کے حکومت اس میں مکمل طور پر ناکام ہوچکی ہے۔ انہوں نے سانحہ مستونگ کے بعد ہنگو میں بم دھماکے میں شہید ہونے والوں کے اہل خانہ سے افسوس کا اظہار کیا ہے اور حکومت سے اس سانحہ میں ملوث عناصر کو فوری طور پر گرفتار کرنے کا مطالبہ کیا ہے۔
وحدت نیوز(گوجرانوالہ) مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی نے انجمن طلبائے اسلام پاکستان کے زیرِاہتمام فروغِ امن کنونشن میں’’امن کانفرنس‘‘ کے انعقاد پر اے ٹی آئی کی لیڈر شپ اور گوجرانوالہ کے مسئولین کو مبارکباد پیش کرتے ہوئے کہا آپ سب عاشقانِ رسول کو دو موضوعات کی مبارکباد پیش کرتا ہوں۔ ایک عید میلاد النبی (ص) کے مقدس مہینے کی مبارکباد اور دوسری پرچم ولایت نبی اکرم (ص) کی مبارکباد۔ شرکاء کنونشن سے خطاب کرتے ہوئے سید ناصر عباس شیرازی کا کہنا تھا کہ انجمن طلباء اسلام پاکستان کی پاک مٹی سے پیار کرنیوالی اور اولیاءاللہ سے پیار کرنیوالی تنظیموں میں سرفہرست ہے۔ انہوں نے کہا کہ پاکستان میں دہشت گردی کے خاتمے کیلئے جہاں امامیہ اسٹوڈنٹس آرگنائزیشن پاکستان نے کام کیا، وہاں انجمن طلبائے اسلام پاکستان نے بھی اپنا بھرپور کردار ادا کیا۔
انہوں نے کہا کہ رسول اکرم (ص) نے پوری دنیا میں امن کا پیغام دیا، رسول اکرم (ص) کے معجزوں میں سے اس سے بڑا معجزہ کیا ہوسکتا ہے کہ آج پورا ریاستی نظام اور تمام دہشتگرد گروہ جشن مصطفٰی (ص) کے جلوسوں کو محدود کرنے کی کوشش کر رہے ہیں تو پوری قوم لبیک یارسول اللہ (ص) کے پرچم اٹھائے سڑکوں پر موجود ہے۔ انہوں نے کہا کہ یہ وہ واحد پرچم ہے جس کے نیچے تمام مسلمان شیعہ اور سنی مل کر جمع ہیں۔ ملکی صورتحال پر گفتگو کرتے ہوئے ان کا کہنا تھا کہ بدقسمتی سے ملک اس وقت ان ہاتھوں میں ہے جو شروع سے ہی پاکستان بنانے کے مخالف تھے، لیکن میں آج تمام دہشتگرد اور ملک دشمنوں کو بتانا چاہتا ہوں کہ وہ اہلبیت (ع) اور رسول اللہ (ص) کے غلاموں کا مقابلہ نہیں کرسکتے، ہم اعتزاز حسن کی طرح اپنے سینوں پر گولیاں کھا کر بتا دیں گے کہ ظلم اور باطل کو کیسے روکا جاتا ہے۔
وحدت نیوز(اسلام آباد) مجلس وحدت مسلمین پاکستان کے سربراہ علامہ ناصر عباس جعفری نے ہنگو میں وطن دشمن دہشت گردوں کی جانب سے بم دھماکے میں بیگناہ معصوم بچوں کی شہادت پر گہرے دکھ کا اظہار کرتے ہوئے کہا ہے کہ پاکستان کو اس وقت بیرونی سے زیادہ اندرونی دشمنوں سے خطرات لاحق ہیں، حکمران دہشت گرودں کیخلاف موثر عملی اقدمات اُٹھائیں، مذاکرات کے نام پر دہشت گردوں کو منظم ہونے کا وقت دیئے بغیر معاشرے سے اس ناسور کو جڑ سے اکھاڑ پھینکا جائے، پاکستان کی سلامتی اور بقا کیلئے دہشت گردوں کیخلاف راست اقدام اُٹھانا ناگزیر ہوچکا ہے۔ علامہ ناصر عباس جعفری کا کہنا تھا کہ حکومت اور ریاستی ادارے، دہشت گردوں کی اصل نرسری وہ مدارس ہیں جہاں سے یہ وحشی درندے نکل کر وزیرستان پہنچتے ہیں، اُن مدارس کیخلاف بھی بھرپور کارروائی کریں، تاکہ پاکستان کی امن اور سلامتی اور آئندہ آنے والی نسلوں کو پرامن، مستحکم ملک میں آزادی سے جینے کا حق ملے۔
اُن کا کہنا تھا کہ دہشت گرد جس بھی مسلک یا مکتب سے تعلق رکھتے ہوں وہ اسلام اور انسانیت کے دشمن ہیں، اسلام میں انتہا پسندوں اور جبر کرنیوالوں کیلئے کوئی جگہ نہیں۔ اُن کا مزید کہنا تھا کہ حکمران اس دن سے ڈریں جب مظلوموں کے ہاتھ ان کے گریبان تک جا پہنچیں گے۔ علامہ ناصر عباس جعفری نے دہشت گردوں کی جانب سے صحافی برادری کو دی جانے والی دھمکی کی شدید مذمت کرتے ہوئے کہا کہ ظالم اور اسلام دشمن قوتوں کا ہمیشہ سے یہی حربہ رہا ہے کہ وہ حق اور سچ کی آواز کو ظلم و جبر سے بند کرے، لیکن اس میں وہ نہ کل کامیاب ہوئے تھے نہ آج ہونگے، فتح ہمیشہ حق اور سچ کی ہوتی ہے، رسوائی اور ناکامی ظالموں اور شیطانی قوتوں کا مقدر ہے۔
انہوں نے کہا کہ رسول اکرم (ص) نے پوری دنیا میں امن کا پیغام دیا، رسول اکرم (ص) کے معجزوں میں سے اس سے بڑا معجزہ کیا ہوسکتا ہے کہ آج پورا ریاستی نظام اور تمام دہشتگرد گروہ جشن مصطفٰی (ص) کے جلوسوں کو محدود کرنے کی کوشش کر رہے ہیں تو پوری قوم لبیک یارسول اللہ (ص) کے پرچم اٹھائے سڑکوں پر موجود ہے۔ انہوں نے کہا کہ یہ وہ واحد پرچم ہے جس کے نیچے تمام مسلمان شیعہ اور سنی مل کر جمع ہیں۔ ملکی صورتحال پر گفتگو کرتے ہوئے ان کا کہنا تھا کہ بدقسمتی سے ملک اس وقت ان ہاتھوں میں ہے جو شروع سے ہی پاکستان بنانے کے مخالف تھے، لیکن میں آج تمام دہشتگرد اور ملک دشمنوں کو بتانا چاہتا ہوں کہ وہ اہلبیت (ع) اور رسول اللہ (ص) کے غلاموں کا مقابلہ نہیں کرسکتے، ہم اعتزاز حسن کی طرح اپنے سینوں پر گولیاں کھا کر بتا دیں گے کہ ظلم اور باطل کو کیسے روکا جاتا ہے۔
وحدت نیوز(ملتان) مجلس وحدت مسلمین پاکستان کے مرکزی ڈپٹی سیکرٹری جنرل و ترجمان علامہ حسن ظفر نقوی دو روزہ تنظیمی وتربیتی دورے پر آج ملتان پہنچیں گے۔ اپنے دو روزہ دورے کے دوران وہ جامعہ شہید مطہری ملتان کے علمائے کرام اور ممتازآباد میں عمائدین سے ملاقاتیں کریں گے۔ وحدت ہائوس ملتان سے جاری پریس ریلیز کے مطابق علامہ حسن ظفر نقوی سورج میانی ملتان میں ایک عوامی پروگرام میں شرکت اور خصوصی خطاب بھی کریں گے۔ دورے کے دوران وہ ملتان کے مقامی ہوٹل میں بین المذاہب اور بین المسالک کانفرنس، پریس کانفرنس اور مرکزی یوتھ آفس میں ملتان بھر کی تنظیمی شخصیات سے خطاب کریں گے۔ اس حوالے سے تمام انتظامات مکمل ہو چکے ہیں۔
وحدت نیوز(کوئٹہ) مجلس وحدت مسلمین صوبہ بلوچستان کے سیکریٹری جنرل علامہ مقصود علی ڈومکی نے کہا ہے کہ ظلم کے خلاف قیام کرکے ملت نے صبر و استقامت اور بیداری کی نئی تاریخ رقم کی ہے۔ اب بھی اگر دہشت گردی کا خاتمہ نہ ہوا تو ملک بھر کے عوام اسلام آباد کی طرف لانگ مارچ کریں گے۔ ظلم اور دہشت گردی کے خلاف ملک گیر عوامی تحریک کی قیادت ایم ڈبلیو ایم کرے گی۔ انہوں نے کہا کہ دہشت گردوں کے مکمل خاتمے تک آپریشن جاری رکھنا چاہیئے۔ نفرتوں کے علمبردار فرقہ پرست عناصر اور دہشت گردوں کے حامی و سرپرستوں کو بھی شامل تفتیش کیا جائے۔ کالعدم فرقہ پرست گروہ کو دہشت گرد ڈکلئیر کیا جائے اور جب تک ایک دہشت گرد باقی رہے یہ آپریشن جاری رکھنا چاہیئے۔ انہوں نے کہا کہ دہشت گردوں کے حامی بھی دہشت گرد اور قومی مجرم ہیں۔ سیاسی اور مذہبی زعماء کو دہشت گردوں کا وکیل بننے کی بجائے مظلوموں کا حامی اور وکیل بننا ہوگا۔ ہم ایک مرتبہ پھر ملک کی سیاسی، جمہوری اور دینی قوتوں اور سول سوسائٹی کو دہشت گردوں کے خلاف مشترکہ محاذ تشکیل دینے کی دعوت دیتے ہیں۔
وحدت نیوز(کوئٹہ) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے سی ایم ایچ کوئٹہ میں سانحہ مستونگ میں زخمی ہو نے والے زائرین کی عیادت کی ، اس موقع پر ان کے ہمراہ مرکزی رہنما علامہ شیخ اعجاز بہشتی ، صوبائی سیکریٹری جنرل علامہ مقصود ڈومکی اور کوئٹہ کے مقامی رہنما بھی موجود تھے،علامہ راجہ ناصر عباس نے فرداًفرداً تمام زخمیوں سے ملاقات کی ، ان کی جلد صحت یابی کے لئے دعا کی ، علامہ راجہ ناصر عباس جعفری نے ایم ڈبلیو ایم کوئٹہ کے ذمہ دارن کو ہدایت دی کے زخمیوں کی تیمار داری اور دیکھ بھال میں کسی قسم کی لاپرواہی نہ کی جائے ۔
وحدت نیوز(کوئٹہ) مجلس وحدت مسلمین کے ممبر بلوچستان اسمبلی سید محمد رضا رضوی کی کوششوں سے بلا آخر حکومت نے تفتان بارڈر میں پھنسے ہوئے 300 سے زائد زائرین کو دو C130 طیاروں کے ذریعے دالبندین ائیر بیس سے کوئٹہ ائیر پورٹ پہنچا دیا۔ یاد رہے کہ اس سے قبل بھی آغا رضا کی کوششوں سے مورخہ 24 جنوری 2014 کو 155 زائرین کو C130 طیارےکے ذریعے کوئٹہ ائیر پورٹ پہنچایا گیا تھا۔ایم پی اے سید محمد رضا رضوی بذات خود کوئٹہ ایئر پورٹ پر زائرین کرام کے استقبال کے لئے موجو دتھے ، سید محمد رضا نے زائرین کو گلے لگا کر خوش آمدید کہا۔
وحدت نیوز (کراچی) پیپلز پارٹی (شہید بھٹو) کی چیئرپرسن غنویٰ بھٹو نے مجلس وحدت مسلمین پاکستان کے سربراہ علامہ ناصر عباس جعفری کو ٹیلی فون پر رابطہ کرکے سانحہ مستونگ میں بےگناہ اٹھائیس افراد کی شہادت پر گہرے دکھ اور افسوس کا اظہار کیا ہے۔ غنویٰ بھٹو کا کہنا تھا کہ مجلس وحدت مسلمین نے پرامن دھرنے دیکر شہداء کی آواز کو بلند کیا ہے جسے ہم سراہتے ہیں۔ انہوں نے کہا کہ پاکستان کی تاریخ میں یہ اعزاز ملت تشیع کے پاس ہے کہ جس نے چار چار دن سڑکوں پر گزارے اور ایک گملا تک نہیں ٹوٹا، ایسی مثالیں معاشرے میں بہت کم ملتی ہیں۔ انہوں نے کہا کہ جس انداز میں معاملات کو اچھے طریقے سے انجام دیا گیا وہ قابل ستائش ہے۔ غنویٰ بھٹو کا کہنا تھا کہ ہم آپ کے دکھ درد میں برابر کے شریک ہیں اور اظہار تعزیت کرتے ہیں۔ علامہ ناصر عباس جعفری نے اظہار تعزیت کرنے پر غنویٰ بھٹو کا شکریہ ادا کیا۔
وحدت نیوز(کوئٹہ) بلوچستان کے صوبائی دارالحکومت کوئٹہ میں نماز جمعہ کے اجتماع سے خطاب کرتے ہوئے ایم ڈبلیوایم کے مرکزی رہنماعلامہ سید ہاشم موسوی کا کہنا تھا کہ پچھلی حکومت کی طرح موجودہ حکومت نے بھی دہشتگردوں کیخلاف کوئی کارروائی نہیں کی۔ زائرین کربلا کی بس کو مستونگ کے مقام پر درجنوں بار نشانہ بنایا گیا، لیکن حکومت نے ہمیشہ چشم پوشی اختیار کی۔ انہوں نے کہا کہ بلوچستان کے موجودہ وزیراعلٰی ڈاکٹر عبدالمالک بلوچ مکمل طور پر ناکام ہو چکے ہیں۔ ڈاکٹر عبدالمالک بلوچ کو اگر صوبے میں دہشتگردی پر قابو پانے کیلئے اختیارات حاصل نہیں تو انہیں مستعفی ہو جانا چاہیئے۔ ان کا کہنا تھا کہ وفاقی وزیر داخلہ چوہدری نثار علی خان نے شُہداء کے لواحقین سے وعدہ کیا ہے کہ وہ تمام مطالبات پر فوری عملدرآمد کراتے ہوئے دہشتگردوں کیخلاف فیصلہ کن کاروائی کرینگے۔ لیکن اگر حکومت نے اس بار بھی اپنے وعدہ پر عمل نہ کیا تو ہمارا اگلا مطالبہ اسلام آباد میں مرکزی حکومت کی معزولی ہوگی۔ امام جمعہ کوئٹہ کا مزید کہنا تھا کہ کوئٹہ سمیت پورے پاکستان میں شیعیان حیدر کرار (ع) کا بےگناہ خون بہایا جا رہا ہے۔ پاکستان میں محبانِ اہلبیت (ع) پر پے در پے حملے ہوئے لیکن انہوں نے پاکستان کی بقاء و سلامتی کی خاطر صبر کا دامن ہاتھ میں تھامے رکھا۔ انہوں نے کہا کہ مومنین کی کامیابی ہمیشہ اسی طرح میدانِ عمل میں حاضر رہنے سے ہی ممکن ہیں۔
